Retour page d'accueil       Retour page "Ville de Morlaix"  

Dès 1587, à la suite d'une décision prise par le duc de Mayenne, d'accord avec les Seize, il fut résolu que la bourgeoisie parisienne ferait, appel au peuple des villes de France ; le manifeste, envoyé à cette occasion, énoncait qu'il y aurait lieu d'établir dans chaque ville un conseil de six personnes, gens de bien, fidèles et prudents, qui communiqueraient ensemble une fois ou deux par semaine, et recevraient les lettres du dehors ; les affaires de justice et de finances devaient être confiées à un conseil de gens notables choisis dans les trois états. Cet appel fut entendu ; on vit nombre de villes s'organiser, constituer des conseils à l'instar de Paris et se préparer à la défense. — Le 17 février 1589, Mayenne et les Seize établissaient un nouveau Conseil de gouvernement, sous le nom de Conseil général de l'Union, réunissant les anciennes ligues de Péronne et de Paris.

En Bretagne, dans les villes où il y avait une administration municipale régulièrement établie, la Chambre du Conseil se substitua à cette municipalité ; là où cette organisation n'existait pas, le duc de Mercœur en autorisa la création. Voici quelques renseignements que j'ai recueillis à ce sujet.

Saint-Malo. — Le 7 avril 1589, sur la proposition du procureur syndic, Jean Picot, sieur de la Gicquelais, les bourgeois nomment un conseil, composé de 20 membres, dont deux appartenant au clergé, chargés de veiller à la conservation de la ville, au repos et à la sûreté des habitants. Ce conseil dont la première séance eut lieu le lundi 17 avril, sous la présidence du sieur de la Parraudiere, lieutenant du gouverneur, se réunissait une fois par semaine, le lundi à dix heures du matin ; les défaillants, non excusés, devaient une amende de deux écus au profit de l'hôpital.

La Chambre du Conseil de Saint-Malo correspondait directement avec les autres Chambres de la province, avec celle de Morlaix, par exemple : à ce sujet voici un texte, du 1er janvier 1590, jour où il y avait eu une réunion extraordinaire, dans la soirée.

« Ledit jour, premier de juin, à sept heures du soir, le conseil fut assemblé ; l'occasion de cette convocation à heure extraordinaire fut que le procureur scindic receut lettres des habitans de Morlais et du sr Delaunay, prédicateur audit Morlais, par lesquelles ils donnoient advis, comme les habitans de Roscoff et de Pempaul s'estoint rendus en l'obeissance du prince de Dombes, au party du roy de Navarre, contre les protestations paravant faites par eux ; ce qu'estant sceu et appris à Saint-Malo, fut à l'instant ordonné qu'arrest seroit fait d'un navire dudit Pempaul, nommé la Marguerite, lors posé devant la ville, et qui fut deslors executé ; et ordonné que les biens et marchandises qui se trouveroint dedans cedit navire seroint toutes portées chez le depositaire ; et, pour l'execution de cette ordonnance et faire du tout inventaire, furent nommés les sieurs Croix, Closneur et Bois-Joly » [Note : Le 3 juillet 1590, il y eut une nouvelle assemblée dans laquelle on lut des lettres de l'évêque de Léon, des habitants de Morlaix « en corps de religion catholique », et d'Olivier et Jérôme Plougoulm, propriétaires de la Marguerite, témoignant du zèle et de l'affection de ceux-ci au parti de l'Union. Après avoir constaté les faits, le syndic fut chargé de demander la main-levée de la saisie au duc de Mercœur qui l'accorda le 20 août].

Guingamp. — Un dossier de procédure, conservé aux archives départementales des Côtes-du-Nord (aujourd'hui Côtes-d'Armor), mentionne, en mars 1590, la Chambre de l'Union instituée dans cette ville par le duc de Mercœur. Il s'agissait alors de difficultés entre deux particulier relativement à des deniers royaux levés en 1587, dans la paroisse de Pommerit-Jaudy. En 1591, la Chambre du Conseil de Guingamp avait envoyé des députés aux États de Nantes ; ces délégués n'ayant pus paru représenter légalement la ville, les habitants durent procéder à l'élection de deux députés qui furent Pierre Le Goff et Jean Le Gendre, anciens maires.

Landerneau. — Aux États de Nantes de 1591, figure un député des « manans et habitans de Landerneau, réunis en Chambre du Conseil ».

Fougères. — La même année, nous voyons aux États de Nantes, Pierre le Bigot, sr du Breil, procureur syndic, représentant le Conseil établi par Mgr de Mercœur, à l'hôtel de ville.

Morlaix. — On conserve dans les archives de la mairie de Morlaix les procès-verbaux de la Chambre du Conseil pour l'union des catholiques, depuis le 27 septembre 1589 jusqu'au 31 juillet 1590 ; ils sont contenus dans un petit cahier qui fait le sujet de cette publication. Le préambule est ainsi conçu [Note : Quelques extraits de ce document ont été donnés dans l'Histoire politique et municipale de la ville et de la communauté de Morlaix, publiée en 1846, par M. G. Le Jean, p. 98 à 109 ; il en est aussi fait mention dans l'Histoire de Morlaix, par Joseph Daumesnil, annotée par M. Aymar de Blois et publiée par M. Ad. Allier] :

« Les noms de ceulx qui sont deputtés par le Corps de la ville pour de meshuy deliberer et ordonner sur les affaires de la ville, sans qu'il soict besoign de soner la cloche pour s'assambler troes foys la sepmaine, scavoir les lundy, mecredy et vendredy, à 9 heures du mattin, à la salle des Jacopins de ceste ville. Comanczé, ce jour 27e de septembre 1589, en laquelle année est Jan Pinart procureur, et Guillaume Keranguen, myseur de ladicte ville :

MM.
De Kergariou, gouverneur de Morlaix.
Le senechal.
Le bailly.
Le lieutenant.
L'archidiacre de Plougastel.
Le provost du Mur.
G. Quintin, prieur de St-Mathieu.
Fr. Le Levyer, recteur de Ploujan.
Y. Tanguy, vicquaire de Saint-Melaine.
Jan Coroller, sr de Kernescontou, id.
Thomas Jagu, sr de Kernegues, id.
Gilles Dupleisseix, sr de Kerango, id.
Nycolas Nuz, sr de Kerchunan, id.
Yvon Le Bailly, id.
Vincent Kermerchou, sr de Trelever, contrerolleur.
François Collin, sr de Poulras, commissaire du fort du Thoreau
De Kerloaguen.
De Bourgerel.
Du Vieux-Chatel.
Du Refuge.
De la Boyssiere-Plourin.
De Kerneguez Coetquiz.
De Kerguaradec.
Du Restigou.
Les sr. Yves Le Gac, sr de Keramprovost, juge-consul.
Yves Parthevaulx, consul.
Jacques Gueguen, id.
J. Le Levyer, sr de Kerochiou.
Yves de Kernechriou, sr de la Vileneufve.
Fr. Noblet, sr du Morlen.
J. de Kerguz, sr des Ysles.
Vincent Le Grand, sr de Kerscau.
Les srs Pinart, procureur.
Keranguen, myseur.
Guillaume Le Bihan, jurat.
Jean Floch, sr de Kerbasquiou, jurat.
Jacques de May, sr de Kermorvan, id.
Yves Jégou, sr de Tourbrunault, id.
Rolland Sallaun, id.
Jean Calloet, greffier.
M. Fouquet.
Fr. Noblet, sr de Roudour.
Jean Kerautem, sr Kerguern.
Yves de Botmeur, sr de Rosmeur.
Fr. Kererault, recepveur des finances.
Jan du Plessis, sr de Coatserho.
Yvon Kerret.
Pierre Guillouzou.
Yvon Perthevaulx.
Guillaume Clech.
Thomas Prediry.
Jean Auffret.
Jean Le Mynor.
Yves Coadic.

Cette assemblée réunissait en elle l'ancienne administration municipale composée d'un procureur-syndic, d'un miseur, d'un contrôleur et de douze jurats, et les membres des trois états élus pour former le Conseil à qui le gouvernement de la ville et la direction politique étaient délégués. Les procès-verbaux de ses séances présentent un intérêt particulier au double point de vue de l'histoire locale et l'histoire générale de la province où Morlaix fut un des centres ligueurs les plus actifs. Nous n'avons ces actes que jusqu'au 31 juillet 1590, bien que la Chambre de l'Union ait tenu jusqu'en 1594. Voici les notes que j'ai recueillies à ce sujet et qui, par le fait, sont le complément du texte que je publie.

1591. « Extraict du cahier de la maison de ville et chambre du conseil pour l'union des catholiques, establie à Morlaix , du 29ème jour de janvier 1591.

Lecture faicte des lettres escriptes par Mgr le duc de Mayenne à Monsr. le seneschal de Morlaix pour la tenue des Estats Generaulx à Orléans.

Aultres lettres escriptes par Mgr le duc de Mercœur ausdits habitans pour la tenue des Estats de ceste province, assignée au 12ème de febvrier prochain.

Deliberans sur le contenu esquelles lecttres, lesdicts habitans et deputés de la Chambre ont prié et deputé d'aller pour eux ausdicts Estats assignés à Nantes, noble home Bernard Le Bihan, sr de Kerouflac et du Roudour, M. le seneschal, et noble home Yves de Botmeur, sr de Rosmeur, l'un des dicts habitans, desquelz ont esté aussy d'advis que M. l'archidiacre de Ploegastel soit aussy deputé pour aller ausdicts Estats pour le clergé de son archidiaconé [Note : Cette élection eut lieu le 25 mars dans l'église du Mur ; les ecclésiastiques qui prirent part au vote furent : Nicolas de la Boissière, archidiacre, Fr. de Goazbriand, prieur de Kernitron et recteur de Treduder, Vincent Quintin, prieur de Saint Mathieu, Fr. Le Levyer, recteur de Ploejan, P. Lagadou, recteur de Ploegaznon, Geoffroy le Goallès, recteur de Pluegonmeur, Paul Toux, recteur de Ploetur, Hervé Le Miorcec, recteur de Lohnec ; Y. Larcher, G. Haridon, G. Simon, Tangui Gueguen el Y. Le Faucher, chapelains du Mur. Le député nommé fut Yves Arrel, scolastique] ; et ont lesdicts habitans promis avoir agreable ce que par leur susdicts deputés sera pour eux et en leur nom faict ausdicts Estats. Faict en ladite chambre et maison de ville les jours et an que dessus.— Pierre Guillouzou » (Archives d'Ille-et-Vilaine).

1593. Guillaume du Pleisseix, sr de Kerangoff, procureur de ville, est autorisé par arrêt de la Chambre de l'Union à faire acquitter sans difficulté les billets qu'il donnera au dessus de dix écus.

« Extraict de la maison de ville et chambre du Conseil de l'Union des catholiques à Morlaix, du 4ème jour de mars 1592.

Lecture faicte d'une lettre de la part de Mgr le duc de Mercœur, gouverneur de Bretagne, pour envoier depputés aux Estats, au 12ème de ce moys, ladicte lettre dabtée du 15ème de febvrier dernier et signé : Phles Emmanuel de Lorraine.

Les habillons dudict Morlaix, assemblés en ladictte maison et chambre en forme de corps politicque, à la mode accoustumée, ont, d'un commun advis, deputé pour aller ausdicts Estats et par devers l'excellence de mondict seigneur : nobles gentz M. François Noblet, sr du Morlen, advocat, et Yves Quintin, sr de Kerhamon, ausquelz seront baillées lettres et memoires, soubz le signe du procureur sindicq de ladicte ville, aulx fins de ladicte députtation ; et ce qu'ilz auront ce touchant faict, lesdicts habitons l'auront pour agreable, et ont ordonné au soubscript commis du greffier d'office audict Morlaix de signer le présent acte : Tribard, pour le greffier » (Archives d'Ille-et-Vilaine).

— La ferme de Bodister, tenu par Guillaume de Kermerchou et Jean de Vaumorin par ordre de la Chambre de l'Union de Morlaix, produit 300 écus.

— « Extraict du cahier de la Chambre de la Saincte-Union des catholiques establye à Morlaix, le mercredy aulx cendres, 13ème de mars 1593.

Deputes pour aller aulx Estats : les sieurs de Kerscau, Le Grand et le sieur de Kerhamon. Tribard, pour le greffier » (Ibid.).

En 1594, les députés aux États sont Jacques de Kergus, écuyer, sr de Mesambez et Morice Ballavenne, sr de Mésilly ; la délégation est faite par Yves Deleau, l'aîné, comme « procureur scindicq de la communaulté et corps général des nobles, bourgeois et habitans de la republicque et ville de Morlaix ».

Le cahier de la Chambre de l'Union fait connaître, dans tous ses détails, l'administration municipale de la ville de Morlaix ; en même temps il donne un tableau exact de tout ce qui se passait au sein d'une assemblée qui, dans cette partie de la Bretagne, était, avec une grande indépendance, à la tête du mouvement ligueur. Cet état de choses dura jusqu'en août 1594, époque à laquelle Morlaix se détacha de la Ligue ; le 22, de ce mois le maréchal d'Aumont, prenait possession du château au nom d'Henri IV.

Du 27ème de septembre 1589, devant MM.. le gouverneur, le seneschal, le lyeutenant de Morlaix, M. de la Boissiere pour M. le procureur du Roy.

Les diz devant nomez ont juré de ne rien divulguer de ce quy se conclud aux assemblées ; avis de tenir segret ce qu'il sera propossé et conclud.

Le procureur de ville remonstre que le jour de hier en la congregation on advissa de bailler 200 escuz à M. le gouverneur pour l'ayder à ses despents, requerant que l'on regarde le milieur moien et le plus expediant pour ladite depanse, ensemble tette aultre some qu'il sera advissé.

Lesditz devant només, à la pluralité des voyes, ont advissé que celluy qui acceptera les vins qui deschargeront au havre de ceste ville en gros, et l'estrainger qui deschargera et mettra ses vins en cellier pour les vendre en detail poyra le debvoir de demy escu sur chaque thonneau, et est entendu qui mettra ses vins au cellier et s'il n'est vendu que une barricque en detail poyra des lors le debvoir sur tous les vins ectants au cellier.

Aussi sont lesdits devant només, à la pluralité des voyes, d'avis que celly ou ceulx qui feront sortir des toylles sur ce havre poyront sur chacun fardeau de toylle demy escu.

Aussi sont d'avis que ceulx qui feront descharger des drapz en havre poyront par chacun pacquet demy escu.

Plus sur chacun thonneau de plomb, fer et estais qui se deschargeront pareillement audit havre se prendra aussy à la deschargeance demy escu.

Sur chacun portaige de sel qui se deschairgera aussy audit havre se poyra quart d'escu.

Plus a esté pour la police advisé qu'il ne se vandera en ceste ville le quartier de cel plus hault que trancte soubz monnoie.

Plus sur chacun thonneau de bled qui se tirera audit havre, se poyra ung escu.

Sur chaque piece d'Olonne ou Mindrignac (sic) qui se chairgera audit havre sera prins ung soubz tournois.

Sur chaque pieze de raisins et figues qui se deschairgera audit havre sera prins ung soubz tournois.

Sur chaque bote d'uille qui se deschairgera audit havre ung escu.

Sur chacun millier de lay et heure qui se chairgera audit havre demi escu, et n'entendent comprandre les potées que les marguilliers chairgent.

Lesdits devant només ont acordé de bailler au sr de Cremeur par moys la some de six vingt escus, luy estant accompaigné de 15 quiraczes et 15 …………., en oultre payer ses despans puis qu'il est en ceste ville et aura en oultre ung logeis gary en ceste ville.

— Du 29 de septembre 1589, en la salle des Jacobins, presentz messire le Gouverneur, les seneschal, lieutenant, N. de Kermadeza pour le procureur du Boy, etc.

Lesdits devant només sont d'avis que Me Main Danyel soyt receu au nombre des chanoynes du Mur, et attandans place vaccante sera (poyé) sur les deniers de la chapelle, par l'advis de Messire de Plouegastel, le prevost du Mur, le procureur des habitants et ses juratz et .. ... de la ville.

Par advis de la compaignye il est dict que l'on fera bannyr par toutz les carrefours de ceste ville, à son de trompe, que toutz ceulx qu'y n'ont signé la desclairacion par nous faicte et jurée, qu'ils ayent à le faire dans x jours pour tout delay au greffe d'office, aultrement qu’ils ayent à vider de la ville, et à la prochaine assemblée viendront pour prester serment.

Passé l'heure de huict heure du matin, ceulx qui seront absentz des deputés seront desclairés absentz encores qu'ils se trouvent à la fin.

Par advis de la compaignye il est diet que celluy qui disputtera ou revoquera ce quy sera proposé ou arresté en assemblée de la presente compaignye, sera executé de 12 escuz amende laquelle sera receu par le recepveur qui sera cy après nomé.

Plus ladite compaignye ont nomé deputtés pour recepvoir les deniers qu'il faudra lever suyvant la dernière assemblée, scavoir : François Kerellot pour recepveur, et Jan Keraultem pour contrerolleur, et pour sallaire auront seix deniers pour frans, et rapporteront en l'assemblée une foys la sepmaine de lesmache qu'ilz auront faicte, ladicte sepmaine, et compteront de moys en moys en la mesure compaignye, sans qu'ils soient tenuz de compter ailleurs, et sur ce seront garantys par ladite ville, et poyeront des deniers qu'ils auront receuz par ordonnance de la chambre quy leur sera alloué sur leur compte, et aura le contrerolleur le tiers et le recepreur les deux tiers de seix deniers pour l'eupvre.

Aussy a esté advisé eue sur charge de drap de Paris l'on levera ung escu, et sur charge de drap de Rouan demy escu, et sur charge de drap de soye et mercerye mellé sera levé deux escuz, et sera ledit debvoir poyé par ceulx qui les deschargeront.

Advisé que l'on esquipera quelques basteaux pour aller prandre le passaige de Saint-Jullien, des moynes, et Keranroux, et les rendre à ceste ville atandans faire une pataige o deux, pour la préservacion et la liberité dudit havre.

Advissé que les basteliers de Plouezoch seront contrainctz de promectre par serment au capitaine du chateau qu'ils ne presteront ne bailleront leurs basteaux peur passer o repasser les ennemys de ceste ville, promectre luy tenir bon ; promecteront d'advertir ledit capitaine et ladite ville s'ils entendent qu'il se brasse rien contre ladite ville.

Aussy que les habitantz ont agreable le louaige faicte par le recepveur Kerellot de la maison de la dame Lanygou qui est de 70 escuz pour le sr de Cremeur, et se poyra des deniers de ladicte recepte, et faire dresser des écuryes.

— Du 2ème octobre 1589, devant messire le gouverneur, le bailliff, M. de la Boissière pour le procureur du Roy, etc.

Deffances aux corporaulx de laiser sortir hors de la ville auchun medecin apoticaire ny sirurgien sans avoir congé de M. le gouverneur.

Pour la requeste présentée par partye des vinotiers advisé ce qu'il a sté deliberé tiendra jusques à ce que aultrement soit deliberé et conclud.

Advissé que las abés de la Trinité viendront à merquerydy scavoir ce qu'ils ont des deniers clairs et desclairer ce qu'ils vouldront bailler volontairement sans diminucion des debvotions ny aulmones.

Pour faire une visée du compte de Yves le Bailliff à comparoir demain 7 heures du matin, lesdits devant només ont convenu de nobles gents Maurice Noblet, Maurice Ballavoine, Jean Clerch, Yves le Gac, Jean le Luyer, Guillaume Dupleisseix.

— Le 4ème octobre 1589, devant messieurs le gouverneur, seneschal, bailliff, M. de la Boissière pour le procureur du Roy, etc.

Pour le regard des espions qui seroient trouvés a expier la ville, seront constitués prisonniers et mis à la pension du Roy au fraict de la ville.

Advissé que l'on fera vyder hors la ville les femes de Barbarin, Morice Masson, Claude de la Boissière, du Lanic, nomée Marie Boys, la fame de Kergroahès, Marye Corre, la fame et la mere de Claude de la Boissière cy devant dans demain pour tonsjours à peine de la prison.

Le sr de Bosmeur affirme par serment sa perte vers les Angloix à la somme de 60 escus.

Advissé que ledit sr de Rosmeur sera recompansé de sadite perte sur les deniers de la recepte sans que telle ny semblable recompanse soit octroyé à aultres a l'avenir durant ces troubles, sans prejudice du droict d'aultruy.

Aussy est advisé que en forme de prest on prendra d'antre les mains de Me Jean Duboys comis à la recepte des portz et havres pour faire les fraitz qui sera recquis par ce qu'il sera remboursé des deniers de la recepte.

Advisé que les fermes de la ville seront baillées à la forme acoustumée entendu les troubles et sans aultre comission, et sy on trouve que lesdits fermiers ne se mectent à la raison le jour de l'asination de bail, sera ladicte asination supercedée.

Aussy est advissé que on envoyra les srs de Penallan, Mesilly, Rosmeur Kerscoff, Kerengoff, Keremprovost, Toulbrunault, yront vers les volonteres pour avancer chaicun une somme pour parvenir à rembourser M. le gouverneur et en forme de prest, et seront ceulx qui avanceront ranboursés dessus les deniers de la recepte ; et seront les deniers de la recepte et les corptz de la ville obligés a poyement de ce qu'ilz avanceront.

Lesdits devant només consentant de recepvoir Jacques le Joyeux parmy lesditz habitans moyenent qu'il jure l'Union.

Plus est advissé que le procureur de ville envoyra expres vers les Angloix pour leur asurance de leur trafficque, et sera remboursé de douze escus pour le bateau et aultres frais qu'il fera.

M. de Kerelech a esté jugé defaillant.

— Du 6ème jour d'octobre 1589, devant Messieurs le gouverneur, seneschal, baillif, lyeutenant de Morlaix, M. de la Boissière pour le procureur du Roy, etc.

M. le lyeutenant excusé du deffautz à cause de sa maladye.

Sur la requeste presentée par M. de Lemgueluch (?), lesdits devant només consantent que M. de Lemgueluch vienne en ville à la chairge de jurer l'Union et pourra venir en toute seureté.

Pour le faict de Me Maurice Masson est advissé qu'il presentera sa requeste dans 3 jours par laquelle il mettra ses declaracion et protestation et cependant sa fame demeurera en la garde de lui et ses parantz, et rendra la cleff de sa maison entre les mains du procureur de la ville ; et en cas qu'il ne presente sa requeste dans ledit tempz sa femme vydera ladite ville.

Pareil expedicion pour Guyon Le Fesant.

Pour le regard de la requeste presentée par les marchandz de Pontivy, est advissé que leurs marchandises leur seront rendues avecques asurance du comerce a l'advenir, et a l'isue le procureur et greffier descenderont pour faire la délivrance.

Aussy est advissé, que l'on escripra à ceulx de Lannyon et Lantreguer scavoir s'ilz n'entendent que le comerce soict libre come au passé, et de ce qu'ils ont retenu l'un des habitans de ceste ville.

Advissé que les abés de la Trinité quy ont esté es quatre anés dernieres bailleront troys centz escuz, ou à leur faulte de ce faire viendront lundy prochain a l'isue des processions jurer en présence du corptz de nostre Seigneur qu'ilz n'ont deniers clairs et passe du serment qu'ils ne congnoissent avoir deniers delivreront la … entre les mains desdits habitans pour deux ans.

Advissé que l'on escripra aux habitus de Lanmeur que consantons le comerce libre vers eux et qu'ils ayent à faire delivrer certain personaige que l'on a prins leur ville et de repoudre de ce que l'on feroict en leur ville vers auchuns dudit Morlaix ; pareillement lesdits habitans responderont de ce que l'on pouroict faire vers auchuns dudit Lanneur en ladite ville.

A une heure apres mydy de ce jour en fera une visée du compte de Yvon le Bailliff par les convenus cy devant.

Advissé que Yvon Demay sera recompensé à cause de sa perte vers les Angloix, ensemble avecques Resmeur de la some de 60 escus sauff rabatu 24 escus que le procureur de ville luy a promis pour quelques Angloix.

Advissé que l'on baillera deux escus a chacun d'ung appelé Laurent, et un gaultre appelé le Ducguen, par mye, pour servir lesdits habitans pour canonyers.

Et a l'isue ledit procureur de la ville et le soubzsignant fumes condesandus jusques en la maison de Maudet le Marchy et ont esté delivrées les marchandisses aux marchantz de Pontivy.

— Du 9ème jour d'octobre 1589 : devant Messieurs les gouverneur, seneschal, lyeutenant et M. de la Boissière pour le procureur du Roy, etc.

Le sr de Parq a juré la Saincte Union et de se maintenir.

Lecture faicte des lettres de M. les habitans de Quimper Caurentin, ensamble de la congregacion faicte audit Quemper du 1er de ce moys et serment de l'Union par eux faictz estant conforme a la desclairacion des habitans dudit Morlaix.

Lesdits devant només supplyent le sr du Mesguen et le sr de Kervern d'aller vers ceux dudit Quemper.

Aussy est faict lecture de la lettre missive des paroyssiens de Ploegat Gallou.

Pareille lecture faicte de la lettre missive des paroyssiens de Garllan.

Pareille lecture faicte de la lettre des paroyssiens de Ploezoch.

Advissé que le capitaine du fort sera adverty d'empescher qu'auchun bateau dudit Ploezoch sorte hors, ains prendra ledit basteau et les homes sy bon luy semble ou les mettra à terre.

Advissé que ..... prisonnier retenu sera captif jusques à ce que aultrement soit advissé.

Pour le regard des deux gentilhomes de Mme de Tyvarlen pour lesquelz Mlle de Cleudon a respondu, est advissé qu'ils demeureront elargys parce que ladite dame de Cleadon retirera une promesse, sy faire se peult, de la dame de Tyvarlen qu'elle, ny auchun des siens, ne feront mal à auchun des habitans.

Sur la plainte faicte contre Guillaume Tiret pour les propos par (luy) tenus le jour d'hier à Guillaume Crech serviteur du sr de Morlen est advissé qu'il sera constitué prisonnier, et sera condesandu pour voir et visitter son cofre pour scavoir sy l'on trouveroit o memoires o lettres des ennemis, en presence de M. le procureur de la ville, Kernegues, Jagut, le recepveur, Kerellot, Mesilly, Guillaume le Bihan, le greffier Calloet ; a prendre ces dix et le soubzsignant.

Pour le regard de Me Guillaume Viel, advissé que sa fame l'advertira de comparoir ceans à vandredy pour faire la declairacion et serment en tel cas requis, ou, à sa faulte de comparoir, sera pour lors advissé.

Pour la cuirase prise par le sr de Bourgerel à ung marchant normant la retirant hors la ville contre les ordonnances, est ladite cuirase confisquée, et Hervée le Mer vandeur condempné à 8 escus d'amende.

Pour les prinses qui se feront sur l'ennemi en ville, est dict que le presneur aura ung tiers, et la ville les deux partz.

Et pour le regard des prinses qui se feront aux champs, le presneur et comandeur aura ung tiers, le souldartz ung aultre tiers, la ville l'aultre tiers.

Pour la requeste de Mlle de la Villeneuffve, lesdits habitans disent avoir entendu que ledit sr de la Villeneuffve a esté prins par les Srs de Cremeur e Rusguit lesquelz l'ont faict sortir hors la ville, et qu'ils n'ont esté ouys sur la prinse, et qu'ils ne scavent où il est demeuré ne où il est.

Sur la requeste de M. le recepveur, luy est permis de faire contraindre tous ceulx quy chargeront et deschargeront marchandisses a poyer les debvoirs imposés tant par emprisonnement de leurs personnes, que arsement et vantes de leurs marchandisses, et sera ledit recepveur alloué des fraictz qu'il fera a ladite contraincte, et ordonné à toutz ceulx qui chargent ou deschargent leurs marchandisses tenus à coustumes d'advertir le coustumier a paine de confiscacion et 100 escus d'amande.

— De l'onziesme octobre 1589, devant messieurs les gouverneur, seneshal lyeutenant, le sr de la Bouessiêre, M le bailliff, etc,

Kernegues-Coetquiz et Dugué ont juré la Sainte Union.

Advissé que l'on poyra tous les despans de M. du Faouet durant qu'il a esté en ceste ville, montanz à la some de 330 escus.

Plus est advisé que l'on lepvera deniers par cotisation, et ladite cotissacion se fera par les capitaines et corporaulx des paroyses lesquelz seront cotissés en la Chambre.

Depuix est advissé que l'on lepvera en forme demprunst sur les biens saisis la some de 2000 escus, ou plus sy faire se peult, pour pouvoir rembourser sur lesdits deniers de la recepte dans ung an, et au cas que ladicte recepte ne peult, fournir sera faicte cotissation sur les habitans.

Et pour lepveurs desdits deniers sont convenus : de Sct. Matthieu, les srs de Mesilly, Penallan, le misent Yvon Pertevaulx. — de Sct. Melaine, les srs de Kerengoff, Morice Noblet et Trellever, Rosmeur, Yvon Pridiry. — Sct. Martin, Kerenprovost, Kermorvan, Kerbasquiou, Poulras, Jean le Mineur.

Et est entendu que toutz, demeurant en ville de quelque calité qu’il soict seront priés d'avancer audit prest, et procederont à faire ladicte lepvée de ce jour, et contiueront jusques à avoir parfaict, et à se trouver ce jour ceans à une heure apprés mydy.

Pour le faict des paroysiens de Plouezoch, avant les desclairer ennemis l'on entendra lundy Jehan Venneaut.

Par la requeste presentée par Jean Pezron est advissé que l'on escripra au procureur de la ville de Lannyon.

— Du 13ème jour d'octobre 1589, devant messieurs le gouverneur, seneschal, bailliff, lyeutenant, M. de la Boissière.

Le sr de Mesgouen, le sr Kerenroux, Penarguer, Kerasten ont juré la Sainte Unyon, Le Prat-Guen et Mesaudren pareil, M. de Kerarchant pareil.

Pour le regard des fraicts qu'il convient faire pour la guerre, advisé que le recepveur poyra au desir des billetz que le procureur baillera et l'y vaudront de quitance.

Pour le regard des paroysiens de Ploezoch, egart à la requeste par eux presentée, advisé qu'ils pouront venir demain, le marché entendant venir le lendemain en prossession jurer l'Union et se joindre avecques les habitans, envoyront de toutes frayries certain nombre qui feront le faict valable pour toutz les aultres.

Grand nombre de paroysiens de Garllan sont presenté en la Chambre suplyantz estre receus à se joindre avecques les habitans de la ville et avoir ung capitaine aultre que Kervilsic, sur quoy leur a esté par M. le gouverneur baillé pour capitaine le sr de Kerouchant, pour lieutenant le sr Du Boys de la Roche entre les mains desquelz lesdietz paroysiens ont juré l'Union.

Pour le resgard du prisonnier qui fut presenté sur la prise du sr de Mesaudren, nomé Guillaume Letosoys, le conseil est d'avis qu'il soict libre parce que le sr de Lezversault promect que ledit Letosoys ne fera mal ny offense à la ville et à auchun desditz habitans en auchun temptz, et que ledit sr de Lezversault a promis et en a rezpondu, et pour assurance a signé sur le cayer : Francoys du Parc Lesverzault.

Pour la lettre de ceulx de Rosgoff et Pempoul, est advisé de leur escripre pareille assurance de comerce et trafficq reciproque en ceste ville.

Plus est advissé d'escripre à M. de Plœuc pour le remercyer de sa bonne volonté qu'il a promisse (aux) habitans, et le faire souvenir de la promesse qu'il a faicte de rendre le comerce et trafficq de marchandisse seurement en l'evesché de Leon.

Et parait d'escripre au sr de Kergournadec’h.

Pour le regard des abés de la Trinité, bailleront 200 # dessus les deniers de la confrerye par ce qu'ilz seront recompensés dessus les deniers de la recepte, et feront la poye dans huitaine, et parce qu'ilz ne seront tenus de faire les diners et festin acoustumé à faire, ains seullement tenir les maisses et aultres acessoires.

Sur la lecture faicte de la lettre escripte par la dame contesse de la Maigana au procureur de ville, est advissé que ledict procureur escripra à ladicte dame que Gilles Tercec et les deux aultres bouchers ont esté ouys, qui ont raporté scavoir : ledit Tercec que l'on ly a retenu o Bourouguel cincq vaiches ; et que les dix escus que l'on avoict aprecyé, l'on les délivra aux souldatz, Thomas Priser et Cadigues, retenu aussi deux vaiches et hoté quatre escus, et dudit Tercec neufs. Aussy luy remontrer les extorcyons que l'on a faict au mesaiger qui porta le procureur de ville à ladicte dame.

Pour la requeste, de Barbarin est advisé que jurant l'Union et par la promesse et obligation que la mère dudict Barbarin fera de respondre de ses actions, qu'il soict receu et admis en ladicte ville, et se fera ladicte mère anthoriser de son mary et le tout sans préjudice des actions du sr de Garllan en justice.

Est advisé que les paisans de Plouezoch qui furent hier prins qui venoinct en ville pour se debvoir reconcylier avecques ceulx de la ville seront mis en liberté passe de ladicte reconsilyation.

— Du 16ème jour d'octobre l'an 1589, devant MM. le seneschal, lieutenant et procureur de ville.

Les habitans cy devant nommés sont d'avis que M, de Rosampoul, suyvant son offre, face une sortye et que de la ville l'on lui fournisse 200 barque-boussiers à cheval pour repourser les enetnys qui font actes d'ostilité en la parroisse de Plouegonven.

Lesdits habitans ont deputté pour accorder avecques le sr des Yslles pour faire venir ses deputtés en ceste ville le sr de Kerochyou, le recepveur Kerherault, Kerscaou et le greffier Cailoët.

Il est faict prohibition et deffance attouttes personnes de quelque calitté et condition qu'ils soinct de mal parler ny murmurer contre MM. les cheffs et capitaines qui comandent en ceste ville, soyt en pryvé soyt en publicq, ains leur obéir sans contredict et rebellion, à paine de la vye.

Aussy est advisé que le sr des Ylles et sa troupe seront deffrayés.

— Du 17ème octobre 1589, devant MM. les gouverneur, seneschal, bailiff : M. de la Bouessière pour le procureur du roy, M. le lyeutenant.

Il est advissé que l'on lepvera une compagnye de six vingtz homes harque-bousiers, laquelle sera departye en deux compagnyes, scavoir 60 en chacune compagnye, et y aura ung capitaine et ung sergent de bande et ung enseigne à chacune compagnye, aux gaiges, scavoir :

Aux gaiges par chacun moys à chacun souldart 3 escus ; à chacun capitaine (en blanc), à chacun enseigne la some de (id.), et à chacun sergent de bande la some de (id.), lesquelz seront tenus à faire les sortyes, lorsqu'il sera recquis.

Les devant només sont d'avis d'avoir aultres forces à la discression de MM. les cheffs qui commandent en ceste ville assistés de MM. les juges, les troys capitaines de paroisses, les srs de Kergaradec, Restigou, procureur et miseur et le recepveur Kerellot.

Advisé que l'on escripra à Mgr de Mercure.

Aussy advisé que l'on pryra M. de Rosenpoul pour aller devers M. le comte de la Maignane à Bourouguel, et sera ledit sr de Rosempoul acompaigné de MM. le miseur et Trostang.

— En la Chambre du Conseil le 20 octobre 1589, devant MM. le gouverneur, les seneschal, bailly de la court de Morlaix.

A esté advisé que M. des Isles et ses troupes seront defroiez home et cheval à demy escu par home et 10 soulz tournois pour chaque laquais.

Aussi a esté advisé que mondit sr le gouverneur prandra 12 personnes pour demeurer au chasteau avecques luy pour 15 jours, ou aultre temps qu'il sera requis, aux frais et gage de ladite ville limitté à 15 s. t. par jour.

Deffence sera faicte à touttes personnes de vandre livre de mesche à plus haut pris que six soultz ; et ordonné aux marchandz d'exposer les mesches qu'ilz ont en vante soubz et au dedans ledit pris, et deffendu de ne les receller à paine de confiscation.

Aussy a esté advisé que le donsjon sera dressé le plus tost que faire se pourra.

Il sera banny par ville comendernent à touttes personnes qui peulvent porter armes de sortir hors leurs maisons et en armes à toutz advertissementz et alarmes qui se donneront en ceste ville, et se retirer aux corps de garde chacun en sa paroisse, et dict que celluy ou ceulx qui deffauldront et ne sortiront hors leursdites maisons seront tenuz comme ennemys.

— Du 21ème jour d'octobre l'an 1589, en la maison de ville, devant MM. les gouverneur, seneschal, bailly, lieutenant, Restigou, et MM. de l'Eglise et Tiers Etat en nombre sufisant.

Pour loger M. de Goulesne et ceulx de sa compaingnye, advissé que M. de Goulesne avecques 40 hommes et chevaulx seront logés en la paroisse de Sainct-Martin, et pour faire leurs estapes et chercher logeix sont només : Le Breil, Yvon Derien, et Yvon Deleau de ladicte paroisse. — Seront logés 80 homes et 80 chevaux en la paroisse de Sainct-Mathieu, et pour faire les estapes. le sr de Kerneguès, F. le Lavenan et Kerguennet. — En la paroisse de Sainct-Melaine pareil nombre qu'en Sainct-Mathieu, et pour faire les estapes MM. de Trelever, Kerochiou, et Kervern. — Et en cas qu'il y ayt plus grand nombre que 200 chevaulx avecques ledict sr, seront logés esdicles paroisses amesmes aférant par cy devant.

Pour le renforcement de la garnison au chateau du fort, advissé que les srs de Kerscau, Kerigonnal et Portzmeur retourneront dudict chateau à la maison estantz advertis, et seront rendus en leurs placses deux aultres par ce qu'il est besoign de leurs presances.

Pour certaines lettres eseriptes à M. le seneschal de ceste ville de la part de MM. de Kergresch et Kercabin [Note : On trouvera des détails sur les négociations entamées entre les ligueurs de Morlaix et du Léon et les conseillers Kergresch et Kercabin dans le rapport de ceux-ci publié dans le Choix des documentss inédits sur l'histoire de la Ligue, en Bretagne, édité par la Société des Bibliophiles bretons, p. 33 et suiv.], advissé que mondit sr de Keroglac, sy il luy plaict, fera response la ladicte lettre et leurs escrira que sy il leur plaît de venir en ladicte ville afin de y fere cognoistre le contenu en ladite lettre, y auront toute seureté.

Advissé que toutz ceulx qui sont habitantz apresent en ville y desmeureront et resideront, et au cas qu'ilz sortent seront leurs biens confisqués et vendus pour les deniers provenantz estre employés au faict de la guerre ; et eulx declairés deserteurs et proditeurs de la ville ; et sera la presente ordonnance banye ceans ; et ordonné après que les femes lesquelles l'on a ordonné sortir sortiront dans 24 heures, et pour executer ladicte ordonnance les srs de la Villeneufve et des Illes.

Il est pareil deffandu à toutz habitantz de ne bouger et de ne faire sortir leurs biens hors ceste ville, soubz peine de confiscation et les deniers estre employés au faict de la guere, et le recepveur commis pour arester les biens que l'on vouldra faire sortir par mer. — Les biens de cents qui sont enemys et rebelles desclairés bonne prinse.

— Du 23ème jour d'octobre 1589, devant MM. les gouverneur, seneschal, bailly, lyeutenant.

Advisé que ceux qui sont taxés pour faire une advance en ceste ville seront contrainctz au payement du contenu en leur taxe par les voyes deuz et raisonables, mesmes par execution de leurs biens.

Mercredy, l'on rapportera les noms de ceulx qui ont moyen de supporter les advances pour y pourvoir.

Il est deffendu à tonnes personnes de quelque qualitté qu'ilz soinct de ne faire oultraiges ny injure à ceulx qui seront deputtés pour l'execution de ce quy sera advisé en la Chambre, à paine de la prinson et autres amandes que la Chambre advisera ; et sont commis toutz sergentz pour l'execution desdictes deffances.

Sur la lecture de la lettre du compte de la Mainanne envoyée à M. de Rosanpoul, a esté advisé que ledit sr de Rosanpoul sera pryé de parlementter et conférer avecques ledit sr compte en la plus grande assurance qu'il voyra l'avoir affaire, à laquelle fin est le sr de Trostange nomé deputté pour luy faire compaignye,

Pierre André et Bergat, de la parroisse de Ploueigras, prins prinsonnier estantz venuz randre des enfentz en ceste ville au sr de Keranprovost, et P. Noblet, sont eslargis payans les despans.

— Du 25ème jour d'octobre 1589, en la maison de ville.

Pour les prinses qui se font de partye des habitantz de Morlaix et marchantz quy viennent en ville pour le traficque, ont esté deputtés pour faire remonstrances touchant aux cheffz des compaignyes qui sont en ville, scavoir MM. les seneschal, bailly, lieutenant ; MM. de Kermadeze, l'archidiacre, le procureur de ville, Kerochiou, le Restigou, Kergaradec, Kernegues, à une heure après mydy à se trouver au logeix de M. le seneschal en la ville close.

Pour les 200 escus baillés par ceulx de la confrarye de la Trinitté, il est advissé que l'on baille 50 escus à chaque paroisse à charge de les employer promptement aux munitions de guerre, o fortifications de ceste ville, et 50 escus entre les mains du recepveur.

Lecture faicte d'une lettre de la part des parouessiens de Plouegaznou signé. P. Trogoff et de la Lande, adressée à M. le recteur de ladicte parrouesse qu'il dict avoir respentance.

François le Caveran de Ponthou sera receu.

Marie Corre eslargy parce quele vydera la ville dans ce jour, à peine de fouet.

Toutz ceulx quy son desnomez aux roles pour les advances seront execuittés et contrainctz par corps. Enjoinct à F. Marchant faire le debvoir à paine de 10 #.

La Chambre a esté d'avys que le sr de Coespel sera très bien venu en la ville en toute seureté comme amy bienvellant d'icelle.

Pour la conferance près M. le compte ont esté deputtés MM. le gouverneur, les troys juges, le Restigou, Kergaradec, Kerrozyou et procureur de ville.

Pour le faict de M. de Gouezbriant [Note : François de Goezbriant avait été fait prisonnier à Plestin, alors qu'il se rendait en sa garnison de Tréguier, par un parti de ligueurs et livré à Cremeur et à des Iles. Ceux-ci pensaient lui faire payer une rançon, mais les habitants de Plestin s'y opposèrent, ne voulant pas qu'il recouvrât sa liberté sans un engagement écrit établissant qu'il ne leur ferait plus la guerre. (Etudes historiques sur le Finistère, par R.-F. Le Men, p. 108 et suiv.)], les habitantz quittent l'interest qu'ilz ont eu en sa ranson parce qu'il promectera ne porter jamays les armes contre la ville en général ny en particullier, ny offanser les parouesses de Plestin, et parrouesses y alliées :

— « Du 26ème octobre 1589, au logis de M. de Cremeur à Morlaix.

« Executans ce que dessus pour le faict dudict sgr de Goezbriant, icelluy seigneur de Goezbriant a promis par serment par luy presté entre les mains de M. l'archidiacre de Plougastel qu'il ne portera les armes, ne ne fera la guerre aux habitantz et ville de Morlaix et aux parroesses alliés, par expres à ceulx de Plestin, sauff à luy à se pourveoyr contre ladicte parroesse de Plestin en general ou particulier par les voyes de justicze, parce que le procureur de ville, au nom desditz habitantz, a presté pareill serment entre les mains de mondit sr archidiacre de ne faire la guerre au sr de Goezbriant, ainctz desmeurer le comerce libre entreulx corne au passé. Françoys de Goezbriand. J. Pinart ».

— Du 27 octobre 1589.
M. le procureur a remonstré avoir accordé avec le sgr de Goulaine pour la somme de 1900 escus et avoir poyé à valloir 900 tant desur, et s'est obligé en privé avec le miseur et Vincent Kermerchou de payer le surplus et le reste dans dix jours.

Lesdictz habitantz d'un commun assentiment approuvent ledict accord et en promectent indempnité ausdictz només.

Et pour faire et repeter les remonstrances audict sr de Goulaine pour la repetition des deniers prins par ses gens de party des habitans, et faire cesser lesdictes princes suivant la promesse dudict sieur, ont esté només et deputtés les sieurs de Kergaradec, Kerscau, Kerouziou, Keremprovost, et M. le seneschal, et à l'yssue.

Advisé que les mesmes deputés qui ont faict la cotisation acordé par forme d'emprunt feront un rolle de cotisation de ceulx qui n'ont esté comprins au precedant rolle et assignacion à un heure appres midy de cze jour.

Lesdictz habitantz sont d'avis que le mois de la garnison dudict sr de Goulaine comancze de cze jour sauff à recongnoistre ceulx qui ont entretenu les soldartz pour le passé et ont fourny foing et advoine ; et pour les hostes ramboursés de la despancze faicte par ladicte compaignye jusques à cze jour, enjoinct au procureur de leur bailler des billetz et au receveur de les poyer.

Pour aider les fouriers de la compaignye de M. de Goulaine à loger les soldartz sont députés Kergurunet et Pierre Thepault.

Plus est advisé que Mgr le gouverneur prendera vingt souldartz à gaiges pour un mois pour la deffancze du chateau.

Sont deputés le sr des Ysles et de Morlen avecques le greffier pour faire invantaire de cze qui est au coffre de Me Guillaume le Veill.

Les habitantz sont d'avis de bailer paseport et seureté au gentilhomme qui sera envoyé de la part de MM. de Kergrech et Kergabin.

Advisé qu'il sera dressé un acte d'asurancze à toutz marchantz qui envoiront marchandise en ville de quelque ville, pais ou contrée qu'ilz soinct.

— Du 30ème octobre 1589, devant MM. les gouverneur, seneschal, bailliff, lyeutenant et M. de la Bouessière.

Sur la plaincte des pauvres gens chez lesquelz ont logés des souldartz de Mgr de Goulaine, sont députtés le sr de Kernegues, Kergurunet, Kerenguen, Pierres Thepault, Yves Pertevaulx, pour faire faire estat à quoy monte le fournissement des boys et chandelles affin de bailler deniers ausditz gens suyvant ledict estat quy sera faict par lesdictz desnomés.

Advissé que doranavant le guet et sentinelles comancera à 6 heures du matin à comancer à demain, et que le corporal ne bougera de la sainctinelle jusques à ce que l'autre corporal se rende, ausquelz est enjoinct de se trouver à l'heure limitée ; et seront les deux compaignyes continuées pour 8 à 10 jours.

Deputés pour aller à Kernizien, vers M. le compte de la Maignane, le sr de Morllan et Trostang.

Advissé que M. le procureur de la ville escripra au téologal de Saint-Paul qu'il sera le très bien venu en ville.

Advissé que l'on contraindera ceulx ausquelz apartiennent les jardrins de payer les murailles faictes authour leurs jardrins, et ordonné à Guingamp, procureur de la paroisse, à painne de la prison, de les faire contraindre suyvant le mémoire du sr de Kergaradec.

Advisé que ceulx qui ont esté deputté pour faire la cotisation viendront ceanz à une heure appres mydy pour parachever le rolle de la première cotisation.

Guillaume Stanger a juré la Sainte Union entre les mains de M. l'archidiacre de Plougastel de servir Dieu et les habitans au faict de la guere.

Pour faire une nouvelle cotissassion sur ceulz desmeurantz en ville de quelque condition que se soict, mesmes dans les eclesiasticques et gentilhomes : paroisse de Sct. Mathieu : Guill. le Bihan, F. Sallaun, Guillaume Clech, — Sct. Melaine : P. Guillemot, Yvon Foucquet, Jan Le Guallès, — Sct. Martin : Toulbrunault, René Perefixe, Yvon l'aisné. — Et se fera ceste cotissassion de la some de 3000 escus, et à se trouver ceanz vandredy prochain une heure appris mydy.

Pour avoir l'euyl sur la garite de la rue des Vignes sont deputtés Jean Guillemot et Jean du Boys. — Pour la garite de la rue de Ploujan, Jean Lesquellen, Guillaume Bigot et Vincent Nouel. — Pour la garite de la Fontaine et la rue de Sct. Melaine, Maurice Noblet, 0llivier Nouel.

Advisé que les deux piezes d'artillerye qui sont soubz la halle seront rendues au petict chasteau.

M. le gouverneur est pryé de faire rendre les deux piezes d'artillerye dont il a promesse parceque lesdictz habitans feront les fraictz de les rendre.

Advissé sur la requeste de la fame de Languibrech ? que ledit sr de Languebrech ? sera luy, ses enffans et biens en ville en toutte seureté parce qu'il se presentera pour jurer et signer l'Union, après avoir entendu que Mrs de Goulaine, Rosenpoul, Faouet, Cremeur sont consentantz.

Les abés de la Trinité ont payé presentement la some de 200 escus qu'ilz avoinct, avant ce jour, promis pour ayder au faict de la guerre, laquelle some a esté delivrée au procureur de la ville, et ledit procureur les a delivré scavoir : au recepveur Kerellot 50 escus, à Jan Floch pour la paroisse de Sct. Martin 50 escus, à Ryou Pochon procureur de Set. Mathieu 50 escus, au procureur de Sct. Melaine 50 escus.

Pour la requeste de Me Guillaume de la Brosse, sirurgien, a esté advisé que ledict de la Brosse demeurera exsant de toutz succydes et de guet durant les troubles.

Pour la requeste de Meauce le Jeune est advisé, que les cotisseurs auront esgart à la cotissation du domaige qu'elle a eu.

Sur la requeste de Barbe Corre est dict que les cotisseurs auront esgart à la peu cotisser.

— Du 31ème jour d'octobre 1589, devant MM. de Goulaine, Rosenpoul, Cremeur, gouverneur de ceste ville, seneschal, lyeutenant et aultres deputtés.

Lecture faicte de l'acte de paseport que Mgr de Chateauneuf envoye aux habitans de Morlaix, dabté le 29 octobre present moys, signe Rieux et Cassette. — Les habitans ont deputté pour la eonferance vers M. Chateauneuff o les conseillers, scavoir l'archidiacre de Plougastel, les srs de Resdigou, Morllen, Kerochyou, Kervern, Kersco et Kerigonval. — Lesquelz deputtés viendront à la Chambre du conseil pour raportel ce qui aura été proposé affin de envoyer une resolution.

— Du 2ème jour de novembre 1589, en l'assamblée generalle de la maison de ville.

Le sr de Kernegues à raison de son age, requiert et a requis estre deschargé de l'estat de capitaine en la paroesse de Sct. Melaine. — Deschargé par advis du conseill.

A esté institué par M. le gouverneur à lieutenant en l'absence de M. Kergaradec, son lieutenant. — Et sur la nomination de M. de Kernegues et par l'advis du conseil mondit sr le gouverneur a institué à capittaine en la pareoesse de Sct. Melaine le sr de Rosmeur, lequel present a presté le serment.

Lesdicts devant només ayant ouy lecture des memoyres dressés pour les deputtés soint signés par M. le procureur de la ville et presentés à MM. les comissaires ; et ont deputté pour aller vers MM. conseillers [au lieu] de M. l'archidiacre, Morise Deporte, Francoys le Borgne et Jean Keraultem.

Sur la requeste de Pierres Coatnempren, advissé qu'il demeurera prisonnier.

Pour le regart des extraordinaires faictes par Pieres Paul Garamour, Janne Kerscaff, seront payés sans que cella soict tiré à consequance à l'advenir.

Pour faire les estapes de M. de Carné en la paroesse de Sct. Melaine, et 150 chevaulx, deputtés Jean Calloet, Morice Noblet, et Francoys de Penhoadic.

Pour le regart de Guillaume Le Guen, advisé qu'il demeurera es prisons et sera payé pour ses despans 10 s. par jour.

— Du 4ème jour de novembre 1589, devant M. le gouverneur et M. le bailly en la Chambre.

Les habitantz sont d'avys et ont deputté presentement pour pryer M. de Lanvengat de faire entendre les conceptions des habitantz à MM. de Kergrec’h et Kercabin et a ceste fin ont deputté MM. le bailly, Desilles et Kerango.

— Du 5ème jour de novembre 1589 en la Chambre, devant MM. de Goulene, de Cremeur, le gouverneur et MM. de la justicze.

M. le seneschal a resmonstré se qu'il se fist hier en la conferance avecques MM. de Kercabin el Kergresch, et a presenté un arest non singné contenant la declaration que elle entend que les subgectz du Roy facent et qu'ilz prestent serment de ficlelidé et obeissance au roy de Navare.

Advissé que l'on se tiendra à la declaration jà faicte, et que ledit sr seneschal l'escrira à MM. de Kercabin et Kergresch.

Après, M. de Lanvengat a remonstré que le jour d'hier, en la conferance, il fust advissé de ne faire poinct la guere aux gentz d'eglisse, payssantz, fames, filles, pourveu que lesdictz payssantz mectent les armes bas et demeurent labourer de tere.

Advissé par la compaignye que à l'advenir l'on ne fera la guerre ausditz payssantz pourvu qu'ilz mectent les armes bas, et qu'il ne sonent le toxin, et qu'ilz laissent les chemins libres aux gentz de guerre, et le party contrere ne le faysant de leur part, et aussy autroict surceance d'armes jusques à mardy pour tout le jour, et deffanse faicte à toutes personnes pour lundy et mardy de n'oupvrir leurs bouticles et se trouver toutz pour ayder à la fortification de la ville à peine de 60 liv.

Les monstres de chaque parrouesse assingnées à mydy de ce jour chacune en sa parroesse.

Les lettres de Mgr le duc adressantes à MM. de Goulaine, Cremeur et habitans, leues.

— Du 6ème novembre 1589, en la maison de ville.

Le sr de Rosmeur laict offre de faire faire la porte de la barrière des Vergers, et advancer les deniers o la charge d'estre rembourzé soict par le procureur de la ville, ou par le tresorier, ce qui luy a esté accordé et promys.

Pierre Guillousou faict pareil offre pour la bariere de Ploujan : pareile ordonnance.

Jacques Arel sera rembourzé de ce que les souldartz ont demeurré chez luy, auparavent touchera deniers suyvant l’estat presenté et aparu, et à ladicte fin, le procureur baillera recquete.

Advissé que M. Kerochiou, les srs de Morlen, des Illes, et le recepveur prendront le coffre de M. Guillaume le Viel, et venderont la marchandise y estante pour les deniers provenantz estre employés à reparer les murailles de la ville closse pres le pont (au Moulin ?) et pour avoir le soign de faire faire ladicte reparation, sont només les srs de Kermadeza et Jan du Plessix.

Le sr de Kergurunet, du Restigou, La Bouessiere només pour faire les tranchés et reparatious recquisses à Sct. Matthieu.

Les assistantz declairent n'avoir jamays heu oupinion du sr de Kerscan que bonne, et sy aultre closse a esté aleguée contre luy, ce ont esté calompnyes et pour savoir qui la acussé au sgr. gouverneur sont només les srs de Morlen et des Illes et le sgr lieutenant.

Advissé que le sr de Cremeur aura pareil apoinctement que les gentz de M. de Goulenes pour l'advenir, suyvant l’acord faict avecques luy.

Ceulx qui ont esté cotissés et qui restent à poyer seront contrainctz par toutes voyes, et ordonné à Fleurdeville faire les contrainctes à peine de 10 liv. ; mesmes seront contrainctz les srs de Kernegues et Mesilly.

Ordonné que les cotisseurs cy devant només cotiseront sy 4000 liv., et seront cotissés les eclesiasticques et gentilz homes, et assisteront sy bon leur semble à ladicte cotissation le srs archediacre, Bourgerel et la Boueziere : pour le tiers estat assisteront aussy, pour Sct. Martin, Jan Coadic ; à Sct. Melaine Jan Aufret ; pour Sct. Mathieu, Marc Lechesue, et ne seront cotissés sy qu'ilz n'ont le moyen de poyer 2 livres.

Advissé que l'on parachevera a remplir le donjon du petit chateau et seront payés les oupvriers qui travailleront.

Advissé que le procureur de ville escrira à la dame de Kerlan envoyer ce quelle a esté cotissée et ce quelle sera cotissée en la prochaine, ou à sa faulte de ce faire elle sera déclairée enemye de la ville et feront neantlmoingz vendre.

Advissé que les srs de Kerneguès et de Kergiurunet ensemble avec les fouryers de M. de Goulenes feront se retirer toutz les gentz du sr de Goulenes de la parrouesse de Sct. Mathieu.

Permys aux srs de Guerdavid et Kerloazet d'entrer en ville avecques leurs biens et famille o la charge de singner l'Union et contribuer aux frays de la guere comme les aultres gentilz homes.

Advissé que Rolland Trogoff sera retenu pour canonyer et pour acorder avecques luy sont deputtés les srs de Kergaradec, Resmeur (ou Rosmeur ?) et Pratanfeuten.

Advissé, sur la requeste de Maurice le jeune, que l'on fournira du boys au sr de Goulenes et pour ceste efect le procureur de ville nomé. Et pour fournir des lingeryes et chandelles, le myseur et Kernegues només.

Advissé que Veaumorin aura 8 liv. pour avoir fourni de la lingerye au sr de Cremeur.

Sur la requeste de ceulx de Plouigneau, permys a eulx de venir en ville justisier à Sct. Estienne avecques toute seureté et sauf conduict.

Sur la requeste de Pierre Coëtnempren, permys de se retirer o la charge de rendre certificat dans deux jours de s'estre rendu au sr de Mesle et deffense de ne tirer persone avecques hors la ville et partant eslargy.

Note : Pierre de Coëtnempren, cap. au gouvernement de Saint-Pol, en 1621, était fils d'Yves de Coëtnempren, sr de Crec'hengar, et d'Ambroisine de Kerliviry. Voici trois pièces transcrites sur les originaux appartenant à M. P. de Courcy, qui feront connaître la formule des commissions, des serments à la Sainte-Union et des lettres de sauvegarde ou passeports :

1° 19 décembre 1567. — Pierre de Boiseon commissaire des montres de l’arriere ban de l’evesche de Leon, gentilhomme ordinaire de la chambre du Roy, sieur de Coetynizan Kerouzeré, Goudelin, Vieulx Chastel, Plounévez Quintin etc avons commis et par cestes commectons noble homme Yves Coatnempren sr de Knec'hguengar pour estre capitaine et conducteur des gens partables de la parroisse de Trefflaouenan pour.... et conduire les ditz partables, pour faire rampartz et guectz pour la tuition et deffense du païs ; pour empescher les insultes d'assaultz des ennemys du Roy nostre site ; commandant et par cestes commandons aux ditz partables d'estre obeissantz au dit de Coëtnempren executant cestes......... à Lesneven le 19e de deceubre l'an 1537 soultz nostre signe : signé : Pierre de Boyseon. Du commandement du dit sieur : De Launay.

2° 24 juin 1590. — Rolland de Neufville, par permission divine evesque de Leon, certifions que noble homme Yves Coëtnempren sieur de Knechengar y demeurant en la paroisse de Trefflaouenan, dés le 22e jour de ce present mois a faict protestation de s'en tenir à la Sainte Union des catholiques, aider et suivre le parti d'icelle à son pouvoir et n'a lherer jamais à auchun aide contraire et aissin l'a jure entre nos mains. A quoy il a esté receu soubz le bon plaisir de Monseigneur le Duc de Mercœur, gouverneur et lieutenant pour le Roy tres chrestien Charles dixieme du nom en ce duché de Bretaigne.

De quoy lun avons delivré le présent acte à sa requeste pour luy servir où et comme estre debvra soubz nostre signe et cachet de nos armes, le 24e jour de juign l'an 1590. Rolland de Neufville, evesque de Leon.

3° 24 novembre 1590. — Jan de Goulaine baron du Faouet, seigneur de la Ruffeliere, commandant en l’evesché et sur la coste de Leon soulz l'authorité de Monseigneur le duc de Mercœur gouverneur et protecteur des catholiques de ceste province, à tous capitaines, chefs et conducteurs de gens de guerre tant de pied quede cheval estans…… en ce pays pour le service de la Sainte Union des catholiques soubz l'anthorité de mon dit seigneur et tous autres qu'il appartiendra, salut. Pour ce que par cy devant le sieur de Knec’hguengar auroit esté ravaigé at ranczoné par aucuns du Saint Party soubs pretexte qu'il tenoit le party contraire et qu'il favorisoit les sieurs de Kerdellegan (Francois de Coëtnempren sieur de Kerdellegan, cap. des arquebusiers de Trefflaouénan) et Penanknec’h (Pierre de Coëtnempren, sieur de Penanknec'h, puis de Crec'hengar) ses enfantz qui en effect portoient les armes pour le party contraire. Lesquelz depuis, reduitz et rangés à leur debvoir et recognoissant leur faute, nous ont promis et juré observer et entretenir lez pointz et articles de la dite union et à iceux ne contrevenir en quelque façon que ce soit : Pour ces causes, avons iceluy sr de Knec’hguengar, ses enfants et famille, prins en la protection et sauvegarde de mon dit seigneur et en la nostre. Sy vous prions et à tous ceulx en nostre pouvoir enjoignons que ne permettre leur estre faict aulcun tort ny .... en leurs corps ny biens, ains leur departirez de vos faveurs et ayde si besoign est et vous requierent et nous en prendrons revanche où l'occasion s'en presentera. En themoign de quoy avons signé cestes et fait apposer le cachet de nos armes ce 24e novembre 1590.

Jean de Goullaine. Par mon dit seigneur, Keranguin].

Pour les requestes de ceulx qui sont tenus prisonniers par les gentz du sgr de Goulene, seront communicquées audict sr de Goulenes à ceste fin par les srs de Kerochiou, Morlen et des Illes.

Sur la requeste de mademoiselle de Goezbriant, seront ses coffres portés en ungne chambre apellée la chambre du Prévost.

— Du 8 de novembre 1589.

Sur la requeste du procureur est advisé que le bail à ferme des moulins sera bannye à qui faira meilleure condition.

Advissé que toutz les prisonniers qui seront prins en ville seront rendus à M. le gouverneur et à son chateau.

Pour pourvoir des logeys et aultres choses nesesaires aux souldatz qui sont en ville ou viendront : pour les logeys aux personnes en la parrouesse Sct. Melaine, sont només Maurice Noblet et Jean Calloet. — Pour la provission des foin, paille et avoyne sont només Fr. Desilles et Jean Guillemot. — Pour les escuryes, Pierres Kermerchou, Yvon Foucquet et Kerhamon. —Saint Mathieu ; pour les logeys M. de Kernegues et Kerenguen, et faire fournir des lingeryes, boys et chandelle au sieur de Goulaine. — Pour les estables Kergurunet et Pierres Thepault. — Pour le magasin de foin, paille et avoyne, ledict Kergurunel, et Jean Tison. — Sainct. Martin : Pour logeys les srs de Trostang et Kerenprovost. — Pour les escuryes magasin de foin, paille et avoyne, Renné Perssic, Guyon de la Villeneuffve. Et lesdictz desnomés seront contrainctz à faire ses chairge à painne de 20 escus.

Est advissé que en la parouesse de Sct. Mathieu seront logés les homes et chevaulx des srs de Goulaine et Faouet. — En la parouesse de Sct-Melaine les srs de Carné, Rosempoul, Cremeur, Des Illes et leurs troupes et chevaulx. — En la parouesse de Sct. Martin MM. de Leon et Cornouaille.

Advissé que l'on escripra a M. de Kergournadec pour le remercyer de ses canons.

Deliberant sur les lettres et articles envoyés de la part de M. de Chateauneuff, et conseillers de la Court, lesdictz habitans sont davis d'aprover les articles cy appres et non aultrement, et se pour leur interest seullement.

Pour le regard de la pippe de vin prise par le sr de Restigou que le sr de Kernegarouet vollait vendre en la parouesse de Plouegonven contre la deffanse d'envoier vins hors ceste ville, sera vandue et au plus donant et dernier encheriseur pour le tiers estre delivré au sr de Restigou, et les deux partz au recepveur : ledit sr de Restigou baille ladicte part adjugée pour la fortification de ladicte parouesse.

Et pour le tonneau de vin baillé en garde à Pierres Le Diouguel, advissé que le vendra en sa juste valleur, pour les deniers estre mis entre les mains du procureur.

Pour la prinse faicte par Guillaume Sallaun des deux gentilshomes et leurs chevaulx, est advissé que lesdictz deux chevaux seront vandus par ledict Sallaun, et partagés pour ledict Sallaun avoir le tiers et les deux partz à la ville. — Et ledict Sallaun et Kerenguen deputés aler vers Mgr de Goulaine touchant la ranson desdictz prisonniers.

Vincent Keronnore remonstre que ung coffre qu'avoit Guillaume le Veil que on faisoict transporter hors ceste ville fut deposé en sa maison et que, depuix, M. du Faouet et ses souldartz auroict transporté, come il montre par acte dudit sr du Faouet, recquerant estre deschairgé, dont luy a esté decerné acte.

Pour compte de la despanse faicte par Mgr de Goulaine ches Catherine le Bris, le sr de Kerenguen et Yvon Perthevaux, consul, deputtés pour compter avecque la feme le Briz à raison de demy escu pour home et cheval.

Pour la requeste de Me Francoys Engoyart, advisé que l'on baillera de l'argent à M. du Faouet ; ledict sr sera suplyé de faire pour la raison, et poyer ungne moittyé de la provission qui foict, en la maison dudict Engoyart.

Pour voir le rolle et nombre des gens d'armes qui sont soubz la chairge des srs de Goulaine et Faouet et aultres seigneurs en ceste ville tirant poye sont comis les srs de Kerochyou, Kerengach et Kergurunet.

— Du 9ème jour de novembre 1589.
Pour les articles presentez par MM. les deputtés de Leon de la part de M. de Chateauneuff, pour la trêve par luy requis, advisé que l'on choesira des deputés pour luy aller vers M. de Chateauneuff, pour luy representer les memoyres et articles de la part desdictz habitans et leur ville.

— Du 10ème de novembre 1589.
Pour la reparation de la muraille de la ville estant joiniant la maison de Francoise Guyngamp, advisé que ceulx qui ont esté deputtés prenderont des pierres, boys et aultres etoffes la part où ilz pouront trouver parceque ceulx ausquelz apartiendront seront remboursés de la valleur.

Pour la police : deffandu a toutz taverniers de vandre pinte de vin de Gascoigne à plus hault prins que 5 s. t. pincte, et vin du Pouetou à 3 s. t., vin d'Espaigne 5 s. t., à painne de 24 escus d'amande et confiscation de la marchandise.

— Pour les hotelleryes, deffandu de prendre plus haut pour home et cheval par jour que demy escu, par table de marchant 10 s. t., pour chacques serviteur 5 s. t., par table, pour cheval 10 s. t. par jour.

Pour faire les remontrances aux cheffz et capitaines qui sont en ville touchant leurs garnisons, prevenir à M. de Goulaine qu'ilz n'entendent soudoier de sa compaignye que 50 curacyers et 50 harquebousiers ; M. de Cremeur 15 curacyers et 15 harquebousiers, et que chacune cuiracze ayt deux chevaulx, que n'entendent prendre auchun cuiracyer qui soict de 3 lieux de ceste ville, non de la ville, sont deputtés pour aller vers lesdictz srs Kerochyou, Rosmeur, Kersco, Kerygounach.

— Du 13 novembre 1589.
Advisé que Trifech estant prinsonnier ira servir le chateau pour curer le puis, et aultres chosses suilvant le commandement de M. le gouverneur.

Advisé que Gord, portefaix, aura six escus pour faire panser son bras qui est rompue au servicze du puplic.

L'asemblée sera à 9 heures et les convenus se trouveront à ladicte heure à peine d'un escu qui sera executé à la sortye par le sergent de ville, et ceulx qui comparoistront appres la deliberation poiront la moictyé.

Le sr de Rosmeur deputté pour aller en la compaignye des srs de Rosanpoul et du sr de la Motte, pour aller trouver Mgr le duc de Mercueur pour les fins des articles et propos de surceance avecques M. de Chateauneuff.

Sera faict ung rolle de ceulx de la noblesse et baillé à MM. l'archidiacre, Kernegues, Kermadeze, pour les supplyer de prester à la ville pour les fraiz de la guerre certaines sommes de deniers, chascuns sellon ses moyens et affection au party, et ceulx quy feront reffus y seront contrainctz suyvant l’estat quy en est faict.

Advisé que le recepveur Kerellot fera la levée des deniers de la presente subvention à 6 deniers par livre parceque ledict recepveur les contraindra par touttes voyes et rigueurs de justice.

Advisé que los soldatz qui sont venus trouver M. de Goulaine seront poyés a la differance de moys comanczé par mondit sieur de Goulaine.

M. de la Motte et M. de Kermorvan sont deputtés pour aller trouver M. de Cremeur pour scavoir de quant le moys des soldartz est comanczé. Et pour aller trouver MM. de Goulaine et du Faouet, les srs Morlen, Kervern pour les sermentz de leurs soldartz.

Advisé que ceulx qui ont resté a payer seront appellés en la Chambre à mercredy.

— Du 15 novembre 1589.
Le sr de Locrenan faict sa plaincte que le sr de Kerbourdon a ravagé sa maison et demande estre licentyé de s'en revanger. — Acte de sa plaincte et permis de se pourvoir par les voyes debues et raisonahles, et coppie adressée audict sr de Locrenan de la lettre de M. de Chateauneuff par laquelle il desavoe ledict Kerbourden et Bourdiech.

Les paroysiens de Plouygneau, par Me. Jean Tiron. demendent estre receus à se joindre et unir avecques les habitans, et demendent avoir ung passeport pour venir faire leur declaracion, scavoir, de la frerye de Kerlan, Me Jean Bethennec prebtre, Robert le Gac ; de la frerye de Kerstrart, Guillaume Kerbren ; de la frerye de Luzivily, Bizien le Granec ; de la frerye de Ted fentec, Laurens Bras ; de la frerye de Bourouguel, Jean Lescoure ; de la frerye de Kersco, Jean Coatevern et du treff de Lanneanou, Hervé Meur. — Lesdictz habitans ont consanty ce que dessus.

Advisé d'envoier vers Mgr de Mercur touchant la treue parlée avecques M. de Chateauneuff, et escripre par missives à M Des Illes.

Pour les parouosses de Plougouven, Plestin, Plourin, Ploujan, Plouezoch, Plougaznou sont et ont esté de l'Union, suppliantz les sgrs capitaines et gens de guere de ne mal faire ny permettre que lesdictes perouesses soinct ravaigées.

Et pour le regard des paroysses enmys en l'Union ausquelles les habitons ont maisons et biens et gentilshomes qui se sont rendus en ceste ville, seront les cheffz de gens de guere pryés de ne les ravaiger ny permettre qu'ilz soinct pilés ny ravaigés.

Les habitans, pour leur interest., consentent que le Sr de Kerhuiz faisant venir sa famille et biens soict receu en ville, jurant et signant l'Union. — Parail pour le sr de Lesormel par Kerguen qui remonstre que le sr de Lesormel a esté ruisné par les ennemys et qu'il n'a jamais porté les armes contre ceulx de l'Union, ce que les habitans ont congneu.

Sur le plegement de Louys Hamon, advisé que, neanmoingt ses oppositions, sera continué à travailler sur les murailles dont est cas entendu que c'est pour la fortification de la ville sauff, passé de la guerre, de les réparer s'il est veust debvoir faire.

Les srs de Coatromarch et Pratquen receus à pareil, et assé congneus qu'ils n'ont porté les armes et qu'ils sont en ville poix le commencement de l'Union.

Pour refformer le rolle de la taille pour les habitans sont députtés le sr de Coetserchou, Nicolas le Blousart de Sct.-Mathieu ; de Sct.-Melaine le sr de la Villeneuffve et Yves Kerret ; de Sct.-Martin Jacques Demay et Jean Le Gaineur.

Avisé à la pluralité des voyes que ceulx qui sont taxés au rolle de la taille poyront par provision en la some que ung chacun est taxé, et les deputtés pour la réformation de ceulx qui sont trop cotissés, se trouveront ceantz à une heure apres mydy de ce jour en entendement d'eux, et pour cotisser, ceulx qui ont esté omis à estre cotissés et sera le tembour soné par les carffours.

Avisé que l'on deputtera deux personnaiges pour scavoir de M. de Rosenpoul sy le sr du Pré et le sr de Kerverzyou sont de sa compaignye, le sr de Kerochyou et le sr de la Villeneuffve.

Avisé que toutz ceulx desnomés au premier rolle de la taille seront contrainctz à poyement de ce qu'ils sont cotissés par touttes voyes de justice, mesmes par emprisonnement de leurs personnes.

— Du 15 novembre en l'assamblée de la ville, presents MM. de Goulaine, Rosampoul, du Faouet, de Cremeur et de la Motte.

Lecture faicte de la lettre envoié aux habitans par la noblesse de Leon du 13 novembre.

— Du 17 novembre 1589.
Pierres Jacques, Jean Guillemot, Guillaume Perot, Gilles Guillouzou, François Dugué, se plaingnent d'avoir esté surchargé en la taille. — Advisé que toutz ceulx (qui se) treuvent surchargés, présenteront leurs requestes et y sera advisé.

Pour la requeste présentée par noble home Guyon Huon sr de Kergadou, disant s'estre retiré avant ce jour dans Morlaix, et come il a aparu par acte, et demande estre mis en la taille parmy les survenus et non par aultre rolle.

Le sr de Kerochyou faict paraille requeste.

D'aultant que les denomés sont pressés, lesdicts habitans sont d'avis que lesdicts srs de Kergadou et Kerochyou se cotisseront parmy les survenus sans prejudice du prest qu'ilz ont vers lesdictz habitans, et en cas qu'ils ne vouldroinct se cotisser en la raison, seront cotissés par la Chambre.

Les cotissés au premier rolle poyeront par provision ce qu'ilz sont taxés, et pour le regard du surcroys, ceulx qui treuvent estre trop taxés présenteront leurs requestes demain lundy, faulte de ce faire dans ledict temps ne seront recepvables de ce faire par cy-apprès.

Noble home Francoys Henry remonstre que, avant les guerres, il avoit perdu son bien et neantmoingt est cotissé, et n'avoir moien pour poyer ce qu'il est cotissé, et demande estre deschairgé.

Pour le contenu de la requeste présenté par Mlle de Kernezech, advisé que M. le miseur condesandera sur les lieux pour s'informer de la vérité et y mettre ordre.

Pour la requeste presenté par Me Francois Quemeur, sirurgien, advisé que son père sera exempt de guect et poyeront les suscydes corne de coustume.

Pour la requeste verballe, de MM. de Kerguelen et Kergadiou Levigneh, les dictz habitans ont consanty pour leur interest, quils viennent en toute seureté en la ville et se d'avant mardy au soir pour tout dellay, jurant la Saincte Union, contribuant aux avances des fraictz de la guere come ont faict et font les aultres gentilshomes venus auparavant ce jour en ceste ville.

Sur la requeste de Jeanne Lescoff qui remonstre que le capitaine Noir est dans sa maison avecques nombre de souldartz 17 jours, ausquelz elle auroict fourny des leur despance, et qu'elle n'a receu que 6 escus à valloir, supplyant estre satisfaict. — Lesdictz habitans ont deputté MM. de Kersco, et le procureur de ville pour parler à M. de Cremeur affin de faire la raison à ladicte Lescoff.

Faict comparoir eu la Chambre Hervé Gueguen prisonnier : advisé que ledict Gueguen demeurera encores prisonnier à la pension du Roy. — Yvon le Bail, aussy prisonnier, après avoir esté ouy, advisé qu'il sortira de la prison avec injonction de mieulx vivre à l'avenir.

— Du 20ème jour de novembre 1589, en la Chambre du Conseil.

Sur la requeste présentée par les parouesses de Plouegaznou et Garlan, la Chambre a advisé que le corps desdictes parouesses sera receu à se joindre et venir avecques le corps de ladicte ville, parce qu'ils poyeront telle some en laquelle ilz seront taxés lors du departement qu'il se fera sur les aultres parrouesses pour les fraiz de la guere ; et deputeront 10 o 12 des principaulx desdictes parouesses pour faire ladicte Unyon et s'obliger audict poyement, mercredy prochain à l’oufverture de la Chambre ; et pour les gentilshomes rebelles et capitaines desdictes parrouesses seront aussy receuz à la differance qu'ilz se presenteront parce qu'ilz poyeront telle some en laquelle ils seront taxés en ladicte Chambre. En oultre respondre des ravaigementz par eulx faicts o pour avoir esté participantz et aydantz. — Depuix est advisé que MM. les gouverneur, troys juges, l'archediacre, les troys capitaines resouldront et feront response tant ausdictes parrouesses que toutz aultres parrouesses.

Pour Jeanne Le Scauff, luy sera faict reponse à l'oupverture de la première Chambre.

Pour la parrouesse de Plouegras advisé qu'il leur sera escript que leur desclairation n'est bonne ny saine et s'ilz ne veullent se conformer enthierement à la déclairation des habitans, qu'ilz ne pevent les recepvoir pour amys.

Advisé que le premier rolle sera executté par provission neantmoins oppositions o appellations, suyvant les precedantes ordonnances, et sauff à statuer sur les requestes des premiers jours : et seront les desnomés audict rolle contrainctz par emprisonnement de leurs personnes et execution de leurs biens.

Pour la parrouesse de Garlan se présentent Charles Lescourre, Pierres Guyrart, Pierres Meryatlec, Jean Lescurazec, Ylare Guymarch, Thomas Bezriolt, Yvon Geffroy, Jan Pape, Francoys Braouzec, Me Pierre le Pouren, prebtre, et leur curé Jean Berthou. — Les dictz parouessiens cy només ont juré l'union entre les mains de M. l'archidiacre, et sont receuz cri la sauvegarde de la ville.

— Dudict jour devant MM. les gouverneur, seneschal, lyeutenant, archidiacre, Restigou, Kermadeza, la Bouexiere, Villeneuffve, Kermerchou, Dupleissix et aultres, au chasteau.

Pezron Vern, Bizien Quentret, Jan Tudoret, Francois Kergaro, Guillanme Jaouen, Guillaume Fabien, deputtés de la paroisse de Lanmeur par procure par eulx aparue dabtée le jour d'hier, desclairantz que lesdictz paroissiens ont juré l'Union soubz la protection de Mgr le duc de Mercueur. — Et d'aultant que nos seigneurs de Goulaine, Rosempoul et aultres ne sont en ville, licenciés de s'en aller et renvoyés jusques à vandredy prochain, et ce pandant la seuretté et passeport continués, cessant touz acte d'hostelité. — A paraill le treff de Locquerec et Guimaec.

— Du 22ème jour de novembre 1589 en la Chambre du Conseil.

MM. de Kermabon, Kerbournet et Kerguelen ont juré l'Union entre les mains de M. l'archidiacre et signeront sur ce cayer. Pierre de Kaermabon.

Le sr de Kergadiou-Trogoff a presenté requeste pour estre receu à servir avecques les habitans : sera receu entrant en ceste ville dans vandredy en jurant l'Unyon, et faystint le debvoir come les aultres gentilshomes.

Le sr de Roslan a presenté pareille requeste : viendra dans vandredi prochain, et auront toutre assurance pour le respect des habitans.

Pour le sr de Kerbizien, François du Parc, l'on a aparu une lettre par luy envoyée pour estre reczou. — Passeport luy baillé pour venir à vandredy en ville se unir ; — pareil pour le sr de Kergadiou.

En general pour toutz gentilshomes et capitaines des paroisses, est advisé que, jurantz l'Unyon et contribuantz aux fraictz de la guere, ils seront reczeus parceque lesdictz capitaines et gentilshomes feront remectre lis chemins libres, ainsin estoinct avant la levée des armes en cze pays, et à la charge de se represanter dans lundy prochain et sauff les actions de ceulx qui ont esté ravaigés contre los ravaigeurs et aucteurs.

Pour le faict des lettres de M. le compte de la Magnane, est advisé que pour l'interest des habitantz ledict sr compte sera reczeu en la Saincte Unyon avecques eulx, soubz le bon plaisyr de Mgr le duc de Merceur, auquel sera faict plaincte de la consequance de la fortairesse de Bourougel, au prejudicze de ceste ville et du pays : ensemble des ravagementz faictz par les soldartz de sa garnison ; et envoiant le present acte de reception audict sr de la Maignane ne sera parlé desdictes plainctes, et par acte de sa reception luy sera promys ayde contre la partye contrere.

Yvon Riou aura un pasepord pour venyr en ville.

M. des Iles et Kerret deputtés pour aller vers M. de Goulaine pour ceulx de Roscoff.

Pasepord acordé pour Me Jacques Guainec, prebtre.

Pour les parroessiens de Lanmeur, Locquirec leur sera envoyé à leur desir le memoyre preseniement leu, lequel ilz garantiront et l'envoyeront dans vandredy prochain et y pourront venir en toutte seuretté.

Pour bailer la responcze à M. de Goulaine sont deputtés le sr de la Mote, le procureur de ville et ses juratz, et sera poyé de ce que l’on a promis pour le moys passé ; et en cas qu'il veille demourer pour huict jours, luy offrir 500 escus.

Le sr de Kerjan Kerriou et Penanprat reczeus avecques les submissions et condictions des aultres.

Sur la remonstrance faict par M. de Rosmeur, cy devant par nous deputté pour aller trouver Mgr le duc de Merceur, qu'il ne veille faire le voyage seul, a esté advisé que le sr de Kerloaguen sera pryé d'aller aussy de la part des habitans vers mondit sgr, et que le miseur de la ville fournira dessus les deniers d'auctroy de ceans aulx fraictz de leur voiage.

Le sr de Kerjean le Dresnay est present en la Chambre, et a juré la Saincte-Union entre les mains de M. l'archidiacre de Plougastel.

— Du 24ème jour de novembre 1589.
Sont présents Yvon le Coatrivon, Kerveliou procureurs, Guillaume Geoffroy et Guillaume Thomas, parroissiens de Lanmeur, deputtés par le Corps de la ville et parroissiens dudit Lanmeur, corne ont faict connoistre par acte du 23e du present mois, par lequel il conste qu'ilz ont juré l'Union avecq les habitans de Morlaix et recogneu l'auctorité de Mgr de Mercueur, et ont rendu l'acte du serment signé Harsic de Goezbriand, F. Marisit et Devoudans, ont repetté le mesme serment entre les mains de M. l'archediacre de Plougastel presant. — Aussy a comparu pour le treff de Locquirec Jacques Lucas monstrant et aparoissant pareill acte et pareill serment du 19e de novembre, signé Duboys Henry, Y. Febven, R. Gallou ; A. de Goezbriand, notoyre, a repetté pareill serment entre les mains de nostre dit sr archidiacre et a rendu ledit acte entre les mains du procureur de ville. Et partant sont lesditz parroissiens receuz en ladicte Union par eulx jurée et suilvant les promesses contenues par cest acte.

— Du 25ème novembre 1589, en la Chambre du Conseil.
Avisé que l'on escripra en la parroesse de Plouygueau, et treves et aultres parroesses estantz enemys des habitans avecques ung passeport à leurs deputtés pour scavoir leur volonté.

Ayanct veus la desclairation de la ville et parroesse de Lanmeur, Locquirec Guymec, sont receus à servir avecques les habitans, pourront venir en ladicte ville en toutte seuretté, et sont comprins les srs de Penarvern, de Gliviry, Kergadiou-Trogoff et Kergadiou-du-Parcq, Penarport, Kerydec.

Le sr de Kerambelec est receu de venir en ville en toutte seuretté et servir avecques les habitans, ayant veu la lettre du sr de Kermellec.

Le sr de Coatgaric est pareillement receu à venir en ville desmeurer avecques lesditz habitantz, le tout soubz le bon plaisir de Mgr le ducq, esperant qu'il avoira ainsin agreable.

Avisé que lesdictz gentilshomes cy-dessus desnomés jurantz entre les mains de leurs curés et signantz l'acte signé par les parroessiens demeureront unis avecques les habitans de ceste ville, les tiendront pour amis et allyés, executant l'acte de paseport leur envoié par le corps desdictz habitans.

Et sera bany par la ville deffense, du comendement de M. le Gouverneur et par l'avis de la maison de ville, à touz habitans d'icelle et tous aultres qui s'y sont retirés pour leur seuretté de sortir hors ladicte ville en armes, faire auchun ravaige ny acte d'oteritté, sans permission et passeport de M. le gouverneur ; et deffanse aux corporaulx qui seront en garde de les laisser sortir aultrement à paine d'estre punis exemplerement et de respondre solyderement pour le domaige et degat qu'ilz pouroinct faire.

Lecture faicte de la lettre de Mgr le duc de Merceur, donnée à Jugon le 10e jour de novembre present moys, de la lecture de laquelle est ordonne reporter acte.

Le sr de Villegoury, capitaine de Ploegat Gallou, Me Olivier Ingladeur, curé d'icelle, Jean le Goff, Méliau Kerbren, Guillaume Le Glas, Pierres Manicat, Jean le Remeur et Henry Narec, de ladicte parroesse, ont presentement juré la Saincte Union entre les mains de M. l'archediacre de Plougastel.

Le sr de Tuongoff present a presté le serment à l'Union entre les mains de M. l'archidiacre et a signé : Jehan de Pensornou.

Avisé que l'on baillera de present à M. de Goulaine 200 escus, et sera remercyé de ce qu'il a asisté les habitans en leur besoign, et ledict suplyé de les excuser sy pour le present ne peuvent luy faire plus grande recongnoissance, ny mesmes entretenir à soulde pour plus longtemps ; et sont deputtés le procureur de la ville, misseur, controlleur, comisaire et juges consulz et aultres qui trouvera d'aller avecques luy.

Pour aller vers N. du Faouet et le pryer de demeurer avecques les habitans sont deputtés les mesmes cy devant.

Hervé Guegen est eslargy des prisons de Morlaix, poyant ses despans.

— Du 27ème novembre 1589, devant MM. les deputtés en la Chambre du Conseill :

Le sr de Gliviry, gentilhome de la paroesse de Lanmeur, a presenté l'acte des gentilshomes paroessiens et a juré l'Union tant pour luy que pour eulx : acte dudict serment, partant receus come amis de la ville à la charge ausdicts aultres gentilshomes qui ont signé ledict acte comparoir merquerdy en ladicte Chambre en personne pour repeter le mesme serment.

En l'endroict les srs de Kernegues, Kerochyou, Yves Pechon ont presentés leur requeste affin d'avoir leur recours contre ceulx qui les ont ravaigé. Acte leur est decerné de la presente desclairation et requeste pour avoir leur recours come ilz voyront l'avoir à faire.

Lecture faicte de l'acte de serment faict par les paroysiens de Guymaech dabté le 26e novembre prescrit moys au prosne de leurs grandes maisses et gentilshomes qui ont soubzcript.

Guillaume Jaouen present, de ladicte paroyse, deputté par ledit acte, a repeté pour luy, come procureur desdictz paroisiens, pareil serment de l'Union entre les mains de M. l'archidiacre. — Par faict sont lesdictz gentilshomes et paroisiens receus à l'union et amityé desdicts habitans à la chairge ausdictz gentilshomes de se presenter merquerdy prochain o l'entrée de ceste Chambre pour repetter ledict serment.

Me Jean Bechemech, prebtre de la paroise de Plouygneau, a juré la saincte Union et receu à la protection de la ville.

Me Allain Cloarech, prebtre, Nicollas Glau, Maurice Guillou, depultés de Botsorchel, se sont presentés offrants jurer l'union, ce qu'ilz ont faict entre les mains de M. l'archidiacre, et aporteront l'acte garanty de leur prosne à lundy prochain, à la Chambre.

Lecture faicte de l'acte des paroisiens de Plouygneau faict au prosne de leurs grandes maisses, du 26e de ce present moys, par lequel ilz noment, o leur procureur, Me Guy Thepault pour en leur nom jurer ladicte Union.

Me Jean Guimaec, Jean Meur, Guillaume Kerben, Jan Guillou, Nicollas Pezron, Nouel Pelletier, François le Loulle ont juré tant pour eulx que pour leurs paroisiens la Saincte Union : acte du serment que ont faict les desnomés tant pour eulx que les aultres de ladite paroise.

Pareille lecture faicte de l'acte de ceulx du treff de Lannéanou, dabté du jour de hier ; et se sont presentés Jean le Remeur, Francois le Bensat, 0llivier Kergaroff, Yvon le Bensat, qui ont juré tant pour eulx que come procureurs de ceulx dudict treff la saincte Union. — Acte dudict serment, et receus a l'union et amytié de la ville et ont receu ledict acte de declaration presentement.

Le sr de Kerlan se plaint que l'on a abatu les arbres de la rabine du lieu de Kerlan. — Acte de la plaincte, et se pourvoyra.

Le sr Keranguen de Kervoasou present qui a juré la Saincte Union : acte en est receu.

Jean Molpot et Jean le Chapellain de la paroise de Ploegatmoysan se sont presentés affin de jurer l'union pour eulx et lesdicts paroisiens comme ils ont presentement faict et aporteront dans houictaine leur acte garanty.

Passeport acordé au sr de Trogoff pour venir jurer l'Union dans vandredy prochain.

Ordonné à Perrin Dissat de rendre la some de 16 livres par luy receu de M. de Kerourchant pour vante de certain nombre des bestiaulx estant à Robert le Gac et s'y sera contrainct par corps sauff son recours vers ses consortz, en oultre les aultres bestiaulx qui peult tenir du ravaige, et l'amende luy remisse de grace pour ceste foys, et sera la defence faicte ceans samedy dernier banye afin que auchun ne pretande cose d'ignorance. — A pareil ordre audict Dissat ou aultres qui retiennent ledit Gac prisonier de l’elargir, sur les mesmes paines.

Ayant veu la déclaration des paroysiens de Plounerin, est advisé qu'ils seront recrus a venir avecques les habitans, en jurant l'Union et signantz l'acte que les aultres paroessiens ont signé, lequel leur sera envoyé par le procureur de ville avec les missives.

Les habitans acordent le passeport baillé par M. le gouverneur au sr de Perven.

Yvon Cavannant, Yvon Guilloux, Francoys le Quellec, Louys Gainart, de la parroisse de Plouezoch, tant pour eulx que pour ceulx qui demeurent en ladicte parroisse, mais n'avoir acte, ont juré la Sainete Union : acte, et advisé qu'il leur sera baillé l'aultant de ladicte declaration et le renderont garanty ceans merquerdy.

Lecture faicte de l'acte des gentilshomes de Plouegaznou par lequel ils jurent la Saincte Union : acte, et ordonné qu'ils vendront en personne merquerydy prochain pour faire pareil serment que par ledict acte.

Avisé que Jeanne Lescaff sera payé de ce que le capitaine le Noir luy doibt pour despance de luy et ses gens, et pour acorder avecques elle sont comis MM. les procureur, miseur, le recepveur Kerellot et sauff à repetter vers ledit capitaine Noir telle some qui fauldra voyr et sera.

Lecture faicte des lettres obtenues par Me Jacques Deportes de l'estat et office de procureur du Roy à Morlaix.

— Du 29 novembre 1589, en la Chambre du Conseill.
Le Madehar, pour le Sr de Kergaran, Yves le Roux, demande d'estre receu à se unir avecques les habitans o l'offre qu'ils font de venir jurer l'Union.

Le sr de Kersco Kerigonnal, pour le sr du Poulpry, faict pareille demande suyvant la lettre missive qu'il a receu dudit sr du Goezlin qu'il a présentement aparue.

Le sr de la Ripvière et ses filz, de Plestin, font pareille demande.

Lesdictz devant només sont d'avis que les acts desnomés viennent jurer l'Union et leur est baillé permision jusques à lundy et pourront venir en toutte suretté.

Les Srs de Kernechriou et Kermabusson, de Plestin, ont juré entre les mains de M. l'archidiacre de Plouegastel la Saincte Union.

Avisé que le sr du Glyviry, de la panse de Lanmeur et aultres cy devant només seront advertis de venir vandredy prochain, l'entré de la Chambre, pour jurer la Saincte Union.

Avisé que le procureur de la ville escryra à Mgr le gouverneur de ne nous bailler pour le present auchune garnisson ; touttefoys sera escript aux deputtés, s'y ilz entendent que le sr de Cremeur velle retourner en ceste ville, n'eu envoyer aultres, et s'il ne vient et que lesdictz deputtés descoupvrent que l'on velle bailler auchune garnisson, demanderont 100 ou six vingtz harqueboussiers a pied soubz le comendement de M. de Kergaryou.

Pour le procès intenté par Me Jean de Poulique vers les cotisseurs des deniers d'emprunst en ceste ville, est advisé que l'audiance leur sera denyé et sont declaré non resevables.

Pour recepvoir d'avecques les gentishomes les somes ausquelles sont taxés, seront contrainctz à poyement faict par vante de leurs biens et par emprysonnement de leurs personnes, et pour les recepvoir et faire les contrainctes sont comis les sergentz et huissiers, et auront les sergentz de ce qu'ils contrainderont 1 sous par livre.

Seront les requestes faictes de la part de noble home Jean Kerguellen et le Doal communicqués à M. le gouverneur en presence de MM. les troys juges pour adviser ce qu'il sera veu convenir.

Les srs de Penarvern, capitaines de Plouegaznou, le Pouldu, Etienne le Pruet, Bartaige ont juré la Saincte Union entre les mains de M. l'archediacre de Plouegastel.

Lecture faicte de la lettre de M. de Rosempoul envoyé aux habitans touchant le faict du compte de la Maignage. — Avisé que lon escripra à M. de Rosempoul du comportement dudict compte puix la promesse qu'il avoict faicte de jurer l'Union.

Avisé que le procureur de la ville baillera des billetts pour poyer ceulx qui ont fourny aux souldartz de Mgr de Goulainne, pendant les six premiers jours qui furent en ceste ville, de ce qui fut fourny ausditz souldartz.

— Du vendredy, 1er jour de décembre 1589.
Advisé que le recepveur fera ugn estat de son compte dans lundy, et des deniers qu'il pourra avoir seront délivrés à M. de Kerguariou à valloir ès 1200 livres promis par la ville, et l'on fera adviser au moyen le plus expédiant pour le parpaier.

Advisé qu'il sera entretenu, au chasteau, 6 soldatz et ugn cononier pour ugn moys sans ce tirer à consequence à l'advenir, et au cas que dans ce temps Mgr le duc de Mercueur ayt pourveu de garnison ledit chasteau ne demeureront aux fraictz de la ville et sera advance faicte ausdicts soldatz de 15 jours.

Advisé que le recepveur yra par devers les gentilshomes qui se sont volontairement cotisés pour recepvoir l'argent et baillera guidance en mesme forme que aux habitantz.

Comendement à toutz sergentz de contraindre les desnomés aux rolles au payement des sommes esquelles ilz sont cotisés dans lundi par toutte contraincte de corps et executions de leurs biens, à paine d'en respondre en leurs propres et privés noms et privation de leurs estatz, et par expres à Anthoine Fleurdeville exercer, marchant ceverement.

Seront les gentilshomes cotisés requis ce jour pour payer, à faulte de quoy sera escript à Mgr le duc de leur contrevantyon : ce neanltmoing seront contrainctz à poyement par tonnes rigueurs de justize, et en cas de plus grand refus, seront declairés et tenus pour enemis et declairés de bonne prinse atandants la volonté de Mgr ; mesmes ceulx qui sortiront sans poyer seront tenuz pour enemis et defancze qui gardera les portes de ne laiser sortir sans paseport.

Les srs de Kerambelec, Roslan, du Gliviry, de Penamprat, de Lanhaca ont répété le serment de l'Union entre les mains de M. l'archidiacre, suilvant l'ordonnance du 27 novembre dernier.

Advisé que le procureur de ville, escripra à M. le compte de la Maignane, efectuant ses promesse de se sarzir des personnes enemys à l’Union qui hantent ordinairement sa maison, au scandale et prejudicze de ladicte ville et Union.

— Du 4ème décembre 1589.
Les srs de Kerhuon et de Kerriou ont repeté et faict le serment de l'Union des catholicques entre les mains de M. l'archidiacre.

Pour le faict de Allain Guiommarch, acusé d'avoir tué Kervilsic, capitaine de Garlan, pour avoir comandé sonner le toxin contre la Saincte Union et au prejudicze de ceste ville, est advisé que l'on sursoira a l'execution de toutz decrectz et poursuilte touchant ledict homecide jusques en avoir adverty Mgr le gouverneur, lequel sera suplyé de la part des habitans d'absouldre Guiomarch, et faire deffancze aux heritiers de Kervilsic de faire aulchune poursuilte ny recherche touchant ledict homicide contre ledict Guiommarch ni aultres.

Yvon le Rous, sgr de Kervengat, de Plestin, a juré l'Union entre les mains de M. l'archidiacre.

Paseport ordonné au sr de Kerverzic et le sr du Marchallach.

Les paroissiens de Louzec (?) ont randu l'acte de l'Union signé en ladicte paroise.

Pour le faict des deux chevaulx amenés par les soldartz de M. de Rosanpoul à Concq et retenus par lesdictz soldartz, est advisé que sera escript à M. de Rosanpoul et cze pandand ordonné que le corps de ladicte ville suportera la perte.

Pour examiner le compte de Yvon le Bailliff asignation à mercredy, un heure appres midy, et pour asister, deputés les srs de Kerochiou, Mesily, Me Jean Callloët, Moricze Noblet, Guillaume le Bihan et Jean Floch, et lesdictz deputtés ausy comis pour asister aultres comptes des precedantz procureurs.

Pour examiner le compte de Jean Duplesseix, assignation à vandredy prochain, un heure appres midy, et Duplesseix est chargé d'advertyr le precedant procureur contable.

Pour le domaige faict au sr de Kerscao Kerigonnal et au sr de Kernegues l'eupre par faict sera faictes.

Comendement à Marye Moricquin de reboucher la porte de sa maison que ovre sur la venelle entre demain au soyr, à paine de la prinson, et defancze faicte à touttes personnes de ne rompre les fossés d'enthour ladicte ville à peine de la prinson.

Comendement faict au sr de la Villeneufve d'acoustrer sa porte qui ovre sur la venelle, en l'estat qu'elle estoict auparavant.

Pour les portes de la ville, scavoir la porte de la prinson et celle de Bouret, seront levées touttes les nuictz.

Advisé que les paroisiens pouront engager ou vendre les ornementz des eglises moins recquis, pour employer auy fortifications de la ville.

Le sr de Kercharan s'est presenté, lequel a faict refus de jurer et signer l'Union, disant l'avoir jurée entre les mains du sr de Kerduhel, à Lanion, aparoisant un acte duquel par insertion la teneur ensuilt [Note : Louis Hingant, seigneur de Kerduhel, le Faouet, la Salle au Chevallier et capitaines des ville et château de Moncontour, comisaire deputé par Mgr le duc de Merceur et de Pentheure, gouverneur de Bretaigne, pour recepvoir les protestations de toutz ceulz de cest evesché qui voullent se randre et adherer au sainct party et union des princes catolicques pour la manutention de la religion apostolique et romaine soubz l'auctorité de mondict seigneur protecteur d'icelle en ce duché, selon nos lettres de comission du 25 du present moys, scavoir faisons que ce jour 1er de décembre 1589, estant, à… pour l'effect et execution de nostred. comission, se seroit presenté a nous escuier Guy de Coatmen, sr de Kergaran, a juré et protesté devant nous se vouloyr ranger au party de lad. Saincte Union, et embraser de tout son pouvoyr la cause de Dieu et conservation de son eglise soubz l'auctorité et obéisance de mondict seigneur, abjurant toutz partys contraire, promectant que pour lad. manutention il employra sa vye et biens, et procurera de tout son pouvoyr l'augmentation et accroissance dudict sainct party, par quoy, suivant nostre pouvoyr et comission, nous avons mis et mettons ledict de Coatmen en la protection et sauvegarde de mondict Seigneur, luy, sa femme, hommes et subjectz, serviteurs et famille : prions toutz cappitaines, gouverneurs et cheffz de guerre de le prester toute paciancze sans mal faire auchun : en thesmoing de quoy avons signé cestes. — Ainsin signé : Louis Hingant — Mauricze Kerlesan, comissaire, et Jaques de Coetanguon]. — Et porte ledict sr de Kercharan la croyx des politicques au chapeau, et aultre que celle que portoict ceulx de l'Union. — Et aiant faict sortir ledict sr de Kercharan, et prins l'advis de la compaignye scavoir s'il doibt estre retenu.

Et a ledict sr de Kercharan juré et a signé l'Union.

Le sr de Kergadion Tuongoff a juré l'Union entre les mains de M. l'archidiacre.

Pagadic eslargy bailant ses despans en la jaule, lequel dict n'avoir heu que pour un soull de pain tout le jour : le procureur de ville a promis poier ses despans.

— Du 6ème décembre 1589.
La dame de Kernezec demande estre recompansée du boys et chandelle qu'elle a fourny au sr de Goulaine. — Les habitans disent qu'il est préalable de faire une raison aux pauvres que ont fourny boys et chandele aux soldartz de M. de Goulaine avant de rembourser les riches ; et ont advisé qu'en la première cotisation on aura esgard a ceulx qui ont fourny à ladicte, campaignies ; et pour le regard de ceulx qui ont nourry pour quelque temps et logé lesdictz soldartz, est dict que ceulx qui ont été exemptz seront contrainctz de loger les premiers qui viendront en ville premier et avant que ceulx qui ont cy devant fourny soint contrainctz de prendre aultres.

Pour le sr de Quersaliou prins en ceste ville prinsonnier par Bernard Nouel parce que le temps de son paseport luy baillé par le sr gouverneur de ceste ville est expiré, advisé que ledict sr de Kersaliou sera retenu et que Mgr le duc de Merceur, gouvernant en ce pais, sera adverty, et cependant sera ledict sr de Kersalliou tenu randre en ceste ville le sr de Kerguiniou par luy prins prinsonnier ; et sera aussy comunicqué et conferé de l'afaire dudict sr de Kersaliou avecques les srs de Rosanpoull et de Cremeur, ses beaux fraires.

En l'endroict s'est presenté le sr de Kernisan qui a dict estre envoié par ledict sr de Kersaliou, et recquerant estre reczeu en la Chambre, offrant jurer l'Union. — Sur quoy, appres avoir ouy lesdictz habitans, a esté advisé que ledict sr de Kersaliou sera reczeu à jurer ladicte Union à la charge que, avant sortir de la ville, il fera randre le sr de Kerguiniou par luy prins prinsonnier, et ce dans houictaine, en bailera cauption reseaulx de le randre et de l'acquitter de sa ranczon et des despans ; et dans troys semaines appres il yra trouver Mgr de Merceur, de quoy il en reportera un certificat de mondict seigneur de s'estre presanté à luy : il prestera le serment en tel cas recquis. — En l'endroict a esté deputé le sr de Kervegan pour advertir le sr de Kersaliou de ce que dessus, lequel sr de Kerveguent, estant de retour, auroict dict que le sr de Kersaliou s'est excusé de se deporter pour le present de signer l'acte d'Union, et non pour aultre subject que pour plus aisemant et à meilleure condition retirer le sr de Kerguiniou d'entre les mains du capitaine du Hireau auquel il auroict delaissé ledict Kerguiniou, parce que ledict du Hireau et aultres hereticques estants advisés que ledit sr de Kersaliou avoict signé ladicte Union et debvoict faire l'acquict de la dicte ranczon la pouroict sursauser, come est vroysemblable.

Sur la resmonstrance faicte par Bernard Nouel de la desobeisance à luy faicte en ladicte qualité par Allain Tiocler, est ledict Tiocler condampné en deux escus d'amande à l'ospital de ceste ville.

Sur la resmonstranse faicte par le sr de la Mote que le Sr de Kercharan qui, depuis 8 jours a signé l'Union en ceste ville, et le sr de Kerven qui avoict prins paseport pour y venir signer, auroict, le jour d'hier en une taverne en ceste ville, dict en presencze de plusieurs honestes personnaiges que le roy de Navarre est très bon catholicque, et que qui meult Mgr de Merceur ce n'est le sczele de la Religion, ains un ambition pour se faire duc : d'aventaige come ceulx qui suivent le party du roy de Navare sont sy bons catolicques que ceulx du party contraire ; ausy que ledict sr de Kercharan a dict qu'il avoict signé l'Union o contreceur et contre sa volonté, mais sans dire davantaige, et cze en la presancze des srs de Kerouchant, Kerinisan, du Crech Lanicelaen, Hervé Kerret, Pierre Thepault et auparavant à Madamoiselle de Kernegues.

Ordonné que lesdictz desnomés seront ouys à vaudredy à la Chambre pour informer des faictz cy dessus contre les dictz srs de Kercharan et Kerven est, cze pendant, seront retenus lesdictz srs de Kercharan et Kerven, scavoir ledict sr de Kerven par le sr du Bourgerel et ledict sr de Kercharan en prison.

— Du 8ème jour de décembre 1589, devant M. le gouverneur, MM. les seneschal et bailly, lieutenantz.

Sur la plaincte faicte par le recepveur Kererault que Guillaume Allain a bastu le sergent faisant son explect, il est ordonné que ledict sergent sera contrainct de faire son raport verbal et que les tesmoigns seront ouys pour ordonner ce que la Chambre advisera.

Lecture faicte de la requeste du sr de Crechgonan.

Le sr de Kernegues Jagu se plainct et dict que le dict Crechgonan ayda à ravager sa maison. — Les srs de Kerouchant, Kernegues, Kervern, Keranguen, le recepveur Kererault, ouys, ont atesté que ledict sr de Grehgonnan estoit deguisé en abits de paisant portant une baratte rouge sur la teste, ung porpoinct et chausses de toille et se faignoict estre servitteur du sr de Crechgonan, et depuis sa prinse ledict Keranguen dict avoir esté adverty par le baron de Plestin que ledict sr de Crechgonan l'a ravagé en novembre darrain pour avoir suivy le party de l'Union. — La prinse faicte de la personne du sr de Crechgonan a esté declairée bonne et sera trecté sellon son argent, et sa taxe sera receu par la Chambre pour estre distribuée ainsin qu'il a esté par devant advisé.

Noble home Yves de Leau et Yves Jegou ont presenté le paseport de Mgr le duc de Mercœur au nom de Pierre Lebertrot et Maturin Claude, marchantz de Vitré, dabtté du 24e de novembre derain, signé Ph.-Emanuel de Lorraine, avecques ung atestation du conseil de mondict sgr estably à Angers le 20e novembre aussi derain, signé Lefort et scellé.

Aussi aultre passeport de Maturin Guillaudon dabté le 8 jour de 9bre 1589, signé Ph. Emanuel de Loraine et plus bas : par Mgr, E. Danyn. — Acte audict Yves Deleau et Jegou pour leur jouyr corne il apartiendra.

Il est advisé que en l'absancze du sr de Kergumet, noble home Nicollas Allain exercera l'estat de corporal en la paroisse de Sct Mathieu.

Lecture faicte de la resqueste de M. de Halle par laquelle il requiert estre receu en la ville soulz la protection de Mgr le duc de Mercueur. Le sr de Halle sera receu a jurer l'Union et pourra se tenir en l'une de ses maisons et aura touttes seurettés pour tout l'interestz des habitantz seullement, et aura passeport pour aller trouver Mgr le duc de Mercueur.

— Du 9ème décembre 1589 devant MM. l'archidiacre de Ploegastel, seneschal de Morlaix, presentz MM. les procureurs de la ville.

Les srs de Kerverzic et du Marc'hallac'h presentz ont juré entre les mains dudict sr archidiacre la Scte Union en la maniere et forme acoustumée et sur le formulaire qui leur a esté leu et presenté, et d'aultant que lesdicts sgrs ne peuvent desmeurer bonement jusques à samedy en ceste ville ont nomé le Pratguen pour alors repeter ledict serment signé : Guy Jourdain, J. Le Galléer.

Ledict sr de Marc'hallac'h dict avoir este ravagé par le sr de Kervordon, tenant le party contraire, protestant de se pourvoir contre, soict par la voye de la guere ou aultrement.

— Du 12ème jour de decembre, estant en la Chambre du conseil.
Lecture faicte de la lectre missive de Mgr le duc de Mercueur donné à Pondivy le 7e du present moys. — Acte de la lecture de ladicte lectre.

Pour le regard de Jean Talbo et ses enffans de la perroisse de Plouygneau leur est concedé passeport pour venir en ville pour jurer la Scte Union.

Pareil passeport aultroyé au Melynere, la Touche, le Meur.

Lecture faicte de l'acte de l'aprobation de Mgr le duc faict de l'imposition faicte par lesdicts habitans sur les marchandisses entrantz et sortantz dudict Morlaix suivant la pancarte ataiché audict acte.

Avisé que le procureur de la ville fera banir le bail effarant pour ung an desdictz devboirs.

Lecture faicte de la comission de Mgr le duc affin de faire le bail afferant pour ung an des deniers, corvées, impost et billot de pavaige et ancraige. — Acte de ladicte lecture et sera ledit bail faict à la manière acoustumée.

Le recepveur Kerellot se plainct que les sergentz ont esté batus par Guillaume Sallain pour le debvoir contraindre sa taille. Ledict Kerellot se pourvoyra en justice.

Lesdictz habitans sont d'avis que le sr de Kergaradec soict deschairgé du prest auquel il est taxé, et aussy de touttes les levées qui se feront en ladicte ville durant qu'il sera en la chairge de lyeutenant de M. le gouverneur.

Les habitans sont d'avis que le sr de Kersalyou soict receu à jurer l'Union et, ce faisant, sera eslargy de ceste ville, baillant caution de payer 250 liv. pour la renson du sr de Kerguynyou ou à acquiter ladite ranson, à la chairge d'aller dans ung moys trouver Mgr le duc de Mercur et M. le gouverneur à peine de 1000 escus. Et les dictz habitans quitent de sa ranson ausdictes chairges en faveur de madamme de Carné et des srs de Rousenpoul et Cremeur, et baillera caution d'avoir esté trouver Mgr dans ledict temps sur la dicte paine de 1000 escus, et demeurera en ville jusques à ce que ledict sr de Kerguynyou soict revenu. — Ledict sr de Kersalyou a juré la saincte Union entre les mains de M. l'archidiacre de Plouegastel et a signé : Jan du Boisgelin.

Lecture faicte des letres de M. le gouverneur contenantz assurance à toutz marchantz estrainger pour par expres aux Angloix de comercer en ceste ville avecques deffansse de leur malfaire en corpz et biens. — Avisé que lesdictes lectres seront banyes en ceste ville, et enjoinct au procureur de ville d'escripre en Angleterre et ailleurs.

Avisé que le sr de Kerloaguen aura par jour, durant qu'il a esté au voyaige pour lesdictz habitans deux escus, et le sr de Rosmeur ung escu demy et six soulz tournois et les fraictz des actes.

Avisé qu'il sera informé d'office contre les srs de Kergaran et Kerven des propos soutenus contre l'honneur de Mgr le duc et la Saincte Union.

Lecture faicte des actes des desclaration et serment de la Scte Union des paroesiens de Botsorhel et Ploegat-Moysan, receus et à la chairge de poyer es deniers.

Jean Ledyouguel receu à jurer la Scte Union et viendra a merquerdy faire ledict serment.

Kersco Kerygonnal pour Guy la Tourneuffe dict declarer se desister des decretz par luy obtenu contre le Guymarch et aultres touchant la mort du sr de Kervilsie, capitaine de Garllan.

Lecture faicte de la lettre missive de Glyviry de Lanmeur. — Avisé que ledict Gliviry se déportera de faire auchune levée des deniers sur lesdictz paroisiens de Lanmeur et luy sera unne deffanse signifyé, et permis de continuer à faire le proceix par la justice.

Sur la requeste presentée par Guillaume Moignet, de Lannyon, sur quy a esté saisy des lectres qu'il envoyoict à M. de Chateauneuff ; avisé qu'il sera retenu et son garson elargy.

Avisé que M. Me Mairc Mason et Bourdideh seront receus à jurer l'Union et viendront à vandredy.

Avisé que le sr de Kerigonan sera elargy et mis hors la ville.

— Du 13 decembre 1589, en la maison de ville.
Advisé que les procureur, miseur et recepveur assisteront Fleurdeville, sergent, pour executer le restesant à poyer, et M. de Kergariou leur baillera des soldartz.

Le sr de Penanchoat present en sa personne a juré la Scte Union entre les mains de M. l'archidiacre.

Passeport octroyé au sr du Fournuet pour venir jurer ladicte Scte Union.

Advissé que les munitions de guere estantz à present en la maison du procureur de la ville seront mises es endroictz que adviseront les srs de Kerochiou et Mesilly deputtés à la dicte fin, soict es tours de la ville ou ailleurs.

Advissé que pour les pouldres, balles et mesches acheptés par le procureur de ville pour la deffancze d'icelle, qu'il sera poyé sur les deniers de la recepte. Et pareil est advissé pour le baril de pouldre de Flandres que ledict procureur a, soict comis lesdicts srs de Kerochiou et Mesilly pour en faire estat et fere pris.

Pour les reparations des murailles et barieres de Sct Mahé et aultres de la ville sera advissé à vandredy.

Jan Le Diouguel présent a juré la Scte Union par l'attouchement qu'il a faict presentement sur les sainctes evangilles entre les mains de M. l'archediacre et a signé : J. Diouguel.

Sur la requeste presantée par Jane Jagu, est advisé qu'il soict informé la prochaine.

Sur la requeste de Pierres Oriot, néant.

Pour la maison prinse et fermée pendant un an d'avecques la dame du Savigou, est advissé qu'elle sera retenue jusques au moys de janvier prochain.

Sur la requeste de Jan Geffroy, prisonnier de Plouegaznou, advissé que les requestes seront veues à vandredy prochain tant pour ledit Geffroy que pour le sr de Lautrennou, et en attendant baillant cauption en presancze dudict sr de Kerochiou, est ledit Lautrenou eslargy.

Sur la requeste du sr de Bourdidel, est advisé qu'il luy sera baillé passeport pour venir jurer l'Union et ce avecques toutte seuretté pour le jour qu'il comparoistra, tant pour aller que s'en retourner, et à la charge de venir vendredy ou lundi prochain, aultrement il ne sera recepvable, et tardera pour ledict jour de toutz decretz, arrestz de la Court quy pourroict estre contre luy.

Pour le faict des srs de Kergaran et de Kerven est advissé, après avoir ouy le raport contenu es charges et informations contre eulx faict, qu'ils seront pour l'interest de ladicte Chambre eslargys à la charge d'aller trouver Mgr le gouverneur dans ung moys prochain venant, auquel sera envoyé la plaincte contre eulx faicte avecques coppie desdictes charges pour en ordonner à son plaisir, et de ce faire bailleront cauption de la somme de 500 escus pour chascun d'eulx et comparoistreront pour recevoir les advertissement qui leur sera faict par M. le gouverneur, et ce faict sera ledict sr de Kerven receu à jurer l'Union. — Suilvant laquelle ordonnance luy donné à entendre, a comparu ledict sr de Kergaran lequel a repetté d'abondant pareil serment de tenir bon à la Scte Union. — Plus a comparu ledict sr de Kerven auquel l'on a faict à pareil entendre ladicte ordonnance, et a presentement juré l'Union entre les mains de M. l'archidiacre, sur les Sctes Evangilles, et a signé : Estienne.

— Du 15ème decembre 1589.
Le sr de Pontplancoet est reczeu à l'Union, et a presté le serment entre les mains de M. l'archidiacre, et a signé : G. de Quelen.

Sur la requeste du sr de Keraudren pour avoir poyement de certain boys suilvant la sentence du 21e janvier 1576, et aultres depuis données, est advisé que de ce jour la ville prand en prest d'avecques ledit sr Keraudren, et pour sa part à la contribution des deniers qu'elle emprunte pour la guere la somme de 8 liv. pour les causes données par ladicte sentence, à laquelle some il a esté cotissé, et sera remboursé dessur les mêmes deniers que les aultres qui ont faict pareil prest.

0llivier Talbot, et Jean et aultre 0llivier Talbot ont juré l'Union et presté le serment entre les mains de M. l'archidiacre lesdicts Ollivier et Jean les enffantz dudit Jean Talbos ont signé : O. Talbos. J. Talbos.

Pour le faict de Jean Geffroy prins prinsonnier par le sr de Kerochiou, est advisé qu'il sera comué de prinson baillant cauption et à lundy sera faict le serment tant par luy que par le cautionant ; Henry Artisany se mect à pleige pour ledict Geffroy et a signé.

Pour la requeste presentée par les paroissiens de Plestin recquerantz entre deschairgés poyer le terme du fouaige pour la Sct Michel dernière, disants l'avoir poyé à Lannyon à Me Jan Kerinal se disant comys du recepveur Kerelot pour avoir esté contraincts pour les causes qui par la recqueste et le faict de laquelle le cas est cogneu. — Advisé que lesdicts paroisiens se pourvoiront vers Mgr le duc de Merceur aultrement come ilz voiront l'avoir affaire ; et sera ledict Kererault pryé de n'user de contraincte contre lesditz paroisiens d'icy 3 semaines.

Advisé que le sr de Carné sera defroyé pour ses premiers jours, sauff à adviser plus amplement à lundi.

Sur la requeste du sr de Kergurunet est advisé qu'il luy sera baillé acte qu'il est bon catolicque, et a tousjours esté du party de l'Union, et l'un des corporaulx en ceste ville, et que les six mois derniers l’acès n'a esté libre pour luy en l'evesché de Léon, pour luy valloir ainsin voira l'avoir affaire.

Pareil decerné au sr du Veaumorin pour la recepte qu'il avoict au havre de Lanion et Morlaix, ensemble pour la recepte des estatz de Léon.

Le sr de la Motte, le procureur, le miseur deputtés pour aller trouver M. de Carné.

Pour le paseport de Me Jean Meur, Me Yves Lerou, Yves Guillou, Hervé Melinezre, Louis la Touche, paseport leur est doné pour venir jurer l'Union.

Il est dict que les canoniers seront poyés.

Pareil acte decerné sr du Coatglas, capitaine au fort du Toureau, qu'il n'y a sureté au chateau ? hors Morlaix. — Aussy que ledit capitaine s’est comporté fidellement en sa chairge et y a faict………………………

— Du 17ème jour de decembre 1589, M. le gouverneur, MM. le seneschal, lyeutunant en la Chambre de ville.

MM. de la Chambre sont d'avys que M. de Carné sera supplyé de mectre la comission de Mgr le duc de Mercueur à prochaine.

— Du 22ème jour de decembre 1589.
A esté advisé tant pour le présent que pour l'avenir que les amandes contre les defaillantz seront precomptés ausdictz defaillantz sur les somes qu'ilz ont avancé pour les fraictz de la guere.

Sur la requeste presentée par le sr de Kervelmec pour Pierres Lafleur, à ce que ledict de Lafleur soiet receu à jurer l'Union, a esté advisé de le recepvoir jurant et signant ladicte Union. — En l'endroict ledict Lafleur est comparu en personne, et il a juré l'Union entre les mains de M. le recteur de Ploujan, et a signé : Pierre de la Fleur.

M. le recepveur est pryé d'avancer pour les vivres envoyés à Plouygeau et Plouguomen a l'armée jusques à la some de 100 ou six vingt escus sur les billetz qui luy seront baillés par le procureur de ville, et sera remboursé sur les premiers deniers de la recepte. — Ce qu'il a promis faire.

Lecture faicte des lectres de Mgr le duc de Merceur dabtées le 15e de decembre 1589, signées Phles. Emanuel de Loraine. — Acte de la lecture des dictes lettres : — De lui par extraict : « Les habitans ont desclairé sur la requeste de noble home Nicollas Nuz recepveur et fermier des nouveaulx debvoirs imposés sur les marchandisses en ceste [ville] qu'ilz entendent et s'obligent garantir sur ladicte ferme au desur de la pencarte, et luy est permis de faire banir le faict d'icelle, et seront tenuz les marchandz d'advertir ledict fermier avant chairger ny deschairger les marchandisses subgestes audict debvoir ».

Paseport acordé au sr de la Haye de venir en ceste ville pour jurer l'Union et poura venir en toute seuretté.

Pour visitter les logeys où sont le sr de Carné et sa compagnye logés, sont comis pour compter avec les ottes : à Sct Martin, René Preffice et Yvon Demay. En la paroisse Sct Mathieu, le miseur et Kergurunet.

Pour la requeste de Me François Goyart, sera pryé Francoys Noblet de deporter quelque tempz avecques ledict Goyart.

Jan Callais présent a juré la Scte Union entre les mains de M. de Ploujan, partant receu à servir avecques lesdicts habitans et luy est le comerce et trafficq libre, J. Cales.

Le sr le Sainct de Kerembelec a juré pareillement la Scte Union : Le Sainct.

Pour le faict de Me Maurice Masson, receu à jurer l'Union o la chairge de se rendre à un seigneur catolicque lequel il servira ugn moys pour le moings : partant ledict Masson a juré la Scte Union o ladicte chairge : Morice Masson.

Ms. Jean Meur et Yves Erzon presentz ont juré la Scte Union entre les mains de M. de Ploujan : J. Meur, Y Erzon.

Louis le Touche, Henri Melinezre et Jean le Guillou ont juré pareillement ladicte Scte Union.

Yvon le Disez, du Pontou, Jean Le Roux, Perceval le Dantec, tant pour eulx que pour les aultres habitans dudit Pontou et pour Francoys le Ganet, ont juré presentement la Scte Union entre les mains du recteur de Ploujan. Y. Dissez.

Nicollas Thomas a presenté la desclairation faicte par les paroisiens de Guerlisquin, le 17e de ce moys : acte, et envoyront à merquerdy prochain des deputtés pour faire telle desclairation que par ledict acte.

Avisé que Moignet sera liberé faisant faire rendre deux des prisonniers de ceste ville tenus par Du Hircan.

Paseport est octroyé à Jacop Ryou pour venir en ceste ville pour jurer l'Unyon ; acte, et viendra h merquerydy prochain pour jurer l'Union.

Avisé que les canoniers seront pour quatre jours qu'ils auroinct esté mener l'artillerye en l'armée seront poyés, scavoir : F. Coston quart d'escu par jour, et les aultres deux reales par jour.

Aussi a esté passeport adjugé à Hervé Gerzon à venir en ceste ville pour jurer l'Union, et viendra à lundy en houict à l'entré de la Chambre.

— Du 27ème jour de decembre 1589 devant MM. les gouverneur, seneschal et archediacre de Plouegastel.

Jacob Ryou, de la parroisse de Plouras, a juré la Scte Unyon entre les mains de M. l'archediacre de Plouegastel et promys employer sa vye et moyens pour la conservation de la foy catolicque, appostolicque et Romaine.

Le parsur de la Chambre remys à vandredy.

— Du 29ème jour de decembre 1589, devant MM. le gouverneur, les trois juges et l'archediacre.

Sera le maistre d'hostel du sr de Carné adverty que les habitants ne pevent, passé ce jour et derain, payer sa despance ny ses soldartz, esgard aux debttes et aux grands frais qu'il a faict au passé, et sera un advertissement signyffyé audict hostes et assignation baillée ausdict hostes à merquerydy pour compter et poyer, parceque mardy le recepveur rendra son compte à huict heures du matin.

Le sr de Kernegues deputté pour aller devers la noblesse pour scavoir s'ils vouldront payer volontairement.

Les habitants atournent noble home Nicollas Nuz, sr de Kerpers, fermier de la nouvelle imposition, de payer à M. de Kergaryou la some de 1100 escuz luy debuz par lesdietz habitans suyvant leurs promesses, et arester les premiers deniers de ladicte recepte, jusques à ladicte concurance, et prenant ledict Nuz quictance dudict sr de Kergaryou, luy servir aultant d'argent que doibt la ville, ce que ledict Nuz a promys faire au desur de sadicte ferme, et ont ceulx de la Chambre faict a leur ………. I. Pinart. N. Nuz.

Pour le regard de Guillaume Moninet prinsonnier, il est dict qu'il sera informé des propos que l'on supposse qu'il a proferés contre Mgr le duc de Mercueur.

Advissé que les capitaines et corporaulx des parouesses visiteront les partticulliers de chascune compaignie pour scavoir quelles munitions, pouldres et mesches ilz pevent avoir, affin de les contraindre d'achapter telle cantitté qu'il leur seront enjoinct par billettz dans le temps qui leur sera prefix pandant la pouldre du sr de Kerhamon et Lanigou arresté entre leurs mains et aussy la pouldre du greffier civil (sic).

Lecture faicte de la commission de Mgr le duc adressante au sr de la Motte, dabtée du 15e de decembre present moys, signée Phles. Emanuel de Loraine, et plus bas Gallinière et cachettées : ordonné rapporter acte au registre des comissions.

Jan le Rouge, sr de la Haye, a esté receu à jurer la Scte Unyon entre les mains de M. l'archediacre de Plouegastel, a la charge d'aller trouver Mgr le duc de Mercueur dans deux moys, à fournir certificat d'avoir faict entendre à mondict seigneur, et bailler à cauption de ce faire (la some) de 500 escuz, et fournira ledict certificat en ladicte chambre passé ledict delay : Jean Le Rouge.

Jan Cazin, sr de Rosangavet, a juré l'Union entre les mains de M. l'archediacre de Plouegastel, et a promys employer ses moyens pour la conservation et manutention de la foy catolicque, apostolicque et Romaine : corne aussy a faict Jan Roc'huel, sr de Doudron : Jehan Cazin. Jan Rochuel.

Passeport accordé à Pridon et Pasquer du Ponthou pour se randre dans mercredy prochain à la Scte Union : et aussy au recteur de Botsorhel : Jan le Bougant.

Les parouesses de Plouerin et de Guerlesquin ont rendu leurs declairations de se joindre et d'avoir juré l'Unyon, et advissé que les recteurs et curés desdictes parrouesses viendront mercredy prochain jurer ladicte Union.

Pour accorder de pris de la pouldre de P. Calloët, Kerhamon et Lanigou sont deputtés Kerrochyou, le miseur et Rosmeur.

Advissé que le procureur de ville prendra 1000 à 1200 livres de pouldre pour rendre au Thoreau, d'avecques lesdicts Kerhamon, Lanigou et Calloet, et le miseur les poyra.

Pour le faict de Kerochyou, remys à la prochaine.

Ordonné que les parouessiens de Plouegonven payront les fraictz et la defancze quy fast faict à Plouegonven lors du demolissement du chateau de Bourouguel.

Advisé que le clerc du procureur du Roy viendra à la Chambre à la prochaine, et pour le regard du vallet dudict procureur du Roy, luy sera faict comandement de soy retirer, esgard que son mestre ne s'est rendu encores de l'Unyon.

Pour la requeste de Pratanfeurten et Tanguy Jobart, Ruault Quittier dict qu'il veid ledict nomé Jobard tirant le cheval, et sauter deriere en disant ses motz : « nous accorderons les soldartz ; » la prochaine pour faire estat.

Pour la dame du Triain est ordonné qui sera faiet defancze de coupper le boys de Peranrun, et permys à ladicte, dame de retirer ses coffres de la maison de Francoys Le Bernez.

(A. Barthélemy).

© Copyright - Tous droits réservés.