Retour page d'accueil        Retour Château de Coatfrec  

Affaire de la prise du château de Coëtfrec par La Fontenelle 

Enquête du 13 Mai 1598

Enqueste civille et ordinaire faicte par nous Pierre Ballavenne, sieur du Rest, lieutenant et juge ordinaire de la Cour royalle de Lanmeur, en vertu de la commission émanée de Mosseigneur des requestes du palays, à Rennes, à nous entre autres adressée, en dabte du treizième jour d'apvril dernier, sur les articles à nous présantés par hault et puissant Francoys de Goazbriant, seigneur dudit lieu, Coatgoazer, Larmorique, etc. Et interogat fournis de la part de messire Claude de Queguésay, seigneur de Kergomarc'h, Kerrabel, etc., ayant en notre compaignie pour adjoint M. Dominique Prigent, commis au Greffe criminel de Morlaix, duquel prins le serment avons vacqué à la dite enqueste es lieul, jour et an cy-apprès.

Note : Cette enquête fut provoquée par François de Goesbriand pour prouver que lorsqu'il entra comme gouverneur au château de Coëfrec, d'où il fut chassé traîtreusement, peu après, par La Fontenelle, qui l'occupa et le pilla de fond en comble, le mobilier qu'y avait laissé le sieur de Kergomar, son prédécesseur, se réduisait à peu de chose, et qu'il meubla lui-même la place, d'une façon convenable, avec des meubles et de la vaisselle qu'il y fit transporter de ses maisons de la Noë-Verte, l'Armorique et Kergrec'h, et que, par conséquent, le sieur de Kergomar, alors gouverneur de Guingamp, et le sieur de Kerahel étaient mal fondés à lui demander compte d'un prétendu riche mobilier et de nombreuses munitions de guerre qu'ils y auraient laissés. Nous avons pensé que la publication de cette pièce présenterait de l'intérêt, et par les détails que l'en y trouve sur l'occupation du château de Coëtfrec, pendant les guerres de la Ligue, et par les renseignements qu'elle contient sur nombre de familles du pays de Lannion, à la même époque. 

Du mercredy traiziesme jour de may mil cinq centz quatre-yingtz-dix-huit, escuyer Louys Le Mignost, sieur de Kerlan, demeurant au manoir de Kerivoallen, paroisse de Servel, aaigé d'environ vingt-six ans, tesmoign fait jurer par serment dire véritté, purgé de conseil sollicitation et avertissement, enquis sur les faictz présantés par ledict seigneur de Goazbriant. Dépose que environ deux moys avant que ledict seigneur • de Goazbriant entra au château de Coatfreq, il estoit en la dicte place, soubz la charge du sieur de Kerahel et y commandoict soub lauthoritté du seigneur de Kergomarc'h, et n'y avoict audict temps aulchuns boys de décorrance allanthar de ladicte place, coulombier ny méttairye, combien que avant la guerre, ladite place estoict décorée de boys de haulte fustaye desdits mettairye et colombier, ainsy quil ouyd dire notoirement. Interrogé sur le premier, second et troysièsme article, dict que du temps que ledict seigneur de Kerahely commandoict, il n'y avoict ès chambres dudict châsteau aulchuns meubles de valleur sauf seullement quelques charlitz garnys de quelques couettes, sans aulchuns courtines de soye, et qu'il y avoict quelques gentilzhommes réfugiés en quelques chambres dicelle, desquelles ne peult savoir quelles comodittés ils avoient. 

Sur le quatriesme article dict que decs incontinant que ledict sieur de Goazbriant fuct introduict en ladicte place l'on fit inventaire par la justice en présance dudict seigneur de Kerahel du déposant et aultres demeurantz audict chasteau de toutz les meubles et munitions qui y estoient. Et ayda le déposant à transporter et conter les baletz pour les invantoriser. 

Sur le cinquiesme article dict que estant demeuré en ladicte place il vid ledict sieur de Goazbriant y prandre nombre de meubles de touttes sortes pour accomôder ses gentz en ladicte place ne saict de quelle maison on les y faisoict prandre. 

Sur le sixiesme et septiesme et huitiesme articles dict que quelque temps apprès lentrée dudict seigneur de Goazbriant en ladicte place il y vid arriver la dame de Kergomarc'h qui emporta avec elle nombre de meubles ne peult savoir quelles especzes il oyoict notoirement dire quelle avoict emporté les meubles de plus précieux, et de plus grande valleur. Et laissa le surplus des aultres hardes en la garde et possession d'un nominé monsieur Charles, son domestique, qui avoict une. chambre à part audict chasteau. Et ce faict ladicte dame sans se plaindre daulchun deffault de ses meubles, — départist dudict lieu avecque grandes démonstrations damittyé antre elle et les sieur et dame de Goazbriant lequel lalla conduire hors la barrière. 

Sur le neuffiesme et dixiesme article dict ne savoir rien par ce qu'il n'estoict audict chasteau lors que le sieur de Kergomarc'h y demeuroict. Bien dict y avoir esté une foys pandant ledict temps et voyoict que la salle basse dudict chasteau servoict descurye. 

Sur lonziesme et douziesme dict navoir heu congnoissance de lestat des maisons et commédittés dudict seigneur de Kergoumarc'h avant les troubles. 

Sur le traiziesme article dict avoir quelques foys hanté ledict chasteau avant les guerres, lequel estoict logeable et garny de couvertures où se tenoict pour lors Pierre Chaunay. Soubz le seigneur de ladicte place. 

Sur le quatorziesme dict avoir respondu cy dessus. 

Sur le quinziesme dict ne pouvoir rien déposer.

Sur le seiziesme article ne saict aussy rien dire ny apareil. 

Sur le dix septiesme et sur le surplus de ses articles dict pareillement ne pouvoir rien déposer à raison quil nestoiçt lors en ce pays. 

Interrogé sur les interogatz fournys de la part dudict seigneur de Kergomarc'h dict navoir esté par ledict seigneur de Goazbriant ny aulchun des siens sollicité de venir porter sa déposition et n'est parent allyé debteur ny obligé audict seigneur de Goazbriant amis qu'il est venu dire son record de vrillé en vertu des monitoires qui ont esté si touchant publiés en sa paroisse et est son record qu'il affirme contenir véritté ainsi signé Le Mignost, etc ...

Escuver Morice Le Roux, sieur de Busart, demeurant aprésant au lieu du manoir de Kermon, paroisse de Ploulech, aaigé de environ vingt-et-un an, tesmoin faict jurer par serment dire véritté, purgé de conseill, sollicitation et advertissement enquis, dépose que quelques temps apprès que le seigneur de Kergomarc'h avoict quitté le chatteau de Coafrecq pour aller demeurer en la ville de Guingamp et estably pour commander soubz luy le seigneur de Kerahel, le déposant y fict quelque séjour et ne vid aulchuns boys de décoration de haulte futaye, mettairye ny colombier et ne hantoict que la chambre où se logeoit ledict seigneur de Kerahel et celle quit tenoict en la chambre duquel seigneur de Kerahel y avoict quelques litz garnys ne peult touteffoys savoir de quel estoffe. Et en sa chambre il y avoict de litz garnys à la commune façon, ne savoict à qui appartenoict lesdicts meubles et est tout ce qu'il peult savoir estant à long. Interrogé sur les articles dudict seigneur de Goazbriant depuis le premier jusques au dix-huitiesme article sur lequel il dict que apprès la prinse dudict chatteau par le seigneur de Sourdrec, ung nommé Laplante, de la garnison de Guingamp, y demeura avecque quelques soldartz pour la démolition de la place et emporta des munitions. 

Et enquis sur les interrogatz du sieur de Kergoumarc'h dict nest parant ny allyé ny audict seigneur de Goazbriant ny par icelle ny aultre sollicité amis est venu en vertu des monitoires qui ont esté publiés en sa paroisse ci touchant dire son record véritté en justice et a signé Morizce Le Roux. 

Noble homme Jacques Droniou, seigneur de Crechgoua, demeurant en la ville de Lannioun, aaigé d'environ trente-et-un ans, tesmoign fait jurer par serment dire véritté, purge de conseil, sollicitation et advertissement. Enquis sur les articles dudict seigneur de Goazbriant, dict ne pouvoir rien déposer sur le premier et subséquantz articles jusques au neuffiesme. sur lequel interrogé, dict que le commancement des troubles incontinant apprès la prinse de Leutreguier, il se rendit, au chatteau de Coatfrecq portant les armes soubz le seigneur de Kergoummarc'h, lors commandant en ladicte place, il estoit logé ledict déposant en uune chambre sur le portal qui n'estoict garnye daulchuns meubles fors de quelques litz et la chambre dudict sieur de Kergoumarc'h où il couchoict estoict garny de deulx litz ne peult savoir de quel estoffe charge ou soye estoict les courtines et garnitures et ny avoict que paille commoditté des meubles et non suffisants pour recueillir les soldartz que lors y estoient et ne vid pandant son séjour qui peult avoir esté pandant deux moys y rendre aulchuns meubles de dehors à sa savance. 

Sur le dixiesme ne sait laquelle étoict la chambre.du sieur de Grandboys par ce qu'il ny estoit de son temps.

Sur lonziesme article dict avoir hanté les maisons de Kergoumarc'h et Kermorvan, mais n'avoir prins aultrement garde quelles chambres ny ornement y avoict bien dict que avant les troubles ledict seigneur de Kergomarc'h résidoict en son lieu de Kermorvan. 

Sur le treiziesme article dict que de lors ledict seigneur de Kergoumarc'h entra audict Coatfrec il estoict en mute réparation des couvertures et logeables estant entretenu par ung nommé Pierre, fermier, il vid ledit seigneur de Kergoumarch faire battir un garde-corps sur le marchecouly qui estait du côté du boys taillis, ne sait à quelz frailz ny aux despans de qui, par corvée ou aultrement. 

Sur le quatorziesme et quinziesme, sexiesme, dix-septiesme article dict ne rien savoir. 

Sur le dix-huitiesme article dict que lors de la prinse dudict chatteau de Coatfrecq faicte par le seigneur de Sourdras sur le seigneur de La Fontenelle, il estoit de la campaignie du seigneur, de Coatinisan, il fut présant lors que ung soldart nommé Laplante, de la garnison de Guingamp, fuct commandé de demeurer audict Coatfrec avecq seize ou dix-sept arquebuziers pour conserver ladicte place en attandant la démolir durant lequel temps vid ledict Laplante sérer tous les meubles y estant comme coffres, bahus, charlictz, couettes, garnitures, munitions de guerre comme poudre, bales, canon de fer et uune espée vert qui se tiroict aboitte. Toutz lesquels meubles il mist en sa garde disant le conserver pour les rendre audict seigneur de Kergoumarch et deffaiet vid ledict Laplante charger tous les meubles dans des charettes disant que cestoict pour les rendre à Guingamp plus dict au commencement des troubles durant faisoict sa residance audict chatteau, il étoit décorée de boys de haulte futaye, mettairye et coulombier de boule et est ce quil peult dire sur les articles dudict deffandeur. Et enquis sur les interrogatz dudict demandeur dict navoir esté sollicité par ledict deffandeur ny aultres de par luy ny estre son parant ny allyé amis est venu dire son record de véritté en justice en vertu des monittoires publiés dimanche dernier en ceste ville à instance dudict deffandeur. Ainsy signé Droniou, en interligne. 

Maurice Guillou, notaire de la court de Launay, barach la paroisse de Plouber, aaigé d'environ quarante-troys ans, thesmoin faict jurer par serment dire véritté purge de conseil sollicitation et advertissement enquis sur le premier des articles dudict deffandeur, dict quil est demeurant en la paroisse et environ ung quart de lieux du chatteau de Coatfrecq et y a demeuré avant les troubles, durant iceulx et jusque ce jour. Lequel chatteau estoict décorée de boys de haulte fustaye, mettairye et colombier, où ledict seigneur de Kergoumarc'h commandoict avant la réduction de Guingamp ; en loboissance du roy et quittant ladicte place pour aller comme gouverneur audict Guingamp. Il y établit ledict seigneur de Kerahel avecque quelques dix ou douze soldartz seullement pour la garde de la dicte place. Et quelque temps apprès vid la dame de Kergoumarc'h hôter et transporter dudict chatteau dans nombre de charettes quelques coffres abahus et aultres meubles comme ung chair et quelques hardes qui estoient couvertz des tappis et y avoict entre aultres troys charettes de la paroisse conduis par les paroissiens entre aultres estoient Jean Hamon et le serviteur dudict deposant nommé François Kernot, les enfants de Pasquiou, les enfants de Jan Boulouch et aultres et ensemble avecque daultres charrettes des environs chargé pareillement desdicts meubles prindrent le chemin de Guingamp escortés de quelques soldartz de la guarnison de Guingamp. 

Sur les aultres articles subséquand jusques au neuffiesme dict rien ne savoir et interrogé sur ledict neuffiesme article dict avoir quelqueffoys hanté ledict chatteau durant que ledict sieur de Kergoumarc'h y demeuroict et en la chambre des seigneur et dame de Kergoumarc'h dict quil y avoict deux ou troys litz, lun desquelz étoict garnis des courtines de sarge tané et un aultre de sarge jaune et vert et ne voioit les chambres dudict chatteau garnyes des litz, ni meubles ny litz parés daulchune, richesse ains convient accoutrés fors quil a ouy dire que la chambre où estoict logé le seigneur de Grandhoys estoict mieux parée que les autres et que le sieur de Kersach, Restineur, Kerozern, Tréménou, La Haye, Lesnoal, du Rest, y estans réfugiés avoir leurs chambres garnys des meubles qui leur appartenoict pour la plus part et y faisoient rendre leurs commodittés nécessaires pour leur nourriture et entretinement de la maison et vid entre aultres ledict seigneur de Restimeur emporter oluy ses meubles lorsquil en départist. Sur lonziesme article dit avoir esté quelque foys en manoirs de Kergoumarc'h et Kermorvan avant les troubles quil a veu garny des meubles sans aultrement prendre garde à leur valleur et parure et a veu ledict seigneur de Kergoumarch faire sa résidance ordinaire audict manoir il fict rendre audict Cnatfrecq quelques vivres et quelque peu de meubles comme litz et coettes sans quil ait vu y faire rendre aultres meubles daulchun aultre endroit. 

Sur le douziesnie article dit avoir entendu que le seigneur de Kergoumarc'h emprunta quelque nombre des deniers du sieur de Kerozern pour payer sa rançon lors de la prisse au chatteau du Chatillon. 

Sur les traiziesme, quatorziesme article dict que lors que le demandeur entra audict Coatfrec quil estoict réparé de couverture et des planches logeables et sy tenoict Pierre Chavanay pour la garde et conservation dudict Coatfrec et boys et vid le seigneur de Rochglas, fermier, qui estoict subist de tenir le chatteau en réparation, poursuivi en justice pour, le réparer ainsy quil aouy dire, dit oultre que le boys de haulte futaye en partye fut abattu et couppé durant que ledict sieur de Kergoumarc'h sy tenoict, lequel fict rendre partye dudict boys au manoir de Coattellean, appartenant à layeule, de la femme du seigneur de Kerahel, hérittière de Kergrist et aouy dire que, certains habittans de la ville de Lannion firent charoier en leur ville nombre dudict boys ne saict sy ledict seigneur de Kergoumarc'h ou ses gens les leur avoict vandus, Durant lequel temps aussi firent démolir et ruiner la mettairye, le colombier, enclos dun verger et jardin près dudict chatteau. Lesquelles démolicions et ruines estoict faictes avant que ledict deffandeur y entra, lequel ne fut à sa savance durant son séjour aulchune démolicion ny ruine au boys, lequel quelque temps apprès fut abattu en ce que restoit par le commandement du seigneur de La Fontenelle, apprès que ledict sieur de Goazbriant en fut hors et a veu durant que ledict sieur de Kergoumarc'h sy tenoit la salle basse dudict chatteau servir descurye. 

Sur le quinziesme, saiziesme, dix-septiesme dict ne pouvoir rien déposer. 

Sur le dix-huitiesme et dix-neuffiesme article dict que lors de la reprinse de ladicte place faict par messieurs de Sourdras, baron de Moulas, ledict demandeur et aultres ung nommé La Plante, lieutenant du capitaine La Perrière, de la garnison de Guingamp y fuct même pendant la démollicion de ladicte place. Lequel La Plante fict promptement serrer et amasser totales les meubles de touttes espèces y estant quil fict charger dans de charettes disant qu'il avoict charge de les rendre audict sieur de Kergoumarc'h. Et vid en la cour dudict chatteau un. grand monceau de ses meubles où on y avoit forces coettes, Charlitz et aultres hardes qui y furent baillés en garde à ung nommé Jan Le Roux, atandant les charoyer. Et a entendu que la porte et pont levys dudict chatteau furent rendus au chatteau de Coatinisan plus dict quil a entendu que ledict sieur de Goazbriant fit randre de son manoir de Kergrech audict chatteau quelques charettes de meubles pour la commodité des soldartz ne sait quelle quantitté ny quelles sortes. Et est ce quil dict savoir suries articles. Interrogé sur les interogatz dudict sieur de Kergoumarch dit navoir esté induict ny pryé par aulchun de la part dudict deffandeur de venir en justice dire sa déposition ains est venu pour decharger sa consiance, en consèquance des monitoires qui ont esté par deux foys publiés en sa paroisse et a signé M. Guillou. 

Damoyselle Jannes de Kersolles, dame de Kerinon, demeurant en la ville de Lannion, comme réfugiée, aaigée d'environ trante-quatre ans, tesmoin fait jurer par serment dire véritté, Dépose que quelques temps apprès que le seigneur de Goazbriant entra au chatteau de Coatfrec, madame de Kergoumarc'h accompaigné de nombre des gentilzhommes ; entre aultres estoict le seigneur de Fontaine-Prouost, de Guingamp, conseil de ladicte dame, ariva au manoir de Kerinon, près dudict chatteau, où elle demeura uune nuit. Et le landemain sen alla audict chatteau de Coatfrec où la déposante laccompaigna à sa paièce et disoict ladicte dame qu'elle estoict venu expressément quérir et retirer dudict chatteau les meubles quelle y avoit laissé et deffaict. Incontinant son arivée ladicte dame alla par touttes les chambres dudict chatteau recognoistre et chercher ses coffres a hahus et aultres meubles à elle appartenant. Lesquelz meubles estans dans lesdictz coffres furent invantorisés par le feu seigneur du Pont-Glas, seneschal, et le sieur du Rest, lieutenant de Treguier, en présance de plusiers personnes et de la déposante, laquelle dame faisoict uune grande démonstration de joye ayant rencontré uune pochée des lettres et garentz disoict estre de grande conséquance. Lesquelz coffres ne sembloict briser ains vid ; ladicte darne les ouvrit. Lesquelz garantz et lettres ladicte dame emporta avec elle et ny avoict auxdicts coffres aulchuns meubles de valleur et laissa lesdicts coffres à ung sien domestique nommé Charles parce quil ny avoict en tous lesdicts coffres que des faillis hardes qui ne valloict la peine de recueillir ny emporter et est son record estante au long enquis sur les articles dudict deffandeur et interrogatz dudict demandeur. Et est venu dire son record de véritté en justice à cause des monitoires qui ont esté publiés ce touschant ne saict signer. Dict oultre que ayant esté par touttes les chambres à la recherche de ses coffres elle vid les dictes chambres communément garnis de quelques litz et charlitz ne saict à qui appartenoict lesdicts meubles, bien dict quelle ouyd dire que le sieur de Goasbriant y avoict faict rendre quelques meubles. 

Escuyer Rolland Trogoff, seigneur dudict lieu, demeurant en la paroisse de Plouber, aaigé denviron cinquante-six ans, thesmoin fait jurer par serment dire véritté. 

Dépose que de tout temps il a frecquanté le chatteau de Coatfrecq comme demeurant en la paroisse prochain voisin, Lequel chatteau estoict avant les derniers troubles décoré de boys de haultaye, mettairye, enclos de jardin et colombier, et que en l'an mil cinq centz quatre-vingt-dix, le sieur de Kergoumarch y entra pour tenir garnison et estoict ladicte place bien entretenu de couvertures, planchers sollivaux, et les chambres logeables. Et enquis sur le premier article dict, que incontinant la prinze de Guingamp, ledict seigneur de Kergoumarch sy retira et fict transporter nombre de meubles dudict Coatfrecq à Guingamp et à cette fin lon fict venir huict ou neuff charettes de ladicte paroisse de Plouber, et y fuct laissé le seigneur de Kerahal avecque dix ou douze soldartz, pour conserver ladicte place, avec lequel seigneur de Kerahel le déposant demeura audict chatteau, comme maistre dostel, environ quatre moys, et n'y avoict audict chatteau, meubles ny charlitz pour recueillir lesdits soldartz. Toultz lesquels meubles qui estoient par touttes les chambres dudict chatteau ne pouvoient valloir cent escuz. Ce quil saict par avoir esté par touttes lesdictes chambres, qui nestoient garnies que de faillis meubles et ny avoict que bien peu dutancilles de mesnaige comme estain, lingeries qui ne pouvoient         valloir dix francz, et à cause de l'indigence et incommoditté des meubles pour entretenemant des soldartz audict chatteau, ledict seigneur de Kerhael ny sy plaisoict, ains voulloict tousiours se retirer. 

Sur le quatriesme article dict avoir ouy dire notoirement que invantaire fuct faicte des meubles estans en ladicte place, par monseigneur le lieutenant de Lannion. 

Sur le cinquiesme article dict quil est certain et notoyre que ledict sieur de Goazbriant apprès son introduction en ladicte place, y fict rendre plusieurs meubles, ne saict de quels endroictz. Bien ouyd dire à Charles Moreau, dict Pontcoff, que lesdicts meubles venoient du manoir de Kergrec'h et la Noë-Verte, et mesme du manoir de Kerousy, et durant la demeure dudict sieur de Goazbriand en ladicte place le déposant y hantoict quelques foys et voioict les chambres dicelle ameublées et garnyes que auparavant. 

Sur le neuffiesme article dict avoir souvent este en la chambre dudict sieur de Kergoumarc'h, audict Coatfreq, durant quil y estoic et se souvient dy avoir veu uune couchette garni dun pavillon de sargejaulne et verte. Et en la chambre au-dessus la cuisine y avoict troys litz garnys de sarge verte et sassure quil ny avoict aulchun lit garny des courtines du soye. 

Sur le dixiesme article dict.quil y avoict en la chambre du seigneur du Grandboys ung lit garny dun tour de vellours rouge et des courtines de taffetas. Et saict bien le déposant que nombre des gentilzhommes qui estoient réfugiés avoient leurs litz garnitz leur appartenantz. Et tous les meubles et ustancillés de mesnaige. 

Sur le douziesme article dict quil est bruict commun que ledict sieur de Kergoumarc'h sestoict beaucoup endetté avant les troubles pour faire lacquet de la terre de belisle et quil avoict emprunter du seigneur de Kerliviou, curateur du seigneur de Kerbouchart et Guerjan, la somme de troys mille escuz et a ouy dire quil emprunta aussi de largent pour payer sa rançon à Chatilon. 

Sur le traiziesme dict avoir respondu cy dessus et oultre dict que le seigneur de Rochglas, fermier, fuct contrainct par justice de reparer ledict chatteau et à ses fraictz y furent faictz les réparations au chatteau excepté quelque parapellz et marchecoulis que les paisantz des paroisses firent par corvées, il nemploya ledict seigneur de Kergoumarch entour ladicte place pour lesdictes fortiffications et réparations aulchuns deniers du sien ains le tout fuct faict aux fraitz dudict Rochglas et des paroisses. Plus dict que lors que ledict seigneur de Goazbriant entra en ladicte place, les boys de deccoration estoient couppés, la mettairye, le colombier. abattus et rasés, et ne fict ledict seigneur de Goazbriant aulchune ruine. Et est tout ce quil dict sçavoir estant au long interrogé sur lesdicts articles. Interrogé sur les interrogatz dudict sieur de Kergoumarc'h dict estre venu sans aulchune sollicitation en vertu des monittoires publiés en sa paroisse nest parant ny allyé audict deffandeur. Amfin signé, R. de Trogoff, etc. 

Jacob Josant, laboureur de terre, demeurant en la paroisse de Guimilliau, aaigé denviron soixante-dix ans, faict jurer. Dépose que quelques temps apprès la prinse faicte du chatteau de Coatfrecq par les sieurs de Sourdras, baron de Molas, Kergourmac'h et aultres y fuct adverty par Francoys Le Leset, procureur syndicq, lors de ladicte paroisse quil falloict fournir dicelle ses charettee attelées pour charoyer les canons, munitions de guerre et aultres meubles dudict chatteau de Coatfrecq en la ville de Guingamp et pour y aider le déposant fournist une charette et alla en personne jusques audict chatteau de Coatfrecq où. il vid charger ladicte charette dun canon de fonte verte et nombre darquebuzes à crocq, un petart. Laquelle charette ainsy chargée fuct conduite et mesnée audict Guingamp par Jan Josantz, son filz, Jan Auffret, Charles Audren, et autres de la paroisse, et furent lesdictes arrivés renduz au logeix du seigneur de Kergourmac'h, à Guingamp, et est son record quil affirme contenir véritté quil est venue porter à causes des monitoires peublies en sa paroisse, et ne saict signer. 

Françoys Lesec, laboureur de terre, de la paroisse de Ploumilleau, aaigé de quarante-six ans, thesmoin faict jurer. Dépose quil y a environ quatre ou cinq ans, estant procureur sindicq de ladicte paroisse, il eust commandement de la part du sieur de Kergomarch de luy fournir et randre prés le chatteau de Coatfrecq, six charettes attelées pour ay ler à transporter les meubles et munitions y estantz en la ville de Guingamp et suivant ledict commandement lon adviza au prosne de la grande messe que troys fermiers eussent ensemblement fourny unne charette et fuct donné ordre de trouver lesdictes six charettes en ordre et furent au temps prefix rendues près ledict chatteau. Et nalla le déposant avecque aulchune dicelles charettes, mais il a ouy notoirement dire quelles furent chargées de canons et aultres munitions de guerre et meubles et rendues en la ville de Guingamp, près du logis du sieur de Kergoumarc'h. Et est son record quil affirme contenir véritté et est venu le porter en vertu des monitoires publiés. Ce touschant en sa paroysse à instance dudict deffandeur et ne saict signer.

Yvon Le Bricquir, laboureur de terre, de la paroisse de Guimilliau, aaigé d'environ trante-cinq ans, thesmoin faict jurer. Dépose quil y a environ cinq ans, ne peult aultrement cotter le temps, il estoict l'un des procureurs syndicq de ladicte paroisse, ensemble avecque François Lesecq, sur ce quil leur fuct commandé de la part du seigneur de Kergoumarc'h de luy fournir six charettes pour transporter ses meubles et munitions de guerre du chatteau de Coatfrecq à Guingamp. Il fuct advisé au prosne de départir les dictes six charettes par frerries en mettant troys frerries pour fournir et ateller chaincune charette ; lesquelles charettes estant ainsy à la dilligence dudict déposant trouvées prêtes. Il fict conduire audict chatteau de Coatfrecq doù ainsy quil a entendu par le bruict commun ils furent chargés des munittions de guerre et aultres choses comme canons et randuz en ladicte ville de Guingamp. Et est tout ce quil peult savoir quil est venu porter à cause des monitoires qui ont esté ce touschant publiés, il ne saict signer. 

Jan Meur, laboureur de terre, de la paroisse de Guimilliau, aaigé d'environ quarante-cinq ans, thesmoin faict jurer. Dépose quil y a aprésant environ cinq ans il alla conduire et mesner une charette de la ferme du Halegoat et Kerdudoal jusques au chatteau de Coatfrecq, ensemble avec Yvon Guiomarch et Yvon Le Bihan et aultres et y estant, furent commandé dy charger une grande pièce de canon de fonte vert qui estoict toutte la charge de ladicte charette et fuct charoyé par dix bestes, savoir six beuffz et quatre chevaux, jusques dans la ville de Guingamp et deschargé en la maison du seigneur de Kergoumarc'h, gouverneur de la ville, qui les print et enferma dans la court de son logix et de mesme compaignye cinq aultres charettes, chargées des munitions dudict Coatfreq furent deschargées audict logis dudict seigneur de Kergoumarc'h, tous lesquelz meubles leur furent baillés pour estre chargés en leurs charettes par ung nommé capitaine La Plante de la garnison de Guingamp et est son second quil affirme contenir véritté quil est venu porter à causes des monitoires publiés. ce touschant en ladicte paroisse, et ne saict signer. 

Richard Pastol, laboureur de terre, de la paroisse de Ploumilliau, aaigé de quarante ans, thesmoin faict jurer. Dépose que quelque temps apprès la prinse du chatteau de Coatfrecq, les frairies de Querguioumarch, Le Gellot et Kernot fournirent une charette attellée de huict bestes que le déposant ayda conduire audict Coatfrecq. Estant arrivé ung nommé capitaine La Plante leur délivra unge pièce de Canon de fer quilz chargèrent en leur charette, laquelle fuct ainsy rendu en la ville de Guingamp, par François Le Garec, Françoys Connan, Allain Geoffroy et Rolland Daniel, et nala le déposant du tout jusques à la ville ains laissa les surnommez à mi chemin et y avoict cinq aultres charettes de ladicte paroisse pour le transport desdictes munittions de Coatfrecq audict Guingamp et est son record quil affirme contenir véritté et ne saict signer.

François Le Garec, laboureur de terre, de la  paroisse de Ploumilliau aaigé denviron trante ans, thesmoin faict jurer. Dépose estre mémoratif quil y a présant environ cinq ans il alla ensemble avecque quelques aultres de la paroisse pour ayder à rendre les munitions de Coatfrecq audict Guingamp suivant le commandement du sieur de Kergoumarch et fuct la charette dudict déposant chargée d'une pièce dartillerye de fer et d'un coffre abahut que capitaine La Plante y mist et deux pochées de hardes que deux soldatz a luy incongneuz jettèrent aussy dans ladicte charette, laquelle le déposant ayda a amesner jusques audict Guingamp et fuct ladicte pièce de canon minse en la court du logix dudict sieur de Kergoumarc'h et lesdicts capitaine et soldartz emportèrent leurs hardes. Et y avoict cinq aultres charettes de ladicte paroisse chargées des munitions, coffres et aultres meubles qui furent transportés dudict Coatfrecq audict Guingamp et est son record quil affirme contenir véritté et estre venu le porter à cause des monitoires publiés ce touchant en sa paroisse. Et ne saict signer. 

Rolland Daniel, laboureur de terre, demeurant en la paroisse de Ploumilliau, aaigé de cinquante ans, thesmoing fait jurer. Dépose quil ayda à charger la charette de Françoys Le Garec dune pièce de canon de fer et quelques aultres hardes du château de Coatfrecq quil ayda pareillement rendre et décharger au logeix. du seigneur de Kergoumarch, en la ville de Guingamp, et vid cinq aultres charettes qui aussy estoient chargées des munitions dudict Coatfrecq qui furent rendus audict Guingamp. Et est son record ne saict signer. 

Françoys Conan, laboureur de terre, de la paroisse de Ploumilliau, aaigé de vingt-six ans, thesmoin faict jurer. Dépose que Françoys Le Garrec, Richard Bastel, Rolland Daniel et aultres, des frairies de Guerrouvarch, Querbot et Golot, charoièrent, y a aprésant environ cinq an, du chatteau de Coatfrecq unne pièze de canon de fer en la ville de Guingamp, lequel ilz deschargèrent en la cour du logeix du sieur de Kergomard et y avoict en cinq aultres charettes nombre des munitions et meubles et entre aultres vid troys coffres à bahutz qui furent aussy renduz au logeix dudict sieur de Kergoumarc'h, dudict chatteau de Coatfrecq, lesquelz munitions .et meubles leurs furent baillés et dellivrés par capitaine La Plante, et est son record ne saict signer. 

Richard Le Goff, laboureur de terre, de la paroisse de Ploumilliau, aaigé denviron trante ans, thesmoin faict jurer. Dépose que a présent, y a environ cinq ans, Françoys Le Garec, Rolland Daniel, Françoys Conan, mesnèrent uune charette attellée au chatteau de Coatfrecq, où ils chargèrent en leur charette unne pièce de canon de fer, un coffre de bahut et quelques hardes que capitaine La Plante leur dellivra laquelle charge fuct par les surnominés randus à Guingamp. Et nalla à la conduite dicelle ledict déposant ains demeura pour ayder charger cinq aultres charettes de ladicte paroisse des munitions et meubles dudict chatteau et est aussy savant et mémoratiff davoir ayder à charger auxdictes charettes deux gros canons de fonte verte, des berches et arquebusses à crocq, quelques barilz de poudre, quelques moutzquetz, unne coette et quelques coffres qui furent pareillement randus audict Guingamp et deschargés au logeix dudict seigneur de Kergoumarc'h. Et est son record ne saict signer. 

Jan Querré, laboureur de terre, de la paroisse de Ploumilleau, aaigé, denviron trante-troys ans, thesmoin faict jurer. Dépose que les frairies de Querrogon et Treman dont il est, fournirent, à présant y a environ cinq ans, unne charette attellée pour charoier les meubles et munitions du chatteau le Coatfrecq, en la ville de Guingamp. Lequel déposant ayda charger sadicte charette dun coffre abahut, unne coette de plume, deux pieczes de plomb à faire balles quit aya a randre et descharger au logeix du seigneur de Kergoumarch, où cinq aultres charettes chargées des munitions dudict Coatfrecq, furent pareillement ledict jour deschargées. Et est son record ne saict signer.

Jacques Pasquiou, laboureur de terre, de la paroisse de Ploumilléau, aaigé denviron vingt ans, thesmoin faict jurer. Dépose, quil ayda ensemble avecque quelques aultres de la frairie de Querrogon à mesner unne charette chargée d'un coffre abahut non fermé à cleff où il y avoict quelque pappiers, unne coette et deux pieczes de plomb, du chatteaù de Coatfrec jusques en la ville de Guingamp, quelz meubles furent deschargés dans la court dune maison quil a ouy estre la demeure du seigneur de Kergoumarch, aussy dict quil y avoict cinq aultres charettes pareillement chargées de meubles, daultres hardes. Et est son record quil affirme contenir véritté, et ne saict signer. 

Yvon Raoul, laboureur de terre, de Ploumilliau, aaigé de quarante ans, thesmoin faict jurer par serment. Dépose que les frairies du Quinquis, Bostin, Kerdu et Kernigadou fournirent apprès la prinse du chatteau de Coatfrecq unne charette attellée pour charoier dicelle munitions de meubles en la ville de Guingamp. Et fuct chargé en sa charrette unne grande pièce de canon de fonte verte qui estoict toutte sa charge, que il, Yvon Flachec, Allain Le Coat rendirent et deschargèrent en la court du logeix du sieur de Kergoumarch à Guingamp. Et dict quil y avoict cinq aultres charettes qui estoient aller davant audict Guingamp, chargés des aultres meubles et munitions dudict Coatfrecq qui fust brullé le mesme jour. Et est son record ne saict signer. 

Nouël Le Goff, laboureur de terre, de la paroisse de Ploumilliau d'environ quarante ans, thesmoin faict jurer. Dépose que apprès la prinse du Chatteau de Coatfrecq, il ayda amesner et à conduire une charette à Guingamp, qui estoict chargée dune coette, deux pieczes de plomb et ung coffre à bahut dans lequel y avoict quelques ........ quelle charge fuct rendu du chatteau Coatfrecq en la ville de Guingamp au logeix du seigneur de Kergoumarc'h et vid quelques aultres charettes chargées de canons et munitions dudict Coatfrecq qui pareillement furent rendus et deschargés audict logeix dudict seigneur .de Kergoumarc'h. Et est son record quil affirme ne savoir signer. 

Yvon Le Bihan, laboureur de terre, de la paroisse de Ploumilliau, aaigé d'environ trante-huit ans, thesmoing faict jurer par serment. Dépose que quelque temps apprès la prinse du chatteau Coatfrecq faicte par le seigneur de Sourdras et aultres. Il est quelques aultres des frairies de Guérionnis, Kermoguisun et Kervanen, fournirent une charette attelée au seigneur de Kergoumarc'h pour ayder à rendre ses munitions et meubles dudict Coatfrecq en la ville de Guingamp, dans laquelle charette le déposant ayda charger unne piecze de canon de fonte verte qui estoict toute sa charge, avec un petit baril, de pouldre, laquelle charette il a ouy dire avoir esté rendue en la ville de Guingamp par le serviteur de Pierre Kerruchel et aultres et deschargée en la maison du seigneur de Kergoumarc'h et vid charger aultres charettes des munitions dudict Coatfrecq pour les rende audict Guingamp. Et ne saict signer. 

Guillaume Grandour, laboureur de terre, de la paroisse de Ploumilliau, aaigé denviron trante ans, thesmoin faict jurer. Dépose que apprès la prinse du chatteau de Coatfrecq, faict, par le seigneur de Sourdras et aultres. La frairye de Kersaudy dont il est demeurant, celle du Quinquis, Jostin et Kerdu fournirent unne charette au seigneur de Kergoumarc'h pour ayder à rendre ses meubles et munitions de guerre à Guingamp et fuct chargé dans ladicte charette du déposant unne piecze de fonte verte sans aultre chose quil ayda conduire et déscharger au logeix du seigneur de Kergoumarc'h audict Guingamp et y avoict quelques aultres charettes qui portoirent nombre de canons et munitions qui furent pareillement chargées audict Coatfrecq et deschargées au logeix dudict seigneur de Kergoumarc'h à Guingamp. Et est son record ne saict signer. 

Escuyer Rolland Lorans, seigneur de Losestan, demeurant en la paroisse fie Pemerit-Jaudy (aujourd'hui Pommerit-Jaudy), aaigé denviron vingt-huit ans, tesmoin faict, jurer. Dépose cognoistre les sieurs de Goazbriand et Kergoumar par les avoir souvant hantés et enquis, sur le sixiesme article dict que estant résidant au chatteau de Coatfrecq ou commandoict ledict sieur de Goazbriant. Il fuct adverty que madame de Kergoumarc'h estoict au manoir de Kerynon. Laquelle estant allé voir vindrent tous de compaigne audict Coatfrecq, où estant arrivé ouyd dire notoirement quelle estoict venu en intention de retirer ses meubles et hardes pour les transporter à Guingamp ne prind aultrement garde ce quelle emporta par ce quil fuct diverty à ses affaires. 

Sur le saiziesme article dict que quelque quinze jours apprès que ledict seigneur de Goazbriand fuct introduit audict Coatfrecq il le vid au logeix dudict sieur de Kergoumarc'h à Guingamp et ouyd ledict seigneur de Kergoumarc'h luy dire quil debvoit tenir ladicte place de Coatfrecq soubz lui comme faisoict le seigneur de Kerahel, par ce que les munitions qui y estoient lui appartenoient, auquel ledict seigneur de Goazbriand répondit quil tenoict ladicte place du roy et que lors quil entra en ladicte place lennemy avoict intelligene sur icelle et eust esté prinse sans son entremise et nouyd lors ledict seigneur de Kergoumarch reprocher ny se plaindre aulchunement daulchune perte quil eust souffert à cette occasion et est tout ce quil peult déposer sur lesdicts articles ainsy signé Lorans. 

Du quinziesme may mil cinq centz quatre vingtz-dix-huit, en la ville de Pontrieu, escuyer Jan Orion, sieur de Mesangaoniat, demeurant au lieu de Penanhaye, paroisse de Plouesal (aujourd'hui Ploëzal), évesché de Tréguier, aaigé denviron vingt-six ans, thesmoin faict jurer par serment. Dépose que environ troys moys avant l'introduction du deffandeur au chasteau de Coatfrecq il sy estoict rendu lun des chevaulx légers du sieur de Kerahel qui y commandoict soubz le seigneur de Kergoumarc'h et durant lesdicts troys moys il a veu ladicte place assée bien accommodée des meubles. ne saict à qui ils apartenoient et quil y avoict nombre des reffugiés en ladicte place que y avoient apporté des meubles et utancilles pour leur usage et ne vid aulchuns meubles de grand prix audict lieu, de litz garnitz de soye ains estoient de sarge aussy dict que apprès que ledict seigneur de Goazbriant entra en ladicte place, il y demeura quelque temps et vid randre quelques meubles en ladicte place que on disoict apporter du lieu de Kergrech et la Noë-Verte appartenant audict seigneur de Goazbriant et par ce moyen estoict la place mieulx et plus commodément meublée que de paravant. 

Sur le siziesme article dict estre mémoratiff davoir veu arriver la dame de Kergomard audict Coatfrecq et que le subie de son voiage estoict pour quérir et retirer ses meubles ne peult avoir souvenance quelz meubles elle emporta et que les chambres où il entroict il ny avoict aulchuns lictz ny charlitz garnys de courtines du soye et est tout ce quil dict savoir quil affirme contenir véritté. Et enquis sur les interrogatz dudict demandeur dict nestre aulcunement parant ny allyé à sa savance audict deffandeur et navoir esté solicitté ny induict par aulchun pour venir dire son record quil est venu porter à cause des monitoires qui ont esté publiés, ce touschant ainssy signé Jean Orion. 

En la ville de Guingamp, ce saiziesme may mil cinq centz quatre-vingtz-dix-huit, maistre Rolland Jégou, notaire de la court de Tonquédec, demeurant en la paroisse de Cavan, évesche de Tréguier, aaigé denviron vingt-sept ans, thesmoin faict jurer. Dépose que estant voisin du chatteau de Coatfrecq, il fuct, comme soldart, en ladicte place, saubz la sarge, du sieur de de Kergoumarc'h, au commancement des troubles, et que lors ladicte place estoict non du tout à suffire à meubler pour le logement de soldartz et ne luy souvient avoir veu aulchun lict qui eust esté garny de courtine de soye excepté en la chambre du seigneur de Helles où estoict logé le seigneur du Grandboys où y avoict deux litz garnys de courtines de soye et surplus des aultres litz estans. Touttes les aultres chambres estoient garnys de sarge ne saict de quelle coulleur. 

Sur le premier article dict quit nestoict en ladicte place le jour que ledict sieur de Kergoumarc'h en départist et ne saict quelz meubles il emporta. Bien est vray quaprès son département il y laissa le sieur de Kerahel avecque dix ou douze soldartz et bien petitte quantitté des meubles non suffisaute pour les accommoder et ne voict les chambres sy bien garnies quelle estoict de paravant et, que mesme le seigneur de Kerahel sy déplaisoict et ne voulloict y demeurer pour le peu de meubles quil y avoict. Et sassure le déposant que le seigneur de Kergoumarc'h fict faire ung estat et, mémoire du reste des meubles quil laissa audict seigneur de Kerahel en ladicte place et luy semble plus que aultrement quil fuct ..... de la main de madamoyselle de Lestang, damoiselle ordinaire et domestique avecque madame de Kergomar ayant faict rendu le surplus à Guingamp. 

Sur le neuffiesme et dixiesme article dict avoir répondre au commancement de sa déposition. 

Sur le traiziesme article dict quil a veu la place de Coatfrecq en bonne réparation de couverture et planche, quelle estoict en mesme estat, lors que ledict sieur de Kergomarc'h y rentra, le sieur de Rochglas, fermier, estant venu faire lesdites réparations et, vid ledict sieur de Kergomarc'h y faire quelque machecoulis et parapet, aux fraictz dudict fermier ; et que les paysans y venoict par corvées nettoyer les douffues et faire quelques réparations à lanthour de ladicte place, sans quil vid ledict sieur de Kergomar leur bailler aulchun poiesmen t. 

Sur le quatorziesme dict quil voioict, des chevaulx ordinairement en la salle basse dudict chatteau, dict oultre que lors que le seigneur de Kergoumarc'h entra en ladicte place il estoict décoré de boys de haulte fustaye, mettairye, colombier et enclos de jardin, lesquelz estoient démolitz et ruinés avant, que ledict seigneur de Goazbriant y entra et que tant du temps dudict sieur de Kergoumarc'h que dudict seigineur de Kerahel, il y avoict nombre des gentilzhommes réfugiés des environs audict chatteau, comme les sieurs de Restimeur, Tréveznou, Kerozern, Kernavane et aultres qui avoient leurs comodittés et meubles leurs appartenant. Et est tout ce quil peult dire. Estant au long interrogé sur les articles dudict deffandeur et interrogé sur les interrogatz dudict seigneur de Kergoumarc'h, dict nestre parant, allyé ny debteur audict deffandeur et estre venu porter le présent record en vertu de inthimation lui signiffyé et compulsaire décerne à instance dudict deffandeur, ainsy signé Jégou.

Escuyer Guillaume Le Goallès, sieur de Kerrance. Demeurant en la paroisse du Faouet, évesché de Tréguier, aaigé d'environ trante ans. Dépose que quelque temps apprès quele seigneur de Kergoumarc'h avoict quitté le chatteau de Coatfrecq pour se randre en la ville de Guingamp, il se rendist ensemble avecque le seigneur de Perlotz, un nommé Le Mesec et aultres audict Coatfrecq, soubz la charge du sieur de Kerahel qui estoict estably pour y commander par mondict seigneur de Kergoumarc'h. Sur le premier article dict avoir ouy dire que ledict sieur de Kergoumarc'h quittant ladicte place fist quelque temps apprès randre le plus beaulx de ses meubles en la ville de Guingamp et pandant son séjour en ladicte place voyoict, que les soldartz nestoient à suffire, garnys de litz et ustanciles de mesnaige pour leur commoditté ainsy falloict que la plus part des soldartz faulte davoir de litz et couettes se fussent couché sur des paillazes et combien quil alloict et hantoict ordinairement les chambres dudict chatteau. Il ne voioict dans aulchune chambre aulchun lict tandu ny garny des courtines fores en en la chambre du seigneur de Kerhaël où il y avoict quelques garnitures de lictz façons. 

Sur le second et troiziesme et quatriesme article dict que ledict sieur de Kerahel ne pouvant supporter les fraictz de ladicte garnison et nayant en la place commoditté pour entretenir les soldartz, porta parolle audict seigneur de Goazbriant estant lors au manoir de Kergrech pour sy venir loger, ce que ledict sieur de Goazbriant accepta et avant y entrer fist faire invantaire des meubles et munitions de guerre y estantz par monseigneur le lieutenant de Lannioun (aujourd'hui Lannion).

Sur le cinquiesme article dict que apprès l'introduction de monseigneur de Goazbriant, en ladicte place et y demeure comme chevaulx léger et vid ledict seigneur de Goazbriant faire rendre en ladicte place quelques charettes de meubles ne saict le nombre que lon disoict apporter des manoirs de Kergrech et de la Noé-Verte et par ce moyen les chambres dudict chatteau estoient de beaucoup mieulx garnys et ameublées quelles nestoient auparavant, tant pour la commoditté dudict seigneur que le logement des soldartz, parce que on y avoict randu nombre de litz, coettes et aultres meubles, et est tout ce quil dict savoir estant au long interrogé sur les articles dudict deffandeur. Et enquis sur les interrogatz dudict seigneur de Kergoumarc'h, dict nestre parant, allyé ni debteur audict seigneur de Goazbriant, à sa savance, et est son record ainsy signé : G. Le Goalles. 

Escuyer Pierre Kergrech, seigneur de Kervalanger, faisant sa résidance en sa maison du bour, en paroisse de Laneber (aujourd'hui Lannebert), évesché de Saint-Brieuc, aaigé denviron trante-quatre ans, thesmoin faict jurer par serment. Dépose que incontinant apprès que le sieur de Kergoumarch entra au chatteau de Coatfrecq, pour y tenir garnison, le déposant sy rendict pour y demeurer, tant pour sa conservation que faire la guerre, ès ocurance, soubz lauthoritté dudict seigneur de Kergoumarc'h et oudict temps estoict ladicte place descorrée de boye de haulte fustaye, mettairye, colombier et ladicte place logeable et en bonne réparation de couverture. 

Sur le premier article dict avoir demeuré continuellement audict Coatfrecq jusques à la prinse et réduction de Guingamp en lobeyssance du Roy et lors ledict seigneur de Kergoumarc'h quitta ladicte place y laissant sa femme pour quelque temps apprès pour venir demeurer et commander audict Guingamp, et ayant entendu que ledict sieur de Kergoumarc'h avoict retirer et faict transporter dudict Coatfrecq ses meubles, le plus précieulx en ladicte ville de Guingamp sur ladvis qu'il reçut que l'armé de monseigneur le duc de Mircour (Mercoeur) saprochoict dudict Coatfrecq, ledict déposant fict aussi retirer les commodittés quil y avoict, et estant allé pour se subiect audict Coatfrecq, vid les chambres touttes desgarnyes sy quil ne restoict que quelques vieulx charlitz pour le logement dun nombre des soldartz qui y estoient demeurer avecque le seigneur de Kerahel y establiy pour commander par ledict seigneur de Kergoumarc'h et lors ledict déposant se retira en ladicte ville de Guingamp où il demeura servant le Roy soubz lauthoritté et de la compaignie dudict seigneur de Kergoumarc'h jusques à ce que ledict seigneur de Goazbriant fuct en liberté hors sa prinson de Nantes. Lequel sieur de Goazbriant sen estant rendu en sa maison de Kergrech près de Leutreguier ; le déposant lalla trouver et pendant quil y demeura voioict le seigneur de Kerahel qui y venoict quelque foys se plaignant du peu des commodittés et moyens quil avoict pour supporter les fraitz et entretenement de la garnison de Coatfrecq et que le sieur de Kergoumarc'h ne voullant luy bailler moyens pour suporter lesdicts fraitz, estoict contrainct de la remettre entre les mains de quelque aultre et sur ce offrict ladicte place audict seigneur de Goazbriant lequel ny alla lors présantement ains départirent et vid ledict seigneur de Goazbriant vers la maison ce Kermarquer et le pour demander quelques couettes et aultres meubles pour faire rendre en ladicte place de Coatfrecq et deux jours apprès ledict déposant reçut l'ordre dudict sieur de Kerahel sadressant audict seigneur de Goazbriant pour le prier daller en diligence audict Coatfrecq par ce quil étoict contraint de labandonner. Et sur ce ledict deffandeur envoya ce déposant en la ville de Lannioun pour advertir les juges dudict Lannion de se trouver audict Coatfrecq tant pour faire estat de la place que invantaire des meubles y estantz et deffaict le lieutenant Royal dudict Lannion assisté du seigneur de Coatbruc comme procureur fiscal de la juridiction de Coatfrec et le seigneur de Kerilly-Plusquellec, greffier ordinaire dudict Lannioun y estant condesanduz firent estat et invantaire des meubles y estant représanté par ledict seigneur de Kerahel en présance dudict déposant et plusieurs aultres de la garnison excepté ce quil y avoict en la chambre dudict Kerahel quit disoict, lui appartenir ; et ce faict le sieur de Goazbriant y entra deux ou troys jours apprès et par ce quil ny avoict meubles en ladicte place suffizante pour la commoditté et le logement des soldartz il fict rendre nombre des charettes des meubles de touttes. sortes dudict manoir de Kergrech et dudict lieu de Kermarquer quil avoict achetté du seigneur du Lesquill, curateur du sieur de Kerousy. Aussy vid rendre quelques battelles de meubles quon apportoict du manoir de la Noue-Verte, appartenant audict seigneur de Goazbriant, il y remarqua entré aultres choses nombre des coettes, tapisseries, garnitures de lit, vaisselles dargent et destain, lingeries et aultres ustancilles de mesnaige et nécessaires en unne garnison. 

Sur le sixiesme article dict quil estoict absant de ladicte place le jour que madame de Kergoumarc'h y arriva pour quérir le reste de ses hardes et meubles. Bien dict quil a ouy notoirement dire quelle avoict emporté unne couppe et esgaire dargent et un petit coffret auquel il y avoict les garans de lacquest de boysson et belisle faict par ledict seigneur de Kergoumarc'h et tous les aultres meubles de conséquance ny laissant, que quelques vieuix meubles ne vallantz la paine de les transporter les laissantz touteffoys en la garde dun nommé monsieur Charles, un son domestique, sans que ladicte dame se plaignoict davoir rien perdu excepté un mirouer quelle ne trouva dans son cabinet, quelle mirouer le déposant dict que la dame de Kerahel avoict de précédant temps emporté. 

Sur le huictiesme, neuffiesme et dixiesme articles dict que, durant son séjour audict Coatfrecq soubz la charge dudict seigneur de Kergoumarc'h et lors quil sy tenoict avec sa femme et famille il hantoict et fréquantoict ordinairement par touttes les chambres dudict chatteau et il luy souvient quen la chambre desdicts seigneur et dame de Kergoumarc'h il y avoict deux litz garnys de sarge tané à brodrye de soye pour la plus part du temps et survenant compaigni lon y mestoict courtine et garnittures de soye, et y avoict aussy unne couchette garny de sarge de laine comme mieulx luy souvient et par touttes les aultres chambres il ny avoict que garnittures de laine excepté la chambre où couchoict le seigneur du Grandboys aprésent seigneur de la Roche-Jagu où il y avoict deux litz garnys de courtines de soye et est certain que ledict seigneur de Kergoumarc'h ny occupoict en tout que quatre chambres accommoddées comme il a rapporté en aultres chambres dudict chatteau estoint logés les gentilzhommes réfugies, lesquelz y avoint faict randre les commodittés de leurs logementz et utancilles de leurs mesnaiges. Dict oultre que avant quitter ledict seigneur de Goazbriant pour avoir prins le party de monseigneur de Mercœur il se rendict en la ville de Guingamp de la compaigni du seigneur de Kergoumarc'h, portant leurs armes pour le service du Roy et hantant quelque foys la maison du sieur de Kergoumarc'h, il y voioict et remarquoict les mesmes garnitures et especzes de meubles quil avoict veu audict chatteau de Coatfrecq tant vaiselles dargent, tapisseries, que couvertures de litz, excepté touteffoys les boissaiges de lict. 

Sur lonziesme article dict avoir esté quelques foys avant les troubles au manoir de Guermorvan où ledict seigneur de Kergoumarc'h faisoict la plus ordinaire résidance et ne luy souvient dy avoir veu que deux chambres tapissé avecque les litz garnys de soye et ne savoict les commodittés quil y avoict en maisons de Kergoumarc'h et Keruhel pour ny avoir esté avant les troubles. 

Sur le douziesme article dict avoir ouy dire nottoirement que pour faire lacquest de la seigneurie de Belisle, le seigneur de Kergoumarc'h emprunta nombre des dettes de plusieurs personnes et depuis a aussy emprunté pour le payement de sa rançon estant prisonnier de guerre à Châtillon et lors emprunta des deniers du seigneur de Kerozern et de sire Annet Hervé pour fournir à sadicte ranczon et le saict par lavoir entendu par lesdicts seigneurs de Kerozern et Hervé. 

Sur le traiziesme article dict que ledict chatteau de Coatfrecq estoict en bonne réparation lors que ledict seigneur de Kergoumarc'h y entra, lequel y fict faire le parapet quil disoict lui revenir par marche faicte à environ vingt-cinq ou trante escuz ne saict sy le seigneur de Rochglas, fermier, bailla largent ou non et que les paysantz dalenthour estoint contrainct par corvée de curer la douffue et aultres réparations allenthour dudict chatteau duquel la salle basse servoict descurye et que lors que le seigneur de Goazbriant entra en ladicte place, le boys de haulte fustaye estoint pour la plus part abattus et le colombier et mettairye démolitz et ruinez et des arbres que ledict deffandeur trouva abattus. Il fict réparer et doubler la salle basse et aultres endroictz dudict chatteau et ne fuct durant son séjour faict aulchun desmolition ny ruine entour ladicte place. 

Sur le quinziesme article dict avoir notoirement entendu que ledict sieur de Kergoumarc'h a faict ouvrir quelques coffres randuz à Guingamp par ledict seigneur de Goazbriant ne saict si ledict seigneur de Kergoumarc'h en emporta ce qui estoict dedans ou non. 

Sur le dix-huitiesme article dict avoir entendu que le seigneur de Kergoumarc'h apprès la reprinse du chatteau de Coatfrecq sur le seigneur de la Fontenelle, y mist des gentz de sa garnison, qui se rindrent jusques à la démolittion de ladicte place et quil y avoict au préalable retiré et faict randre audict Guingamp tout les meubles, canons et munitions qui y estoint et depuis ledict temps a vu remarqué lesdicts canons audict Guingamp et estant lors de ladicte reprinse et dernier siège de Coatfrecq absant en la ville de Rennes, ledict déposant a depuis son retour recouvert les lettres, obligations et aultres garantz quil avoict en ladicte place de Coatfrecq par les mains de monsieur Jacques Caupsion, secrétaire dudict sieur de Kergoumarc'h qui luy délivrant lesdictes lettres que syl luy est resté quelque aultre chosse, quil les eust trouvé chez ledict sieur de Kergoumarc'h où avoient esté renduz touttes les lettres et garantz qui estoint audict Coatfrecq. Et est tout ce quil dict savoir quil affirme contenir véritté. Et enquis sur les interrogatz dudict seigneur de Kergoumarc'h, dict estre venu porter son record de véritté en conséquance de monitoyres, ce touschant publiés en sa paroisse. Et interrogé syl est parant ni allyé audict sieur de Goazbriant, dict que la mère dudict sieur deffandeur et le déposant, portent même surnom, et quil y a plus de deux centz ans que ses prédécesseurs sont sortis jouveigneurs de la maison de Kergrech, dont est héritière la mère dudict deffandeur, et ne peuvent aujourdhuy cotter les degrés de leurs consaguinettes. Et est son record, ainsin signé, P. de Kergrech.

Noble homme Estienne Bisonnet, seigneur de la Planpe, demeurant a présant en la ville de Saint-Brieuc, aaigé denviron trante ans, thesmoin faict jurer par serment dire véritté. Dépose que incontinant apprès la réduction de la ville de Guingamp en loboissance du Roy, le déposant estant ensaigne du capitaine, compte soubz la charge du seigneur de Kergoumarch, sest tousiours tenu en ladicte ville. 

Sur le dix-huictiesme article dict que comme lun des manbres de ladicte compaignye, il assista au dernier siège et prinse du chatteau de Coatfrecq que firent les seigneurs de Sourdras, baron de Moullas et aultres. Le déposant fuct, commandé par ledict seigneur de Kergoumarc'h, antra avecque environ trante hommes en ladicte place et icelle garder et conserver jusques à ce que ladicte place eust esté démoliy et que un nommé Cauption, secrettaire dudict demandeur, estoict en ladicte place, pour donner ordre à retirer les meubles et iceulx faire transporter hors et y avoir vu quelques pieczes de canons dans ladicte place et que quelques pieczes de fer furent gettés lors de la démoliction de ladicte place en la douffue et vid quelques damoyselles et hahittans dudict Lannioun emporter quelques coettes et aultres hardes quilz avoient comme estant réfugiés en ladicte place. Et est tout ce quil a congu estant au long. Enquis sur les articles dudict deffandeur et enquis sur les interrogatz dudict seigneur de Kergoumarc'h dict nestre parant ni debteur audict seigneur de Goazbriant, et estre venu dire son record de véritté à raison de l'inthimation luy faicte et compulsaire décerné contre luy et dict ne saict signer. 

Damoyselle 0lluier Kererien, compaigne espouse de noble homme Gilles Juhel, sieur de Roger, demeurant en la ville de Guingamp, aaigée denviron quarante-cinq ans, thesmoing faict jurer dire véritté. Dépose que du temps que la dame de Liscoët estoict logée chez elle, lon y fict randre quattre coffres à bahutz, quon disoict appartenir au seigneur de Goazbriant, lesquelz, coffres, demeurent en la salle basse de la maison et estoient fermés à  cleff et incontinant sy trouva le seigneur de Kergoumarc'h assisté de quelques personnaiges quelle ne peult nommer pour nen avoir la souvenance que fict faire ouverture recelle desdicts coffres en présance des juges roiaulx de Saint-Brieuc comme mieulx lui semble et vid la déposante dans lun desdicts coffres quelques accoustremens de soye à usaige de famme et ne print garde ce quil y avoict dans les aultres coffres ne sy on tira rien. Diceulx lesquelz coffres appris avoir esté fouillés furent reffermés et portés dans les chambres de ladicte dame de Liscouët, et quelque temps apprès elle vid un nommé Le Carbout, domestique dudict seigneur de Goazbriant, qui vind quérir lesdicts coffres auquel ilz furent délivrés. Et a veu comme estant demeurante au voisine dudict seigneur de Kergoumarc'h, randre en la maison dicelle nombre des meubles ne scaict touttefoys dou ilz venoient et est tout ce quelle dict scavoir et est son record ne scaict signer.

Jan-Guillaume Marchant, demeurant en la ville de Guingamp, aaigé denviron quarante-huit ans, thesmoin jure dire véritté. Dépose quil y a plus de trante ans quil est demeurant dordinaire, en la ville de Guingamp et estre mémoratiff que le seigneur de Kergoumarc'h, apprès la prinse et réduction dicelle en loboissance du Roy y fuct estably gouverneur et salla loger au logeix du seigneur Lalour Kerlan venant du chatteau de Coatfrecq où il sestoict tenu quelque temps auparavant et dict avoir veu incontinant apprès larivée dudict seigneur de Kergoumarc'h audict Guingamp faire randre et descharger en son logeix nombre des charettes de meubles de touttes sortes comme couettes et aultres hardes et mesmes quelques coffres à bahutz. Dict oultre que incontinant apprès la prinse dudict Coatfrecq, faicte sur le seigneur de la Fontenelle, il vid ledict seigneur de Kergoumarc'h faire randre audict Guingamp en son logeix nombre des canons et munitions qui estoient audict Coatfrecq dans des charettes et est tout ce quil dict scavoir estant au long enquis sur lesdicts articles et est venu porter son record de véritté à cause des monittoires qui ont esté publiés ce touschant en cette ville, et ne saict signer. 

Du dix-neuffiesme mai, mil cinq centz quatre-vingt-dix-huict, en la ville de Lentreguier, escuyer Yves de Launay, sieur de Keruhelva, demeurant en la paroisse de Ploubihan (aujourd'hui Pleubian), aaigé denviron trante-quatre ans, thesmoin faict jurer. Dépose que au moys de juign mil cinq centz quatre-vingtz-dix il alla trouver au chatteau de Coatfrecq le seigneur de Lesquiel qui y estoict réfugié et y demeura cinq moys pandant lequel temps le seigneur de Kergoumarc'h demeuroict et commandoict en ladicte place. 

Sur le Premier article dict quil nestoict audict Coatfreeq lors que ledict seigneur de Kergoumarc'h départist pour aller à Guingamp pour y estre gouverneur. Bien à ouy dire par le commun bruict que incontinant apprès la ledict seigneur de Kergoumarc'h estoict introduict audict gouvernement il fict retirer dudict chatteau de Coatfrecq le plus beau et précieulx de ses meubles pour les randre audict Guingamp et le surplus de ce quil y laissa fuct baillé par invantaire au seigneur de Kerahel que ledict seigneur de Kergoumarc'h y laissa pour commander et garder la place avecque douze soldartz. 

Sur le second, troiziesme et quatriesme article dict avoir ouy dire que ledict seigneur de Goazbriant fuct introduict en ladicte place par ledict sieur de Kerahel. 

Sur le cinquiesme article dict avoir ouy dire que ladicte place nestante commodément garnye pour le logement des soldartz ledict seigneur de Goazbriant y fict randre nombre des meubles ne saict la quantitté ny doù il les faisoict apporter. 

Sur le sixiesme article dict avoir ouy dire durant que ledict seigneur de Goazbriant, estoict audict, Coatfrecq, la dame de Kergoumarc'h y alla pour quérir ses meubles et emporta entre aultres deux coffres de bahutz. 

Sur le huictiesme article dict avoir quelque foys hanté la maison dudict seigneur de Kergoumarc'h en ladicte. ville de Guingamp et y a regconu et remarqué quelques garnittures de lilz, tapisseries et aultres meubles comme robes de soye de ladicte dame de Kergoumarc'h quil avoict veu de précédant temps audict Coatfrecq et mesme deux canons de fonte verte abattus qui avoient esté prince en un barque espaignolle et rendue audict Coatfrecq par ledict seigneur de Kergoumarc'h.

Sur le dixiesme article dict avoir esté quelque foys en la chambre du sieur de Laroche Jagu audict Coatfrecq et y avoir veu un litz garny de courtine de soy. Dict oultre quil y avoict nombre des gentilzhomnies réfugiés et aultres en ladicte place qui avoient faict randre et aporter de leurs maisons des lictz, coettes et aultres utancilles de mesnaige et entre aultres estoient les seigneur de Kerozern, Kervanane, Kersach, Lesquille, Annet, Hervé et nombre daultres. 

Sur le traiziesme et quatorziesme article dict que du commancement que ledict seigneur de Kergoumarc'h entra audict Coatfrecq il estoict décorré de boys de haulte futtaye, de mettairye et colombier. Quelles choses estoient ruinés et démollis avant que ledict seigneur de Goazbriant y entra, lequel chatteau estoict lors que ledict seigneur de Kergoumarc'h y entra en bonne réparation de couverture et a veu ledict déposant les paisans dallenthour travailler pour curer les douffues par corvées et que la salle basse servoict descurye. 

Sur le dix-huictiesme article dict avoir assisté à la dernière prinse du chatteau et que avant quil fuct brullé ledict seigneur de Kergoumarch fict retirer hors de ladicte place des meubles et munitions quil y avoict pour les rendre audict Guimgamp. Et enquis sur les interrogatz dudict seigneur de Kergoumarc'h a dict nestre parant ni allyé audict sieur de Goazbriant ny aussy son debteur et estre venu dire son record de véritté en justice à cause des monittoires qui ont esté publiés. Ce touschant ainsy signé Y. de Launay. 

Escuyer Pierre de Richou, sieur de Pontlasen, demeurant en la paroisse de Plébihan (aujourd'hui Pleubian), aaigé denviron trante-quatre ans, thesmoin faict jurer. Dépose que environ un demy an apprès que le seigneur de Kergoumarc'h entra au chatteau de Coatfrecq, le déposant lalla trouver pour porter les armes soubtz sa conduicte pour le service du Roy. 

Sur le premier article dict quil nestoict audict Coatfrecq lorsque ledict sieur de Kergoumarc'h sortist pour aller à Guingamp, bien à ouy dire dun comun bruict et notoire quil fict transporter et randre audict Guingamp le plus beau et précieulx des meubles quil avoict audict Coatfrecq où il laissa le sieur de Kerahel commander avecque certain nombre des soldartz auquel il a ouy dire que les meubles que le seigneur de Kergoumarc'h y laissa furent baillés par inventaire. 

Sur le huictiesme article dict avoir assisté ledict seigneur de Kergoumarc'h à Guingamp comme estant lun de ses chevaulx légers, et avoir veu et remarquer en son logeix quelques meubles de ceulx qui estoint audict Coatfrecq. 

Sur le quatorziesme article dict que du temps dudict seigneur de Kergoumarc'h la salle basse dudict chatteau servoict descurye. Et tout ce quil dict savoir quil affirme contenir véritté. Et enquis sur les interrogatz dudict demandeur dict nestre à sa savance, parant ni allyé audict seigneur de Goazbriant, et est venu dire son record de véritté à cause des monittoires qui ont esté publiés. Ce touschant ainsy signé, P; Durechou. 

Escuyer Charles Le Lagadeq, sieur de Lesquily, demeurant en la maison de Kervéguen, paroisse de Pleumeur-Gaultier (aujourd'hui Pleumeur-Gautier), aaigé de trante-cinq ans, thesmoign faict jurer par serment dire véritté. Dépose que quelques temps apprès le rethour du seigneur de Kergoumarc'h de la prinson de Chatillon le déposant lalla trouver au chatteau de Coatfrecq où il commandoict pour porter les armes soubz la conduicte pour le service du Roy et y demeura environ deux moys passé, du quel temps se vint tenir audict lieu Kervéguen sans avoir depuis faict aulchune résidance ni beaucoup hanté ledict chatteau où il voyoict les chambres asés bien parées et garnyes de meubles ne saict à qui ilz appartenoient, et quil y avoict lors plusieurs gentilzommes réfugiés audict chatteau qui avoient leurs chambres à part.

Sur le premier article dict ne savoir sy ledict seigneur de Kergoumarc'h fict emporter aulchuns meubles par ce quil nestoict présant lors de son département pour aller à Guingamp. Bien est savance quil y laissa pour commander en son absance le sieur de Kerahel.

Sur le huictiesme article dict quil ne luy souvient davoir veu les mesmes meubles audict logeix dudict seigneur de Kergoumarc'h à Guingamp quil y avoict audict Coatfrecq. 

Sur le traiziesme et quatorziesme article dit que on commancoict à couper ladicte place, lors que le déposant y entra en la diligence dudict sieur de Kergoumarc'h, ne saict aux fraitz de qui. Bien dict avoir veu quelques réparations faictz comme machecoulis et parapelz, du temps dudict sieur de Kergoumarc'h, ne saict à quel aprix ny qui les paioict. Oultre dict avoir veu environ trante paysantz curer les douffues, lesquelz ledict sieur de Kergoumarc'h défroioict de bouche, ne saict silz receuvoient sallairez ou non. Aussy dict avoir veu la salle basse servir descurye. Et est tout ce quil peult déposer sur les articles dudict deffandeur et enquis sur les interrogatz dudict sieur de Kergoumarc'h, a dict nestre à sa savance, parant audict seigneur de Goazbriant. Bien est vray quil est parant audict seigneur de Kergoumarc'h, et est venu dire son record de véritté à cause des monittoires quil a ouy avoir esté publiés ce touschant, ainsin signé : Charles Le Lagadec.

Noble homme Prigent Cristien, sieur de La Macze, demeurant aprésant en la ville de Leutreiguier, aaigé denviron vingt-sept ans, thesmoin fait jurer. Dépose avoir hanté et fréquanté le chasteau de Coatfrecq, tant du temps dudict seigneur de Kergoumarch que du seigneur de Kerahel, et estoict lors le déposant de la garnison de La Roche-Jagu et y a veu les chambres assés bien parées et garnies des meubles, ne saict sy ledict seigneur de Kergoumarch fict emporter aulchuns meubles à Guingamp parce quil ny nestoict lors de son département. 

Sur le neuffiesme et dixiesme article dict quil luy semble plus que aultrement que ledict seigneur de Kergoumarch occupoict quatre chambres audict Chasteau et quil y avoict nombre des gentilzhommes en aultres chambres lesquelz y avoict faict randre quelque commodité pour le mesnaige et est mémoratiff davoir veu la chambre ou couchoict le seigneur de Grandboys garnies de courtines et rideaulx de soye et est tout ce quil a cogneu et peult dire estant au long interrogé sur les articles dudict deffandeur et sur les interrogatz dudict seigneur de Kergoumarch, dict nestre à sa savance, parant, allyé ny debteur audict deffandeur et est venu dire son record de véritté à cause des monittoires quil a entendu avoir esté publyés ce touschant et a signé. Ainsy signé, Prigent Cristien. 

Damoyselle Margueritte Carell, fille de Jean Carell, demeurant en la ville de Leutreguier, aaigé denviron vingt-cinq ans, thesmoin faict jurer dire véritté. Dépose que comme elle estoict avecq madamoiselle de Kerahel, elle fuct au chasteau de Coatfrecq, où elle demeura près dun an, et de lorsquelle y entra, le sire de Kergoumarch sestoict déjà retiré à Guingamp. Et interrogée sur le premier article, dict ne savoir sy le sieur de Kergoumarch fit emporter aulchuns meubles à Guingamp parce quelle nestoict ladicte place, bien dict que des meubles qui estaient audict Coatfrecq du temps du seigneur de Kerahel nestoient pas de pris, et sassure quil ny avoict aulchuns litz garnis de courtines de soye anis qui ny avoict aulchunes chambres garnye de courtines que celle dudict seigneur de Kerahel et estoient les dictes courtines de sarge et ny avoict assis des charlitz ny couettes pour le logement des soldartz et à ceste occasion convenoict à la plus part des soldartz coucher sur des pailaczes. 

Sur le second et troysiesme article dict avoir veu souvant ledict seigneur de Kerahel aller au manoir de Kergrech trouver ledict, seigneur de Goazbriant, ne saict le subist de leur conférance. 

Sur le cinquiesme article dict avoir veu nombre de charettes des meubles que ledict seigneur de Goazbriant fict randre audict Coatfreq avant quil y entra et y avoict forces couettes et aultres meubles de toutes sortes et utancilles de mesnaige et par ce moyen furent les chambres bien garnyes, tant pour le logement dudict seigneur de Goazbriant que la commoditté des soldartz. 

Sur le sixiesme article dict que la cleff dun petit cabinet de madame dé Kergoumarch audict chasteau estoict avecque ladicte dame de Kerahel et que la déposante et aultres y entroient quand bon leur sembloict, auquel cabinet ny avoict que quelques faillis tableaux et navoir jamais entendu durant son séjour en ladicte place que ladicte dame heust heu aultres meubles ains que lon disoict quelle les avoict faict transporter audict Guingamp.

Sur le neuffiesme article dict que les meubles qui estoient du temps dudict seigneur de Kerahel en ladicte place, tant couettes, lingeries, veselles destain et générallement daultres, les utancilles de mesnaige estoient de petitte valleur et ne vid audict chasteau aulchuns vaiselles dargent durant quelle demeura et hantoict ordinairement par touttes les chambres et endroictz audict chasteau avecque ladicte dame de Kerahel.

Sur le dix-huictiesme article dict que apprès la dernière prinse dudict chasteau la déposante estante au manoir de Kergrist alla audict Coatfrecq avecque madamoyselle de Boissilleau, tante dudict seigneur de Kerahel, pour quérir et retirer dicelle les meubles qui apartenoict audict seigneur de Kerahel et lors estoict audict Coatfrecq un nommé Laplante avecque nombre de soldartz de la garnison de Guingamp et emportèrent dudict chasteau un coffre de boye plain des contras et garantz quelles firent randre audict manoir de Kergrist et est tout ce quelle peult déposer estant au long interrogé sur lesdicts articles fois quelle dict que du temps quelle y demeuroict quil y avoict nombre des gentilzhommes réfugiés en ladicte place, qui y avoient faict randre quelques commodittés pour le logement de leurs maisons, et luy souvenant entres aultres dudict sieur Duplonglas et Reumen (?), Villerogon et aultres. Et enquis sur les interrogatz dudict demandeur, dict nest à sa savance, parante ny allyé audictes parties et est venu dire son record de véritté à causse des monitoires lui ont esté publiés. Ce touschant et ne saict signer. 

Maistre Robert Cavallen, sergent royal, général et darmes, en Bretaigne, de la paroisse de Pleubihan (aujourd'hui Pleubian), aaigé denviron trante-deux ans, faict jurer. Dépose avoir hanté la place de Coatfrecq quelquefoys durant que le seigneur de Kergoumarch demeuroict et le subist de son premier voiaige fuct pour accorder avecque luy pour ses paroissiens et depuis a demeuré audict Coatfrecq portant les armes soubz ledict seigneur de Kergoumarch et voyoict les chambres dudict chasteau honnestement garnis ne saict à qui appartenoict les meubles et que, au mesme temps y avoict nombre de gentilzhommes refugiés en ladicte place entre aultres le présent seigneur de Kernavanec, Kerozern, le seigneur de Lesmais, Lesquiell, Kerverret lesquelz avoient leurs chambres à part garnies des meubles pour leur logementz et commodité et ne saict à qui ilz appartenoient et a esté du depuis audict chasteau lors que le seigneur de Kerahel y commandoict et ne voyoict les chambres sy bien parées et accommodées quelles estaient auparavant ne saict sy ledict seigneur de Kergoumarch fict transporter ses meubles dehors ou non et est tout ce quil dict savoir quil est venu déposer à cause des monitoires quil a ouy avoir esté publiés et a signé : Rob Cavellen. 

Du vingtiesme may mil cinq centz quatre-vingtz-dix-huict audict Lannioun (aujourd'hui Lannion), Jan Le Meur, procureur syndicq de la paroisse de Plouber (aujourd'hui Ploubezre), aaigé de quarante-troys ans. Dépose avoir esté avant les troubles au chasteau de Coatfrecq sittué en ladicte paroisse et estoict oudict temps décoré de boye de haulte fustaye mettairye et colombier et est mémoratiff que au commancement de ses troubles ledict seigneur de Kergoumarch entra audict chasteau pour y tenir garnison pour le service du Roy et lors sy retirèrent plusieurs gentilzhommes des paroisses voisins pour se conserver et entre aultres estoient les seigneurs de Kerozern, Kerveziou, Kervanane et le seigneur de Hellen. 

Sur le traiziesme article dict que ledict chasteau estoict en bonne et de leur réparation et logeable que le sieur de Rochglas fermier estoict tenu de lentretenir en bonne réparation. Par sa ferme et hantoict durant ledict temps souvante foys ledict chasteau pour quelques affaires qu'il avoict avec le seigneur de Kerviziou, commissaire de la paroisse et y a veu les paisantz de lentour venir par corvées currer les douffues et avoir veu la salle basse dudict lieu servir descurye et dict quapprès la prinse de Guingamp le seigneur de Kergoumarch y alla demeurer laisant audict Coatfrecq le seigneur de Kerahel avecque quelque nombre de soldartz, auquel lieu madame de Kergoumarch demeura quelque temps apprès pour donner ordre faire charoier audict Guingamp ses meubles dudict Coatfrecq et luy souvient que pour cest effet ladicte paroisse de Plouber fournist troys charettes attellées ne peuls avoir de souvenance que par qui ils estoient conduictz. Bien dict estre commun et notoire quilz furent employés pour charoier des meubles dudict Coatfrecq audict Guingamp. 

Sur le dix-huictiesme article dict avoir ouy dire que les paroissiens de Ploumilliau fournirent six charrettes attelées audict seigneur de Kergoumarch pour rendre ses meubles, canons et munitions dudict Coatfrecq en ladicte ville de Guingamp avant la démollition de ladicte place, aquel charoy ne peurent les paroissiens de Plouber contribuer par ce quilz estoient en fuitte et ruine à cause du siège et est son record quil affirme contenir véritté qu'il est venu porter à cause des monitoires qui ont esté publiés en sa paroisse. Dict oultre que lors que ledict seigneur de Goazbriant entra en ladicte place lesdicts boys de haulte futaye, colombier et mettairye estoient desmollis et ruinés. Ainsy signé : J. Meur.

Escuyer Allain de Kergris, sieur de Kerdudoal, demeurant en la paroisse de Ploumilliau, aaigé de trante-quatre ans, thesmoin fait jurer. Dépose avoir esté gendarme de la compaignye du sieur de Kergoumarch au commancement quil entra au chasteau de Coatfrecq et lors estoict ladicte place décorée de boys de haulte fustaye, mettairie colombier enclos de jardin et verger, et ledict chasteau estoict commodément logeableu et en réparation de couverture, lequel seigneur de Kergoumarc'h, lors de son entrée, fict faire des machecoulis et parapellz, qui ne pouvoict revenir à grand prix ; ne saict qui paya les deniers et y voyoict les paisantz venir travailler alenthour dudict chasteau, à corvées. Dict oultre que la salle basse dicelle servoict descurye et estoict tellement endommaigée quil falloict couper du boys pour la réparer.

Sur le premier article dict avoir ouy dire comunément que madame de Kergoumarch qui estoict demeurée audict Coatfrecq apprès le département du seigneur de Kergoumarch son mary donna ordre pour se retirer dudict Coatfrecq et randre à Guingamp ses meubles et avoir entendu que les paroissiens de Plouber fournirent pour ce subist quelques charettes ne saict quelle especze de meubles ladicte dame fict emporter et saict que le seigneur de Kerahel y fuct laisser commander avecque quelque nombre de soldartz lequel comme estant son cousin germain allyé le déposant assista en ladicte place et que durant le séjour dudict sieur de Kerahel en ladicte place il ny avoict que fort peu de meubles de sorte que les soldartz navoient aulchune commoditté des lictz et leur convenoict se coucher sur des paillasses. 

Sur le second article dict que ledict sieur de Kerahel se déplaisoict fort en ladicte place pour les incommodittés quil y avoict et rechercha le sieur de Goazbriant qui estoict lors au manoir de Kergrech pour venir demeurer en ladicte place. 

Sur le quatriesme article dict que quelque temps avant que ledict sieur de Goazbriant entra en ladicte place il y vict ledict sieur du Rest, lieutenant de Lannioun ne saict pour quel subist bien dict avoir entendu que oudict temps ledict seigneur de Kerahel fict faire inventaire des meubles qui pouvoient estre audict lieu. 

Sur le cinquiezme article dict que pareillement il demeura audict Coatfrecq du temps dudict seigneur de Goazbriant incontinant lentrée duquel le déposant vid nombre des charettes des meubles de touttes sortes que ledict seigneur de Goazbriant faisoict apporter dudict lieu de Kergrech et daultres endroictz pour servir à ameubler ledict chasteau. 

Sur le sixiesme article dict estre mémoratiff davoir veu la dame de Kergoumarch arriver en ladicte place et que lon disoict quelle estoict venu pour retirer ses meubles dudict lieu, laquelle estoict accompaigné de nombre de gentilzhommes et de messieurs de la justice. Et fuct icelle dame par touttes les chambres dudict chasteau visitter et faire estat de ses meubles ne faict quelles especzes elle emporta. Bien et certain et mémoratiff davoir ouy lors ledict seigneur de Kerahel son cousin faire demande de ladicte dame de Kergoumarch de la somme de cinq centz escuz ne voullant consantir le transporter des dicts meubles sans estre payé de ladicte somme. 

Sur le septiesme article dict que lors dudict voiaige oudict chasteau ladicte dame y soupa avecque le seigneur et dame de Goazbriant en toutte amittyé et ne louyd jamais se plaindre davoir trouvé deffault de ses meubles et départirent ensemble en grande démonstration damittyé. 

Sur le huictiesme article dict quil a quelque foys hanté la maison du seigneur de Kergoumarch à Guingamp et y a remarqué quelques meubles quil avoict veu oudict Coatfrecq et entre aultres les mesmes robbes de soye et parures que ladicte dame de Kergoumarch soulloict porter audict Coatfrecq. 

Sur le neuffiesme article dict que le seigneur de Kergoumarch nocupoict audict Coatfrecq luy et sa famille que quatre chambres garnyes ases commodément et en la chambre où ilz couchaient y avoict deux litz et une couchette garnye des courtines et pavillons de serge avecque garniture de soye et en la chambre où couchoict le seigneur de Grandboys y avoict un lict garnye des courtines de taffetas avecque un demy tour de lict de vellours rouge et ne luy souvient dy avoir veu meubles de grande valleur ny aulchuns utancille (ustensiles) de mesnaige esdites chambres qui eussent peu monter à grand prix, dict oultre quil y avoict nombre de gentilzhommes réfugiés audict chasteau comme les seigneurs de Lesmaës, Kerozern, Pontglas, Lesmoal et aultres lesquelz avoient leurs chambres à part et faisaient randre leurs meubles et commodittés nécessaires. 

Sur le dix-septiesme article dict que apprès la surprinse de ladicte place faict par seigneur de la Fontenelle ledict seigneur de Kergoumarch y ayant mins le siège ledict déposant louyd se plaindre regrettant le nombre de canons et munitions quil avoient en ladicte place et ne luy souvient de lavoir ouy dire quil y eust souffert aultres pertes. 

Sur le dix-huictiesme article dit avoir assisté à la dernière prinse dudict chasteau et vid ledict seigneur de Kergoumarch y meptre capitaine La Plante avecque quelques soldartz pour y demeurer jusques à la démolition et a entendu notoirement que les meubles et munitions dudict chasteau ont esté randuz au logiex dudict seigneur de Kergoumarch à Guingamp et que les paroissiens de Ploumilliau charoièrent audict Guingamp nombre desdicts meubles. Et est sa déposition quil affirme contenir véritté estant au long interrogé sur lesdicts articles. Et enquis sur les interrogatz dudict seigneur de Kergoumarch dict nest parant allyé ny debteur audict seigneur de Goazbriant à sa savance et a signé Allain de Kergrist. 

Noble homme Françoys Kergrist, sieur de Kervern, demeurant au treff de Keraudy, paroisse de Ploumilliau, aaigé denviran cinquante-cinq ans. Dépose que au commancement des troubles il se retira au chasteau de Coatfrecq pour sa conservation lors que le seigneur de Kergoumarch sy tenoict et estoict lors ladite décorrée de haulte fustaye, méttairye, colombier et enclos de jardin. 

Sur le premier article dict quaprès que ledict seigneur de Kergoumarch eust quitté ledict Coatfrecq pour aller demeurer à Guingamp, la dame de Kergoumarch fict la dilligence de faire retirer de ladicte place les meubles le plus beaulx et de plus grande valleur et vid troys charettes chargées desdicts meubles où il voyoict entre aultres, coffres à bahutz, couettes, courtines et garnitures de lict et aultres hardes quilz rendirent audict Guingamp, et demeura audict Coatfrecq le seigneur de Kerahel, avecque quelques soldartz pour la garde dicelle, et a entendu que le surplus des meubles resté et demeuré en ladicte place luy furent laissés par invantaire, et est mémoratiff que ledict chasteau estoict lors que le sieur de Kergoumarch y entra en bonne réparation de planches et couverture et ne vid faire aulchuns réparations fors seullement allentour des douffues que les paysans curèrent à corvées sans tenir aulchun payesment. 

Sur le quatriesme article dict que quelque temps avant que le seigneur de Goazbriant fuct introduict audict Coatfrecq par le seigneur de Kerahel lon fict invantaire des biens et munitions qui y estoient en présance de monseigneur le lieutenant de Lannioun et nombre de ladicte garnison, et, que les décorations de boye, mettairye et colombier dudict chasteau estoint démollies et ruinées avant que ledict seigneur de Goazbriant y entra, lequel pour sa commoditté et logement des soldartz fict randre et apporter audict Coatfrecq deux charettes de meubles et quelques charges de cheval du lieu de Kergrech et nombre daultres charettes daultres endroitz et que un nommé Pontcorff donnoict ordre audict charoy ce que ledict déposant dict savoir par avoir demeuré audict chasteau durant le temps que ledict seigneur de Goazbriant y demeura.

Sur le sixiesme article dict avoir entendu que la dame de Kergoumarch fuct audict chasteau pour visitter et faire estat de ses meubles et les debvoir retirer, ne saict ce quelle en emporta par ce quil estoict absant ledict jour. 

Sur le neuffiesme et dixiesme article dict que durant que le seigneur de Kergoumarch demeuroict audict Coatfrecq il entoict quelque foys les chambres quil occupoict qui estoient a ce quil lui semble en nombre de quatre qui estoient garnis de courtines de sarge et tour de litz garnys de broderye de soye et en la chambre ou couchoict le seigneur de Grandboys y avoict un lict garny et paré des garnitures de soye et ne remarquoict dans lesdictes chambres des meubles et utanciles de mesnaige trop somptueux ny de grande valleur et que audict temps y avoict nombre des gentilzommes reffugiés audict chasteau qui avoient les chambres à part garnies des meubles et commodittés quilz y avoient faict randre pour leur usaige entre aultres le seigneur de Kerozern, Kervanane, Kersach, Lesnoal et nombre daultres. 

Sur le douziesme article dict que le bruict est commun que le seigneur de Kergoumarch emprunta des deniers tant pour faire laquest de la terre de Belisle que pour le paiement de sa rançon au commancement de ses troubles. 

Sur le dix-sept et dix-huictiesme article dict avoir entendu par le sieur de Kergoumarch se plaignoict principallement de la perte des canons et munitions de guerre quil avoict audict Coatfrecq lors que le seigneur de la Fontenelle le surprind sans faire estat ny compte daultre perte et que apprès la dernière prinse dudict chasteau le déposant vid ledit seigneur de Kergoumarch y mettre capitaine La Plante pour conserver la place jusqu'à la démollition dicelle et a entendu notoirement que tous les meubles et canons que restoient audict chasteau furent charoiée et randuz au logeix dudict seigneur de Kergoumarch en la ville de Guingamp. Et est tout ce quil peult déposer estant enquis sur les articles dudict deffandeur, et interrogé sur les interrogatz dudict seigneur de Kergoumarch dict nestre parant ny allyé à sa savance audict sieur de Goazbriant et a signé : F. de Kergrist.

Maistre Gilles du Tertre, notaire de la paroisse de Piocaret (Plouaret) et y demeurant au Bouillenou, aaigé de cinquante cinq ans ou environ, thesmoign juré par son sermant dire veritté purge de Conseil, adverty des dangers de parjuritté, enquis sur les articles à luy présantés de la part du sieur de Goazbriant contre le sieur de Kergoumarch dict congnoistre lesdictz sieurs. Dépose sur le premier article avoir veu et estre certain que ledict sieur de Kergoumarch tint garnison au chasteau de Coatfrecq pour le service du Roy, pendant lequel temps plusieurs gentilzhommes du quartier sestoient retirés audict lieu de Coatfrecq et avoient fait randre leurs biens et commodités pour la scaritte de leurs personnes, et que lors ledict seigneur de Kergoumarch fist raser et abastre par terre la maison et appartenanzes de la mettairye dudict Coatfrecq qui estoient vis à vis à l'entrée dudict chasteau aussy fict coupper par pied le boys de haulte fustaye qu'il rabines et aultres boys de la décorancze dudict chasteau et raiser les fossés lonctemps auparavant que ledict seigneur de Goazbriant y mist le pied audict lieu et que bien tost apprès la prinse et réduction de la ville de Guingamp en lobeyssance du Roy ledict seigneur de Goazbriant alla se tenir audict lieu pour y commander et laissa audict Coatfrecq le seigneur de Kerahel auquel il donna la charge pour y commander. 

Sur le second article dict avoir ouy dire nottoirement que ledict sieur de Kerahel alla apprès trouver ledict sieur de Goazbriant au manoir de Kergrech où il se tenoict pour lors pour lassurer de la place de Coatfrecq et mesme le prier dy aller pour commander par ce quil disoict ne pouvoir plus supporter les fraictz de ladicte garnison à raison que ledict, sieur de Kergoumarch ne voulloict retourner et ne voulloict luy randre les biens meubles que ledict seigneur de Kerhael avoict audict chasteau plustost que de invantoriser toulz les biens de ce qui estoient audict lieu ce quil fist par le lieutenant de la Court royalle deTréguier. 

Sur le troicziesme article dict que ledict sieur de Goazbriant alla sy tenir oudict chasteau et list randre pour sa commoditté grand nombre des biens et utancilles pour le service et usaige de son train. 

Sur le quatriesme article dict que les sieurs de Pontglas Villerogon Lahaye et aultres gentilzhommes sestoient retirer en ladicte place pour la seuretté de leurs personnes et avoient faict randre de leurs biens pour leur commoditté et dict estre certain par ce quil hantoict ledict lieu pour la sollicitation de plusieurs affaires avecque ledict feu sieur de Pontglas pour diverses personnes. 

Sur le saiziesme article dict que ledict sieur de Kergoumarch ne tenoict pour luy et ses domesticques audict chasteau que deulx ou troys chambres. 

Sur les aultres articles dict avoir ouy dire de plusieurs personnes mesmes par les sesviteurs du sieur de Lesquiel, quil avoict du bien audict chasteau, que pendant quil les transportoict dudict lieu ledict seigneur de Kergoumarch faisoict, transporter les siens et les randre ailleurs et à ce quon disoict il ne laissa rien du sien audict lieu et que en un mesme temps et jours lesdits seigneurs de Kergoumarch et de Lesquiel firent transporter les biens dudict chasteau et est son record de lui soubz signé la fulmination de l'admonitoire sulmice de la part dudict seigneur de Goazbriant. Ainsy signé : Gil Dutertre. 

Maistre Yves Larcher, prestre de la paroisse de Plusellempre (aujourd'hui Plouzélambre) et y demeurant, aaigé de cinquante-deulx ans, thesmoign juré par ses saincts ordres dire véritié, adverty des dangers et périlz de parjuritté, enquis sur les articles à luy communicqués de la part du seigneur de Goazbriant contre le seigneur de Kergoumarch. Dépose congnoistre les parties dict sur le premier article quil vid ledict seigneur de Kergoumar se tenir au lieu et chasteau de Coatfrecq et tenir garnison en la place pour le service du Roy et bien peu de temps apprès la prinse de la ville de Guingamp il y alla se tenir et laissa en ladicte place de Coatfreeq le sieur de Kerhael pour y commander lequel ayant esté en ladicte place charge quelque temps voyant que ledict sieur de Kergoumarch ne luy donnoict moigne pour entretenir les soldatz de la garnison dudict chasteau, il le voulloict remettre entre les mains et commandement dudict sieur de Kergoumarch. 

Sur le second article dict avoir ouy dire que ledict seigneur alla trouver ledict sieur de Goazbriant en la maison de Kergrech appartenante à mademoiselle sa mère où il se tenoict pour lors pour le prier de venir tenir et commander en ladicte place et vid en icelle ledict sieur de Goazbriant se tenir et est certain quil fist randre grand nombre des biens meubles et commodittés audict lieu de Coatfrecq tant dudict lieu de Kergrech que dailleurs par ce quil ny avoict que bien peu de commodittés lictz et couettes pour y se loger. 

Dict sur le saiziesme article que lors que ledict sieur de Kergoumarch et ses domestiques se tenoient audict lieu de Coatfrecq il ne pouvoict occupper que deulx ou trois chambres pour le plus, lesquelles nestoient que bien peu enrichies de tapicerrye ny daultres utencilles et dict le savoir par ce quil hantoict ordinairement pour les affaires et service du seigneur de Lesquiel lequel se tenoict et plussieurs aultres gentilzhommes les sieurs de Kersac, consailler, Lesmais, Kerofferen et aultres lesquelz sestaient retirés en ladite place pour la seuretté de leurs personnes et chanicun avoict envoié avecque luy sa commoditté, pour y se loger tant des lictz que daultres commodittés requises.

Dict oultre sur les aultres articles que auparravant que ledict sieur de Goazbriant mist jamais le pied en ladicte place pour y commander que ledict sieur de Kergoumarch avoir faict rasser et démolyr la mepterye qui estoict vis-à-vis dudict chasteau avecque toutes ses appartenanzes sans jamais laisser pierre sur pierre. 

Dict oultre estre certain que ledict sieur de Kergoumarch list coupper les rabines et boys de haulte fustaye de la décorrance dudict chasteau et fist abastre et rasser les fossés des parcz adjacentz ledict chasteau et en dispossa à sa vollonté. 

Dépose aussy que lors que ledict depposant faisoict ruiner les biens dudict sieur de Lesquiel dudict chasteau, ledict sieur de Kergoumarch faisoict aussy transporter les siens audict Guingamp là où il commandoict pour lors et luy sembla plus que aultrement quil ne laissa icelles que bien peu de bien. Et est son record quil dict contenir véritté et estre venu exprès pour descharger le faict de sa savance sur la sulmination du monitoire sulminé en l'église Plusellempre. Ainsy signé Yves Larcher.

Du samedy vingt-deuxiesme may mil cinq centz quatre-vingt-dix-huict, à Morlaix, devant monseigneur du Rest, Escuyer Erasme Menou, sieur de Kerarmet, demeurant en la paroisse de Saint-Michel, en Grève, aaigé denviron soixante-douze ans. Dépose que du temps quun nummé Boisuignon, lieutenant de capitaine Toullot, sen estoict saisy du lieu du Roscoët qui est en son voisine il se réfugie au chasteau de Coatfrecq où lors commandoict le seigneur de Kerahel avecque environ vingt-cinq soldartz et y demeura unviron un moys, pendant lequel temps il hantoict et fréquantoict ordinairement par les chambres dudict chasteau. qui estoient ameublées des charlitz sans aulchun parure excepté la chambre dudict seigneur de Kerahel qui estoict tandu de courtines avecque de tour de litz à broderye de soye. Dict aussy quil y avoict nombre des gentilzhommes reffugiés audict chasteau des environs qui faisoient randre de leurs maisons entre aultres y estoient les sieurs de Pontglas, Villeroyen, Le Leurven, Le Rest, Kersolles, Kervinou, Kergumarec et aultres et ouy lors nottoirement et par le comun bruict dire que apprès que le sieur de Kergoumarch quitta ledict chasteau pour aller commander en la ville de Guingamp, il donna ordre par le moyen de la dame de Kergoumarch, sa femme, qui demeura audict Coatfrecq environ quinze jours apprès son département de faire charoyer et randre audict Guingamp le plus beaux et précieux de ses meubles tant vaisselles dargent, tapisseries, couettes, leurs garantz et aultres meubles, aussy a entendu que les paroissiens de Plouber et Louargat fournirent quelques charettes pour transporter lesdicts meubles et le surplus desdicts meubles fuct délaissé par invantaire audict seigneur de Kerahel et ensemble les canons et munitions dudict chasteau. Lesquelz meubles invantorisés, ledict déposant dict avoir veu en la salle haulte dudict chasteau et en la chambre du appellé monsieur Charles qui le comprenoict en quelques charlitz et faillis meubles ne valantz la paine de les transporter excepté un ou deux coffres lesquelz ne saict ce quil y avoict. Dict oultre que pour le peu des meubles quil y avoict audict chasteau ledict seigneur de Kerahel se déplaisoict en ladicte garnison, laquelle il ne pouvoict entretenir voullant à toutte heure labandonner et deffaict a veu que quelque temps apprès remise ladicte place entre les mains dudict sieur de Goazbriant a entendu que ledict sieur de Goazbriant y fict randre nombre des charrettes de touttes sortes des manoirs de Kergrech et la Noue-Verte pour sa commoditté et logement des soldartz et que ladicte dame de Kergoumarch y vid a certain pour quérir et retirer le reste de ses meubles. 

Sur le dix-huictiesme article dict quil se trouva au dernier siège et à la démollition dudict chasteau de Coatfrecq et lors ledict déposant fuct commandé par ledict seigneur de Kergoumarch davertir les paroissiens de Ploumilliau de luy fournir six charettes attellées pour ayder à transporter les meubles et munitions dudict Coatfrecq à Guingamp, lesquelles charettes il vid charger de quelques canons et meubles prenantz la route de vers Guingamp. Et est sa déposition quil affirme contenir veritté quil est venu porter à cause des monittoires qui ont esté publiés ce touschant. Et interrogé sur les interrogatz dudict sieur de Kergoumarch dict nestre parant ny allyé audict deffandeur et est son record et a signé Eras. Menou.

Du douziesme juin mil cinq centz quatre-vingt-dix-huict, davant monsieur le lieutenant de Lanneur (aujourd'hui Lanmeur), en la ville de Morlaix. 

Françoys Le Bihan, laboureur de terre, demeurant à présant en la paroisse de Ploumilliau depuis troys ans aiant au précédamment tousiours demeuré en la paroisse de Plouber (aujourd'hui Ploubezre) dont il est natif, thesmoin jure dire véritté purge de conseil sollicitation et advertissement enquis. Dépose que estant prochain voisin de chasteau de Coatfrecq il y a hanté et avant et depuis les troubles ordinairement et dict que avant que monsieur de Kergoumarch y entra pour tenir garnison ledict chasteau estoict décorré de boys de haulte futaye, colombier et mettairye et en assès bonne réparation de couverture, dict quelques temps apprès ledict sieur de Kergoumarch fist contraindre par la justice le sieur de Rochglas, fermier, de luy mettre entre mains quelques deniers pour fournir au payement de quelques réparations quil fist allenthour dudict chasteau et dict que les paisantz dallenthour alloient à corvée curer la douffue et faire quelques fortifications allanthour de ladicte place et interrogé sur le premier article des faictz de monsieur de Goazbriant dict que lors que ledict sieur Kergoumarch sortict de Coatfrecq pou aller demeurer Guingamp, il est certain et mémoratiff que lon fict eune demande de charettes attellées au prosne de la grande messe de ladicte paroisse de Plouber pour ayder à transporter les meubles desdicts sieur et dame de Kergoumarch estante à certain jour de dimanche dentre la Pentecoste et le premier jour daougst au manoir de Kererne fict commandement audict déposant Vincent Prigent et Thomas Colonnec de se trouver le lundy ensuivant avecq eune charette attellée au chasteau de Coatfrecq ce quil fisrent et y estantz ladicte dame fict au déposant entrer dans sa chambre où sa gouvernante et ses damoyselles chargèrent un coffre de boys de ciprès de toutte espèce de meubles quelles prenoict tant de ladicte chambre que du cabinet de madame et remerquoict le déposant entre aultres chosses quelques vaisselles dargent et les pareures accoustrementz et joyaulx de ladicte dame et audessus lon mist dans ledict coffre à usaige de famme quelques robbes et lingeries pour achever à charger et combler ledict coffre lequel ledict déposant et les surnommés chargérent dans leurs charette ensemble avecq un pot de fer et le randirent en la ville de Guingamp par le commandemant de ladicte dame et luy délivrèrent audict Guingamp où elle estoict venu ledict jour le lundy ayant esté disner au manoir de Kereuzen. Dict oultre que en leur compaignie estoict unne aultre charette que ladicte paroisse de Plouber fournissoict qui estoict chargé dune botte de vin de canarye que lon avoict pareillement chargé audict Coatfrecq et furent deschargés et randuz à ladicte dame à Guingamp. Dict oultre que environ huict jours auparavant nombre de charettes, tant de ladicte paroisse que aultres paroisses circonvoissines avoient esté charoier pour lesdictz seigneur et dame de Kergoumarch des meubles de toutes sortes dudict Coatfrecq audict Guingamp et ne laissa ladicte dame de Kergoumarch audict Coatfrecq lors de son département que quelques vieulx charlitz et quelques lingeries et aultres meubles audict Coatfrecq quelle laissa en garde à Janne Nicollas sa servante. 

Sur le second, troisiesme et quatriesme article dict avoir quelquefoys frecquenté ledict chasteau durant que monsieur de Kerahel y commandoict lequel suivant le commun bruict se déplaissoict en ladicte place à faulte des moyens et commodittés pour soustenir les fraictz de ladicte garnison occassien quil oyoict dire notoirement que à raison que ledict seigneur de Kergoumarch avoict faict transporter lesdictz meubles de ladicte place partye des soldartz estoient contrainctz de coucher sur la plaillace et dict que le sieur de Goazbriant y entra quelque temps apprés et est certain que le boys, la mestairye, collombier estoict démollis et ruinés avant quil y entrast et est tout ce quil peult dire et déposer et estre venu dire son record tant à cause des monitoires publiés ce touschant en sa paroisse que inthimation à luy faicte de la part dudict seigneur de Goazbriant. Disant oultre que Guillaume Le Meur et Hervé Lesec furent entre aultres à aider à faire ledict charroy à Guingamp. Plus dict estre certain et mémoratiff que ledict jour quon luy dellivra ledict coffre à Coatfrecq ladicte dame de Kergoumarch fist un estat et inventaire de touz les meubles qu'elle y délaissa que fust escript par quelque une de ses demoyselle et luy semble plus que aultrement quil fust escript de la main de Mademoiselle de Lestancq, et luy souvient davoir veu invantoriser quelques estainctz, lingeries, potz et aultres hardes de mesnaige. Et a signé : F. Bihan. 

Guillaume Le Meur, laboureur de terre, demeurant en la paroisse de Plouber (aujourd'hui Ploubezre), aaigé de quarante ans ou environ, thesmoign jure dire veritté, purgé de conseil sollicittation et advertissement enquis. Dépose questant proche voisin du chasteau de Coatfrecq il a frecquenté ladicte place de tout temps, laquelle estoict avant la guerre décorré de boys de haulte fustaye, mestairye, coullombier et enclos de jardin et est mémoratilf davoir veu le seigneur de Kergoumarch tenir garnison audict chasteau pour le service du Roy et quelque temps apprès la ville de Guingamp estant réduicte en lobéissance de sa majesté ledict seigneur de Kergoumarch sy retira pour y commander comme gouverneur et audict temps luy souvient que lon fist, commandement aux paroissiens dudict Ploubezr de fournir quelques charrettes attelées au seigneur de Kergoumarch pour charroyer et transporter ses meubles dudict chasteau de Coatfrecq en la ville de Guingamp et entre aultres fuct randu audict déposant unne billette par feu Jean Le Roux Coatarel pour fournir une charette ; ce quil fist à l'aide de son frère Jan Le Meur et Hervé Lefezec, laquelle charette randue audict Coatfrecq fuct chargé d'une botte de vin despaigne que la dame de Kergoumarch leur dellivra ; laquelz charge de vin ilz randirent à Guingamp au logeix dudict seigneur de Kergoumarch ensemble avecque aultres charettes de meubles comme coffres et aultres que Françoys Le Bihan et Guillaume Prigent de ladicte paroisse chargèrent audict Coatfrecq et randirent à Guingamp. Dict oultre que huict auparavant plusieurs aultres de ladicte paroisse et aultres paroissiens avoient fourny charettes pour faire le transport des meubles dudict chasteau de Coatfrecq tant en la ville de Guingamp que ville de Lannion et noblesses circonvoisines de sorte que chaincun aiant esté crainct voiant que ledict seigneur de Kergoumarch sestoict retiré fict moyen de transporter les meubles dudict Coatfrecq demode quil ny demeura que bien peu de commoditté et est tout ce quil a cogneu et dépose aiant esté interrogé sur les articles du seigneur de Goazbriant et est venu porter son dict record tant en vertu des monitoires qui ont esté publiés ce touschant et inthimations à luy faictes et ne saict signer. 

Du vingtiesme juign mil centz quatre-vingt-dix-huict, davant monsieur le lieutenant de la court de Lameur (Lanmeur), noble homme Martin-Nouël Le Jeune, habittant et bourgeois de la ville de Morlaix, aaigé denviron vingt-six ans, thesmoin juré dire véritté, purgé de conseil sollicitation et advertissement enquis. Dépose quil y a aprésant environ sept ans quil alla demeurer au chasteau de Coatfrecq soubz le commandement du seigneur de Kerahel qui y commandoict lors et y demeura le déposant environ un an portant les armes durant lequel temps ledict seigneur de Kerahel ny avoict quenviron douze ou quinze soldartz que le sieur de Kergoumarch luy avoict laissé, comme il a entendu, lequel sieur de Kergoumarch sen estant retiré à Guingamp, pour y commander, fist à ce que le déposant a ouy dire, charroyer et transporter ses meubles dudict chasteau de Coatfrecq à Guingamp, et pendant son séjour en ladicte place de Coatfrecq est mémoratitf davoir veu quelques lettres missives escriptes de la part dudict sieur de Kergoumarch de Guingamp audict sieur de Kerahel, portant charge et commandement de luy faire randre à Guingamp les munitions de guerre et aultres meubles quil avoict délaissé à Coatfrecq et à ce faict de quitter et desmollir la place, laquelle nestoict garny que de quelques vielz charlitz et faillis meubles. Dict oultre quà loccasion du peu de commoditté des meubles quavoient les soldartz, le seigneur de Kerahel sy déplaisoict nayant les moyens pour soustenir les fraitz de ladicte garnison et quelque temps apprès vid le seigneur de Goazbriant frecquanter ladicte place lequel ne voullust y entrer quau préalable lon eust faict estat et invantaire des meubles y estant pour la confection duquel invantaire le déposant est certain et mémoratiff davoir veu monsieur le lieutenant du la court de Lannioun ariver en ladicte place assisté de monsieur de Coatbruc et le greffier dudict Lannioun et vid faire ledict invantaire audict chasteau et quelque temps apprès y vid arriver la dame de Kergoumarch et disoict on que le subiest de son voiaige estoict pour retirer le reste des meubles quelle y avoict laissé et deffaict se souvient le déposant que apprès que ladicte dame eust faict visitte par les chambres de ses bahutz elle fist apporter quelques meubles. Dict oultre ledict déposant, veu randre audict Coatfrecq nombre des meubles de touttes especzes, comme couettes, lingeries, bahutz coffres, lingeries, vaisselles destain et dargent et aultres ustancilles de mesnaiges requises en unne garnison que le sieur de Goazbriant y faisoict apporter des manoirs de Kergrech, la Noue-Verte et aultres endroict, et est tout ce quil a cognei et dépose sur les articles du seigneur de Goazbriant et estre venu dire son record de véritté à cause des monitioires quil entend avoir esté publiés. Ce touschant et a signé Martin Nouel. 

Hervé Lessec, laboureur de terre, demeurant en la paroisse de Ploubezr (aujourd'hui Ploubezre), aaigé de vingt-huict ans, thesmoign juré dire veritté, etc. Dépose avoir tant avant que durant les derniers troubles hanté au chasteau de Coatfrecq et estre mémoratiff que apprès la réduction de la ville de Guingamp en lobeissance du Roy, monsieur de Kergoumarch quitta la place de Coatfrecq pour aller commander à Guingamp et audict temps ladicte paroisse de Plouber fournict nombre de charettes audict sieur de Kergoumarch pour randre ses meubles dudict Coatfrecq firent transporter les meubles chaincun chez soy. Et quelque temps apprès ledict déposant Guillaume et Jan Le Meur fournirent unne charette attellée audict seigneur de Kergoumarch en laquelle ilz chargèrent unne botte de vin despaigne quil randirent dudict Coatfrecq à Guingamp au logeix dudict sieur de Kergoumarch et est son record et ne saict signer. 

Jan Le Meur, laboureur de terre, demeurant en la paroisse de Plouber (aujourd'hui Ploubezre), aaigé de soixante ans, thesmoin juré dire véritté. Dépose que apprès que le seigneur de Kergoumarch eust quicté la place de Coatfrecq pour aller demeurer à Guingamp lon fist de sa part randre des billettes aulx paroisses circonvoisines pour avoir des charettes pour transporter ses meubles et entre aultres la frairye de Keranglas où demeure ledict déposant fournist unne charrette attellée de quatre boeuffs et deux jumentz, laquelle fuct conduicte par Guillaume Meur, son frère et Hervé Leznec, lesquelz luy ont dict quelle fuct chargé dune hotte de vin despaigne qui fust par eulx randue dudict Coatfrecq audict seigneur de Kergoumarch à Guingamp et est son record et ne saict signer. 

Vincent Prigent, laboureur de terre, demeurant en la paroisse de Plouber (aujourd'hui Ploubezre), aaigé de cinquante ans, thesmoin juré dire véritté. Dépose que Françoys Le Bihan et luy fournirent unne charette attellée à monsieur de Kergoumarch en laquelle ilz chargèrent du chasteau de Coatfrecq un grand cofre, un pot de fer quilz randirent à Guingamp au logeix de monsieur de Kergoumarch et est certain que madame de Kergoumarch avoict de paravant par nombre de charettes de ladicte paroisse randu et transporté ses meubles dudict Coatfrecq à Guingamp et que tous les aultres gentilzhommes que les habitants de Lannion retirèrent aussy leurs meubles dudict Coatfrecq incontinant que ledict seigneur de Kergoumarch en sortict et est son record et ne saict signer. 

Yvon Legal, laboureur de terre, demeurant en la paroisse de Plouber (aujourd'hui Ploubezre), aaigé de quarante ans, thesmoin juré dire véritté. Dépose que il estoict demeurant en la mettairye de Coatfrecq lors que monsieur de Kergoumarch entra au chasteau de Coatfrecq, laquelle mettairye fuct par ledict sieur de Kergoumarch ruiné ensemble avecq le colombier de sorte que le déposant fuct contrainct daller demeurer à Kervisiou, lequel chasteau estoict lors en bonne réparation de couverture et y fist ledict sieur de Kergoumarch faire quelques fortiffications aux parapelz par marche faict avecq un nommé Lemeur, maçzon. Dict oultre que les paysantz voisins ont curé les douves à corvées et que lors que quelques charettes dudict Ploubezre transportèrent les meubles de madame de Kergoumarch à Guingamp, le déposant charroya une charrette de meubles dudict Coatfrecq audict Guingamp pour monsieur de Kerdalahez, où y avoict quelques coffres et aultres meuble et a ouy dire nottoirement que le reste des meubles que la dame de Kergoumarch laissa audict Coatfrecq consistant en quelques estainctz (étains), charlitz, lingeries fuct baillé par invantaire au sieur de Kerahel. Et est son record et ne saict signer. 

Maistre Yves Le Louic, nottaire des courtz de Bodister et Plougaznou, demeurant en la paroisse de Plouézoch, aaigé de trante-huict ans, thesmoin faict jurer par serment dire véritté, purge de conseill sollicittation et advertissement enquis. Dépose que environ deux jours apprés lentrée et introduction du sieur de Goazbriant au chasteau de Coatfrecq il eust de luy lettre par laquelle il commandoict à ce thesmoign, qui estoict lors en son lieu de la Noë-Verte, en ladicte paroisse, de faire la dilligence de luy randre audict chasteau touttes les vaisselles d'argent, coffres, lingeries et couettes quil y avoict ; ce que ledict thesmoin accorda et tira lors incontinant charger dans un batteau, à la coste dudict Plouézoch, lesdicts coffres plein de lingeries et de lestain et aussy lesdictes couettes et pour le regard desdictes vaisselles dargent, il luy randre audict Coatfrecq par terre, et y avoict des vaisselles dargent un grand poteau (pot à eau) dargent doré et une douzaines de couppes, un grand plat, quattre chandelliers et deux douzaines d'asiettes et deux douzaines et demey de cuillerés, aussy dargent, et pour le regard des meubles quil fict chargé audict batteau, iceulx furent deschargés au quay de Lannion, et de là pareillement randuz audict Coatfrecq, où fuct ce thesmoign lors audict chasteau, lequel nestoict garny que de quelque peu de faillys meubles pour ameubler. A laquelle place faillut audict seigneur de Goazbriant y faire randre, de ses aultres lieux, nombre daultres meubles. Et est tout ce quil dict savoir et dict signé, ainsy signé Y. Le Louic. 

Nobles hommes Guillaume de Laforest, sieur de Guicaznou, Hellès, Trofenteuniou, etc., demeurant en son manoir de Trofenteuiou, paroisse de Plouézoc'h, aaigé denviron vingt-trois ans, thesmoing faict jurer par serment dire véritté, purge de conseill sollicittation et advertissement enquis. 

Sur le premier, deuxiesme, troisiesme, quattriesme, cinquiesme, sixiesme, septiesme, huictiesme et neufiesme article des faicts dudict deffandeur, dict ne pouvoir rien savoir à sa savance, bien dépose sur le dixiesme desdicts articles qui, au commancement des troubles, mesme incontinant apprès la prinse de la ville de Lantreguier, le feu sieur de Hellès, son père et luy allèrent demeuré au chasteau de Coatfrecq, pour se conserver, auquel chasteau commandoict absolument le sieur de Kergoumarch, où ils résidèrent par l'espace de six moys, et pendant quil y fuct voyoict que ledict sieur de Kergoumarch n'avoict ni noccupoit pour sa commoditté que deux chambres, dans lune desquelles il se souvient quil vid deux litz, dont lez garnittures estoient de soye et broderie et que quelques coffres à bahutz, en laquelle chambre ledict sieur de Kergoumarch se couchoict, et en lautre chambre, y avoict quelques faillis litz et coffres de peu de valleur, et en la salle haulte dudict chasteau, y avoict deux grandz coffres de ciprès, qui estoient tous les meubles quil cognoisoict appartenir audict sieur de Kergoumarch. Et pour le regard des aultres chambres, savoir où logeoict les gentz dhonneur qui venoint hanter ladicte place, y avoict troix litz, avec les garnittures de sarge verte et les franges de laine, de peu de valleur, appartenant aussy audict sieur de Kergoumarch et pour le respect du surplus des chambres, elles estoient garnies et ameublées par les gentilzhommes quy y estoient reffugiés, comme entre aultres le sieur de Tréveznou, le sieur de Hellès, père dudict thesmoin, le sieur de Lesnoal, et aultres quil ne peult à présant nommer. 

Sur le traiziesme desdicts articles dict que au commancement des troubles ledict sieur de Kergoumarch pour se rédimer de sa prinson emprunta de largent, entre aultres de la dame de Guicaznou, tante dudict sieur de Kergoumarch, et dun marchand nominé Anner, ne saict toutefois combien. Et enquis sur le surplus de ses articles dict ne pouvoir rien déposer, par ce quil nestoict lors audict Coatfrecq. Et est son record quil affirme contenir véritté dict signer, ainsin signé : Guillaume de Laforest. 

Signé : Pierre BALAVENNE et Dominique PRIGENT, commys au Greffe. 

© Copyright - Tous droits réservés.