Retour page d'accueil       Retour page "Ville de Morlaix"  

— Du 2ème jour de janvier 1590.
Il est faict comandement à toutz sergentz royaulx et haultz justiciers estantz en ceste ville de se trouver au logeis du procureur de ville ce jour à une heure après mydy pareillement pour faire les executtions et contrainctes qui leur seront donnés en charge par ledit procureur de ville : et à leur faulte de ce faire et jusques à ce que les dites executtions soient faictes, leur est faict deffence de faire aultre explect de justice à paine de faulx : et neanltmoings leur est enjoinct de faire lesdittes executtions à peine de la prison et suspention de leurs estatz : et permys ausdicts sergentz de rompre porte et portes (sic), d'user de touttes aultres contrainctes jusques audict poyement, et sera la présente ordonnance puplyé presentement par les carefours de ceste ville pour touttes intimations et signiffications ; et comandé à toutz babittans de ceste ville de tenir la main forte à ce que dessus : faict, par ordonnance de MM. les gouverneur et senneschal de Morlaix.

— Du 3ème jour de janvier 1590.
Advisé qu'il sera derecheff escript à ceulx de Roscoff, et advertir les particuliers quy devertissent les marchantz de venyr en ceste ville.

Jean Loail ouy, dit qu'il vid Vincent Nouel et Tanguy Jobert tenyr ensemble à Kerveniou le cheval dont est cas, et sur le propos d'acord qu'estoict entreulx, le cheval demeura audict Jobert, et, ne scaict aultre chose. —Sera le sr de la Motte ouy pour faire estat.

Le procureur de ville resmonstre avoir esté mandé par le sr de Carné pour luy dire que les hostes ou ceulx de sa compaignie sont logés font refus de les entretenir, et le prie d'advertir la ville et de faire loger ses soldartz, disant qu'il n'avoict pour le present, argent pour poier, mais qu'il en esperoict avoir incontinent, recquerant que lesdictz aient à adviser et bailler responcze. — Advisé que le procureur de ville i baillera un rolle des hosteleries et cabaretyers et fera un departement pour loger les soldartz dudict sr de Carné, et suilvant ledict departement acompaigner le maistre d'hostel dudict sr de Carné pour les faire loger, et signifira ledit procureur de ville oudict nom ausdictz hostes, que au cas que mondict sr de Carné ne les poye il leur fera bon pour 8 jours, passés lesquelz lesdictz hostes se retireront vers mondict sr de Carné pour avoir poiement sy plustost ne sont poyés.

Lozon sergent sera envoyé a ....

Sur la requeste de Jacques Le Grand, est ordonné que lorsque l'on fera estat sur les aultres requestes, que l'on fera ausy sur sa requeste et cze pandant en touttes aultres cotisations sy s'en faict, l'on aura esgard.

Asignation pour le compte de Yvon le Bailliff a demain un heure apprès midy, et sera ledict Le Bailliff adverty par le procureur de ville. — Et pour le compte de Jean Dupleseix à vandredy, un heure après midy. — Et la Chambre a nommé pour procureurs specialz le sr de Kerscau et le sr de Kerochyon pour contraindre les procureurs et miseurs contables à la ville de conter.

Pour le compte de Jean Keraultem à lundy, un heure appres midy. — Lesquelz comptes seront randus et examinés par MM. de la Chambre.

Le Moguet, de Lannion, eslargy, poyant ses despans.

— Du 5 janvier 1590.
Acte decerné à Peyron Guilemot, procureur de la chapele de N.-D. de la Fontaine que neanltmoings que l'on aict mys du boys dans la muraile de la maison appartenante à ladicte chapelle pour faire la maison du guect en la mazière appartenante à 0llive de la Forest, que neanltmoings ladicte maziere n'a esté estat de my-muraille en la maison de ladicte chapelle.

Tudual de la Boeziere, de Penchoat en Léon, a juré l'Union entre les mains de M. l’archediacre, et a esté receu en la protection de Mgr le Gouverneur et de la Chambre.

Sur la requeste du sr de la Villeneuffve est advisé que sur sa cotisation luy sera rabatu la somme de 9 liv., et neanltmoings aura quitance d'avoir advanczé les somes mentionés esdictes cotisations, et pour le surplus de la despancze faicte en sa maison luy sera faict estat lors que l'on fera aux aultres qui ont fourny pareillement despancze aux soldartz.

Yvon le Rest pour les desobeissanczes et injures par luy faictes à noble home Francoys le Borigue desinier faisant sa ronde a esté condampné en un escu d'amande à la parroisse de Sct. Mathieu pour les réparations et fortiffications de ladicte paroise et tiendra prinson 24 heures à pain et eau.

Pour le faict du sr de Kerscau est advisé que les deputtés cy devant feront pris et acorderont avecques luy, pour ses artilleries et bouletz se fera suilvant ledit pris en acord ramboursé par le procureur de la paroisse de Sct. Melaine ou sur les deniers de la ville et czepandant poira ses cotisations.

Ordonné que le sr Mesely poira les 10 escus qu'il a esté cotisé par la première cotisation sauff son recours vers les cotiseurs.

Advisé que le sr de Cootserchou mectra cze jour l'original de son compte au greffier d'officze a paine de 20 escus, et prandera le sr de Kerscau come quation, et asignation a la Chambre à lundy pour le voyr.

Pour Yvon le Bailliff mectra ausy demain son compte contrerolle au greffier à pareille paine de 20 escus et asignation à mardy, 8 heures, faict en presancze desdits Dupleseix et Bailliff.

Le sr du Botonn metra ausy son compte dans lundy au greffe a pareille paine et asignation à mercredy en la Chambre, et sera signiffyé.

Francoys Noblet, present, mectera son compte au greffe dans mardy à pareille paine de 20 (escus), et asignation à vandredy en la Chambre.

Pour la recqueste de Jeanne Jagu, advisé qu'elle poira sa cotisation et pour le pris de la piere par elle demandé, est advisé que le sr de Coatserchou et Francoys Borgne visiteront combien de charettes de pieres ont esté emploiés pour la reparation de la ville pour, eulx ouys, et le marché faict par ladicte Jagu avecques.... luy faire estat come de raison.

Sur la recqueste de la veuffe de Henry du Vall suppliant avoir rabais pour les deniers comuns est dict quelle se pourvoira là où elle voira l'avoir affaire parczeque la Chambre n'a sur ce jurisdiction.

— Du 8ème janvier 1590.
Lecture faicte de la lettre de ceulx de Roscoff présantée par Allain Kermelec. Sera escript à ceulx de Roscoff comme les habitons se contantent de leur responcze.

Yvon le Bailliff crée à corporal pour la compaignie de Kernegues Jagu et a presté le serment entre les mains de M. le gouverneur.

Paseport acordé au sr de Traonanrun pour venir jurer l'Union lundy sans préjudicze des saczyes.

Pour le faict de Lautrenou est condarnpné à 20 escus et Geffroy déclairé quicte et viendront jurer l'Union, et a un tiers adjugé à la ville.

Pour obvier au differant de la difficulté qui se trouve pour l'eligement d'un nouveau debvoir aposé sur les vins, est advisé que les vandeurs de vin poiront ledict debvoir audict fermier, sauff à eulx de se faire rambourser ou acorder aultrement avecques les achepteurs, et sera la presente ordonnance banye et aposée au bas de la panquarte à cze que aultre n'en pretende cause d'ignorance.

— Du 10ème janvier 1590.
Paseport acordé au sr de Goazlin de venir jurer l'Union à lundy prochain pour ce que les decrectz de prinse de corps sur luy obtenus sursoiront pour lediet jour.

Paseport acordé à Fiaicre le Rouge, sr du Pontglas, pour venir jurer l'Union, et terme de huictaine.

Pour voyr et examiner le compte du recepveur Kerelot sont deputtés le procureur et miseur, Me Jean Calloët, le sr de Kerochiou, Yvont Perthevaulx et Mesilly et asignation à une heure appres midy de cze jour à paine de 2 escus d'amande contre les deffaillantz.

Le sr de Coatserchou dict protester de nullité de cze que le sr de Kerscao et aultres ses enemis font de son livre de compte parcequ'il a esté examiné par devant MM. les seneschal , procureur du roy, procureur, juratz et misenr de ladicte ville, et un grand nombre des principaulx habitantz de ladicte ville, calculs arestés et veriffyé. Plus Jacques Demay.

— Du 14ème janvier 1590.
L'assignation pour procéder au compte du recepveur, à un heure apprès midy de cze jour.

Ordonné que le miseur fera les fraictz de dresser la tour de Nostre-Dame pour mectre les munitions de guere comme a esté cy devant advisé.

Advisé que l'on envoira des sergentz au lieu de Kerlan pour exécuter jusques à cent escus, scavoir 50 escus pour sa taxe et aultres 50 escus pour clore les ysues de sa maison à Morlaix pour la fortification de la ville, et se feront lesdictz sergentz poier de leurs fraictz ou salaire par ladicte dame de Kerlan, et permis aux sergentz de faire randre les biens qu'ils exécuteront en ceste ville et les y vandre, et advant que lesdictz sergentz partent pour aller à Kerlan, sera sa maison en ceste ville visitée par le sr de la Villeneufe, Rosmeur, Kervern et Piere Guilon pour scavoir si l'on trouve des meubles pour paier ladicte some.

Pour conter avec les hostes sont comis, avecques le procureur de ville, le sr de Kernegues et le miseur paroisse Sct. Mathieu : pour Sct. Martin, Yvon Delean et Toulbrunault ; pour Sct. Melaine, Jean Keraultem et Jean Caloet.

Advisé que l'on comencera à batir le muraille de la ville devers la muraille de Kerveniou, celle de Christefle Quintin et de Cristine Delean, et sera prins deniers l'aferant dudict Kerveniou d'avecques Jean Caloet jusques à 40 escus, et pour le respect des aultres seront contrainctz d'avanczer et poier chascun pour son adferant , aultrement sera decerné executoire entre eulx, et pour avoir le soing et faire la diligence de faire lesdictes murailles sont comis les srs de Coatserchou et Francoys le Borgne.

— Du 17ème jour de janvier 1590.
Le sr de la Court, pédagogue, a juré l'Union entre les mains de M. l'archidiacre et a signé : J. de Lacourt.

Advisé que le sr de Kerochiou Kerchunan, le greffier Calloët acorderont avecques le sr de Kerscau pour son artilerye tant bonnes que celles qui sont crevées et feront leur rapport à la prochaine.

Advisé qu'il sera escript aux paroises de sonner leurs cloches et s'amaczer pour prandre et se sacsir de ceulx qui ravagent et enlevent les personnes, et sy se mectent en deffancze permys de leur rompre la teste : par expres Bourdider et Kerbonniou, les deux Pridous, le prebtre Le Gac et aultres ennemis qui ont faict lesdiz ravages et emprisonnementz.

Advisé que les gentilzhomes qui sont survenus en ville seront plus tost ramboursés que les habitantz et aultres qui demeurent en ville deseur les deniers de la ferme des nouveaulx debvoirs.

Pour la pouldre du sr de Kerhamon advisé que chaincun corporal prendera 50 liv. dans huictaine et poiront pour chaicune livre 21 soult tournois dans six semaines : et chaicun corporal poura contraindre les partyculiers de son escoade de prendre le nombre de pouldre qu'il advisera qu'il poura fournir et luy sera recquis.

Advisé que Francoys Guingamp randera touttes les vaselles et meubles qu'il a de la paroisse de Sct. Martin entre les mains de Jean Floch, Toulbrunault et Jacques Demay, lesquelz baileront 5 escus sur le gaige lesquelz seront employés à la fortification de la paroise : et à dimanche les paroisiens adviseront des aultres deniers pour parachever ladicte fortification, et a cze faire sera ledict Guingamp contrainct par corps par detention de sa personne dans 3 heures appres midy de cze jour.

Paseport octroyé à Moricze 0llivier sr de la Villeneuffe, Geffroy Guezennec sr de Kerret, Me Jean Guezennec et Jean Gueguen à venir jurer l'Union en toutte seureté, à lundy prochain.

Pareille expedition pour la paroisse de Sct. Melaine que pour la paroisse de Sct. Martin : et les procureurs de Sct. Melaine qui seront contrainctz par corps dans demain houict heures du matin mectre les veselles d'argant de ladicte paroise entre les mains du sr de la Villeneuffe, Kervern, et Trelever qui advanczeront sur le gaige desusdictes veselles la some de 60 escus pour la fortiffication de ladicte paroisse atandant dimanche pourvoir au prosne de la grandmese, sy mieulx lesdictz procureurs dudict Sct. Melaine n'aiment advanczer ladicte somme dans demain sur mesme gaige.

— Du 19ème janvier 1590.
Ordonné aux 12 juratz de se trouver avecques le procureur de ville ce jour à un heure apprès midy en sa maison, et ausy le contreroleur et le miseur pour luy asister pour executer ceulx qui restent de la cotisation tant les habitantz que les gentilzhommes quy demeurent, à paine de 6 escus executés contre chaicun deffaillant, neanltmoingz opposition ou appellation quelqunque.

Advisé que Yvon le Bailliff touchera au dernier quartier du bail des deniers communs pour l'an 1585, et en fera l’advancze parczeque le sr Keranguen, apresent miseur, touchera au premier quartier de l'an 1590 et sera la quittance baillée par ledict Keranguen pour le premier quartier desdictz deniers pour l'an 1589 changée et mise au nom dudict Le Bailliff, et cze faict en presencze dudict Keranguen et deffandue au fermier de ne poyer à aultre qu'audict Le Bailliff.

M. Jean Colcanap, recteur de Botsorchel, a juré l'Union entre les mains de M. l'archidiacre de Plouegastel et a esté reczeu sans prejudicze de la saczie aposé sur son temporel et beneficze, et à la charge de randre son curé a huictaine en ceste ville et a signé : J. Colcanap.

Le sr de Kergurunet deschargé de la charge de corporal en la paroise de Sct. Mathieu.

Pour la creation de lieutenant au capitaine de Sct. Melaine, remis à lundy.

Advisé que l'on prendera jusques à 100 ou six vingtz soldartz à pied qui seront nouris es maisons des particulliers, dont sera faict une liste, scavoir : en la paroise de Sct. Melaine, Jean Calloet et Kervern : à Sct. Martin, Kervezere, Yvon Demay ; à Sct. Mathieu, M. Kernegues et Francoys Sallaun ; et asignation pour y proceder et se trouver ensemble à 5 heures apprès midy de cze jour ceantz, et en atandant pour les 30 soldartz que M. de Carné a seront logés chas 30 particuliers, et les chevaulx nouris sur les magasins de la ville et cze pour 15 jours et comanczeront à dimanche.

— Du 22ème jour de janvier 1590.
Le sr de Kervern institué en charge de lieutenant du capitaine de la paroisse de Sct. Melaine et a presté le serment.

— Du 24ème jour de janvier 1590.
A esté faict lecture de la lettre du capitaine du fort pour quelques nécessités qui sont : a été advisé que le procureur et miseur feront la diligence de fournir ce qui est requis et de faire les fraiz.

Jean le Levier, sr de Kerochiou, resmonstre avoir prins le curé de Lanneanou et l'avoir constitué prinsonnier, recquerant qu'il soict interogé.

Advisé que Francoys Deleau yra en personne au get.

La prince faicte du recepveur du baron de Kerlach au Val, declairée bonne, et permis de prandre le metaier qui l'avoict resellé. — Et les boys tombés au boys du val Kerret permys aulx paroisiens de Sct. Martin de s'en saczir, et seront employés aulx fortifications des barieres aulx paroises de la ville tiers à tiers en les 3 paroises.

Sera escript à M. de Goazbriant de ne bailer suport à nos enemis dans sa maison.

Auparavant de demolir la maison des religieux de Sct. Dominicque estante en la rue des Vignes, sera faict estat.

Pour ce que l'on a entendu que Nicolas Salaun prinsonnier est espion, est dict qu'il sera retenu jusques à avoir informé.

Advisé qu'il sera bailé atestation au sr de Coatlespel qu'il a tousjours favorysé le party de l'Union et les habitantz de ceste ville, leur aiant asisté de ses moiens, et le tienent pour bon amy et non auchunement pour enemy du Sct. Party de l'Union.

Sur la recqueste du procureur de Sct. Mathieu qui a presenté une sentence contre les habitantz de la ville, advisé que le procureur de la ville bailera biletz au miseur pour les bailer audict procureur de Sct. Mathieu : ladicte sentence dabtée du 17 novembre 1584.

— Du 26 janvier 1590.
La femme de M. Guillaume le Veil sera interogée par M. le seneschal, laquelle est arestée en ville.

Advisé que le sr du Botonn et Pieres Guilouzon, abés, feront et balleront le diner de la Chandeleur à la mode acoustumée le dimanche 4e feubrier prochain, faulte de quoy faire sont dès apresent comme delors condampnés chaincun en 40 escus pour estre employes aulx fortiffications de la ville, et neantmoingz comparoistreront lesdicts habitantz au son de la cloche à la mode acoustumée en ceste salle pour deliberer des affaires de ladicte ville, et sy font ledict diner, sera l'asemblée faicte en l'isue dudict diner en la maison où il sera donné, et adjoinct au procureur de ville de leur signiffier la presente ordonnance ausdicts abés dans ce jour à ce que ne pretandent cause d'ignorance.

Comendement faict à Boulouch, femme Guillaume le Veil, se retirer de ceste ville promptement et defendre de se y trouver durant que son mary et elle seront du party contraire.

Me Guy Clerc adverty de se comporter en bon et fidelle citoien sans recuilir les enemis en sa maison, ny entrer en conferancze avecques les enemis, et son garson estant prinsonnier sera eslargy.

Jean le Diouguel present, luy est ordonné aparoistre la quittance generale qu'il dict avoir obtenu de la dame de Kerveniou à 2 heures apprès midy de cze jour, et lors Francoys Corre et Francoys Trébara aparoistreront les cedules qu'ilz trouvèrent à Kerveniou.

Advisé, que les 4 escus debus de rente par Me Jean Caloet à la paroisse de Sct. Melaine seront vandus pour le provenu estre emploié au fortification de ladicte paroisse et pour mesme effaict seront baillés à bons ou par ypothecques deux maisons situées contre le semictyere de Sct. Melaine, sur le quay, apartenantes à ladicte paroisse.

— Du 29 janvier 1590.
Demain 8 heures du matin se trouveront avecques le procureur de la ville les 12 juratz, le miseur et contrerolleur pour asister les sergentz à faire l'execution contre ceulx qui restent des derniers rolles, à peine de 6 escus contre chaicun deffaillent et sera le procureur creu.

Advisé que ceulx qui vouldront faire advancze de cent escus seront exemptz d'avoir et nourir soldartz en leurs maisons, et à mercredy viendra le procureur bailer leurs noms, et cze jusques à estre remboursés. — Advisé que, au cas que ledict procureur ne pouroict trouver par la voye que dessus deniers dans mercredy, que l'on nomera 60 des plus aisés pour advanczer la somme de 1,200 escus, et pour cze faire ont esté deputtés, de la paroisse de Sct. Mathieu : Francoys Deleau, Francoys le Lauenan, Guillaume Deleau ; de Sct.Melaine : Francoys Noblet, Richart Campion, Yvon le Baillif ; de Sct. Martin : Jean Coaille, Francoys Guingamp, Francoys Picart. — Et procederont à l'asignation que leur sera bailé par le procureur , et celluy qui defaudra à ladicte asignation sera contrainct de faire advancze de 100 escus et neanltmoingtz les aultres procederont à ladicte taxe. — Est advisé que ceulx qui feront ladicte advancze seront poyés desur les deniers de la recepte avant toutz aultres, M. le gouverneur préalablement poyé de cze qui lui est debu, et à ladicte fin de cze jour est le fermier Nicolas Nuz, delaigé à les payer, et d'abondant tout le Corps de la ville demeurera oblygé pour le remboursement.

Pour asister au compte des procureurs, de Sct. Melaine : Nicolaz Nuz, Jean Calloet, Yvon Kerret, Pieres Guillouzou. Sct. Mathieu : Jean Coroler Guillaume le Bihan, le miseur, Guillaume Clech. Sct. Martin : Keranprovost , Toulbrunault , Yvon Deléau , Jean le Minor. — Asignation aujourd'y, à 2 heures apprès midy.

Sur la recqueste du sr du Botonn est dict que les soldartz qui sont en sa maison seront mis aileurs, et l'on y aura esgard à l'advenyr.

Pour la recqueste de Nicolas Salaun, remis l'execution à M. Kergonadec pour le constituer prinsonnier.

Pour la recqueste de Yvon Guillerm, advisé qu'il brillera 20 escus au sr de Rosmeur, de laquelle somme il aura recognoissance d'avecques les procureurs de vile d'avoir advanczé lesdictz 20, desquelz ledict Guillerm sera remboursé lorsqu'ilz seront remboursés des deniers qu'ilz ont advanczés pour le faict de la guere, et partant est dict que le sr de Rosmeur le dclivrera et le laisera sortyr libre.

Et à l'isue de ladicte asamblée se sont trouvés devant M. le gouverneur et M. le seneschal les cy apprès només deputtés pour les aultres tréviens de Lanneanou, disantz qu'ilz estoinct à ladicte ysue aulx Jacopins atandant avoir expedition et responcze de la requeste par eulx presentée en ladicte Chambre et baillée cze jour au procureur desdictz habitantz pour la faire lire à ladicte asamblée disantz iceulx. — (Ici manque un feuillet, le 71ème du registre).

.... et Keruzcar curateur estant dudict sr du Vall tient encores toutz les garantz dudict sr et entreaultres les actes concernant ladicte preminancze, et demande un temps competant pour les aparoir ; en cas qu'il soict pasé oultre proteste des domaiges et interestz vers le sr de Mesily et Keranguen ou leur privé nom et aparoistre ses actes en temps et lieu.

Le sr de la Villeneuffe pour Jean Bidean et consortz s'opose ausy et entend desduire ses actes coutre celluy qui touchera. — Et neaultmoingtz lesdictz paroisiens entendent disposer et asigner lesdictz opposantz aujourd'huy à 2 heures appres midy en ladicte eglise pour voyr faire estat des choses. — Ledict sr de Kerdrein proteste de nullitté de ladicte asignation.

Le sr de Kerscau somme le sr de Coatserchon d'aparoir les actes pour justifier tant la charge que la descharge de son compte et, sur son refus de cze faire, les deputtés declairent que ilz paseront oultre à l'examen de son compte et le somment d'asister.

Paseport acordé au sr de Kernoter de venyr jurer l'Unyon en ceste ville dans lundy en houict jours.

La paroise de Sct. Melaine ramboursera le sr de Kervern des fraictz qu'il a faict et fera pour les fortifications qu'il est pryé de continuer.

Advisé que les corporaulx feront une liste de ceulx de leurs compaignies qui peuvent nourir un paisant en leur maison pour 2 ou 3 mois.

Le sr de Pratanfeunteun, licentyé de loger en la maison de Kergroazes les detenteurs qu'il avoict logés en son pavillon, et sera recompansé sy sondict pavilon vault plus de forme que ladicte maison, et pour scavoir s'il y a meubles en la maison de Kergroazes et y faire l'estat, par le greffier lequel prandra deux des voisins sur le lieu.

Advisé a pareill que les enfantz du sr de Kereleau seront recompansés pour la ferme de la maison scittuée à Trocheou empeché pour les fortifications, pour le temps que lesdictes fortifications demeureront en l'estat.

Advisé que le (sr) de la Villeneuffe aura une cleff de la porte de la venelle de Licennou près la maison Piere Guillouzou.

Les enquestes faictes contre le prebtre Poulguinan, la prinse declairée bonne et pour les acusations particullieres pas de sa ranczen remis à MM. les eclésiasticques pour faire la justicze, et sera escript aulx paroisiens les causes de l'amprisonnement dudict curé.

Pour les moulins du Deu, advisé qu'ilz seront banys entre le 2e mars à la deligence du procureur de ville.

— Du 1er jour de febrier 1590.
Escuyer Ollivier Keroudault sr de Poulbroch prisonnier a juré l'Union des catholicques soubz l'auctoritté de Mgr le duc de Mercœur gouverneur en ce pais, presant M. l'archidiacre de Ploegastel, le sr de la Mote, gentilhome ordinaire de la maison de mond. sgr, ayant charge de luy pour les affaires de la Scte Union, et particullierement dudict seigneur, presant aussy le sr de Kerdrain procureur des habitans de ceste ville et plusieurs aultres gentilzhommes et habitans dudict Morlaix : auquel sr de Poulbroch ayant faict entendre les articles du serment de ladicte Scte. Union, a offert les jurer, et a esté receu, à la charge d'aller trouver mond. sgr dans le moys et de ce faire ; le sr de la Motte a recquis cauption de 500 escus, pour le respect de laquelle cauption est la cognoiscance renvoyée à la Chambre et sans préjudice a ledict sr de Poulbroch juré l'Union sur les articles entre les mains de mond. sr archidiacre de Ploegastel, et a signé : O. Kerroudault.

— Du 7ème jour de feubrier 1590.
Pour la pouldre de Kerhamon advisé que le procureur de la ville advisera les corporauz pour faire une liste de leurs arqebouziers affin de scavoir quel nombre de pouldre ilz ont et qu'ilz peuvent avoir.

Pour demain mectera le sr de Coatserchou ses actes au greffe tant pour la charge que descharge de son compte, et cze dans demain pour venyr vandredy appres diner. — Pareile expedition pour Yvon le Baillif. — Ledict sr de Coatserchou proteste de nulité.

Pour les 173 escus empruntés par le Sr de Kerdrein, procureur, d'avecques le sr de la Motte pour parpoier le sr de Cremenr, est advisé que ledict procureur bailera cedule au sr de la Motte de ladicte somme, de laquelle il sera poyé desur les deniers les pluctz claires et des premiers de la ville quelque condiction qu'ilz soinct.

Advisé que le procureur de la ville avecques partye de ses juratz yra trouver M. de Cremeur pour scavoir le subject de la prinse de Mauricze Brulac faicte en ceste ville par les gentz dudict sr de Cremeur.

Paseport acordé au sr de Kernevez-Ollivier pour venyr jurer l'Union à vandredy prochain.

— Du 9ème jour de feubrier 1590.
Demandé passeport pour Yvon le Rumeur, recepveur du sr de Corbouson.

Pour le faict du sr de Coatserchou advisé qu'il comparoistera aujourd'huy un heure appres midy avecques ses actes pour proceder à l'examen de son compte. — Pour le compte de Yvon le Bailliff asignation à lundy, 8 heures du matin.

Advisé que les juges consultz seront advertis de venyr doresnavat à la Chambre et sera leur nom mis sur la liste des deputtés.

Le sr de la Villeneuffe Ollivier a signé l'Union et a juré entre les mains de M. l'archidiacre : Ollivier.

Pour la recqueste du sr de Kerven recquerant prolongation de temps pour aler trouver Mgr de Mercour, advisé que la recqueste sera communicquée à M. le gouverneur et à M. de la Motte.

Advisé que les cotiseurs leveront et asoiront sur six vingtz hommes 1500 escus en forme de prest, et les cotiseurs seront appres cotisés par la Chambre.

Pour l'insolance et paroles outrageuses proferées au procureur de la ville par Yvon Kerret qui s'est retiré, sont deputté le procureur de Sct. Mathieu et Vincent Kermerchou pour le faire venyr à la Chambre pour faire en honestes excuses audict procureur à paine de 6 escus pour lospital. — Ledict Kerret reantré a faict excuse audict procureur.

Advisé qu'il sera escript au predicateur Laune de venir prescher le caresme en ceste ville.

Advisé que le procureur de ville escripra à M. de Coatredrez qu'il sera (receu) avecques sa famile et qu'on luy pourvoira de logeis et de gros meubles.

Sur la recqueste de prebtres du Mur est advisé quilz seront poiés par le Bodon suilvant l'anciene coustutne et continueront le servicze.

Sur la recqueste de Augustin Pennec, renvoyé à la justicze pour son eslargissement.

Pour les 4 escus de rante deubz à Sct. Melaine advisé quilz seront vendus au denier vingt sans aulchun terme de racquit, et que les deniers seront amployés à la fortiffication de la paroisse.

— Du 12ème jour de feubrier 1590.
Yvon Le Levier a juré l'Union entre les mains de M. l'archidiacre et a promis de ne james se retirer devers l'enemy, ny leur prester serment ny aide a paine de la vie et a signé : Le Levyer.

Sur la recqueste de Paul Berthelot, il luy est permis de prandre Olliver de Lesmais.

Sur la recqueste de Me Guillaume Delacrose recquerant estre licentié de se retirer avecques sa famile et ses meubles à Sct Paull, lesdictz habitantz consantent l'enterinancze de ladicte recqueste sy Mgr le gouverneur le trouve bon, auquel ilz se remectent.

Advisé que le sr de Coatserchou representera ses actes pour justifier la charge et descharge de son compte dans mercredy houict heures, faulte de quoy faire sera procedé à l'examen et deduction de son compte sans avoir esgard ausdictz actes, et en fera bailler execution contre ledit Coatserchou.

Le sr de Morlen resmonstre que deux coffres apartenantz au sr de Keradrouany ont esté arestés en ceste ville à instancze du sr de Cremeur, et le sr de la Motte et a aparu un acte du greffier de Kerahes d'avoir signé et juré l'Union du 2e jour de décembre 1589, signé : Olimant et sellé.

Pour la recqueste de la dame de Penanrun et les enffantz de Jacques Duppleiseix... (Le feuillet 76 manque).

La recqueste du sr de Rosmeur a esté leue contenant une demision qu'il faict de la capitenerye de Sct Melaine. — Advisé que ledict sr de Rosmeur desmeurera en ladicte charge, et MM. de la Chambre le prient de demeurer.

Me Francoys Poulguinan, prebtre, a juré la Scte Union entre les mains de M. l'archidiacre et publiera le monitoire du pape à dimanche prochain. F. Poulguynan pbre.

Sur le rapport dudict Poulguinan d'avoir poyé au sr de Kerochiou pour sa ranczon la somme de 92 escus, le procureur de ville demande le tiers de ladicte ranczon sauff à rabatre les fraictz. — Ce que le sr de Kerochiou conteste et empêche, et n'avoir acordé que pour son interestz. — Advisé que le sr de Kerochiou ramboursera le tiers de la ranczon dudict Poulguinan, les fraictz rabatus.

Et advisé que toutz aultres qui ont faict prinses soict des deniers ou prinsonniers randus en ville seront contrainctz au poyement d'un tiers de cze qui est prins hors ville, et les deux partz de ce qui est prins en ville.

Depuis, la Chambre, en consideration de la bonne vollonté que ledit sr de Kerochiou a à la ville, et la prinse et ranconnement de son fils le sr de Guilory, ladicte Chambre leur a donné ledict tiers sans estre tiré à cousequances pour aultres.

— Du 16ème feubrier 1590.
Yvon Pinart, sr du Foënnec, et Yves Maczon, sr de Kerdivalen, ont juré l'Union entre les mains de M. l'archidiacre et ont signé : Y. Masson. — Y. Pinart.

Deffandu a toutz de prandre ne desrober les estaulx aulx bouchers ou poisonniers ny les boys des pontz et maisons à peine de punision corporelle ; et au cas qu'il se puise informer que lesdictz boys eust esté rendus en corps de garde, seront les corporaulx chascun en l'entrée de sa compaignie tenus en respondre, et sera la presente ordonnance banye.

Ordonné que, touttes les nuictz, les portes de la ville close seront fermées pasé les 10 heures du soyr, et seront overtes à 5 heures du matin et sera ausy l'ordonnance bannye, et mecteront les corporeaulx jusques à ladicte heure de dix heures des santineles ausdictes portes.

L'arest levé pour la pouldre de Kerhamon ; est permis d'en disposer comme il voira.

— Du 19ème fébrier 1590.
Pour estimer les pieres prinses de la periere de Jeanne Jagu pour les fortiffications de la ville sont deputés les srs de Kerbasquiou et Toulbrunault.

Advisé que le sr de Kerscau prandera le livre de compte du sr de Coatserchou quest au greffe pour le collationer avec celluy qu'il tient et à la prochaine. — Le sr de Coatserchou proteste de nulité comme il a faict au passé.

Pour le compte de Yvon le Bailliff, asignation à mercredy, 8 heures du matin.

Pour la bariere que l'on a proposé faire contre la maison du sr de Kerochiou sur le quay de Léon, est advisé que lorsqu'il ou les siens vouldront batier en la veille maziere dejouste, que l'on renversera ladicte bariere aulx despens de la ville au dela de la maison que l'on batira en ladicte maziere.

Seront Christine Deleau et Christophe Quintin contrainctz de reparer la muraile de la ville, es endroictz de leurs maisons et veilles mazieres, aultrement sera executoire decerné contreulx et promtement.

Permys aulx paroisiens de Sct Mathieu de lever sur eulx par forme de cotisation la somme de 400 escus pour estre employée aulx fortiffications de ladicte paroise suilvant l'acte de leur consantement du jour d'hier, et en entendent comision du Roy ou de Mgr le duc de Mercœur : et pour prendre le serment des cotiseurs sont comis M. l'archidiacre et le vicquaire de Sct Mathieu l'un en l'absencze de l'aultre : et ont presté le serment Kerarguen, Mesily, Henry Artison, Guillou Rolland, Pierre Paul, Yvon Deleau.

Ordonné à Pierres Guingamp, procureur de la paroise de Sct Melaine, d'emploier les 50 escus par luy prinses de la confrayrie de la Trinité pour achever la bariere de la riviere acomanczée et y faire travailler de demain, faulte de quoy faire sera decerné executoire de ladicte somme contre luy pour estre mis entre les mains d’un tiers et employée audict effaict.

Advisé que le rolle faict par les cotiseurs sera veu en la Chambre pour scavoir si les cotiseurs se sont trop peu cotisés pour, audict cas, estre cotisés par l'advis de la Chambre.

L'asignation des monstres de MM. de la retenue asigné par M. le gouverneur à jeudy en 8 jours et sera bany par la ville et aulx paroises.

Advisé que le sr de Kergaradec fera une compaignye de 50 homes pour faire les sortyes, et son rolle faict sera veu en la Chambre pour appoincter ladicte compaignye comme de raison.

— En ladicte Chambre après mydy dudict jour 19ème febvrier 1590 : MM. les seneschal, bailly et lieutenant de Morlaix presentz et assistantz les cy après només : MM. l'archidiacre, de Bourgerel, de la Motte, du Vieulxchastel, de Kermabon, du Coetanfrotter, de Restigou, le prieur de Sct Mahé, et habitantz de Morlaix estantz de ladicte Chambre.

Lettres de M. de Kerouzy ont esté leues. A pareil lettres adressantes au sr de la Motte dudict sr de Kerouzy. — Aultre lectre adressante à M. le Gouverneur du sr de Coatgaric, tandantz affin d'envoyer secours et munittions au siège de Tonquedec [Note : Voyez le récit de cette expédition dans le chanoine Moreau, édition Mesmeur, P. 104].

M. du Cleuzou sera prié de y aller qui sera asisté de 20 cuiraczes et 100 harquebouziers de ceulx de la ville. — M. de Kergaradec nommé pour conduire lesdictz harquebousiers et leur comander avecques le sr de Rosmeur et Yves Deleau.

Sera envoyé 200 livres de pouldre à canon et 100 livres de pouldre fine d'harquebouze, et 30 livres de mesche et 50 livres de boullectz. — Et ordonné à Yves le Bailliff de bailler entre les mains du sr de Kergaradec 100 escus desquelz il aura descharge sur ses comptes, et ce du consentement du present miseur qui consent que ledict Bailly se fasse poyer suyvant ce qui a esté resollu cy devant.

Sera faict diligence pour promptement faire monter la pièce d'artillerie qui est soubz la halle, et la Fleur dellis qui est au chasteau.

Sera le sr de Kerochiou prié d’aller avecq la compaignie de gentz de pied.

Sera aussy escript aux paroesses pour se mettre en armes pour aller pareillement audict secours.

Seront aussy advertys les corporaulx de Sct Mathieu et Sct Melaine de nommer et advertyr 7 de leurs compaignies, et de Sct, Martin les corporaulx feront advertyr de nommer et advertyr 5 de chacune de leurs compaignies.

Le sr de Collespel sera prié de la part des babittans de deporter l'argent qui luy est debeu par le sr de Kerdrein pour des admonittions parce que le corps de la ville luy fera fond pour ceste poyne par le receveur des deniers de la ville.

— Du 21ème jour de feubrier 1590.
Ceulx qui comparoistreront en la Chambre appres avoir faict la nomination des desnomés au rolle deputés pour asister à ladicte Chambre porront la moyctié de l'amande, ou leur sera rabatu sur l'avancze par eulx faicte suilvant ce que a esté cy devant advisé ; et lorsqu'il sera question de rembourser ceulx qui ont faict les avances, sera faict extraict des defaultz qu'ilz auront faict pour leur estre rabatu sur ledict remboursement et advances : et est ladicte amande un escu pour chaincun deffault, et demy escu pour ceulx qui comparoistreront apprès la nomination du rolle : et ceulx qui n'ont faict avances seront executés pour lesdictes amendes pour estre emploiées à la discretion de la Chambre.

Sera escript au sr du Runven pour le remerczier de sa bonne volonté en l'endroict de la ville et de y continuer.

Advisé que l'on aura esgard à la cotisation et levée qui se faict de 1500 escus à ceulx qui ont esté subchargés et soubzlevés ès precedantz rolles d'amprunct, mesmes pour le respict des cotiseurs.

Randeront les cotiseurs le roule dans vandredy en la Chambre garantie pour toutes prefections et delay et, à leur faulte de cze faire, seront contrainctz de faire l'avancze de la dicte somme de 1500 escus.

Au retour du sr de Kervern sera faict estat de ceulx qui ont fourny armes, deniers ou chevaulx pour aller à Tounquedec, et de ceulx qui pouvoinct fournyr et ne l'on faict, estre taxés esgard de tout.

Yvon le Bailliff bailera 8 escus en oultre les 112 escus par luy poiés, scavoir 100 escus au sr de Kervern pour bailler aulx soldartz qui sont alé à Touncguedec, et 12 escus au procureur de la ville pour faire les fraictz parceque ledict poiement de six vingtz escus luy seront aloués sur son compte.

Deffaneze faicte au provost du chapitre du Mur de recevoir aulchun prebtre en la placze d'aulchun chapelain et chanouenne de ladicte église sans l'advis et consentement du procureur de la ville, ses juratz et procureurs et gouverneur de ladicte chapelle suilvant les anciens privilaiges et posesions de ladicte ville, à paine de nulité de cze qui se fera au contraire.

Le sr provost du Mur aparoistrera le transact qu'il dict avoir faict pour la chapelle du Mur à vandredy prochain.

— Du 22ème febrier 1590.
A valloir en la cotisation qui se faict les cy appres només poiront pour la solde de 50 argebouziers que l'on envoict à Plestin :
Jean Floch, 5 l.
Yvon Jegou, 5 l.
Jacques Demay, 5 l.
Guillaume Keranguen, 5 l.
Jean Dupleseix, 5 l.
Vincent Kermerchou, 5 l.
Kerangoff, 5 l.
Jean Coroler, 5 l.
Jean Pinart, 5 l.
Jean Caloet, 5 l.

M. l'archidiacre a offert 10 escus a estre ramboursé sur la taille.

Le sr de Kerochiou a esté prié et deputé pour conduire lesdictz 50 soldartz.

Le sr de Bourgerel interrogé sy, suilvant ce qui avoict esté aresté ceanlz, il vouldroict poyer la somme de 50 escus, respond n'obeira aulx ordonnances ceantz faictes ny ne poira aulchun denier.

— Du 23 jour de feubrier 1590.
A esté advisé que atandant recepvoir la respouncze qui fut hier envoyée à M. de Kerhir, à Guingamp, lesquelz sont resolus de bloquer et asieger le chateau de Touncguedec ainsin que M. de Coatgouzien présent a dict estre venu pour nous en acertener que les srs de Cleuzon et Kergaradec temporiseront avecque leurs troupes sans retourner la part où ilz sont jusques à avoyr aultre responcze et advis.

Dans cze jours les cotiseurs feront deligence de randre le rolle garantye à paine de 50 escus sur chaicun qui fera deffauct, et neanltmoingtz seront contrainctz de faire l’advancze de la taille dont est cas par emprisonnement de leurs personnes.

Sera le sr de la Mote prié de prester à la ville pour 3 ou 4 jours la somme de 127 escus pour estre randus au Sr de Kergaradec pour les departyr à sa discretion parmy ses soldartz ; qui seront, poyés ensemble avecques les 1730 debuz et prestés cy devant par ledit sr de la Mote aulx habittans dans ouict jours et sera baillé audict sr de Kergaradec 100 et 12 liv pour 12 soldartz.

Ordonné à Jean du Pleseix exiher le livre de son compte examiné et apostillé d'article en aultre par M. le seneschal dans lundy l'antrée de la Chambre, faulte de quoy faire sera ledit compte examiné en la Chambre sur le livre mins par luy entre les mains du sr de Kerscan et celluy qui est au greffe d'oficze, et luy sera escript de retourner contre ledict temps.

Sur la requeste des taverniers, faulte aulx cotiseurs de se trouver cze jour pour conclure le rolle, sont permys d'executer leurs sentences contre ceulx des cotiseurs qui seront deffailentz de se trouver cze jour a un heure appres midy pour proceder audict rolle, et sera le procureur de la ville creu du rapport des deffailantz.

Pour la pierre de la dame de Penanrun, est dict qu'elle sera poiée des pierres et charrettes de ce qu'elle aura interest. — Depuis, pour loutre recompanse a esté dict qu'on luy fera une muraille de telle haulteur qu'estoit le roc sissé aux fraiz de le parouesse, et si, par ce moyen, permis de porter les pierres tirées et en faire tirer aultres pour les affaires de le ville ; et sera faict estat de la haulteur dudiet rocher affin de faire randre ladicte muraille de mesme haulteur, et pour faire estat de ladicte haulteur sont députés le sr de Kervezec.
[Manquent des f°s 83, 84, 85, 86].

Pour le regard des paroissiens de Plouaret, sera dressé l'acte contre dimanche pour leur envoyer à scigner.

Pour la paroisse de Plouzelan ? Francoys Chapelain, Hervé Boursec, Yvon Guegen, Jacques Henry, Guioumarch Guemener, Gilet Gourbrain, lesquelz comme deputés de ladicte paroisse ont aporté l'acte garanty du sermant par eulx rejet à l'Union qu'ilz ont repecté presentement et juré entre les mains de M. l'archidiacre. Et ledict acte délivré au procureur de la ville pour le mettre parmy les actes de la ville ; et lesdictz paroisiens reczeus à l'amictyé des hahitantz de la ville et soubz la protection et savegarde de Mgr le duc de Merceur.

Sur la demande des paroisiens de Plouigneau, sera le sr de Kerloaguen pryé de prandre la charge de capitaine de ladicte paroise de Plouignau et de Plouegonven à pouvoir de prandre tel lieutenant qu'il vouldra, et luy sera escript.

Sera envoyé à Logevy le formulere du serment faict par les paroises reduictes.

Pour mounter et acomoder les deux artileries, sont deputés le sr de Kerochiou, M. La Boisière et le sr de Laingnoudrain.

Le sr de Kerochiou pryé d'escripre unne lettre à Ollivier Plougoulm pour avoir l'angin pour mounster les pieczes d'artilerie.

Pour la requeste de la dame du Roscoet recquerant avoir un savegarde, est advisé quelle aportera certifficat d'avoir juré l'Union pour, pasé de cze, pourvoyr sur sa recqueste comme de raison.

Paseport acordé à Nicolas Thoumas, de Guerlisquin, de venyr jurer l'Union à vandredi prochain.

Pour scavoir sy Loincelven est malade en la prisoun, sont deputés le sr de Lainoudrain et Resmeur.

Que les biens prins en la maisonn de Treuriant seront mins en tiercze main par Jan Autaire pour estre conservés à qui apartiendra et, pour cze faire, l'un et chacun de Mesieurs le juge avec le sr de Kergaradec et Resmeur, et seront ceulx qui ont faict la prince appellés pour estre ouys et faire rapport de cze qu'ilz ont touché et partaigé par leur sermant.

Les deputés, pour faire la ranczon du sr d'Ancremil, et Resmeur, seront priés d'avoir esgard pour la moderacion sur la resmonstrance de M. du Mené et M. le scolasticque de Tréguier.

Pour le cheval du sr de Restmeur, advisé qu'il sera rapporté au gros, sauff sur le tout en recognoistre le sr de Kergaradec et, pour cze faire, sera le cheval vandu au plus donnant el le pris rapporté au gros. — Pareille expedition pour le cheval prins par le sr de Kerouchant.

Francoys Delcau prand la charge de faire la recepte de la dernière cotisation à 6 deniers par franc et en respondera, et faire bon des deniers pour estre poiés dans quinzaine, scavoir 300 escus au sr de la Mote, et 1200 escus pour estre poyé aulx hostes, à l'advis de la Chambre.

Pour le faict de Abaczias, sera informé.

Lecture faicte de la lestre du sgr de Carné.

Pour les cotiseurs est advisé que les precedantz roles seront veuz à vandredy pour scavoir sy sont ases cotisés.

— Du second jour de mars 1590.
Le sr de Kernoter reczeu a jurer l'Union à la charge d'aler trouver Mgr le duc de Mercœur dans le moys, et de cze faire bailera caupcion de 1000 escus suilvant quoy ledict sr de Kernoter a baillé à cauption le Sr du Parc son père et Me Y. Marec, et ont signé. Lequel sr de Kernoter a jure l'Union entre les mains de M. l'archidiacre et le tout sans prejudicze de saisie. Du Parc. Pierre du Parc. Y. Marec.

Le sr de Kersenant Hamon a esté ausy reezeu à jurer l'Union, ce qu'il a faict entre les mains de M. l'archidiacre, et bailera cauption dans huictaine de ny contrevenir à peine de 500 escus. J. Hamon.

Nicolas Thomas ausy reczeu à jurer l'Union, ce qu'il a faict à la charge d'aler, trouver Mgr le gouverneur dans le moys, et de cze bailera cauption, et ausy de ne contrevenyr audict sermant, ce qu'il a faict de (sic) Nicolas du Boys present, et ont signé : N. Thomas. N. du Boys.

Yves Droniou et Jean Dronniou sont ausy reczeus à jurer l'Union, ce qu'ilz ont faict entre les mains de M. l'archidiacre à la charge ausy de bailer cauption dans houictaine à paine de 500 escus de ne contrevenyr audict sermant, et le tout sans prejudicze des fraictz de saczies aposé sur leurs biens ; et pour les particuliers ravaiges leurs recours sera reservé contre les ravageurs : Yves Dronyou. J. Droniou.

Advisé que Rolland Morvan sera eslargy à la fabveur de M. Coatredrez poiant ses despans et les fraicts du gardaige.

Sur la resmonstrance faicte par les parantz de Riou Pochon, Jean Maté et Jean le Roy suposés estre detenus prinsonniers en la ville de Loundres, recquerantz estre permys d'arester les marchantz anglais qui sont en ceste ville jusques à leur liberation. — Advisé, que neanltmoingtz la recqueste, la foy publique sera maintenue en la savegarde de Mgr le gouverneur gardée, et conformément defancze faicte tantz de mal faire en corps ny biens ausdictz marchantz angloys. Bien sera conferé avecques eulx amiablement pour scavoir le moien plus expediant pour faire liberer lesdictz detenus, et sera excript par le Corps de la ville à la Roine d'Angletere pour la suplyer, atandu le bon trectement que ses subjectz recoipvent en ceste ville, de mectre lesdictz detenus en liberté.

Sera escript à M. de Carné pour le prier faire cornandement au sr de Villegros de randre les lectres que Mgr le duc de Merceur a escript aulx habitantz de ceste ville et au sr de la Mote.

Pour la prince faicte à Treverian, renvoyé à la prochaine assemblée.

[Manquent les f°s 90 et 91].

Sur la recqueste du sr de Helles et son filz recquerant estre reczeus à venyr jurer l'Unyon, sur ce que certains particuliers ont dict que le sr de la Mote avoict une comission particulliere de Mgr le duc de Merceur pour s'ensaczir, ont esté deputés, pour aler par devers ledict sr de la Mote, le sr de Lainguondrain et Kervern, lesquelz, de retour, ont dict que ledict sr de la Mote leur avoict dict qu'il n'avoict aultre comission que verbale. — Sur quoy a esté l'advis prins desdictz habitantz et l'arest de la court leu, et suilvant icelluy, lesdictz habitans ont acordé paseport audict sr de Helles et son filz pour venyr jurer l'Union aux charges portées par ledict arest.

Sur la recqueste de la femme de Francois le Bernet est advisé que son proces sera faict à la plus grande deligencze que faire cze pourra, et cze pandant permis à ladicte femme d'aler parler avecques son mary pour leurs affaires particulieres en presancze de l'un des cy après només, scavoir : Kervern, Keranguen, Mesyly, Yvon Deleau.

Sur la recqueste de Allain Le Barbarin est advisé qu'il sera recompansé esgard des aultres cappitaines qui estoinct à l'armée en Saint-Michel-en-Greve sur la ranczon des prinsonniers de guere.

— Le mercredy aux cendres, 7ème mars 1590, devant MM. les gouverneur, lieutenant et procureur du roy :

Le sr de la Mote dict que d'aultant que le sr de Heles a beaucoup faily contre Dieu, son eglise, le sct party de l'Union, des princes protecteurs d'icelle et particulièrement ofansé Mgr le duc de Merceur, nostre gouverneur : et d'aultant qu'il a tous jours entierement favorisé le party du roy de Navare, hereticque et excomunié, pour le faire obeir et recognoistre pour roy de France, beaucoup inttimidé, vexé et outraigé les bons catholicques, requiert et en vertu de son pouvoir que ledict sr de Heles soict renvoyé par devant mondict seigneur pour se purger de cze que dessus, et estre reczeu tout ainsin qu'il plaira à mond. sr, et à sa faulte de se faire, se pouvoira comme il voira par conseill pour le servicze de la Scte Union du Roy et de mondict seigneur.— Ledict sr de Heles a juré la Scte Union et ausy son filz entre les mains de M. l'archidiacre à la charge d'aler trouver Mgr le duc de Merceur dans le temps porté par l'arest, et a ledict sr de Heles et sondict filz signés, et ont baillés à pleiges et cauptions pour eulx Yvon le Bailliff et Yvon Kerret de la somme de 4.000 escus à leur faulte d'aler trouver mondict sgr le duc, à quoy ilz seront coutrainctz par emprisonnement de leurs persones comme pour les propres deniers du Roy. — Et sur ce que ledict sr de Heles a remonstré que Mme sa compaigne est tellement malade que mesme en dangé de mort, equerant avoir un moys pour aler trouver mondict sgr le duc de Merceur, luy est accordé ledict temps d'un moys : Phe. de la Forest. Guillaume de la Forest. Yves Kerret.

Le sr de Goazmelquin, present, a juré l'union entre les mains dudict archidiacre et a signé : Jean de Goudelin.

Pierre Guillousou a presté le sermant de se porter loiaulment à l'estat de procureur de ville el Moricze Noblet de miseur.

Est advisé que aulchun, ne se fera preferer à prendre les deniers de la ville audict Noblet pour quelque chose que ce soict.

Le sr de Keranprovost conterolleur ausy preste scrutant.

Kerven comissaire a presté le sermant.

Kerdrein requit pour cappitaine du fort (du Taureau) à la mode acoustumée.

L'asamblée remise à demain 7 heures du matin.

— Du 8ème jour de Mars 1590, devant MM. le gouverneur, seneschal, baillif, et lieutenant et procureur du roy au Peron du Mur.

Pour la comision bailée par Mgr le duc de Merceur.

Pour ce que le sr de Kerhamon doibt pour la ferme des deniers du pavaige, est advissé qu'ilz seront employés à la redification de la bariere de Ploujan par ses mains suilvant les bilettes de M. de Kergariou et en son absence de M. de Kerscro, et Francoys de Lisle et sur son reffuz de les employer en ladicte fin, sera contrainct par corps.

Advissé que ceulx qui seront només pour juratz et deputés de la maison de ville comparaistront en l'assamblée à peine de 10 escus.

Pour la comision de M. du Faouet adresante pour comander en ceste ville les habitantz et de savoir en avoir donné charge d'obtenyr ladite comision, et sera escript à Mgr de Merceur de n'adjouster foy à aulchuns des habitans s'yl n'a memoire des habitans.

Ledit Hamoun offre verbalement déclairer (sic) qu'il luy baile charge de recquerir Mgr de Merceur de faire venir M. du Faouet comander en ceste ville et a declairé n'avoir eu auchune charge du sr de Kerdrein, procureur de la ville, de suplier ledict sr de Merceur d'establir garnisoun en ceste ville ny par memoire ny verbalement, et tant cze que ledict Hamoun a faict par lesdictes garnisons venues du sr du Faouet en ceste ville pour comander en armement des navires est desavoué par ledict sr de Kerdrein et par toutz les habitantz, et disant ne l'avoir deputé pres mondict sgr le duc de Mercœur comme deputé de la ville, ains y aloict pour ses affaires particulières ; mais ledict sr de Kerdrain luy bailla une lettre pour randre audict sr duc sans aultre charge que de presenter ladicte lettre de laquelle la minute est présentement aparue et aultres lettres qu'il luy a depuis envoyées.

Juratz : Sct Melaine : Thomas Jagu, Nicolas Nuz, Vincent Kermerchou, Francoys Noblet. — Sct Mathieu : Mesyly, Kervescontou, Kerangoff, Keranguen. — Sct Martin : Jean Floch, Toulbrunault, Jacques Demay, Kervezec.

Lecture faicte du memoire baillé par le sr du Rosmeur à Paul Hamon lequel est demeuré avecques le procureur de la ville, lequel sera enregistré à la requeste dudict sr du Rosmeur par cze que ledict memoire ne faict rien contre la ville ny ne prejudicze au publicq d'icelle.

Mgr sera suplyé de revocquer la comision acordée à Kerochiou pour lever des homes aulx fraicts des paroises et que personne ne s'avancze de demander pareilles comisions sans le consentement du Corps de ville.

La Chambre sera tenue à l'aduenyr le mardy et le jeudy à 7 heures du matin à peine d'un escu d'amande pour chacun default. — Et à paine d'un escu d'amande contre ceulx qui entreront en ladicte Chambre, sy ne sont denomés ou appellés.

Advisé que le procureur et miseur de l'an present n'envoiront au chateau que en noumbre de 25 personnes.

Bizien le Goic, et Lucas Prigent, deputés de la paroisse de Lanvellec, ont aporté leur procure dabtée le 23° febvrier, signé : F. Le Gallou, Nouel, Jegou, Kerhervé, Kerhuon, Lelgoalez, Kermounechy.

— Du 9ème jour de mars 1590.
Paseport acordé à Yvon le Rumeur, recepveur de Boiseon, pour venyr jurer l'Union dans houictaine.

Advisé que les deux lettres misives adresantes à MM. de Plouec et du Faouet seront renvoyées par le sr de la Mote.

Advisé que le procureur de la ville pourra acorder avecques un ou deux des habitantz pour faire la recepte et cze que reste par lesditz habitantz et de la taxe faicte sur les gentilzhommes, et cze à dix pour cent ou telle aultre composition qu’il advisera.

Escuier Jean Arrel, sr du Cozkaer et du Leurven, lequel aiant ouy la lecture et meurement conceu les articles de la Scte Union, a presté, le serment de tenyr ledict parly, observer le contenu desdictz articles entre les mains de M. l'archediacre, et a scigné, et a esté reczeu à la charge d'aler trouver M. de Merceur dans le temps de l'arest, et de cze bailera cauption de la somme de 2,000 escus ou luy faire servicze soubz le sr de Kerousy ou aultre cappitaine dudict seigneur, et a bailli a plaige M. le scolasticque et Vincent Kermerchou qui ont signé : Jean Arrel. Yves Arrel. V. Kermerchou.

Nobles gentz Yvon Le Chapelain et Yves Tuongoff ont ausy juré l'Union entre les mains de l'archidiacre, et ont signé : Y. de Tuongoff. Y. Chappellain.

Escuier Francoys de la Boissière, sr de Kerazdrouaut, a repecté entre les mains dudict sr archidiacre le serment par luy presté de la Scte Union à Kerahes et a signé : Francoys de la Boessiere. — Et a esté ledict sr de Kerazdrouaut reczeu à la charge de servir Mgr le duc de Merceur, gouverneur en ce pais et de cze bailera cauption de la somme de 500 escus, ce qu'il a presentement faict au sr de Kerangoff qui e signé : G. du Pleisseix.

Pour la recqueste de Francoys Le Bervet, permys à toutz ceulx qui auront affaire et vouldront parler à luy de l'aler trouver et parler avecques luy.

Sur la recqueste presentée par ledict sr de Kerazronault d'avoir main levée de deux coffres à luy apartenantz, estanctz chez la dame du Morlen aresté à l'instancze de M. de Cremeur et de M. de la Mote, apprès le consantement desdictz srs de Cremeur et de la Mote, que délivrance soict faicte audict sr.

[Manque le f° 99].

Sur la resmonstrancze du sr de Keranguen, miseur l'an dernier, est advisé que sans avoyr esgard à l'arest mins par le sr de Rosmeur et aultres sur les deniers de la ville entre les mains des fermiers, sauff à poursuire leur arest et actions contre le procureur et miseur, les deniers seront poyés audict de Keranguen.

Le serviteur du sr de Plouezoch sera eslargy. — Le viturier de la ville de Lannion ausy eslargy.

Pour la recqueste de Francoys le Bervet est advisé que le proces sera veu à jeudy et jugé en la Chambre.

Pour le cheval qui est au Cheval Blanq, est advisé qu'il sera vandu et pour cze faire deputés les srs de Keranguen, Kergurault et Yvon Deleau.

Yvon le Rumeur a juré l'Union entre les mains de M. l'archidiacre.

— Du 13ème mars 1590 après mydy.
Il est advisé en la Chambre et par l'advis des deputtés qui ont faict la ranczon de MM. d'Ancremel et du Restmeur que la taxe tiendra scavoir le sr d'Ancremel à 1500 escuz et le sr du Restmeur à 1200 escuz payables dans dix jours, durant lequel temps et depuix quilz ont esté randuz prisonniers en ceste ville poiront chascun d'eulx 5 escuz par jour pour leurs despans et garde ; en oultre le prix et à faulte à eulx de peier dans lesdictz dix jours, poiront dix escuz par jour chascun deux tant pour les garder, despanctz et interestz des souldartz ; et faisant le payement dans ledict terme leur sera rabatu à chacun 100 escuz ; et parceque faisant la ranczon dudict sr d'Ancremel on l'a gratiffié de 100 escuz à la requeste des parroisiens de Plestin oultre la somme cy dessus, ledict sr d'Ancremel fera promesse de ne faire aucun enuy par luy ny aultres de par luy ausdictz paroessiens ny à aultres de la Scte Union, et de ce en bailera plegement de la somme de mille escus.

— Du 15ème jour de mars 1590.
Pour la tour du Marcheis est advisé que les locquataires qui sont videront pandant le temps de ses troubles et seront mises des bones portes et claveures sur les portes et les cleffz delivrées a M. le gouverneur.

Pareil pour la tour de Nostre Dame.

Sur la recqueste de Jean du Pleseix, sr de Coatserchou, luy a esté baillé pour conseil le sr Desiles et Morlan. — Et au surplus advisé que son compte sera examiné par les deputés cy devant només et viendront à 8aine prendre asignation, dans quel temps sera le livre de compte baillé à l'un desdictz advocatz à la charge de ne s'en desaizir à cze que ledict Dupleseix instruise son conseil et mete ses actes par ordre pour servir audict examen sauff audict Dupleseix de recuser les suspectz. — Ledict Dupleseix dict que les cyapprès només luy sont suspectz : Jean Calloet, Jean Coroler, Jean Floch, Yvon Deleau. — Et convient à leur placze Keranprovost, Vincent Kermercbou, Toulbrunault, Jacques Guilemot ; et les aultres non recusés avecques lesdictz convenus procèderont audict examen. Et seront les expeditions raportées cydevant sur le cahier delivrés audict Dupleseix par extraict. — Et permys audict Dupleseix de faire fulminer monitoires pour avoir preuve du contenu en son compte.

Ledict sr de Kermerchou proteste de nullité de tout cze que aict a esté jusques à cze jour.

Paseport acordé au Goazlin de venir jurer l'Union dans 8aine et pour ledict jour cessera l'execution des decrectz donnés contre luy en justicze.

Pour le tiers de six vingtz dix quartiers fromant prins par le capitaine du chateau du Thoreau est acordé que ledict tiers desmeurera audict capitaine poiant pour tout pris la somme de 40 escus à M. de la Boisiere qui en baillera quictance audict capitaine qui luy en servira d'acquist vers la ville.

[Manque le f° 102].

Et pour avoir ladicte somme sera prinse par forme d'emprunt d'avecques dix des habitantz de chaincun 10 escus à valloyr à la taille de 2500 escus.

Jean Floch, 10 escus ; Jacques Demay, 10 escus ; Francoys Noblet, 10 escus ; Jean Calloet, 10 escus ; Vincent Kermerchou, 10 escus ; Jean du Pleseix, 10 escus ; Yvon Deleau, 10 escus ; Yvon Kerret 10 escus ; Le Botou, 10 escus ; Kerangoff, 10 escus ; Yvon le Bailliff, 10 escus.

Et ordonné ausdictz només de delivrer ladicte somme presantement entre les mains dudict sr de Kergaradec à ladicte fin.

Paseport acordé au sr de Rosangar pour venyr jurer l'Union en ceste ville dans 8 jours.

Pour les cotiseurs ont esté appellés pour prester le sermant :

Jean Guillemot. Paul Garamour. Nicolas Sallaun.
Pierres Diougel. Allain Picquart. Guillaume le Levier, sr du Coatglas.
Jean Dupleseix. Vincent le Meclet.
Jean de Pouliguen. Huon le Couzault. Francoys Couarn.
Rolland Sallaun. Jacques Laisné. Guillaume Crant.
Hervé Goic. Hervé le Rous. Pierres Noblet.

Le sr du Henquer, filz aisné de Kermiriou, a juré l'Union entre les mains de M. le scolasticque et a signé et a esté reczeu à la charge d'aller trouver Mgr le duc de Merceur dans le moys, et de cze baillera cauption de 500 escus. Le sr Desiles s'est constitué à pleige pour ledict sr du Henquer par la promesse que luy a faict ledict du Henquer de l'indampniser. Estienne. Jac. de Kerguz.

— Du 22 mars 1590 avant mydi.
Le sr du Mesguen, conseiller en la court du Parlement a repeté le serment par luy faict en la Scte Union, et aussi le sr de Coetespell et le sr de Kergontia de Ploegaznou presentz, entre les mains de M. l'archidiacre de Ploegastel, et ont signé : A. du Poulpry. François le Gac. Devaller.

Le sr de la Mote requiert que le sr de Mesguen aille trouver Mgr le duc de Mercure suivant l'arrest : ledict sr du Mesguen a declairé qu'il entend se rendre en la court du Parlement à Nantes, dans le moys de may, et neantmoingz que sa seauce ne comance que au moys d’aougst, et ledict arrest s'entend de ceulx qui ont tenu parti contraire ou adheré.

Lecture faicte de l'acte du serment faict par M. de Kermorvan entre les mains de Mgr l'evesque de Leon dabté du 7 mars 1590 : coppié et ordonné l'enregistrer.

Ordonné que les cotiseurs concluent le rolle dans huictaine à peine des despans en privé nom.

Pour la requeste de M. de Helles qui demande avoir prolongation du temps pour aller trouver Mgr le duc de Merceur actendu que sa femme est mise en l'extreme unction : — a esté advisé actendu la maladie notoire de sa compaigne, soubz le bon plaisir de Mgr le duc et de la Court, que le delay luy est prolongé d'un moys pour aller trouver Mgr le duc de Mercueur.

Et pour scavoir de quelle some de deniers il voudra accomoder la ville en presant, le sr de Leynondren deputé.

Pour recevoir le compte de M. de Kerdrain sont deputés le receveur Kerellot, Jean Calloet et Vincent de Kermerchou à proceder une heure après mydi.

Pour la requeste du sr du Restmeur est advisé qu'il sera eslargy poiant ce que a esté advisé pour ses despans et gardaige, et baillant cauption de Vincent Kermerchou et Francoys Deleau qui s'obligeront solidairement de poier la ranczon dudict sr du Restmeur dans quinzaine ; et à deffault de faire ledict poiement dans ledict temps seront contrainctz de poier la premiere taxe qui estoit de 1800 escuz par touttes voyes mesmes par corps ; et pour stipuler l'acte et assurance de ce, sont deputés le procureur de ville et deux ou troys des deputés qui ont faict ladicte ranczon.

Sur la requeste de Y. Deleau l'executoire e esté mis au bas de ladicte requeste.

Sur la requeste de Francoys le Bervez, remis à mardi pour toute prefixion et delay, et lors sera le procès jugé.

Sur le differant d'autre Kergaradec et V. Nouel touchant le cheval de M. du Restmeur, seront priés de remectre leur differant à l'advis de la Chambre sans ressort.

Pour les 90 escuz baillés par Mme de Coetredez ou procureur de ville pour la poye des souldatz qui sortirent dernièrement à Plestin par le commandement de M. de Coettredez, est advisé que ledict procureur de ville remboursera ladicte dame promptement sur les deniers ordonnés luy estre mis entre mains de la dernière chambre et assemblée.

Pareille expedition pour le sr d'Anchremel que pour le sr du Restmeur baillant cauption au contentement du procureur de la ville et des aultres deputés.

— Du 25ème mars 1590, en la Chambre de l'Union à Morlaix.

Sur l'appel faict des cotiseurs sur l'explect du jour d'hier leur est ordonné conclure le rolle de la cotisation dans houictaine à peine d'estre contrainct de faire l'avancze dont est cas et de toutz despans domaiges et interestz.

Pour la cotisation de 400 escus pour les fortifications de la paroise de Sct Mahé est ordonné à ceulx qui ont esté només pour faire la recepte de contraindre les cotiseurs à poiement de leur taxe à peine d'estre contrainctz eulx mesmes de faire ledict poiement et de toutz despens, domaiges et interestz : et enjoinct au vicquaire de faire publier en sa paroise le contenu en la presente ordonnance.

Lecture a esté faicte des lettres de Mgr le duc de Merceur, du 19e de cze moys, adressantes à M. le gouverneur, à la ville et au sr de la Mote ; et aultre lettre de M. de Rivière adressante à la ville, du mesme jour.

Sera escript à MM. de Plouec et du Faouet, et les comisions leur envoyées.

Sera escript à M. de Penanvern de venir en ville conferer avecques M. le gouverneur contre jeudy matin.

La letre de ceulx de Roscoff sans dabte a esté leue : advisé de leur escripre que le bled apartient au sr de la Villeneufve-Polart.

Plus lecture faicte de la lettre du sr de la Villeneuffe du 19e de ce moys, adresante au se de Keranrous, par laquelle ledict sr de la Villeneuffe demande paseport pour venyr jurer l'Union : a esté paseport acordé audict Sr de la Villeneuffe Polart pour venyr jurer l'Union en ceste ville y venant dans 8aine. Et d'aultant que ladicte lettre faict mention du bien prins par le cappitaine du Thoreau, demandé par les habitantz de Roscoff, est ordonné que ladicte lettre desmeurera avecques le procureur de la ville.

Les deniers debuz par le recepveur Kerelot et la dame de Carbouit a resté entre ses mains.

Le sr de Rochemorvan a repecté le serment de l'Union entre les mains de M. l'archidiacre et a scigné : Jan le Sparler.

Les srs du Marchalach et Tertrebaron ont faict pareil sermant que devant entre les mains de M. l'archidiacre de Plouegastel et ont signé : R. Le Galeer. Claude Collas.

Pour le faict de Francoys Le Bervet sera faict estat sur la recqueste à la prochaine audiencze, et sera le premier faict expedyé, et sera le procureur du Roy adverty de se y trouver.

— Du 26 mars 1590.
Ordonné aulx cotiseurs de proceder au departement et esgail des deniers dont est cas a comancer a 2 heures de ce jour, et permys aulx taverniers de se prendre aulx defailantz pour se faire rembourser suilvant leurs sentences, et faire constituer lesdictz defailantz prinsonniers jusques à avoir obéy.

Pour le faict, de Francoys Le Bervet, ouy et le consentant M. le procureur du Roy, et par l'advis de la Chambre, a esté ledict Bervet par MM. les troys juges eslargy et licentyé sortir par faire ses afaires en la ville close, à la charge de poser le guichet lors des confrontations, et baillant cauption devant l'un de mesdictz sieurs les juges de se representer toutes et equantes à peine de 2.000 escus.

Pour le faict de Francoys Tuongoff prinsonnier, renvoyé à la prochaine. Pour la recqueste presentée par le sr de Kerveguen Ancremel, est advisé qu'il sera eslargy bailant cauption de payer sa ranczon dans le moys et à la charge baillé au sr de Restmeur et ses plaiges, et pour recepvoir les obligations est comys le procureur de ville et deux ou troys de ceulx quy ont esté sur sa prinse comme Kervern, Pratanfeunteun.

Pour la recqueste presentée, par la dame du Cleuzou sera ladicte dame creue à sermant sur les sainctes évangiles sy le cheval mentioné en sa recqueste prins a Coatvoult luy apartient à la vérité, et en cas quelle affirme que ledict cheval luy apartient, luy sera delivré ; et pour recepvoir ledict sermant, comis M. l'archidiacre.

Sur la requeste presentée par la dame de Coatvoult, seront les 4 chevaulx mentionnés en la recqueste delivrés à Mlle du Cleuzou par la cauption quele a baillée de noble homo Jean Coroller de representer lesdictz chevaulx sy la prinse est desclairée bonne, ou poyer la valleur estimée à six vingtz escus ; et pour ladicte prinse sera informé sy le sr du Cosker Coatvoult est du party contraire, et les aultres biens prias audict Coatvoult demeureront en l'estat jusques à juger sy ladicte prinse est bonne ou non.

Pour le cheval contentieulx entre le sr de Kergaradec et Pratanfeunteun, est advisé que ledit cheval sera delivré audict sr de Kergaradec poiant ses despans pour le pris qu'il a esté estimé.

Et pour le regard dudict sr de Pratanfeuteun est advisé que sur le gros des ranczons il aura la somme de 24 escus dont le sr de Kergariou, nostre gouverneur, luy faict bon en privé nom en oultre ce que poura revenir audict sr de Pratanfeunteun.

Et pour le regard des 7 escus debus à l'oste du Cheval-Blanc en oultre les despans du cheval, la ville en fera bon. — Et a presentement ledict sr de Pratanfeunteun delivré la cleff audict seigneur gouverneur.

Le sr de Kergaradec, Kervern, et Pratanfeunteun deputés pour faire un rolle de ceulx qui demeurent en la paroisse de Sct. Melaine, des offres qu'ils feront pour la fortiffication de ladicte paroise, et ledict rolle veu en cas que aulchun facze refus ou moindre aufre que leurs moiens ne portent, seront taxés en la chambre et contrainctz par touttes voys mesmes par corps.

Sera repecté par les carefours de ceste vile a sonn de tronmpe a toutes personnes y desmeurantes, deffance de sortir hors ladicte ville pour faire aulchune prinse ny ravagementz sur quelque personne et maisonn que ce soict, sans adveu et comandement de M. le gouverneur, sur les paines qui eschent ; et seront les conducteurs responsables du tout ; et pareille deffanse faicte aulx corporaulx sur pareiles paines.

Advisé que les cotiseurs emploiront en la taille toutes personnes de quelque qualité qu'ilz soinct, demeurantz ou s'estantz retirés en ceste ville, et comanczeront lesdictz cotiseurs anjourd’huy, 2 heurs appres midy à paine d'avanczer ceulx qui feront faulte, la somme debu aulx taverniers.

Sera faict un extraict de ceulx qui sont venusjurer l'Union en ceste ville par le procureur pour estre taxés à poier une somme pour aider aux fraictz de la guere.

Pour la pouldre acheptée par Kerdrain davecques le sr de Kerhamonn pour le fort, les habitantz sont d'advis d'indemniser ledict sr de Kerdrain de l'obligation en laquelle il se constitue pour ladicte pouldre : et en sera ledict, sr de Kerhamonn poyé : et pour cze faire sera le sr de Keranguen, dernier miseur, adverty de vider ses mains au proffilt dudict sr de Kerhamonn de ce qu'il doibt à clair ; et randera son compte dans quinzaine : et de cze que ledict sr de Keranguen ne poura fournyr, sera le miseur d'apresant contrainct pour parfournir, atandu qu'il est question de remplir l'estat du fort. Et pour l'aultre pouldre qui est encores en la posesion dudict sr de Kerhamonn acheté et aresté par le precedant procureur, sera ledict, sr de Kerhamonn poyé desur le tiers des ranczons de la ville. Et pour la pouldre et meche prins par ledict sr de Kerdrain d'avecques le sr de Coatlespel, sera ledict sr de Coatlespel pryé de deporter le pris, et en promettent lesdictz habitantz de poyer et en indampniser ledict sr de Kerdrain lequel aportara le compte qu'il a faict avecques ledict sr de Coatlespel pour scavoir la somme qui luy est debu.

Advisé que le sr de Kergaradec sera ramboursé de la somme do 27 escus par luy avancés suilvant l'extraict de luy signé du 6e feubrier dernier, desur les deniers de la ville, scavoir des rancons et aultres deniers destinés au faict de la guere.

Pour la recqueste du sr de Kervern, expédition a esté minse sur le compte qu'il a faict avecques le procureur de la ville precédant, par lequel il demeure quitte des 36 escus esquelz il a esté cotisé est deux premiers rolles.

— Du 3ème avril 1590.
Le sr de Toulbrunault present, suivant l'election de luy faicte par les paroissiens de Sct. Martin comme capitaine de la paroisse, a presté le serment de se porter fidellement en ladicte charge.

Faisant droict sur la requeste presentée par les cotizeurs, a esté avisé que tous les desnommés au rolle presentement chiffré seront coztisiés pour contribuer à la taxe de 2500 escus, en laquelle somme ne seront les coztiseurs comprins, ains seront taxés après en la Chambre, à ce que aulchun ne puisse s'en prendre à eulx par en apres…… ledict rolle contre ceulx qui ne coustumés d'estre taxés, et aussy a esté dit que lesdictz coztiseurs ne seront plus en l'avenir contrainctz et denomés pour estre coztiseurs que les aultres habitants n'aient servy auparavant en pareille charge.

Pour la recquette presentée par le sr de Kerjan et Katherine Efflam presentz. — On communiquera les lettres des prisoniers quy sont à Coatfrec aux srs de Ancremel et de Restmeur, lesquelz escriront de faire traiter humainement lesdictz prisonniers quy sont à Coatfrec, et pour ce faire est commis M. le procureur de la ville.

Les lectres envolées par M. de Coatanfao à M. de Kergariou et au procureur de ville, portant atestation que le sr de Coatvoult a juré l'Unyon et priere de ne declairer la prinse faicte de son bien a Coatvoult bonne. — L'atestation de Mgr l'evesque de Léon du 15 febvrier dernier, le sr de Coatvoult d'avoir juré l'Union, et aussy serment dudict sr de Coatvoult. Plus a esté leu acte de sauvegarde du 14e 10bre dernier signé : Philipe Emanuel de Loraine. Par l'advis de la Chambre est dict qu'en faveur de M. de Coatanfao, et M. et Mlle du Cleuzou, les chevaulx prins audit lieu de Coatvoult seront randus sans aultre recherche des aultres meubles, poiant aux soldatz la somme de 12 escus.

La lettre du sr de Kerhir leue touchant le siége proposé sur Coatfrec et Tonquedec. — Advisé qu'il lui sera escript que les habitantz persistent en la mesme vollunté que luy ont faict entendre et fourniront ce qu'ilz ont promis et lorsqu'il voudra prendre assignation.

Et pour les balles, est M. de Coatredez prié d'escrire à Lantreguier.

M. de Kercam offre 100 escus en prest à la ville a estre poyé dans le mois.

Yvon le Bailliff a esté deputé pour recevoir les 100 escus promis par M. de Helles.

Sur la requeste presentée par le sr de Keraultren pour avoir la randition d'un cheval, harnois et une pistolle : — a esté dict que le cheval et son equipage seront randu poiant les despans du cheval.

Pour la requeste presentée par la dame du Carbont pour lever l’arest siniffyé au receveur Kererault, sera le receveur ouy à jeudy.

— Du 5ème apvril 1590.
Paseport acordé à Jean Fol pour venyr jurer l'Union dans houictaine.

A Francoys du Parc, sr de Kernizeen, paseport acordé pour venyr dans mardy prochain jurer la Scte Union. — Paseport acordé au sr de Meseaumeur pour venyr jurer l'Union dans mardy prochain.

Le sr de la Ripvière eslargy par la cauption qu'il a bailé du sr de Kerchaman de le represanter à pairie de cent escus.

Prolongation de delay bailé au Sr de Kervoter acordé d'un moys pour aler trouver Mgr de Merceur par cze que durant ledict temps il servira Mgr de Kergariou à la retenu.

M. de la Boisiere deputé pour faire aulx paroisiens de Plourin fournyr 12 harqebousiers et unne charette.

Le sr de la Villeneuffe deputé pour retirer 3 harquebousiers et unne charette à 8 chevaulx de Plouegaznou. — Le sr du Douant pour Ploujan, deputé pour tirer 12 arqebouziers et 8 chevaulx à leurs fraictz et 20 chevaulx pour estre poyés. —Pour Plouezoch, le sr de Keralsn pour fournyr unne charette, 8 chevaulx et 20 argebouziers. — Pour la paroise de Garlan, deputé le sr du Boys de la Roche pour fournyr unne charette, et cheval et 6 arqebouziers, — Pour la paroise de Lanmeur, le sr du Restigou deputé pour fournyr unne charette a 8 chevaulx et 20 arqebouziers. — Pour la paroisse de Plouigneau, député le sr de Kermadeze pour fournir unne charette à 8 chevaulx et 20 arquebouziers. — Pour la paroisse de Plouegounven, le sr de Kerloaguen deputé pour fournyr 20 arqebouziers et unne charette. — Pour Guimaëc, Vincent Kermerchou pour fournyr 10 arqebouziers. — Pour Ploegat-Goalou sera escript au sr de Vilegoury pour fournir 10 arqebouziers, — Pour Ploegat-Moesan sera escript au cappitaine de la Haye pour fournyr 8 arqebouziers.

Le procureur et miseur deputés pour bailer recognoisance à ceulx qui presteront deniers à la ville pour le siége de Tonnequedec, et seront lesdictz deniers delivrés audict miseur, lequel les departira selon les biletz qui luy sera bailé par M. de Kergariou gouverneur, lesqueles biletz serviront de descharge audict miseur.

Noble homme Yves le Bailliff dict avoir heu 100 escus d'avecques le sr de Heles pour les prester à la ville pour aider aulx fraictz de la guere.

Advisé que ledict Le Baillif poiant ladicte somme audict miseur aura recognoisancze davecques le procureur et miseur pour estre ramboursé lors que les aultres qui ont faict pareilles advances et pres suilvant l'ordonnance auparavant ce jour de la Chambre.

Plus sera escript au sr de Lesquiffiou de faire un rolle de 20 hommes de ses paroises pour porter les picques, et le sr du Vieulx Chastel pour fournir 10 et cze aulx fraictz desdictes paroises.

Pour la recqueste des soldartz qui ont esté à Coatvoult, ordonné que l'ordonnance tiendra.

Pour le comte de Coatserchou, l'asignation à demain un heure apprés midy et adjoinct au procureur d'advertir ledict Coatserchou de se y trouver, et sera creu.

— Du 10ème aupril 1590.
Escuier Francoys du Parc sr de Kervizian a juré l'Union entre les mains de M. l'archidiacre et a signé : Francoys du Parc.

Advisé quil sera baillé acte au sr de Trongoff d'avoir juré l'Union en la Chambre, et s'estre presanté au moys de novembre dernier, et luy sera bailé acte dudict moys encore que le greffier aict omis de le reporter.

Lecture a esté faicte de la lettre du procureur des habitantz de Henbont.

Advisé que le sr de Kergaradec, le Villeneuffe, Kervern, Pratanfeunteun feront un rolle des demeurantz en la paroise de Sct Melaine, et accepteront les offres lesdicts desnomés pour les fortifications : et ceulx quy n'aurait offert à esgart de leur moienne seront taxés. — Depuis advisé que lesdictz només feront taxe sur les demeurantz en ladicte paroise de fournyr une somme par semaine. — Pour la paroisse Sct Martin, pour faire pareille taxe par semaine sont deputés M, le Bailliff, Jean Floch, Toulbrunault et Jacques Demay.

Paseport acorde à Francoys Hamonn sr de Kerbourdon pour venir jurer la Scte Union en ceste ville dans jeudy prochain.

La Chambre a declairé avoir reduict la ranczonn du sr de Restmeur, faicte premierement à 1800 escus, soubz espoyr que ledict sr du Restmeur eust juré l'Union, et a declairer ne pouvoyr consantyr l'elargisement dudict sr du Restmeur s'il ne paye ladicte taxe. mays luy jurant l'Union paient par avancze 400 escus et bailant cauption de poyer le surplus dans quinzaine et sera eslargy. — Depuis est advisé que ledict sr du Restmeur jurant qu'il ne portera james les armes et ne fera aulchune chose contre le Sct party de l'Union, et poiant ladicte somme de 400 escus par avancze, et bailant cauption de poyer le surplus dans quinzaine, sera eslargy poiant au prealable ses despans et gardaige ; suilvant quoy ledict sr du Restmeur a faict ledict sermant entre les mains de M. l'archidiacre et a signé, et a nomé pour ses plaiges nobles gentz Francoys de Kermerchou sr de Penanlan, et Jean Keraultem presentz lesquelz signeront solidairement comme principaux preneurs en meure forme d'obligation, et pour acepter ledict poyement et cauptions sont deputés le procureur et miseur de la ville.

Advisé d'acorder la chaire pour le quaresme prochain à nostre me. Turneau en fabveur de Mgr de Rosanpoull qui a escript pour luy.

— Du 11ème jour d'apuril 1590, devant MM. de la Chambre, assistanctz les srs de Coetredrez et Rosampoul.

Il est ordonné que les denomez au rolle pour fournyr mosquetaires et harquebouziers seront contrainctz au poyement et solde des soldartz, scavoir pour chascun mosquetaire 7 escus et 5 escus par harquebouzier : et ce pour ung moys à paine à ceulx qui feront reffuz de fournyr ainsin qu'ilz seront taxés ausdictz rolle, à paine demprisonnement de leurs personnes et execution de biens, et ce contre demain unne heure apres mydy.

Passeport accordé au sr de Restmeur pour aller à sa maison, et sont pryes toutz capitaines et cheffz de guere de laisser passer librement ledict sr du Restmeur sans luy faire aulchun enuy.

Advisé que le sr de Pratanfenteun aura 24 escus dessus le tiers de la ville de la rancon du sr du Restmeur par les mains du miseur de la ville et en aura aultant de descharge.

— Du 12ème jour d'apuril 1590.
Advisé que le faict dont est cas depand de la guere et des affaires de la Scte Union comme ausy ce qui a esté faict en la ville de Morlaix, Plestin, Plouegonven et ailleurs ; et les compaignies aiantz esté en garnison en la ville de Morlaix par long espacze de temps, l'on auroict voulu faire aulx paroises des champs sans les cotiser pour les inconveniantz que y pouroinct aduenir, lesquelz (sic) conveniantz sont ausy à craindre au faict quy s'offre, joinct que les compaignies n'ont esté à Lanmeur que troys jours seulement, et ont prins leurs comodités et vivres des paroises voisines. Et, partant, la ville et la paroisse de Lanmeur suporteront ce qu'ilz ont fourny, et les aultres paroises chaincune suportera ce que lesdictes compaignies ont prins sur eulx de mesmes que a esté par cy devant faict en l'endroyct des paroises de Plouegonven, Plestin et aultres.

Advisé que M. de Kergaradec, Rosmeur, Kerochiou, Kervern et Yvon Deleau sancqueront des plaiges que le sr d'Ancremel veult fournyr pour les acepter silz les trouvent solvables pour leur interestz, et celluy des aultres cappitaines et soldartz qui ont asisté à sa prinse : et le procureur de la ville, et en cas qu'ilz trouvent les plaiges solvables seront les asurances ce touchant.

Francoys Hamonn, sr de Kerbourdon, s'est présenté suilvant son paseport pour jurer l’Union, y a esté reczeu soubz le bon plaisyr de Mgr le duc de Merceur, par le sermant qu'il a presté entre les mains de M. l'archidiacre de Plouegastel ; et d’aler trouver mondict seigneur avecq et soubz le comandement de M. de Rosampoul, bailant cauption de ne contrevenir à son sermant à paine de 500 escus et a signé ; et cze par le consamentent de M. de la Mote, lequel l'a consanty pour se conformer à l'advis MM. le la Chambre, esperant que Mgr l'aura agreable, et en fabveur de M. de Rosampoul : et a esté reczeu a ladicte Union, sans prejudicze des fraictz, des saczies, et des actions que le sr de Kerochiou present, dict avoir pour la prinse du sr de Guilory son filz contre ledict sr de Kerbourdonn, et ausy sans prejudicze des estatz de Paul Hamonn presant ; et bailera sr de Kerbourdonn cauption dans 24 heures, et signera sur le cahier. Francoys Hamon.

Vincent Lornec, sera poyé de 11 réales et demye pour la despancze faicte chez luy par la Plougoulm par le miseur.

Les cotiseurs se taxeront eulx mesmes, et randeront le rolle garanty dans la prochaine asamblée, et sy se treuve, aiant veu ledict rolle, qu'ilz se soinct moins cotisés quilz ne debuent porter, seront taxés en la Chambre.

- Du 16 avril 1590, MM. du Mesguen, de Kergariou, les seneschal et lieutenant presentz.

Enjoinct au procureur de la ville d'appeler le dernier miseur pour rendre son compte.

M. de Kerscao dict avoir asigné le sr de Coatzerchou après midy ce jour, et demande qu'il plaise à MM. de le asister sur l'audition dudict compte.

A esté advisé qu'il sera procedé à l'examen dudict compte à une heure de ce jour.

Pour la fortification de ceste ville, a esté advisé que des 400 escuz qui sont entre les mains du miseur, de la ranczon de M. de Rosmeur, sera délivré à chaincune des paroisses 100 eseuz, scavoir en la paroise de St-Martin entre, les mains de M. de Toulbrunault ; en St-Mathieu entre les mains du sr de Mesily ; et à St-Melaine entre les mains de M. de Trelever : pour bailler les billettz à St Martin par M. de Kergariou, à St Mathieu par le Coatglas, et St Melaine par Kergaradec.

M. Baril, receveur de Léon, se plainct de ung prisonnier quil princt hier, quil a mys entre les mains de M. le gouverneur, lequel se nomme Jezequel serviteur de M. de Coatinizan et asista à aultres soldatz pour le prandre prisonier, et demande que luy soict faict justice.

— Du 17 aupril 1590.
Lecture faict d'une recqueste presentée par le sr de Kergadoc, Yves Kerret, Francoys le Caouenan.

Advisé qu'il sera demain à l'asamblée pourveu sur ladicte recqueste mesyeurs les juges presentz et sera le sr de la Mote pryé de se y trouver et le sr Baril.

Advisé que la biletes du procureur, contrerolles et le papier contre rolle seront alloués en claire minse au sr de Keranguen sur son compte.

Advisé que le miseur mectera promptement la somme de 40 escus entre les mains de ceulx quy furent només hier de chaicune paroise.

Jean Dupleseix taxé 30 escus. Le Coatglas 5 escus. Rolland Sallaun 5 escus. Pieres Noblet 5 escus. Jean Guillemot 10 escus. Nicolas Sallaun 8 escus. Pieres le Dionguel 4 escus. Paul Garamour 4 escus. Me Jean Pouliguen 2 escus. Yvon le Louczault 2 escus. Allain Picquart 3 escus. Vincent le Merclet, 4 escus. Hervé le Goic 10 escus. Jacques Laisné 4 escus. Hervé le Rous, 8.

Par l'advis de mesieurs de la Chambre est ordonné que l'on adjoustera au rolle sangement de monnoye quy est à 20 par cent à l'afferant que chaincun a esté taxé.

Sur la recqueste du sr d'Ancremel est advisé, pour l'interestz de la ville, que le procureur pasera les actes, Jean Talbos sobligant avecques les aultres plaiges soliderement : et pour l'interestz des cappitaines et souldartz sont deputés pour prendre lesditz plaiges le sr de Kergaradec, Rosmeur, Kervern, Pratanfeunteun et Yvon Deleau, et s'obligeront de payer dans un moys et en atandant garantyr lesdictz actes tiendra ledict sr d'Ancremel prinsonn, mais iceulx garantys et acceptés par lesdictz només poiant ses despans sera eslargy et luy sera baillé paseport. Le sr d'Ancremel present a juré l'Union entre les mains de M. l'archidiacre et a signé.

Pour la recqueste du sr de Kergaradec remise à demain.

— Du 18 aupril 1590.
Advisé que le sr de la Mote aura par forme de presant de sur la ranczon du sr d'Ancremel la somme de 100 escus.

Sur la recqueste presentée par Jean Pasquer detenu prinsonnier à l'instance du sr de Quilory, a esté la prinse dudict Pasquer declairé nulle esgard que cze fuct le jour qu'il jura l'Union sauff audict sr de Quilory de poursuivre ses actions.

Pour la recepte des denyers de la dernyere cotisacion, advisé que la recepte sera banye aujourd'huy contre l'heure de 2 heures apprès midy devant l'un de mesieurs les juges à celluy quy fera la mileure condiction.

Le Flamant estant prinsonnier eslargy et ordonné au miseur de payer un escu pour ses despans en la jaule.

Sur la recqueste du sr de Kergadou, Francoys de Levenan, Yvon Kerret et aultres només comisaires pour regyr les fruictz des saesyes de ceulx quy tienent le party contraire à la Scte Union, est advisé que lesdictz només se pourvoiront pour le contenu en ladicte recqueste par devers Mgr le duc de Merceur auquel escripra le procureur de la ville pour le suplier de descharger lesdictz només et aultres marchands habitantz de ceste ville de telles charges atandu que mondict seigneur a dejà adresé sa comysion au sieur Baril pour mesme faict, et auquel Baril et au procureur du Roy incombe la charge de faire executer lesdites saezyes. — Et le sr de la Mote present a recquis que cela ne retarde le servicze du Sct party de l’Union et celluy de mondict seigneur ny prejudicze. — Acte. — Et a ladicte Chambre declairé quele n'antant que ladicte expedition prejudicze ny retarde ledict servicze.

Sur la recqueste du sr de Kergaradec, lesdictz habitantz ont declairé avoir cy devant revocqué le contenu en l'acte mentionné en l'ordonnance de Mgr le duc de Merceur, et faict entendre audict sr de Kergaradec qu'ilz ne pouvoinct affecter leurs denyers comuns a la recompanse par luy demandée : et sera ledict sr de Kergaradec exempté suilvant les dernieres ordonnances des tailles, emprunctz et advanczes qu'il se feront en ladicte ville en fabveur du servicze et la paine qu'il prandera en ladicte qualité de lieutenant.

Advisé que le miseur baillera denyers pour envoyer messagers la part ou M. de Kergariou comandera, et sera alloué des fraictz que ledict miseur faira sur les biletes dudict sr de Kergariou et aussi sur les biletes du procureur de la ville.

— Dudict jour, en l'auditoire de la Court de Morlaix, par devant M. le seneschal de ladicte Court de Morlaix, la Villeneuffe pour le procureur du Roy.

Faict par Me Jean le Borgne, sergent à quy et à la milleure condiction vouldroict lever la tailles qu'il failli lever apresent.

Noble homme Mauricze Noblet faict offre de recepvoyr ladicte taille moienant avoir 2 soultz par franc, et fera bon des denyers.

Mondict sr le seneschal a ordonné que ceulx qui poiront dans 8 jours volonterement ne poiront que quatre denyers par livre et, passé ladicte houictaine, poiront la somme de 2 soultz, et sera la presente ordonnance bannye.

Guillaume Sallaun et Rion Pochon procureur de la paroisse de Sct Mathieu faict offre de recepvoir cze que est debu par les paroisiens à deux soultz par livre et respondera desdictz denyers en son propre et privé nom et mectera l'argant que viendra scavoir à 2 soultz pour chaincune livre aulx fortifications de ladicte paroise.

Sourtant, la chandelle alumée, et appres l'estaincte de la chandelle est ladicte ferme pour ladicte paroise adjugée ausdictz Sallaun et Pochonn procureurs de ladicte paroise de Sct Mathieu.

Faict demander par ledict Le Borgne, sergent, qui vouldroict faire ladicte recepte en la paroise de Sct Melaine et Sct Martin en la mileure condiction.

Rolland le Bollouch, de la paroise de Sct Martin, prand la cotisation de ladicte paroise à la condiction que dessus fors l'esmolument tourné à son profit. — La chandelle allumé. — Et appres l'estaincte de la chandelle, ladicte ferme adjugée audict le Boulouch.

Pour la paroisse de Sct Melaine, ledict Noblet miseur offre appareil faire la cuilette de ladicte cotisation pour ladicte paroisse de Sct Melaine à la condiction que dessus. — Ordonné que les recepveurs de ladicte cottisation cy dessus només bailleront cauption dans samedy prochain.

— Du 19 avril 1590 : Present M. de Coatredrez.
Lecture faicte d'une lettre de M. de Rosampoul qui demande permission pour ceulx de Kemper Corentin pour avoir de la pouldre et picques.— Les deputés dudict Kemper Corentin sont permys de prandre la pouldre qui est entre les mains de M. de Kerhamon parceque les habittans desmeuront par ce moyen deschargé du marché d'entre luy et les habittans.

Prolongation de delay d'un moys acordé au sr de Helles pour aller trouver Mgr le duc de Mercœur, esgard au deceys nouelement advenu à feue sa compaigne, et par cze qu'il envoira a l’arier ban pour le servicze de l'Union suilvant le comendement que luy fera le sr de Coatredrez, cappitain de l'arierban.

Est advisé que les gentilzhommes qui ont esté cy devant receus à jurer l'Union, et quy doibvent aller trouver Mgr le dnc de Mercœur se randeront promptement avec mondict sr de Coatredrez pour le servicze de l'Union, près de marcher où ilz seront par luy comandés, à paine ausdictz gentilshomes d'estre declairé enemys de ladicte Sct Union, et de payer ranczon, et sera la presante ordonnance banye en ceste ville.

Sur la requeste faicte par Madamoiselle de Kerdren, a esté advisé que M. de Keranguen se desaesira de l'argent qu'il doibt aulx habittans et le presant miseur poirera le surplus de ce que monte la pouldre que ledict sr de Kerdrein a achepté de M. de Kerhamon. — Ledict sr de Kerhamon a promys temps jusques a mercredy prochain.

Pour compter pour la depanse faicte par M. Launay, predicateur, sont nommés Jan Floch, Morive Ballavenne et Toulbrunault.

Pour les 20 escus baillés par le miseur au sr de Keruzec, luy seront allouée.

— Du 23ème avril 1590, devant MM. de Coetredrez et le gouverneur. Il est deffandu a toutte personne de quelque calitté qu'ilz soinct de transportter leurs meubles aux champs ny hors les barieres, à paine de confiscation des meubles dont le tiers sera aux denoncziatteurs et les deux partz à la ville.

Il est ordonné que l'on pourvoyra a chaicune parouesse le nombre de 40 pippes et les capitaines des parouesses deputtés pour contraindre les particulliers de les fournyr et les mectre es placzes plus comodes pour les garder.

Trostrange deputté pour aller trouver M. du Faouet.

Le sergent Guillaume Thepault deputté pour aller à Roscoff et a St Paul pour lever tel nombre de soldartz qu'il poura.

Les srs de Kergaradec et Rosmeur rneneront les compaignyes de gens de pied pour aller sur l'enemy.

Le sr de Rosmeur à la prière de MM. de la Chambre a reprins la capitainerye de St Melaine.

Il sera escript aux parouesses de fournyr ce qu'il ensuilt : — La paroisse de Plougaznou une charette et 8 chevaux, la Villeneuffe. — Plouezoch 6 chevaulx, Kernegues a prins la charge. — Plouejan une charette et 2 chevaulx, M. le gouverneur. — Ploueigneau fournyront 10 hommes des plus fors pour portter la picque, et les contanteront et poyront pour le moys, aultrement bailleront 50 escus pour estre employés à ladicte fin, le sr de Kermadeza les advertira ce jour. — Plourin fournyra 6 hommes a 30 escus, le sr de la Bouessière les advertira. — Plougonven fournyront 10 hommes deffrayés pour un moys, aultrement 50 escus : ledict sr de la Bouessière. — Garlan fournyra les hommes, aultrement 10 escus et fournyront les hommes de ceste ville merquerdy a mydy altrement la poye ; et par mesure sera escript aux capitaines desdictes parouesses faire monstre et se tenyr soubz les armes, et sonner le tauxain, sy voyent l'enemy, pour couryr desus.

Le sr de Rostang a juré de se bien portter en calitté de capitaine de Sct Martin.

La Chambre ordonne que Jan Lorant, Pierre la Fleur, Jan le Moign, Francoys Trogoff, Hervé Le Luyer seront constitués prinsonniers ensemble Me Francoys le Grigneur, l'appoticaire. — Me Jan le Moign proteste que le procureur de ville sera sa partye : les habitanz et deputtés de la Chambre declairent estre leurs partyes.

Advisé que lorsque le vant sera bon à Jan Corail pour aller a n'Espaigne(sic) il sortira baillant cauption.

Si M. de Lesquiffyou demande Pierre La Fleur, luy sera delivré à se tenyr en sa maison et d'en repondre : et depuix delivré aux srs de Kergaradec et Rosmeur. — Francoys Trogoff desmeurera prinsonnier ensemble Hervé le Luyer jusques à ce que aultrement soyt advisé. — Pour le respect de Francoys l'appoticaire, sera interrogé le garson que l'on dict qui fust à Toncquedec passé laquelle interrogation y sera pourveu.

Dudict jour, devant M. le gouverneur, le procureur de ville, les srs du Restigou, Trelever, Coetglas, Rolland Sallon et aultres devant lesquelz Guillaume Gouellou, serviteur et mesaiger envoyé de la part de Tanguy Prigent, maistre du navyre nomé l'Ange, dict estre envoié par ledict Prigent pour advuertir Jan Corail et aultres marchantz quy ont proposé de naviger audict navyre es pays d'Espaigne et ce trouver estre audict Roscoff pour partir pour faire ledict voeaige : aussy ont esté ouys ledict Sallon quy faict aussy ledict voeaige, dict que le vent est propice, Pierre Corre, Francoys le Roch, Morice et Jan le Concas aussy mariniers, lesquelz disent le vent leur estre propice, et esperent, moyennant la grâce de Dieu, partir avecques la marée à ce soyr pour commanzer ledict voeaige : sur quoy au desyr de l'ordonnance de ce jour, est ordonné que ledict Corail sortira pour aller audict voeiage par la cauption qu'il a baillé de nobles genz Auffroy et Francoys Toulcoet, qu'il ne contreviendra au serment par luy faict à la Saincte Union, et aussy de faire ledict voeaige et ont signé : Auffray Toulcoet. F. Toulcoet.

— Du 25ème jour d'aupril 1590.
Advisé que le procureur de ville envoyra un mesaiger à Kerahes qui y tardera jusques à ce que le sre de Kerhir y soict affin que les cornpaignies de ce pays l'allent joindre.

— Du 27ème jour dudict moys d'avril en l'an 1590.
MM. de la Chambre ont deputé et commys les srs de Cleuzdon, de Kergaradec, Kervern, Keraultem et de Rosmeur pour recepvoir ce qui est resté de poyer pour la ranczon du sgr. de Restmeur, avecques pouvoir de donner quictance vallable dudict payement qui est la somme de 733 escuz et tiers, et de distribuer icelle somme par entre eulx et les aultres cappitaines et souldartz qui doibvent participer a ladicte ranczon : et pour la part competant à ladicte ville en ladicte ranczon, MM. de la Chambre donnent pouvoir à Morice Noblet, le miseur, de la recepvoir et de donner pareille quictance ; laquelle part desdicts habitans en icelle ranczon est 366 escuz deux tiers, faissant le tout ensemble 400 escuz qui est le total de ladicte ranczon.

Par advis de MM. de la Chambre le procureur de la ville a accepté les pleiges fournys par le sr d'Ancremel, et à la charge d'avoir les lectres garantyes passées par Me Jan Pouliquen et les hommes desnommés es dictes lectres se rendentz prisonniers, consent que ledict sr d'Ancremel soict eslargy payent son gardaige et ses depens.

Les srs de Kergaradec, Rosmeur, Pratanfeunteun, et Yvon Deleau deputés cy devant pour les cappitaines, chefs de guere et soldartz qui furent en la prinse dudict sr d'Ancremel font pareille acceptation, et ne commance le moys pour poyer que de ce jour.

Pour la recqueste de Paul Carrion, sont deputés Kernegues, Kernehec et Mesily pour compter avecques luy, et scavoir ce quil luy est debu, et iceulx ouy après avoir compté avecques luy reservé luy faire raison.

Large detenu prisonnier eslargy et baillé au sgr. de Coettredrez pour conduire son bagaige à la guere.

Trogoff eslargy et sera enrollé pour aller à la guere ensemble avecques les compaignyes de ceste ville.

Aufroy Guillemot detenu prisonyer eslargy, et seront advertys ses pere et mere de se tenir près de luy.

Pour J. Leff, et le servitteur du Griffon et le Pellerin sortiront de la prison lorsque les compaignyes hors ne (sic) soinct hors ; et sera cependant ledict Pelerin interogé, et au cas qu'il cogaoysse rien, reservé d'en ordoner.

Pour les deux gueulx mys prisonyers par Le Boton, elargys et banys.

Le jeune garzon qui s'est advoué au sr de Rosambaon sera elargy les compaingnyes es toutes hors.

Le Monyer qui fust prins à Plestin qui na chergé le Borvet elargy, poyant ses despenses, et au cas qu'il n'aict le moyen, le procureur de ville poira.

Advysé que Me Jan Delaige aura 10 escus promys pour aller avecques la compaingnye à la guerre, et luy sera faict advance de deux moys.

Pour le serviteur de Me Jan Bourguignon elargy, et sera ledict Bourguignon retenu.

Pour Hervé le Luyer elargy par la promesse qu'ont faict les srs de Restigou, Kernegues et de Rosmeur de respondre de sa personne, et aussy le Coetglas.

La Crosse elargy par ce que le sr du Morlan a promys le retenir en sa maison jusques à ce que la compaingnye soict sortye, et respondera de sa personne.

P. Jan le Moingn, elargy.

Estat pour le solde de la compaingnye qui doibt sortir : — Pour Kergaradec et de Rosmeur :

Aux enseingnes a chaicun des deulx qui sont taxés 15 escus. 30 escus.

A 6 sergentz des bandes ou corporaulx a esté taxé a chaicun 12 escus faisantz……………………………… 72 escus.

Aux 50 mousquetaires taxé à chaicun 7 escus. Faisant……. 350 escus.

Aux 50 harcquebuziers taxé à chaicun 5 escus faisant...... 250 escus.

Pour Martin Ga.............. advisé qu'il sera mys au collier pour y desmeurer deux heures et passé de ce sera eslargy.

Le sr de Rosmeur desclairé quicte de de la somme de 10 escus en laquelle il estoit taxé en la dernière cotizacion, pour comancement de recognoissance de ses voiaiges en la guerre.

Pour les parroessiens de Ploeigneau poieront au miseur qui leur en baillera quittance et aultres paroisses.

Il est advisé que l'on envoiera une aultre charette aux despans de la ville pour porter les baguages.

Les habitans promettent de respondre des mousquetz de M. de Coetredrez et d'aultres qui sont prins en cas quilz soint perduz.

— Du 1er jour de may 1590.
Jan le Briz dict avoir randu deux escuz à la fame de Kergaradec partant eslargy sauf etc.

Ordonné que le Pelerin sortira, poiant ses despans sil a le moien, sinon le miseur poiera.

Advisé que l'on envoiera cinq homes au Thoreau, deux de Sct Mathieu. deux de Sct Melaine et ung de Sct Martin, lesquelz seront contrainctz d'obeir à paine de 7 escuz et seront contrainctz par corps et aultrement à tenir prison pour 8 jours et jusques audict poiement.

Advise, que l'on baillera (scavoir le miseur) au moyne qui a esté à Dinan la some de troys escuz, lequel religieux nomé frere Lorans Loz.

Advisé que l'on baillera à ferme les debvoirs des papegaulx pour 3 ans à celluy qui baillera le plus, pour les deniers estre employés aux fortiffications de la ville, et sera le bail banny, pour estre baillé au plus donnant à vendredy, une heure après mydi.

Pour les fortiffications de la ville a esté advisé que ceulx qui ont advancé et advanceront seront remboursés avant rompre la recepte imposé en ceste ville pour les affaires de la guerre.

Pour voir faire travailler, et tenir estat du nombre des ouvriers en la paroisse de Sct Melaine pour les fortiffications, sont comys pour ceste sepmaine les srs de la Villeneuffe et de Kerviry.

Advisé que les sommes promyses cy devant à M. du Faouet seront poyés par le miseur qui les receuvra ce jour du sr de Kervren qui a promys ce faire.

— Du 2ème jour de May 1590.
Sur la resmontraneze faicte par le procureur de la ville pour le faict de M. de la Mote, est advisé que le procureur de la ville l'advertira que y devant de son consantement les 200 escus debuz par Katherine le Briz au sr de Kerveniou fusent demeurés à ladicte Le Briz pour la descharge de la ville, et à valloir en cze qui luy estoict debu pour la despancze des garnisons de M. de Goulaine et aultres ; mais sy ledict sr de la Mote les veult avoir, les habitantz declairent ne le vouloyr empecher ains pour tout leur interestz consantent quil les retire et en dispose comme il advisera. Pierre Tirel eslargy poiant ses despans. Helye de Campaigne ausy eslargy poiant ses despans. Pour la recqueste de Me Jean Bourguinon, sera faict raport à vandredy.

— Du 4ème jour de May 1590.
Advisé que les debvoyrs des papegaultz se bailleront à cze jour à un heure appres midy à cze luy quy fera la condiction mileure par avancze pour les deniers estre employés aulx fortifications de la ville : et est advisé qu'il n'est expediant de lever pour lesdictz papegaultz que pour l'an presant.

(Manque le f° 130).

.... Se plaignant neanltmoingtz avoir juré l'Union, ny contrevenu à son sermant, certains particuliers de la paroisse de Plestin auroinct ravagé sa maison et celle de son frère, recquerant estre mins en la protection et savegarde de Mgr le duc de Merceur, M. le gouverneur et MM. de la Chambre de l'Union à Morlaix, et seront lesdictz paroissiens advertys d'envoier en ville les themoingtz, sy aulchuns ilz ont, pour veriffier que ledict Briant aict rien faict contre ladicte Saincte-Union et son serment, et en atandant seront advertys de ne mal faire en corps ny biens audict Briant, ne ses domestiques, parceze que ledict Briant tenant son sermant à ladicte Saincte-Union est reczeu à la savegarde du Roy très crestien, et de Mgr le duc de Merceur, et en la protection de M. le gouverneur et Chambre du conseil de l'Union à Morlaix.

Pour la recqueste de M. d'Ancremel, est advisé que son acord garanty avecques le procureur de ville, il poura en toute seureté se retirer en sa maisonn, et par le sommant qu'il a faict au sainct party de l'Union des catolicques est receup en la savegarde du Roy très crestien, de sa justicze et de Mgr le duc de Merceur, gouverneur en ceste provincze : et deffanczes faictes à toutes personnes de luy mal faire en corps et biens ny à ses domesticques par cze qu'il ne contreviendra à sondict sermant à l'Union, ne prestera fabveur ny ayde à ceulx qui tienent le party contraire, et ne leur bailera aulchun recuil mesmes à ses enfantz quy portent les armes contre ladicte Saincte-Union : et à ladicte charge est permys d'aposer panonceaulx de savegarde en sa maissonn, et banyr ceste en la ville de Morlaix et ailleurs.

Pour la recqueste de Me Yves Gaultier, les habitantz declairent n'avoir moien d'acquerir son jardin, bien consantant qu'il soict recompansé du domaige y faict pour la fortification de la ville, lors et de mesmes que les aultres particuliers de la ville qui ont souffert pareil domaige.

Advisé que le miseur paira au sr de Kerauguen pour la minse d'avoir baillé les escarpins à deux prinsonniers qu'est la somme de 2 escus.

Sur la recqueste de Francoys le Bervet, renvoyé à mardy, et lors reservé faire estat.

Sera le sr de Kergaradec pryé de departtir l'argent que la ville luy doict jusques a son rettour.

Le miseur poira Jacques Guillemot d'un escu trois quartz pour le boys qu'il a baillé pour faire le coffre de la munition.

Sera le sr de Kerscau pryé de faire diligenter les randictions des comptes et venyr a mardy pour prandre asignation.

— Le 8 may 1590 en la Chambre.
Lecture faicte de la lettre de M. de Kergaradec.

Les receveurs fairont la deligence de faire poier la cottissacion, et sera banny que ceulx qui restent, s'ilz ne poient ce jour, ilz seront contrainctz a poier le double.

M. de la Bouessière faira deligence de faire vandre tout le foin et avoine de Plourin. — M. de Kerloaguen à Plougonven, et prandra toutz les foins, pailles et avoines qui sont a Bonrouguel, et pour aller à Ploueg.... — Plus sera prins les foins qui sont à Keranroux et allieurs en la parroesse de Plouejan, et pour ce faire, sont comys MM. de Kervescontou et Coatglas : aussy les pailles et avoines. — Aussy sera faict vendre les bledz, foins et avoines qui sont a Tryeuy par Bernard Nouel et le Kersech.

Aussy sera rendu en ville les foins et avoines et pailles qui sont à Kerouchant et Kermerchou : M. de Kermadeze faira la diligence. -- M. du Vieulx Chastel et Keranprovost fairont randre les foins, pailles et avoines qui sont à Taulle. — M. de Kerangoff fera apareil la delligence de faire rendre ce qu'il y a à Pleiber.

A esté advisé que quiconque sera trouvé à sortir hors la ville sans passeport sont déclairés rebelles et ennemys, et deffence a toutz ceulx de la ville de quicter la ville, et sera banny affin que auchun ne pretende cause d'ignorance.

Aussy a esté advisé que M. Kerscau et Francoys de Lisle fairont deligence de scavoir le nombre d'armes et d'homes qui sont en la rue des Vignes et au long jusques à la bariere de Plouejan. — MM. Kernegues et le Reaniour le reste de la parroesse. — En la ville close sont comys à ceste fin le sr de Mesily et Kerscau Quintin ; et aulx faulxbourgs de Sainct-Mathieu sont comys Nicolas le Blonssart et Kerbabu. — Pour Sainct-Martin Pierres Noblet et Thomas Guehou.

Le miseur baillera 30 escuz, à chaicune parroesse, 10 escuz, pour achepter 2 pipes à quart d'escu chaicune pipe, et seront contrainctz ceulx qui ont des pipes de la bailler audiet pris.

Kerhamon et Olivier Nouel prandront l'argent du miseur pour achepter des pipes et faire les baricquades, et pour faire randre les bois qui sont par terre dans le bois du Stiffel.

Pour le regard des 2000 escuz que doibt le sr de Toulbrenaut pour les papegautz, il a esté advisé qu'il les baillera aux parroesses tiers à tiers, et retiendra sur le gros deniers pour l'office de Sainte-Barbe.

Rolland le Boullouch offre randre ce qu'il a receu sans rien prandre pour sa paine, moyennant, qu'il soict desehargé de sa recepte et qu'il ne soict contrainct de faire bon du cadre.

A esté dict que les receveurs auront ung soulz par livre sur le gros affin de faire plus grande deligence de recevoir les tailles.

A esté advisé que le sr d'Ancremel poiant 800 ou 1000 escuz promptement et baillant ses hommes cauplions reseantz en ville de peier dans 15 jours le surplus seront eslargys, et pour faire les escriptz et assurances ce touschant est comys le procureur de la ville.

Sera delivré à Yves Prigent ung escu et demy et son cheval, le surplus demeurera jusques à avoir informé plus amplement dudict Prigent qui est la somme de 28 escuz.

Ledict le Boulloux avecques ung sergent a faict venir en la Chambre le sr de Kerallarnaut. — A esté dict qu'à la prennent chambre sera advisé sy ou nom ledict seigneur poura la somme en quoy il est cottisé.

— Du 10ème jour de mai 1590.
Bonavanture Villaine, marchant de la ville de Nanttes, est licentyé le recharger sa marchandise sans fraulde.

Jacques le Grand est pareillement licentyé de charger 3 toneaux de bled pourveu qu'il ne charge aultres hardes parmy.

Matthieu Floch pareillement lycentyé de charger 23 toneaux.

Advise qu'il sera escript à MM. de Quimper Corentin.

M. le bailly et Trostange, deputtés, pour faire boucher les portes des maisons estantes de vers la Roche, et ce dans ce jour ; et aussy les portes estantes sur la ripvière, et seront contrainetz à paine de 10 escuz.

Le sr de Kervern et Pratanfeuten sont deputtés pour faire boucher les porttes de la parroesse de Sainct-Melaine, et est, aussy pryé le sr de la Villeneuffe d'y assister. — Pour Saint-Mathieu les srs de Mesilly, le Morlenne Villeblanche.

Ordonné au miseur payer les taverniers de la moictyé de leur debu au desir de leurs billets et sentences qu'ilz ont du procureur de ville, et tirant ledict miseur quictance desdictz taverniers, luy servira d'acquit.

Le sr d'Ancremel declairé libre d'aller à ses affaires.

Advisé que la somme de 20 escuz en laquelle sont taxés demoiselle Barbe le Rumeur et Jan le Gendre, ilz la poyront par moictyé.

Le sr de Toulbrunault a presenté 200 escuz pour le deboir des papegaulx luy adjugés pour ledict pris comme plus offrant et dernier encherisseur, offrant les payer à quy sera de la Chambre ordonné ayant quittance : et estant deubment garanty : advisé, que ledict sr de Toulbrunault poyra ladicte somme de 200 escuz entre les mains de Morice Noblet, et est ordonné departyr ladicte somme scavoir 4 escuz 18 soulz aux prebtres de Nostre Dame du Mur pour la messe de saincte Barbe, et le reste tiers à tiers aux troys parouesses de ceste ville pour estre emploié aux fortifications d'icelles, suyvant quoy a ledict Noblet presentement receu d'avecques ledict sr de Toulbrunault ladicte somme de 200 escuz et a signé sur le cayer.

Advisé que le miseur poyra les oupuriers quy travaillent au chateau suyvant les billets de M. le gouverneur sur les deniers d'octroy, et seront les deniers que deboursera ledict miseur passés en claire mise.

— Du 11ème jour de may 1590.
Lecture faicte des lettres de Mgr le duc adressantes a MM. de Morlaix, escriptes à Redon 5 may 1590, signées : Phles Emanuel de Loraine.

Le sr de la Villeneuffue a promys d'aller a Lanmeur avecques les coppyes des lettres de mondict seigneur pour leur faire entendre.

Le sr de Kervern deputté pour aller en Cornoaille.

Pour les reparations : pour le lundy le sr de la Villeneuffe et le greffier Calloet; le mardy, Trelever et Perauld ; le merquerdy, Kerhunan et Richard Campion ; le jeudy, Kervern et Yvon Kerret ; le vendredy, le sr des Illes et Kerochyou ; le sabmedy, le Botou et Kergadou.

Le greffier Calloet et Jacques Guilemot comys pour recepvoir les deniers et payer ceulx qui travaillent ceste sepmaine. — Jan Guillemot et Jacques Toulcoet le jeune, commys pour la semaine quy vient.

Janin Guillou eslargy pour chercher le residu de la ranczon de M. d'Ancremel baillant cauption bourgeoise de ce representer au temps luy limitté, atandu consentement de ses aultres consortz prinsoniers quy l'ont deputté pour faire pourchatz desdictz deniers : et presentement se sont mys a cauptions scavoir : noble homme Pierre de Kermerchou certiffié solvable par noble homme Vincent de Kermerchou lesquelz se sont obligés solydairement en ladicte plevyne parceque ledict Guillou leur a promys indampnitté et d'aultant que ledict Guillou ne scaict signer, a pryé…. de signer à sa requeste affirmant ne scavoir signer : Kermerchou.

— Du 15ème jour de may 1590.
Sur la rernonstrance et requeste de M. du Helles pour la difficulté des chemyns pour aller trouver Mgr le duc, luy a esté prolongé delay de ung mois.

Le navire Ollonnois est par advis de la Chambre licencyé de s'en aller.

Advisé que l'on rendera au filz du sr du Rostellec ses acoutrementz qui furent arestés dernierement en la bariere de Poulfanc.

Pour le regard des abillementz des enffentz de la Villeneuffve Pollart, sy les filles sont demeurantes à Rosgoff avecques leurs père et mère, la prinse declairé bonne, et s'ilz sont demeurantes avecques leur oncle seront delivrés ce qui sont en essance.

La Chambre a deputté le capittaine Moricquin pour aller se saesir de la personne de Yves le Romeur et icelluy ranche en ceste ville, et prié M. de la Villeneuffve de luy tenir la main forte.

Apprès avoir ouy le recteur de Plouigneau, Me. Yves Lerren et M. Jan Pon prebtres de ladicte parrouesse, a esté le sr de Kerloaguen creé à leur capitaine et noble homme Francoys Sallaun, son lieutenant : deffanse faicte à touttes personnes de ne leur faire injure et ausdictz parrouessiens, et ausdictz parrouessiens de faire leur debvoir, et seront promys les contractz ; permys de faire bannyr la deffancze.

Aussy ont esté presentz de la parroisse de Ploueigean. Pezron le Roux, Jan Marrec, Hervé Melniezre, Yves Meusyc, Guillaume Corre, Francoys Crechguen, Mathieu Rolland, procureur de ladicte parroesse.. Guillou.... ce que dessus.

— Du 18ème jour de may 1590.
Advisé que l'on leuera pour l'advenir 30 escus par sepmaine pour la fortiffication de la paroesse de Sainct-Melaine, et ce sur les demeurantz en ladicte parroesse, et pour estre l'esgail et cottisés seront només Nicolas Nuz, Jacques Toulcoet et Ollivier Nouel, Yves le Loaczault et Thomas Pridiry, et sera le rolle leu au prosne de la grande messe, et pour le passé seront les cottissés contrainctz au paiement sellon la taxe faicte et le tout par advance pour chaicun estre remboursé sur les deniers de la recepte.

Pour scavoyr le lieu plus comode pour faire les tranchées de Sainct-Martin sont només M. le gouverneur, MM. les juges et procureur du Roy, juges consulz, procureur et miseur de la ville, le capittaine et lieutenant de Sainct-Martin, Kervezet, Jan Floch, Jacques Demay, Keranprovost, Pierre Noblet, Tanguy Jobart : pour Sainct-Melaine, M. de Kergaradec, les capitaine, lieutenant et enseigne, Coetanfrotte, Jan Calloet, Kerscau, Kerigonval, Me Hervé Jagu, Francoys Noblet. Sainct-Matthieu, M. l'archidiacre, le capitaine, lieutenant et enseigne, Delay, Pierre le Morlen, Keranguen, M. de Kermadeza, M. de Restigou, Pierre Thepault, Kergurunet, et se trouveront soubz la halle à 2 heures appres mydy.

Permys de fulminer monittoires pour avoir preuve des meubles de Kertanguy, la dame de Kerlan, et aultres qui recellent les biens de ceulx qui tiennent le party contraire et mesmes pour Pierres Geffroy.

Pour la pippe de vin arresté en la barriere des vignes advoé par le sr de Kerdalach, luy sera delivré à la charge de n'employer ladicte pippe que pour son usaige à paine d'estre déclairé ennemy et estre ravaigé.

Il est advisé, pour la ranezon de Keresot que les hahitanz de Morlaix auront ung tiers, les parouessiens de Plestin, ung aultre tiers, et capitaine Moricquin et ses soldartz ung aultre tiers ; et seront appellés les srs de Rochmorice, Kerdalach à mardy pour faire la ranczon.

Les Srs de la Villeneuffve et Rendony deputtés pour calculer les billets du sr de Trelever.

Les srs de Rosmeur et Trelever deputtds pour achapter la casse avecques l'Anglois, et sera achapté pour la paroesse et que le procureur de ladicte poyra ladicte casse.

Francoys Moricquin est deputté pour faire compaignie avecques Yves le Remeur pour aller en sa maison pour querir ses lettres et retourner en mesme compaignie.

La Chambre est d'avys que Yves Prigent sera poyé de la somme de 27 escuz et demy comme les aultres qui ont avancé pour les affaires de la ville.

— Du 22ème jour de may 1590.
Francoys Cazin a juré la Saincte Union entre les mains de M. l'archidiacre de Plouegastel et a signé : F. Cazin.

Des comptes qui ont esté trouvés en la maisonn de Yvon le Rumeur seront visités par MM. le seneschall, lieutenant et le sr du Restigou, et cze faict pouront ordonner sur son eslargisernent.

Le sr de Kerscau et Rosmeur deputés pour lever les deniers de la fortification pour ceste semaine en la paroise de Sainct-Melaine.

Sur les recquestes du medecin Sileanne et Alry est avisé quilz poiront leur taxe faict par forme d'amprunst, et pour estre ramboursés suilvant l'ordonnance de la Chambre.

Sur la resmonstrance faicte par le procureur de la ville et recqueste de MM. les religieulx de ceantz, est ordonné, atandu les presentz troubles, que ceulx à quy apartienent les maisonns en la rue des Vignes, joignantes le vergier du covent feront barer des bares de fer les fenestres et overtures qui y sont sur lesdictz jardrins dans houictaine appres la publicquation de la presente ordonnance, à paine de 12 escus pour chaincunne maisonn ; et sera dans ledict temps bouclier la porte ovrante de l'une desdictes maisonns audict vergier ; et pour ce que lesdictz religieulx disent avoir privilaige de contraindre les proprietaires desdictes maisonns de retrancher et boucher toutes fenestres et ouvertures sur leurdict vergier fors la veue morte, est dict pour cze regard quilz se pourvoiront en justicze.

Les noms des soldartz debandés à Plestin : Jean Dagorne, Piere Perennes, Adrien Boutonnier. — Avisé que les soldartz qui sont à Plestin y demeureront pour achever leur moys qui achive au 29e du present moys, et ceulx quy sont debandés et retirés sans congé de leur cappitaine seront constitués prinsonniers, et avant leur élargisement sera ordonné de leur punition, et permis à tous sergentz de les constituer prinsonniers.

Sur la recqueste des paroisiens de Lanmeur et Locquirec, est advisé que le sr de Gliviry comparoistera vandredy prochain en la Chambre pour estre ouy, et czepandant deffandu de lever aulchuns deniers sur lesdictz paroisiens lesquelz sont mins en la protection et savegarde de Mgr le duc de Mercœur et de ceste ville, et deffancze faicte audict Gliviry de mal faire ausdictz paroisiens et par expres aulx desnomés en ladicte requeste, et comparoistera ledict jour ledict sr du Gliviry à paine d'estre desclairé esnemy, et luy sera escript par le procureur de la ville par Piere Bouchet, procureur de Lanmeur, et sera creu de la randiction de la lettre sans aultre signiffication de la presente ordonnance.

Sur la recqueste du sr de Trogoff, est advisé qu'il poira par cze que c'est en forme d'amprunct et pour estre ramboursé.

Sur la recqueste de Francoys le Beruet, renvoyé à vandredy.

Sur la recqueste de Kerisot, et ouy le sr de Rochmorvan pour les paroissiens de Plestin, et le cappitaine Moricquin, a esté ledict Kerisot taxé à 150 escus de ranczonn en oultre ses despans.

Le tambour et cacze de l'Angloys pour lequel estoict deputé pour faire le pris, le sr de Rosmeur et Trelever quy ont dict ne povoir avoir ladicte cacze à moins de 6 escus, est dict que le sr de Trelever poira ladicte somme de 6 escus, et aura aultant de decharge sur les deniers de la ville.

— Du 25ème jour de may 1590.
Lecture faicte de la lettre des parouessiens de Plouegat, par où ilz offrent aller asister les parouessiens de Plestin. — Sera escript aux parouesses d'estre presentz pour aller à Plestin.

Noble homme Francoys Sallaun a presté le serment de lieutenant soubz M. de Kerloaguen en la parouesse de Ploueigneau.

Sera escript et dressé des memoires bien amples au recepveur Kerellot pour conferer avecques MM. de Guingamp.

Pour la pouldre vandue par Kerhamon à Kerdrein pour la ville, est advisé que suivant les precedentz avis, Yvon le Bailly poira 39 escus, une reale et demye dessus les deniers par ledict Bailly reczeus du dernier quartier des deniers communs, et que ledict Keranguen touchera un premier quartier de l'an present desdictz deniers communs touchant ausquelz ledict Keranguen cognoit avoir a cler entre mains des deniers de la ville 200 escuz laquelle some ledit Keranguen poiera à Moricze Noblet miseur à present, lequel poiera ladicte some dans ce jour et acquit dudict sr de Kerdrein pour la pouldre et parpoiera le surplus, et assignation à 2 heures de ce jour.

Ceulx qui ont faict reffuz de poier leur taxe pour les rampartz seront contrainctz par touttes voies et rigueurs de justice.

Advisé que les srs de la Villeneuffve, Coetanfrotter, la Villeblanche et Kernegues yront dimanche au prosne de Lanmeur pour scavoir l'intention des parouessiens pour le faict du sr de Gliviry lequel sera pryé de desmeurer en ville et tiendra son arrest en la maison noble Nicollas Sallaun sans quil puice escripre ne parler ausdictz parouessiens jusques appres ledict prosne et retour desdictz deputtés ; et sera ledict Sallaun exempt de la garde le jour et nuict que ledict sr du Gliviry sera en sa maison, et a ledict Sallaun presté le serment, aussy sera le sr de Kerguelen, s'il se trouve au prosne de la grande messe, pryé de ny asister pour eviter à touttes suspition.

Advisé que Nicollas Sallaun aura demy escu par jour pour la garde du sr de Gliviry.

Pour le faict du Rosmeur, sont deputtés Keranguen et Trelever pour compter pour le voeaige de M. de Kerloaguen et luy a Mgr de Mercœur, et ce poyra par ses mains desur les deniers du paeaige dont il est fermier, et sans prejudice des aultres sommes quy luy sont debus sur le present livre, et 15 escuz qu'il dict luy estre debuz pour la bariere de…

Pour le compte de Jan Duplesseix, assignation à ce jour une heure apres mydy, et sera prevenu de se trouver, et à sa faulte de ce faire, sera decerné executtoire contre luy.

Advise que Yvon le Bailly poyra les escuz au sr de Kerscau suyvant le billette du sr de Kerdrain, et aura descharge sur ses comptes.

Sur la requeste presentée par la dame de Kerlan, il est advisé quelle poyra la somme 50 escuz en laquelle a esté taxée, et à l'advenyr ne sera cotisé sy elle ne vient desormais en ville ; et pour la demolition des barieres faictes devant la portte de sa maison, reservé faire estat passé les troubles, ou apres que ladicte dame de Kerlan aura faict les fortifications quelle offre faire au deriere de sa maison.

Advisé que les fermiers de la novelle coustume et par advancze sur le prochain quartier bailleront 50 escuz a chaicune paroesse pour les fortifications, scavoir : Sainct-Matthieu, Mesilly ; Sainct-Melaine, Kerscau et Kerhamon toucheront 20 escuz, pour les 30 escuz Trelever, et pour Sainct-Martin, Toulbrunault.

Keranguen et Mesilly deputtés pour donner pris au voeaige faict au Parc du sr de Lanydy.

— Du 28ème may 1590.
Le sr de Gliviry licentyé de soy retirer appres avoir ouy la Villeneuffe, Kernegues et Keranguen aiantz esté député pour ouyr les paroisiens de Lanmeur.

Sera escript à Mgr le duc de Merceur, à M. de Coatdredrez et à la Mote.

Paseport acordé au sr de Kerdate pour venyr en ceste ville de troys jours à comanczer des mercredy prochain et sauff a prolonger par M. le Gouverneur de ceste ville, Main ouy ledict sr de Kerdate en ses affaires.

Paseport acordé à M. du Leurven pour retirer unne cuiracze de la ville.

Deputés pous nous avoir l'oil seur les ovriers qui travailent en la paroisse de Sainct-Melaine ceste semaine : Francoys Noblet, Yvon le Bailliff pour mardy ; Fraucoys Dugué, Jean Duboys, mercredy ; Fraocoys Delisle, Guillaume Vigot, vandredy ; Jan Lesquelen, Henry Guilemot, samedy.

Pour faire la cuilette des deniers pour ceste semaine sont comys Ollivier Nouel, Yvon Kerret.

— Du 30ème may 1590.
Lecture faicte d'une lettre missive envoyée par noz concittoiens estantz à Sainct- Paul de Léon, d'une aultre envoyée par M. de Léon à M. de Kergournadec'h, et d'aultre que ceulx de Roscoff escrivent à mondict sr de Léon, et d'une aultre envoyée pour responcze ausdictz de Roscoff pour responcze de l'aultre lettre par ceulx de Sainct-Paul. — Lecture d'aultre lettre envoyée de Plestin par Kerochiou, Kerveguen et Trostang.

La ville baille son tiers de la ranczon de Keresot aux paroesiens de Plestin pour l'eutretenement des soldatz quy sont de ceste ville en ladicte paroesse jusques à ce quil soit aultrement ordonné pour le temps demeureront audict Plestin, et ladicte ranczon pour le regard de l'interest de la ville et de Plestin reduite a 80 escuz, et le Pratguen norné pour recepvoir.

Advisé que le miseur fera l'advancze de la pouldre envoyée a Plestin, sauff a se faire randre ladicte pouldre par les paroissiens de Plestin, ou la valleur en argent.

Advisé que la Villeneuffve et aultres qui furent à Lanmeur dimanche dernier seront remboursés par le miseur de 56 soulz tournois quilz affirment avoir despensé audict voiaige.

Les deputés pour faire la cuillete des deniers pour la fortiffication en la paroesse de Sainct-Melaine fairont bon desdictz deniers, sauff a eulx a contraindre les cottisés a poyement par toutes contrainctes.

Sur la plaincte de Jan Calloet contre Matthieu Rigoleur, est advisé que ledict Rigoleur sera prins au corps et constitué prisonier jusques a estre ouy en la Chambre.

Pour voir les billettes et comptes de Kerhamon sont comis les srs de la Villeneuffve, Kernechriou, Kernegues et Jagu à une heure après midy de ce jour.

Sur la remonstrance et recquette des paroissiens de Plouegat, d'avoir leur enseigne qui fut gaignée sur eulx du temps quilz estoint du party contraire, laquelle a esté vouée et minse en l'église de Sainct-Melaine par MM. les cappitaines qui la prindrent, a esté dict que ladicte enseigne y demeurera comme vouée à l'église et se pourvoiront d'aultre.

Pour la nécessitté d'une gabarre en ceste ville, a esté dict que le miseur fera acoustrer le passage pour servir de gabarre pour nettoier le havre.

Pour la recquette de Kervern, luy est permis de contraindre les taverniers a poiëment des deniers d'impostz et billotz, et sauff à eux de se faire poier par le miseur de ce qu'il leur est debu pour la despance des soldatz que ont esté chez eux durant les garnisons.

Sur la recquette de Katerine le Briz a esté ordonné au miseur luy poier 100 escus pour luy par faire la moictyé de la somme qui luy est debue pour les gentz de guerre qui ont esté ches elle durant les garnisons.

Avisé que le lacquays du sr de Lesmes sera eslargy poiant ses despans.

Sur la recquette du sr de Kerlessy affin d'avoir sa part es ranczsons des srs d'Ancremel et du Restmeur, a esté dict que pour la ranczon du Restmeur il se pourvoira par devers les srs du Cleuzou et Pernaranvern qui ont tousché la part des cuiraciers de ladicte ranczon ; et pour la ranczon du sr d'Ancremel qui n'est de partye, sera ledict sr de Kerlessy appellé tant pour y avoir sa part que de se faire poier de ce que luy estoit debu de ladicte ranczon dudict sr de Restmeur.

Pour la recquette de Francois le Bervet d'estre eslargy a esté nemis de faire estat à vendredy, et que alors le procureur de ville fera venir MM. le bailly et procureur du Roy, et alors sera faict aussy droit sur la recquette du Moulnier quy a charge le moulin Bervet.

Pour la recquette de Guillaume Tourbault et Jan Noir des paroisses de Mur et de Mouillac sont permis de se retirer.

— Dudict jour a l'appres disner, à la Chambre.

Advisé d'envoyer la Couleuvrine par terre, et par mer sera prinse l'une des Lisirart du chateau avecques quattre bouettes et 60 hommes pour aller par mer pour conduire les vitrailles et ladicte piecze de Lisirart. — Et depuix a esté advisé que toutz les canons iront par mer.

Le sr de Kerochijou et Tanguy Jobart, Pierre Corre et le jeune Pierre Cosker commys pour faire les charges du canon et ilz auront la charge de la conduicte, aussy a esté advisé que Jacques Riou, Pierre Prigent y asistent.

Advisé que le procureur envoyra 300 livres de pouldre et en acordera et tirera le meilleur marché quil poura.

Les habitantz sont d'advis d'envoyer 200 harcqueboutiers oultre le nombre qui est à Sainct-Paul.

— Du 3ème jour de juign 1590.
Lettre de M. de Kerguaryou leue : il demande la grande piecze d'artillerie, ung millier de pouldre et nombre de — Le miseur Kerguera et le Raddoar deputés pour faire charger le canon et pour prendre la pouldre et les balles : Pierres Prigent et Jacques Riou comis et deputés pour ayder à charger le canon et le conduire.

Advisé que l'on escrira au duc l'entreprinse aresté faire, et le deseingn de Kerouseré par le mesaiger que la Calaretz envoye vers son Altesse, et sera baillé ungn passeport audict mesaiger.

Jacques Guillemot et Pierre Guingamp comys pour assister demain aulx tranchées de Sainct-Melaine.

Toulbrunault offre sa pouldre a 25 soulz tournois.

Gouferch rendu prisonyer par le sr de Penanuern eslargy avecques injonction à l'advenir de mieulx vivre.

Advysé d'escrire au sr de Penarvern pour faire arester les deniers debues au sr de Kernot par Katerine Guillou et Levenan latz.

— Du 4 juing 1590.
Lecture faicte de deux lettres missives apportées par M. de la Motte de la part de Mgr le duc de Merceur, et d'une comission pour prendre 3,000 escuz sur les biens des politicques pour la fortification de la ville.

Lecture faicte d'aultres lettres de mondit sgr. duc adressantes aus officiers de la justicze de Morlaix, et de deux comissions pour assambler le ban et arriere ban de Treguer et Léon.

Pour faire la cuillette des deniers pour la fortification de la paroisse de St-Melaine, sont nommés et choisis nobles gentz Yvon le Bailliff, et Francoys Noblet pour la presente sepmaine.

Les srs de Kerscau et Trelever depputés pour aller denoncer la deffense faitte aux ouvriers de la paroisse de St-Melaine de ne faire portes es murailles de la fortification de ladicte paroisse.

Deryen Bihan de Roscoff eslargy par la caution qu'il a presentement baillée de Nouel Thepault de se representer s'il est requis, et a juré l'Unyon entre les mains de M. l'archidiacre, et à Chartrenier, descharge poiant ledict droy et ses despans.

— Du 8ème jour de juing 1590 en la Chambre.
Lecture faicte de la lettre de Mgr de Merceur dabtée le 4e juing 1590. Signée Phles Emanuel de Loraine.

Lecture faicte de la lettre de M. le gouverneur de Morlaix adressante aux habitantz de Morlaix, donée au camp devant Kerouzeré, dabtée le 7 juign 1590.

Advisé que les habitantz advouent la lettre escripte par Ollivier Nouel à Mathieu le Moyne estant apresent à St-Mallo pour avoir troys milliers de pouldre et 300 balles et promectant rembourser ledict Nouel du pris des dictes pouldre et balles, et l'indempniser de l'achapt et negotiation qu'yl auroit faicts touchant ou de tel nombre quy poura estre fourny.

Aussy lesdictz habitantz advouent la charge baillée par ledict procureur à noble Yves Deleau pour 1500 livres de pouldre.

Ordonné que le procureur de la ville indemnisera le sr de Kerdrein vers le sr de Kerhamon suivant l'ordonnance cy devant, sauf son recours vers le miseur pour ce que chacun doibt suivant ladicte ordonnance du 25e may dernier contre lesquelz est executoire decerné.

Ordonné aux parouessiens de Ploueigneau de faire baricades et abattre des arbres par tout oh ilz voyront estre nessecaire pour baricader les chemins et faire santilles (sic) suyvant les precedanttes ordonnances, et à peine à ceulz quy se trouveront deffailantz aux gardes santinelles, et faire lesdictes baricades poyer ung escu d'amande pour chascun deffault et estre declairés rebelles et ennemys.

Ordonné à toutz, se retirer à leurs capitaines et corporaulx ou ceull qui sont commis à leur commandement aux lieux leur assignés et ny bouger soyt de jour ou de nuict sans permission de leur corporal ou commandant à peine de 6 escuz et destre declairés ennemys à leur pays.

Pour le cheval du Fetoux sera recongu (sic) au retour de M. le gouverneur du camp de Kerouzeré.

Advisé que le marché tiendra pour derain au vieux marcheix et les porrtes fermés fors le guichet, et que chaicune escouade se tiendra soubz les armes et feront garde exaltement soubz paines quy eschest, et sera banye la presente ordonnance.

Les srs de la Vlleneuffve, Kernegues, Kerscau, Kerigonal, Jan Guillemot sont commys pour baricader les chemins vers Coëtgongar.

Advisé que le miseur baillera 30 escuz à Tanguy Jobart pour estre délivré à Kerochiou pour estre amployés au poyement et entretenement des canoniers estantz au camp devant Kerouzeré.

Advisé que l'on prandera 8 pieczes dolour du magasin des biens estantz au celier de M. le seneschal, et seront prises et estimées par Vincent Kermerchou, Nicollas Nuz et Yves le Bailly, et sera faict estat de quel basteau ilz ont esté deschargés.

— Du 11ème juign 1590, en la Chambre.
Sera escript responcze à M. le scolasticque à Guingamp.

Advisé que le miseur poiera 2 escuz au Fetoux pour son cheval en attendant le retour de M. de Kergaryou pour savoir sy luy est deub davantaige.

Lecture faicte de la lettre envoyée par MM. de St-Malo.

Advisé qu'il sera escript à M. le gouverneur pour le suplyer de renvoyer M. de Kergaradec son lieutenant en cette ville pour commander.

Advisé pendant le siege de Kerouzeré qu'il y aura 3 compaignyes toutz les jours et les nuitz en chaicune parouesse, et contrainderont les soldatz denomés en leurs roolles de se y trouver sur les paines portées par les ordonnances cy devant.

Sera escript aux capitaines de Plourin, Ploujean et Plouezoch de renvoyer le nombre de soldatz qui a esté cy devant advisé à Plestin.

Sera escript à M. de la Tour pour envoyer le nombre des hommes qu'il a promis pour troys jours. Deputés de la paroisse de St-Melaine pour les loger, scavoir : MM. de Penanvern, Trelever assistés du sr de Kervern ; St-Mathieu : Kerscau, Coëtglas.

Les srs Kermadeza, Coetanfroter, Kerchunaut deputés pour voir la venelle près Kermesjoly et la venelle du Mestre.

Requeste presentée par noble home Françoys de la Ripvière, advisé qu'il sera clargy, baillant caution de se representer à paine de 200 escuz et comparoitrera à la prochaine assemblée après houitaine pour estre ouy en la Chambre qui sera demain en houict : ses pleges, Kerchounan et le Coëtglas : Ol. Nuz ; Levier.

Sur la recqueste de ceulx de Ploueigneau, seront mis à la protection des habitans et savegarde du Roy catholicque et Mgr de Mercure gouverneur, et deffancze faicte de les injurier en ceste ville, sauff à informer et proceder contre les particulliers qui se trouveront rebelles et favorisant les ennemys.

Ordonné à M. le miseur de payer à Guyon Raoul 10 livres et demye de pouldre fixe à 24. s. tournois la livre. — Le miseur envoirra querrir de la pouldre au lieu d'où il a heu 200 livres et sera randu en ceste ville aux frais et despans de la ville.

Sera demoly la muraille du jardrin du Bruil devers la ville, pour ce faire Toulbrunault et Kerbasqiou deputés.

Advisé que le capitaine de St-Martin fera venir 25 arquebuziers de la paroisse de Taullé et seront logés o les particulliers qui les nouriront : le sr du Vieuxchastel, Kerbasquiou et Kermorvan deputés pour escripre au capitaine.

— Du 12ème jour de juing 1590.
Avisé que les hahitantz se remectent pour les condictions et termes de la capitulation avecques les asiegés de Kerouzeré à paser par les advis de M. le gouverneur, appellés les principaulx estantz apresent au camp, tel nombre qu'il advisera.

— Du 14ème jour de juing 1590.
Guillaume Bigot et Françoys de Lisle sont commys pour recepvoir les deniers de la fortification de la paroisse St-Melaine pour ceste sepinaine.

Sera Mathelin Larchiver mandé untre lundy pour avoir l'oeil sur les fortications de St-Melaine pour houict jours, jusques à ce que aultrement soyt ordonné, et sera le vicquaire de St-Melaine pryé d'y assister et de prendre le nom des oupvriers.

Sera la muraille du jardrin près de la bariere de Nostre-Dame de la Fontaine tenu en ferme par Me Thomas Fleurdeville abastue à raz de terre.

Le sieur de Penanvern comys pour faire une tranchée près le logeix de la dame de Kernon.

Sera faict ung bariere en la rue des Vignes près l'eglise des Jacobins, et pour y avoir l'oeil sont comys Kervern et Jan Guillemot.

Advisé que l'on prandera du boys pour faire les baricades aparantes au Mur, au Val Keret, et y travailleront chacun en son canton, et le recepveur Kerhero baillera sur sa recepte 90 escuz au miseur pour les departir aux paroisses, à chacune 30 escuz.

Ordonné au procureur de la paroisse de St Mathieu parachever promptement la muraille près la rue des Berbis (sic), aussy est enjoinct de faire accomoder la ripviere près Traoulen.

Martin Jaouen a juré l'Unyon entre les mains de M. le scolasticque, et promet d'employer sa vye et moyens pour la manutention de la religion catholicque, appostolicque et romaine. M. Jaouen.

— Du 15ème juign 1590.
Delfanse feinte de non couper plus en l'advenir aux boys de Penarven, et que l'on praigne au Val Kerret, au Mur et à Kernechronvel.

Lettre de Solimant, de Kerahes, lene et contenant advertissement que le conte de Chemillé, est à Quintin avecq compaignie de 40 cuirasses et 60 harquebusiers.

Sur la recqueste de Françoise Paul ordonné qu'elle sortira poiant ses despans.

Ordenné d'envoyer messaigiers aux capitaines des paroisses pour les advertir de faire bon guet et de la venue du conte de Chemillé à Quintin.

Sera escript à MM. de St-Malo pour les prier de faire au sr de la Moussaie, leur prinsonnier, escripre à sa garnison de Toncquedec de ceser les actes d'ostilité sur les paroises et le pays, et en sera envoyé un messager exprès.

Le miseur et Vincent de Kermerchou comys pour accorder avecques (lacune) marchand, pour faire rendre 600 livres de pouldre en ceste ville et des bollets propres pour les pièces de la ville.

Yvon Core, prinsonnier, ordonné qu'il sortira payant ses despans.

Sur la requeste de Françoys le Bervet sera feint et ouy le sr de Launay et le sr de la Mote.

Il a esté advisé que Françoys le Gall aura la maisonn de l'Arbalestre en laquelle desmeure (lacune) pour la fabrique de la pouldre pour servizo de la ville.

— Du 19 juing 1590.
Sur la recqueste de Françoys Quintin, ordonné que la pipe de vin luy sera vendue poiant les fraictz que le sr de Kervern dict estre environ 9 realles.

Ordonné que Guillaume Rolland, prinsonnier, sera retenu esdictes prisonns.

Sur la recqueste du sr de Quistillic luy est permys de prendre Pasco Barbier, prebtre, et le rendre en ceste ville pour, luy ouy, estre ordonné sur sa recqueste.

Pour le faict de la Rivière advisé que Stangier et le soldart qui prind ledict Larivière seront ouys, auparavant faire acte sur sa requeste et escripra le procureur de (manque le f° 149).

……… Que pouroict advenir au debvoir d'impost et billot sur la plainte de Kervern, impositeur, est advisé qu'il aura rabays du debvoir de deux toneaux.

M. le procureur du roy prandera un extrait d'avecq ceulx quy ont faict la recepte pour la fortification de la paroise de St-Melaine des ceulx quy sont en mesure de poyer et les faire contraindre à poyement de leur taxe, et se fera asister par le sergent et deux ou troys des juratz.

Pour faire la cueilette des deniers en la paroisse de St-Melaine pour les fortifications de ceste ville pour la semaine presante, sont deputés Jean du Boys et Lannigou.

Advisé que la maisonn de la dame de Kerlan sera banye à ferme pour 4 ans pour fortiffier la ville, sur son refus à ladicte dame de Kerlan de cze faire.

Enjoinct au sr du Botou de faire maçonner la porte qu'il a sur la venelle qui deczant à la rive en la paroisse de St-Melaine.

— Du 20ème de juing 1590.
Les lettres missives de M. de Rosampoul du 15 de juing ont esté leues. Pour responcze est advisé qu'il sera escript audict sr de Rosampoul qu'il ny a navires ny mariniers en ceste ville, et que sa commission a esté leu et publiée et receue avec très grand contentement de tous les habitans lesquels il trouvera tousjours à son commandement comme ses obeisants serviteurs.

Ausy ont esté leues les lettres misives de Mgr le duc de Mercueur, 13e jour de juingn, et aultres lettres de M. de Loguevel ; sera respondu escript, audict sr de Loquevel, que notre canon et noz gens sont devant Kerouzeré, et que après l'expedition et prinse de ceste place on asistera ledict sr de Loquevel pour le siège des chasteaux de Toncquedec et Coatfrec.

— Du 22ème juingn 1590.
Sur la requeste de Louys de Kergaryou advisé que deffanse luy sera faict de tenir taverne hors la barrière et ce pour ung moys, et pareille deffanse à toutz aultres pour ledict temps et sauff adviser, passé ledict temps, comme apartiendra. Kervern, impositeur, s'oppose.

Il est ordonné bailler acte au sr de Kergurunet que le sr de Pendory tient le parti contraire et est à Tonquedec en guerre et, suivant les lettres de Mgr le duc, comandé de saesir touz ses biens meubles qu'on luy poura trouver, et pourvu qu'il est notoire que la veuve de Pendory donne recuil à ceulx qui font la guerre contre Lannyon, il est deffandu de lui bailler des vins ne aultres comodité de ceste ville.

Pierres Piczon, de Roscoff, et Guillaume Lauran, de St-Divy, eslargiz et commandez de sortir hors de ceste ville dans le jour, poyantz leurs despans.

Yvon le Brehuz, couturier, ordonné qu'il se retirera pour deux moys est eslargiz poyant ses despans.

Jacques le Moal et son fils eslargiz, poyantz leurs despans, et se retireront pres ceste ville durant ses troubles et jusques à ce que aultrement soict ordonné.

Advisé que la ceinture et la fortification de St-Mathieu se prandera de la porte de Traolen jusques à la porte de la rue des Brebis, et passera par le vieulx marcheix le plus commodement que faire se pourra, et ce par l'advis du sr de Mesily, cappitaine de ladicte paroesse de St-Mathieu, et permis de prandre du boys de Kernechrouel et Kerserchot pour faires lesdictes fortifications.

Brifaut, de Landiviziau, eslargy poyant ses despans.

Enjoint à Guillaume Salaun de recepvoir ce qui reste à recepvoir de la taille du dernier roolle à St-Mathieu et commandé aux sergents et par exprès à Ladure, Friber et Augoujor de faire les executions suilvant la charge que ledict Salaun leur donnera à paine de privation de leurs estatz.

Advisé que le sr de Kerdrein, cappitaine au fort, poyra.

Sur la recqueste de G. Kerlan, organiste, est advisé qu'il aura ung escu par moys du bien de la chapelle Nostre-Dame du Mur.

— En ladicte Chambre le 26ème jour de juign 1590.
Advisé sur la recqueste de M. le docteur Coatguennec prétendant estre excusé de poier la somme de quoy il est cottisé, offrant quitter les deux escuz qu'il a cy devant poyé à aultre cottisation poire ce à quoy il a esté cottisé au passé, esgard que les fraiz ont esté faictes pour nous préserver ou passé, et pour l'advenir sera advisé s'il doibi plus pour aulcune choses, et pour le regard du congé qu'il a demendé il luy est permys de faire à sa vollountté.

Sur la recqueste de damoiselle Isabelle Quemener a esté advisé que MM. Mesely, Kerangoff, et Guillaume Sallaun regarderont le degat qui a listé faict tant, au jardin que où il fauldra passer que en sa maison pour en faire raison à ladicte Queumner et pour les 7 escuz sera faict esta ayant communicqué à Kergariou.

Sur la requeste du receveur le Bervet a esté advisé que, suyvant les precedantes ordonnances, les charges seront communiquées à M. le procureur du Roy et la Motte pour, eulx ouy, faire acte sur ladicte requeste à la première assemblée.

Advisé que les capitaines advertiront les corporaulx de venir à la prochaine assemblée pour faire rapport de ceulx qui ne font leur debvoir aux gardes et ouyr l'advys de la Chambre.

Sera baillé le congé aux oupvriers qui travaillent aux tranchées jusques à avoir receu les restaulx et seront contrainctz ceulx qui restent à poier et à ceste fin chaicun des receveurs envoyront les restaulx à la prochaine asemblée.

Sur la remonstrance faicte par M. de Kergaradec qu'il est requis faire une barrière près le mullin et avoir charge de M. le gouverneur de la faire faire, requérant avoir acte de ses remontrances et de ceulx qui apres en empeschent quelle soict faite.

A 2 heures après mydi sera condescendu pour voir l'endroict où se faict la fortiffication au marcheix.

Advisé que M. le miseur baillera aux hommes de Plouejan quelque somme attendant le retour de M. de Kergariou pour les parpoier, scavoir, ung escu à chaicun.

Sur la recqueste de Vincent Nouel a esté dict que ledict Nouel adresera sa recqueste à M. de Kergariou par ce que la ville declaire ne pretendre interest.

— Du 27ème juign 1590.
Aiant veu les lettres que M. le gouverneur a escript à MM. de Kergaradec et procureur de ville, du siège de Kerouzeré, du 26e de ce moys, et celle que le sr de Rosampoul a escript au sr des Illes, de Kemperven, du 24 de ce moys, est advysé que le procureur de ville escrira à Kereaez, Faouët et ailleurs en Cornouaille, devers l'armée du prince pour decouvrir l'entreprinse dudict prince sy faire se peult, et sera Kervern pryé d'escrire à Kerbiguet et Kerandraon pour ceste fin.

Sera aussi escript aux parouesses de se mectre soubz les armes toutes afaires postpossées et de faire bon guet tant de jour que de nuict. Et seront advertys les capitaines de Lanmeur et Ploegat de se mectre aussy soubz les armes comme les autres paroesses, aultrement sy il advyent du mal par leurs paroesses que l'on se prendera à eulx.

Sera aussy escript à mondict sr de Kergariou que sy l’on decouvre quelques chosse de l'entreprinse de l'ennemy, qu'il sera averty en toute diligence.

Advissé que Kergonuz sera contrainct de vyder ses mains des deniers de la ferme du Bodister et Plougaznou ès mains du misseur à valloir sur le don que Mgr le duc a faict aux hatitantz, neanltmoingz toutz arest et oposicions, et luy sera baillé quittance par le myseur et sera contrainct par corps.

Advissé que le procureur de ville escrira à Mgr le duc pour suplyer son altesse, au cas que l'ennemy veille entreprendre sur nous, de ne nous laisser en peine et de nous assigner et comme nous nomes menazcés et come ceulx des chasteaulx travaillent et ravagent le plat pays, et qu'ilz ont resduict à eula la pluspart de la comune pour eviter leurs incursions et ravages.

Sera aussy envoyé decoupvrir en Treguier l'entreprinse de ceulx des chasteaulx.

Advissé que le receveur Kerallot laissera deux homes qu'il a arestés en ceste ville pour le fouaige des paroesses de Ploeguiel et Ploegrescant, et pouront aller à la maison pour faire diligence de recouvrer l'argent sy faire se peult, et ce pour ungn moys.

Du 24 juing 1590.
Ont este leues deux lettres missives escriptes par le sr de Scepeaux au sr procureur fiscal de Bodister et au receveur et fermier desdictes terres, et par mesme une recqueste presentée par le sr de Kerouchin, lesdictes deux lettres dabtées du 28 de juingn 1590, signées : Guy de Scepeaux. Après avoir mis le faict en deliberation, avisé que le sr de Kerouchin, fermier desdictes terres poira pour les deux dernieres années finies le 1er jour de may dernier au miseur de la ville ce qu'il, en laditte qualitté luy en portera acquit vers et contre tous, et en cas de refus ou retardement sera ledict sr de Kerouchin contrainct par detention de sa perzone de poyer lesdictes sommes neanmoigns les arrests à luy signifiés comme il a presenté et monstre à l'instance du Sgr de Maignanes executeur du testament de feue madame la princecze de la Rochesuryon où est le pris de ladicte ferme au rapport dudict sr de Kerougin pour checun an 1116 escus deux tiers. Et d'aultant que ledict sr de Kerougin a dejà faict rendre une moictié de ladicte somme en la ville de St-Malo pour estre delivrée audict sr Despeaux, est avisé que la ville poiera deux par cent audict sr de Kerougin, parce que à ses frais, risques et fortunes, il fera rendre ladicte somme en ceste ville et la poirra au miseur dans 15 jours par les mesmes contrainctes que cy dessus.

Pour la prinse du sr de Kergadiou Quintin est ordoné que Pierre Kermerchou, Pierre Carchet, Pascoet Clech et autres qui l'ont prins et ont faict une chartre privée de luy, seront contraincts de le representer, ou seront pour la faulte constitués prisonniers, ou d'aultant que ledict de Kermerchou et aultres se sont retirés au champ Kerouzeré, sera escript à M. de Kergariou pour les serrer jusques il avoir obéy à ce que dessus.

— Du 5 juillet 1590.
Lecture faicte de la lettre du sr du Breignou au sr de Rochmorvan par laquelle il donne advys aux paroessiens de Plestin de se rendre au sr de Kergoumarch. Aultres lettres des paroessiens signées : Péchin, demandant advys sur la reponse qu'ilz debvent faire.

Advisé qu'il sera escript ausdictz paroessiens pour se maintenir et sont deputtés pour porter les lettres les srs de la Villeneuffve et de Kervern, et bailler les assurances ausdictz paroessiens.

Aussy sera dressé une mynute de lettre au nom du recteur de ladicte parouesse au sr du Breignou pour reponse à sa lettre. — Plus sera escript à MM. de Plouec et Kergariou pour avoir leur advys.

Les habittans ont agreable l'accord que le sr de Kergaradec a faict avecques les 30 soldatz qui sont demeurés à Plestin, et sont d'avys que le miseur rembourse 39 escuz que l'on a advancé, et par mesure sera escript au Kerdallaen pour faire delivrer 30 quartiers de blé ausdictz soldatz, et sera ledict miseur alloué de 20 escuz qu'il a cy devant advancé.

Permys aux paroessiens de St-Martin de signiffier arrest entre les mains du fermier de St-Martin en conservation d'entre remboursés des fraiz que l'on a faict envyron les maisons et terres dudict prieur et qui reste encore faire.

— Du 6ème jour de juillet 1590.
Le sr de Botou pour avoyr failly troys foys au guect taxé à 3 escuz, scavoir : la moictyé aulx soldatz, et l'aultre moictyé pour les fortifications de la paroisse.

Pour Rochambleiz pour avoir failly 8 foys à la garde, taxé à 2 escus, et s'il fault à l'advenir taxé à 2 escus pour chaicune faulte.

Jacques le Guichart pour le deffault du pasé taxé à 3 réales et s'il fault l'advenir poira pour chaicun deffault tiers d'escu.

Jean le Bouder pour les faultes du pasé, taxé à demy escu et pour l'advenir s'il fault poira pour chaicun default tiers d'escu.

Allain Kervinot se trouvera au guect a paine de deux réales.

Haubony du Moulin et Mauricze du Moulin comparoistreront à l'advenir en garde à paine de poyer demy escu pour chaicun deffault.

Penanlan, Mauricze Noblet, Pierres Thepault, Toulbrunault, Pierres Noblet, Kervern, Keramprovost, Guillaume Sallaun, Francoys Guingamp, Nicolas Sallaun, jurés disant qu'ilz feront report de ceulx de leur cornets qu'ilz ne vont pas en garde et bailleront un extraiet à mardy prochain.

La compaiguye est d'avis que Me Jean Calloet praigue la charge de corporel de la compaignye de Jean Lesquelen : ledict Calloet present dict ne vouloir acepter ladicte charge et avoir des estatz qui l'excusent de toutte charge.

Lecture faicte d'une lettre de Kerdalas adresante à M. de Kergaradec.

Ordonné au miseur de poier 7 escuz à Pierre Stanguier, hoste du Cheval Blanc, et aura aultant de deschairge sur ses comptes.

Le sr de Kergadiou Quintin dict qu'il y a plus de un moys qu'il a heu son paseport et acte d'avoir juré l'Union d'avecques le sr de Kerhir, duquel acte il dict estre desaezy par ceulx qui l'ont prins, et suplye en estre resaezy. — M. l'archidiacre, ouy sur la recqueste de Pierres Kermerchou, Pierre Larcher et Pascot Clech, dict que samedy dernier les dictz només luy dire qu'il y avoit un gentilhomme en ville, de la paroisse de Louargat, tenant party contraire, lui demandantz advis s'ilz s'en debvoinct saezir. —Sur quoy ledict sr archidiacre dict que s'il estoit du party contraire, il estoict de bonne prinse : et peu appres luy fuct ledict sr de Kergadiou amené par les dictz només, lequel sr de Kergadiou portoict des papiers disant qu'ilz portoint paseport pour luy et atestation d'avecques M. de Kerhir d'avoir juré l'Union. Et d'aultant que le sr de Kergaradec estoit lieutenant en ceste ville en l'absence de M. Kergariou, les renvoya audict sr de Kergaradec et ne bailla aultre charge de prandre ny retenir ledict sr de Kergadiou. — Ledict sr de Kergaradec, en l'endroit ouy, dict que ledict prinsonnier lui fuct ledict jour rendu par ledict Kermerchou, et monstre un paseport et acte d'avoir juré l'Uuion entre les mains dudict sr de Kerhir, et se retira ledict Kermerchou avecques ledict prisonnier sans prandre de luy aultre advis parcze qu'il se trouva quelque differant entre ledict Kermerchou et Kerscau, à cause de ladicte prinse. — Faisant droict sur ladicte requeste, atandu la representation faict du prinsonnier, et le decrect donné contre les desnomés levé, et le prinsonnier eslargy, et luy sera son paseport rendu, et toutefoys s'il se verifye qu'il aict faict acte contre l'Union depuis son paseport, sera procedé contre luy comme de raison.

Noble homme Françoys de la Rivière de Troveriant eslargy.

Pour la recqueste de Françoys le Bervet sera faict estat à mardy pour son eslargissernent, et pour le faict de sa femme est licentyé d'aler à Plufur et aileurs pour cueillir son aust (sic) et bailler ses deniers.

Les srs de la Villeneuffve et Kervern ont rapporté le faict de la deputation faicte à Plestin, et ordonné au miseur leur bailler un escu pour la despanze par eulx faicte.

Pour le faict de Jean Cabell, est ordonné qu'il sera payé par le sr de Kerangoff, procureur de la paroisse de St-Matyeu, de la somme de 6 escus neuff realles pour avoir parachevé la tour du Parc au Duc.

Sur la recqueste de Me Louis Chapelain desmandant 12 escus, est ordonné qu’il articulera les fraictz par luy demandés et à quy les a fournis pour peser de cze luy estre faict estat.

— Dudict jour en la Chambre de l'Union à Morlaix.

Lecture faicte d'une lettre de M. de Kergariou nostre gouverneur pour la capitulation de la rendiction du chateau de Kerouzeré, dabtée de ce jour.
— Advisé que M. le seneschal, M. du Restigou yront à Kerouzeré pour la capitulation et sera escript par eulx une lettre de creancze.

Voir   " Capitulation du château de Kerouzéré".

Il est ordonné de boucher les huis et portes des jardrins de la venelle du Maistre : la Villeneufve et Penanker comis et executoire decerné contre les proprietaires ; aussy est cornmys Yvon le Bailly avecques lesdictz srs.

Il est ordonné que toutz arbres tant fruittiers que aultres qui prejudicient à la deffanse de la ville pnur empescher la veue ou aultrement seront coupés à la discretion des corporaulx, chaicun en son canton, sauff à les faire recompanser par cy appres.

Advisé que les lettres de la ville estantz en ung coffre en la maison de Kerdrain seront randues dans ledict coffre au Thoreau.

Advisé qu'il sera escript à M. de la Motte le contenu aux lettres d'advertissement de la desante des trouppes du prince de Dombes en ce pays.

Sera escript à MM. de la Tour Perle (?) Lesquiffyou, Guernisac, Kerbrat de faire randre en ceste ville 300 hommes harquebouziers et arbalestriers et pour les loger deputtés scavoir : Sct Melaine, le recepveur Kererault, Trovern, Kerheras ; Sct Mathyeu, Kervescontou, Nicollas le Blonssart, et Guillaume Sallaun ; Sct Martin, Kernezec, Kerbasqyou et Kermorvan.

Enjoinct à Charles Parfaict, de Lanmeur, procureur de ladicte paroisse, de faire randre leur arttillerye en ceste ville, aultrement les cacher en terre et les demontter, rompre le boys et randre les bouettes en ceste ville, et pour ce faire només pour les asister Jacques Lucas et Jacques du Boys.

La requeste de Francoys le Bervet renvoyée jusques au retour de M. le gouverneur.

Il est faict comandement à Jacques Gueguen de faire les murailles de son jardrin de ce jour, faulte de quoy faire Rosmeur y fera travailler de derain et aura executtoire sur ledict Gueguen.

Il est permys à toutz sergenz d'executter sans atendre houictaine tant par corps que ès biens ceulx qui font deffault de payer la somme de 4 realles et demy que couste à bouscher chascune portte de jardrin de ladicte paroisse Sct Mathieu.

Ordonné au miseur mectre la somme de 50 escuz entre les mains de Ollivier Nouel pour estre employés aux fortifications de la paroisse de Sct Melaine.

Permys à la femme de Francoys Laurent de faire une queste pour parvenir à la liberté dudict Laurent.

Ordonné au miseur poier dans 8 jours à Kerhamon ce que luy restte, lequel sera prié de suparceder et deporter pour ledict temps : MM. l'archidiacre et Kermadeza deputés pour parler audict Kerhamon, et le miseur s'oblige en privé nom, et pour poier ledict Kerhamon faira ledict miseur contraindre les receveurs de la taille des troys paroisses.

Il est ordonné que ceux quy sont dans les tours de Kergurunet videront dans ce jour, et MM. l'archidiacre et Mesilly commys pour les faire desloger, et prandera le sr de Mesilly les cleffz et aura ledict sr de Kergurunet 2 escus le moys de sadicte tour par les mains du miseur.

Ordonné aux capitaines faire faire pour 10 escuz de faulse trappe en chaicune paroisse.

Il est ordonné à toutz habitantz de la ville de se trouver au guect et aux veuffves d'y envoyer à paine d'estre declairés rebelles et enemys de la ville et estre ravaigés, et neanltmoings seront contrainctz pour chaicun deffault à payer promptement 2 escus sauff à chaicun corporal de taxer plus grandes sommes sellon le moyen et callité ; et est faict comandement à touz sergenz de faire les executions, et neanltmoings poura ledict corporal o ses soldartz de son comandement faire de son auctoritté propre sans aultre ministere de justice lesdictes executions.

Le sr de Kergaradec pourra prendre ung soldart de chaicune compaigaye pour faire une patroulle par la ville.

— Du 11ème juillet 1590.
Lecture de la lettre de Mgr le duc de Mercure dabtée du 7e juillet 1590.

Aultre lettre escripte à M. de la Motte dudict sgr dabtée dudict moys.

Aultre lettre audict sr de la Motte dabtée du 5e juillet dudict seigneur.

M. de Rosampoul a esté pryé par MM. de Morlaix de demeurer en ville jusques à avoir faict son gros, et fourniront foin et avoyne.

Advisé que Des Combes sera arresté.

Il est ordonné que les deniers que le sr du Porzmeur a entre main apartenantz au sr de Leurguen seront arrestés, et viendra à demain pour faire raport.

— Du 12ème jour de juillet 1590.
Advisé que l'on escripra à MM. de Sct Malo, Brehat, pour avoir du secours tant pouldre que hommes.

Francoys Guingamp et Allain Guingamp fournyront saeze mousquetz, Marin six, Lachins ung.

Il est permys à chaicun de sauver le plus possible de leurs meubles la où bon leur samblera, sans en excepter aulchun : toutz les habitantz se trouveront derain matin en procession generalle soubz les armes.

Advisé que l'on escripra aux parouessiens quil ayent à se tenyr.

Auchun ne sera receu à faire plaincte pour la necitté (sic) presente des demolutions qui seront jugées par MM. les cheffz de guere qui comandent en ceste ville estre necessaires, sauff à faire la recompanse par cy appres comme il se trouvera raisonable.

Advisé que toutz les marchantz de ceste ville seront toutte aultre besoing pour faire des faulses trappes, et pour y avoir l'œil est comys à Sct Martin, Kernezec ; à Sct Melaine, Yves le Bailly ; à Sct Mathieu, Guillaume Sallaun, et seront les oupvriers contrainctz par emprinsonnement de sa personne.

Deputté pour aller à Sct Mallo.

Sera supplyé M. de Rosampoul suyvant le comandement qu'il en a de faire entrer les navyres de Roscoff au devant du chateau et pour en advertir, les seigneurs de Leon et le sr de la Motte yront ensamble avecques ledict sr.

— Du 16ème de juillet 1590.
Le sr de Kerhunan et Jan Guillemot deputés pour achepter tout le foin qui viendront en ville par la paroisse Sct Melaine et les mectre en la chappelle de Sct Jacques ; en la paroisse de Sct Martin, Pierres Noblet et Rolland le Boullouch ; en la paroisse de Sct Mahé le sr de Kersech et Martin Rigollot. — Et des brevetz que chaicun desdictz deputés envoyront au miseur luy servira d'acquit. — Et pour distribuer lesdictz foins et avoines sont comys Francoys le Borgne et Guillaume Clech qui seront sallarisés.

Pour préparer de logeis et chambres garnyes et estables pour les compaignies, sont deputtés Jacques Toulcoet et Jacques Guillemot pour la paroisse de Sct Melaine ; en la paroisse de Sct Martin, Yves Deleau et Guyon de la Tourneuffve ; en la paroisse de Sct Mahé, M. des Isles et Jean Matte (Motte ?).

Le sr de Kerouhin sera contrainct par les voyes et contrainctes comme devant de poyer suyvant les precedantes ordonnances.

Permys à ceulx qui ont servy au siège de Kerouzeré de faire executter ceulx qui les ont employés à l'afferant de ung escu par sepmaine.

Advisé que le miseur acheptera deux bidés pour le procureur de la ville.

Le sr de Kerbabu se desaesira du quartier du moulin parce qu'il aura acquit suffisant, et seront les deniers mys entre les mains des srs de Portzlan et du Coatglas quy poyront les fraiz suyvant les brevetz de M. de Kerguaradec, et auront lettres pour faire travailler les oupvriers.

Sera decerné executoire contre le sr de Kermezen et sa femme de la somme de 40 escuz, contre Christofle Quintin et sa femme de 20 escuz.

Pour la prince de M. de Coetanscours, est advisé qu'il sera detenu et mys en garde en l'une des chambres de la tour de Kergurunet, et sera gardé par 4 de la compaignie de ceulx qui l'ont prins, qui auront demy escu chaicun jour pour la garde, et prandera ledict sr sa depanse de chez Marc le Louczault.

Recqueste presentée par Me Renné de la Bausse et consortz concernant la prinse de Olivier Plouegoulm à Rosqoff. A la premiere assemblée seront ouys les srs du Morlen.

Regnault Quietier, Francoys Penhoadic, Jacques Guehoc, et Francoys le Levyer ont prins la charge de garder le sr de Coatenscors pour demy escu par jour.

Passeport accordé à Girosau Hervé pour venir en ville en toutte seuretté.

Le sr de Kernenguy presant a esté institué à corporal en la compaignie de Jan Lesquellen et a juré de fidellement s'acquiter pour ce que luy reste.

M. de Kergariou, avecques M. de Kergaradec et les capitaines de troys paroesses pour faire une compaignie tant de gentz de cheval et que à pied jusques au nombre qu'ilz adviseroat pour estre prest à faire les sortyes lorsqu'ilz seront comendés, et seront lesdictes compaignies faictes aux fraiz des habittantz par l'advis desdictz seigneurs.

Ordonné au miseur de poier sur le gros des deniers de la ville les mousquetz qu'il a prins de Morice Menez parce qu'il retirera les mousquetz qui sont en esseure (sic) de là où ilz sont.

— Du 17ème juillet 1590.
Le sr de Kerangof à la sommation luy faicte a declairé ne voulloir plus faire auchune avance pour la paroisse de Sct Mathieu comme procureur. — Ordonné bailler acte au capitaine pour le remonstrer au parsur de la paroisse.

Ordonné au miseur de poier les 2 baricques de vin que le procureur de la ville a baillé aux Espaignolz, qui coustent 24 escuz.

Sur la recqueste de damlles Marie et Francoise Quintin, est dict quelles seront recompansées de ce que, sera demoly de leur maison et jardrin.

Advisé que le miseur mectera demain entre les mains des deputés, pour faire magazin de foigu et avoyne, scavoir 15 escuz pour les deputés de chaicune paroisse.

Pour Jan Tudoret et Jan Garnyer ausquelz on a prins des biens au manoir de la Villeneufve, est dict que leurs biens seront randuz, et pour les biens de la Villeneufve prins audict lieu declairés de bonne prinse, le tiers adjugé à la ville, et lesdict Tudoret et Garnyer fairont l’honesteté aux souldartz.

Le sr de Kerscao assistera pour departir lesdictz biens et praindera le tiers de la ville qu'il delivrera à Jan Cariou.

Pour les chevaulx du sr de Coetanscours, ordonné qu'ilz seront vanduz et la ville aura le tiers et les souldartz qui les ont prins les deux partz pour les fraiz de sa garde qui seront prins sur le total, et sera Katherine le Bris contraincte de delivrer lesdictz chevaulx à ladicte fin.

Ordonné à Kergurunet de randre les clefz de la tour entre les mains de M. le gouverneur dans une heure.

Sur la resquete de Pascoet Clech, sera recogneu à la premiere comodité.

Sur la roqueste de la veufve de Lenard, reservé luy faire droict à la premiere comodité.

Keranguen et Kergurunet deputés pour assister à la vante des 4 chevauls.

— Du 18 juillet 1590.
Lettre de M. de Kerhir leue, contenant advertissement pour assailler les gentz des chasteaux en Treguier.

Advisé que le procureur baillera 100 livres de pouldre du magasin de la ville aux souldatz qui yront, et mesche.

Advisé que l'on levera une compaignie de harquebusiers à pied de 200 homes et leur sera le pillaige accordé des paroisses ennemies, passé Plestin, par le congié et permission des capitaines. Et ordonné que ceulx qui vouldront aller à la guerre viendront s'enroler dans 4 heures de ce jour, chaicun au capitaine de sa paroisse, et deffanse faicte à touz aultres de sortir à paine de la vie. — Et sera la presente ordonnance bannye.

Aussi est advisé d'escripre à MM. du Faouet, Rosampoul, la Motte, Lesquifiou, Guernisac.

Defanse faicte à paine de la vie de couper le boys du Stiffel sans l'expres comandement de M. de Kergaryou ou de la Chambre, et ordonné bannir.

— Du 20ème jour de juillet 1590.
Lettres de MM. les habittans de St Malo aux habittans de ceste ville. — A esté advisé que lesdictz habittans fairont escrire des remercimens de l'honnesteté qu'ilz ont faict a M. le scolasticque et de leur bonne vollountté.

A l'esquipage de la Patasche qui a conduict ledict sr scolasticque jusques à ceste ville, a esté advisé que le miseur leur faira presant de deux barricques de vin de Gascoigne.

Pour la pouldre acheptée par ledict sr scolasticque montante à 330 escus advisé que le miseur Taira deligence de les poier.

Sy M. de Rosampoul ne faict raison de deux harquebouses que le procureur de ville a baillées a deux soldartz de M. de Rosanpoul, est advisé que le miseur les poira parce qu'il aura aultant d'acquit, et aussy pour 12 cargoueres, une livre de mesche et une livre de bolletz, et cependant le miseur faira l'advance desdictes harquebousses.

Aussy a esté advisé que ledict miseur poira la dépanse de 3 soldartz au ………… Davy, montantz à 2 escuz neuff réalles.

Sur la recqueste de Yvon Godet, a esté advisé que on luy hostera les fers, sy le geollier le peult tenir sans fers, et sera informé des propos injurieux que l'on dict qu'il a tenu : depuis ayant ouy les srs de Kervescontou et Kerhennan disantz avoir entendu par aultres que ledict Godet avoit dict qu'il eust esté expediant que Mgr le duc de Mercure eust heu la gorge coupée de la peste, est advisé qu'il sera detenu en l'estat qu'il est apresent jusques à avoir informé plus emplement, pour laquelle information sera ouy la chambriere du lieu ou il fust prins. — Attendu la nottorietté du propos que ledict Godet a tenu, confirmé par les dires du procureur de la (ville) et de Trelever disant le bruict estre de ce comun, toutefoys qu'ilz ne peulvent parler de certain et ne peuvoir nommer ceulx desquelz ilz ont ouy et enttendu, M. de la Motte present a recquis en la quallitté qu'il a gerant les affaires de la Sct Unyon et de mondict signeur, que ledict Godet soict condempné estre pandu. — Sur quoy est advisé que le proceiz dudict Godet sera faict et parfaict.

Sur la recqueste de M. de Coetenscours a esté advisé qu'il sera faict estat sur ladicte requeste au retour de M. le gouverneur et aultres MM. noz cheffz de guerre : cependant sera detenu en seure garde, deffance faicte à aulcun de l'aller voir et sans sortir de son logeix. — A ladicte condiction noble homme Regnault Quectier a prins charge de la garde dudict seigneur pour la somme que cy devant l'on a advisé, sauff à augmenter s'il se void qu'il se doibve estre parce qu'il a promys en respondre : R. Quettier.

En l'endroict, le sr de Lemquendren a déclairé à MM. de la Chambre avoir ouy dire audict sr de Coetanscours plusieurs parolles au préjudice de la Ste Unyon, et à l'advantaige du roy de Navare, et de ses adhérens, et en avoir disputté par plusieurs fois, et tout depuis qu'il a juré l'Unyon.

Le sr de Kermoaz present a esté deschairgé de la garde dudict sr de Coetenscours d'aultant qu'il a promys d'aller demain à la guerre : Penhoadic.

— Du 24 juillet 1590.
Sur la remonstrance faicte par le procureur de la ville que le sr du Faouet luy a dict qu'il est venu expres en ville de la part de Mgr de Plœuc et MM. la noblesse et l'arrière ban de Léon pour offrir le canon dudict sr de Plœuc avecques la compaignye dudict arriere ban de Léon pour le siege des chateaulx de Treguier, est advisé que ledict sr du Faouët sera remercyé, et sera escript à M. de Kerousy et aultres chefz de l'armée ce touchant.

Passeport accordé à Jacques du Pleisseix pour venir et demeurer en ville pour jurer l'Unyon.

Deffanse faicte à touttes personnes de n'inquiester dlle Francoise Quintin, et au préalable le soldart que lon pretand avoir esté pour elle à Kerouzeré sera ouy pour scavoir sy ou non il fut pryé par elle d'aller audict Kerouzeré.

Pour le cheval de Coatanscours, advoué par Kerhourdon, qui est ches Guillaume Toulcoet, est advisé qu'il sere vandu, et à ceste lin est noble homme Renault Quectier commis.

— Du 25ème juillet 1590.
Lecture de la lettre du sr de Kerousy envoyée à M. de la Motte : advisé que le sr de Launay escripra la response audict sr de Kerouzy, et aux srs du Faouet et de la Motte.

Keranguen deputé pour aller par devers le sr du Faouet pour le subject de la lettre et coppie de la lettre dudict sr de la Motte envoyée audict sr du Faouet par ledict Keranguen.

— Du 27ème jour de juillet 1590.
Sur la fortiffication de la ville en l'endroict du jardin de Mlle de Kerlan, a esté advisé que ladicte dame fera la muraille en l'endroict de son jardin par l'advys des cheffz de guerre qui sont en ceste ville dans ouictaine apres la signiffication de la presance qui se faira en la maison de Kerlan ; et à sa faulte de ce faire, permys de desmollir les murailles de la cour de ladicte maison et coulombier s'il est recquis pour des estoffes bastir ladicte muraille, et pour la fasson permys d'arrester les biens et rantes debuz à ladicte dame en la jurisdiction de Morlaix et Lanmeur.

Sur la requeste du sr de Kerallarnaut, les assistantz en Chambre sont d'avis qu'il sera delivré, acte audict sr de son comportement au sainct party de l'Unyon durant qu'il a demeuré en ceste ville, et pour le regard de l'information quil requiert par la requeste sera retardé jusques à la prochaine pour ouyr les y desnommés en la presance du sr de Rosampoul s'il est en ville.

Sur la requeste de M. de Locmaria requerant avoir passeport et suretté pour venir avecques sa femme et famille demeurer en ville ; les habittans sont d'avys, soubz le bon plesir de M. de Kergariou, leur gouverneur, luy accorder ledict passeport et suretté jurant d'abondant en ceste dicte ville ladicte Sct Unyon et baillant de ce les assurances qui seront requisses [Note : Depuis, apres avoir ouy M. l'archediacre qui a dict que mondict sr de Kergariou a agreable et estoit d'avys de bailler ledict passe audict sr de Locmaria, est advisé que lesdictz habittans garantiront passeport audict sr de Locmaria pour venir et demeurer en suretté en ceste ville pour tout l'intérest de la ville (passage biffé)].

Depuis le premier advis tiendra.

Sur la recqueste de Me Renné de la Bausse et consortz a esté ouy M. de Morlen. M. de Rosmeur intervient disant avoir interest comme capitaine et estant en la compaignie de la prinse d'Ollivier Plougoulm et que c'est à luy de faire la rancon, d'aultant que toutz ceulx qui asisterent sont de sa compaignie, excepté le Morlen et son homme. — A esté advisé que le sr du Morlen redigera par escript soubz son signe sa deposittion et aussy le sr de la Villeblanche, et à la prochaine en la presance de M. de Kergariou sera faict estat.

Passeport accordé à Yvon Guillaume, procureur de la paroisse de Plouerin, et Francoys Gueguen de ladicte paroisse pour venyr jurer l'Unyon en ceste ville en toutte seuretté, et viendront à la prochaine Chambre.

— Du dernier jour de juillet 1590.

Ordonné bailler acte à Nouel Dutertre et au sr de Rosmeur qu'ilz sont gentz de bien et d'honneur, et que ledict sr de Rosmeur est capitaine de la paroisse de Sct Melaine, et ledict du Tertre a esté corporal en la paroisse de Sct Mathieu.

Lettre de M. de Kerhir leue portant advertissement que les ennemis menaczent de nous venir assaillir.

Advisé que ceulx de Plouaret viendront jurer l'Unyon.

Pour ceulx de Lanmeur, advisé qu’ilz mecteront entre les mains du miseur 100 escuz qu'ilz ont à valoir.

Sur la recqueste de F. Sallaun, ordonné la presenter au procureur de Ploeigneau et avoir acte, et sur leur refuz, la Chambre pourvoirra.

La Chambre baille seureté au sr de Kersenant-Hamon demeurant en sa maison pourveu qu'il ne facze acte contrerement à son serment de l'Unyon.

Sur la requeste de la veufve de Guillaume Lenard, advisé que à la premiere comodité qu'on la recompansera.

Sur la remonstrance du sr de Kermenguy, corporal, ordonné que Jan Ravaillou sera constitué prisonnier.

Pour le faict de Kergouhin ordonné qu'il sera constitué prisonnier jusques à avoir poié les deniers de sa ferme ou baillé quittance à Olivier Nouel, telle qu'il demande les rantes qu'il a faict randre à Sct Malo.

Ordonné au miseur de baillier la somme de 173 escuz pour les despans de M. de Rosanpoul et sa compaignie à Pierre Paul.

Advisé que l'on escripra à MM. du Faouet, de Rosampoul et de Kerhir de faire en diligence leur gros et de s'avancer au proche de Morlaix. — Et à M. du Cremeur à pareille, et de s'assembler scavoir : le sr du Faouet et la noblesse de Léon……

(A. Barthélemy).

© Copyright - Tous droits réservés.